Leri yu pikin fu suku vrede

Nicole, wan meisje fu aiti yari ben breiti taki en osofamiri ben o froisi go na wan tra sei fu a kondre. Fu dati ede, a ben e fruteri en bun mati Gabrielle doronomo fa sani ben e waka. Wan dei, Gabrielle bari Nicole wantronso taki a no ben wani yere noti moro fu a tori dati. A sani disi hati Nicole èn a ben atibron srefisrefi. Dati meki a taigi en mama: „Mi no wani si Gabrielle noiti moro!”

TE PIKIN de na ini wan fruferi situwâsi leki a di fu Nicole nanga Gabrielle, dan nofo tron den abi yepi fu den papa nanga mama fanowdu. Boiti taki den musu trowstu a pikin, den musu meki a pikin kon sabi tu san na a yoisti fasi fu handri. A no de fu taki dati yongu pikin e tyari densrefi soleki fa ’pikin-nengre’ e tyari densrefi, èn nofo tron den no sabi taki den sani di den e taki èn e du kan hati den firi fu trawan (1 Korentesma 13:11). Den musu leri fu kon abi den fasi di kan yepi den fu libi bun nanga tra memre fu na osofamiri èn nanga tra sma.

Kresten papa nanga mama e du ala san den man fu leri den pikin fu den fu ’suku vrede èn fu du muiti sosrefi fu meki a vrede disi tan’ (1 Petrus 3:11). Wan sma di lobi suku vrede sa de koloku, èn dati sa meki taki a no sa denki takru fu trawan, a no sa atibron esi-esi, èn a no sa suku trobi. Fa yu leki papa noso mama kan leri yu pikin fu suku vrede?

Yepi den fu kisi na angri fu plisi „a Gado fu vrede”

Bijbel e kari Yehovah „a Gado fu vrede” èn a sma di „e gi vrede” (Filipisma 4:9; Romesma 15:33). Sobun, papa nanga mama di koni e gebroiki a Wortu fu Gado, Bijbel, na wan koni fasi fu meki den pikin fu den kisi na angri fu plisi Gado. Fu eksempre, yepi yu pikin fu poti prakseri na a sani di na apostel Yohanes ben si na ini wan kefalek moi fisyun. Yohanes ben si wan alenbo lontu a kownusturu fu Yehovah èn na alenbo disi ben gersi wan smaragd-ston (Openbaring 4:2, 3). * Fruteri yu pikin taki na alenbo disi e prenki a vrede fu Yehovah èn taki a sa gi a vrede dati na ala sma di e gi yesi na en.

Yehovah e gi wi rai tu nanga yepi fu en manpikin Yesus, di Bijbel e kari a „Granman fu vrede” (Yesaya 9:6, 7). Fu dati ede, leisi den Bijbel  tori gi den di e taki fu Yesus. Meki den kon si fu san ede Yesus ben e leri sma fu no feti èn fu no meki trobi, èn taki nanga den pikin fu den tori disi (Mateyus 26:51-56; Markus 9:33-35). Fruteri den fu Paulus, di fosi ben de wan man di „no ben abi syen”. Fruteri den fu san ede a kenki den fasi fu en èn fu san ede a skrifi bakaten taki „wan srafu fu Masra no abi fu meki trobi, ma a musu abi switifasi gi ala sma, . . . èn te ogri e miti en, dan a musu man hori ensrefi” (1 Timoteyus 1:13; 2 Timoteyus 2:24). Kande yu sa fruwondru fu si taki a pikin fu yu e agri nanga den sani di a e leri.

Evan e memre ete taki di a ben abi seibi yari, dan wan boi na ini a skorobus ben e dreigi en. A e taki: „Mi ben e atibron so te nanga a boi, taki mi ben wani kosi en baka! Dan mi memre wan sani di mi leri na oso, te a abi fu du nanga sma di lobi suku trobi. Mi ben sabi taki Yehovah wani taki mi no musu ’du ogri nanga wan sma di du ogri nanga mi’, èn taki mi musu ’libi na ini vrede nanga ala sma’” (Romesma 12:17, 18). A sani disi gi Evan a krakti nanga a deki-ati fu piki a boi na wan safri fasi, so taki a situwâsi no kon moro ogri. A ben wani plisi a Gado fu vrede.

Yu leki papa noso mama musu suku vrede

A de so taki vrede de na ini yu osofamiri? Efu dati de so, dan na eksempre fu yu sa de nofo kaba fu leri den pikin fu suku vrede. Te yu lobi suku vrede soleki fa Gado nanga Krestes lobi fu du dati, dan yu sa man leri den pikin fu yu fu du a srefi.—Romesma 2:21.

Russ nanga Cindy e du ala muiti fu kweki den tu boi fu den bun, èn den e leri den fu sori switifasi te trawan e fruferi den. Cindy e taki: „Na a fasi fa mi nanga Russ e handri nanga den boi èn nanga tra sma te problema e opo kon, na so den boi sa handri te den kisi problema nanga trawan.”

Ibri papa nanga mama e meki fowtu. Ma awinsi yu meki wan fowtu, toku yu kan gebroiki na okasi dati fu leri yu pikin bun sani. Stephen e agri: „Son leisi a ben e pasa taki mi nanga mi wefi, Terry, ben e atibron tumusi esi èn wi ben e gi den dri pikin fu wi trangaleri, fosi wi ben kon sabi soifri san ben pasa. Te dati ben pasa, dan wi ben e aksi den pardon.” Terry e taki: „Wi ben e taigi den pikin taki wi srefi no de volmaakti èn taki wi e meki fowtu tu. Wi feni taki a sani disi meki taki vrede de na ini na osofamiri fu wi èn a yepi den pikin tu fu kon sabi fa fu suku vrede.”

A fasi fa yu e handri nanga den pikin fu yu, e leri den fa fu libi na ini vrede nanga trawan? Yesus ben gi wi a rai disi: „Fu dati ede, ala sani di unu wani meki sma du gi unu, na dati un musu du gi den tu” (Mateyus 7:12). Awinsi yu e meki fowtu, toku yu kan abi a dyaranti taki a lobi di yu e sori gi den pikin fu yu, sa abi bun bakapisi. Te yu e gi den pikin fu yu rai na wan lobi-ati fasi, dan den sa de klariklari fu teki a rai dati.

No atibron esi-esi

Odo 19:11 e taki: „Te wan sma abi a koni fu man si sani krin, dan trutru dati sa meki taki a  no kisi atibron esi-esi.” Fa yu kan yepi yu pikin fu kon frustan a sani disi? David e fruteri san en nanga en wefi Mariann e du fu yepi a boi nanga a meisje fu den. A e taki: „Te den e atibron nanga wan sma di taki noso du wan sani di hati den, dan wi e yepi den fu sori sari-ati gi a sma dati. Wi e yepi den fu poti prakseri na wan tu sani. Wi e taigi den: ’Kande wan tu problema miti a sma a dei dati. Kande a e dyarusu. Noso kande wan sma du wan hati sani nanga en.’” Mariann e taki: „A sani disi e kowru na ati fu den pikin, na presi taki den e tan denki takru fu a sma noso e tan haritaki suma fowtu noso suma no fowtu.”

Te yu e gi yu pikin leri na a fasi disi, dan dati kan abi bun bakapisi trutru. Luku fa Nicole di kari na a bigin fu na artikel disi, kisi yepi fu en mama, Michelle. En mama no yepi en nomo fu kon bun baka nanga en mati Gabrielle, ma a yepi en na wan tra fasi tu. Michelle e taki: „Mi nanga Nicole leisi kapitel 14 fu a buku Teki leri fu a Bigi Leriman. * Baka dati, mi sori en san Yesus ben wani leri wi di a taki dati wi musu gi sma pardon ’te nanga seibitenti na seibi tron’. Mi arki bun di Nicole fruteri mi fa a ben e firi, èn baka dati mi yepi en fu kon frustan taki Gabrielle ben e sari, èn taki a ben bruya fu di en bun mati ben o froisi go na so wan farawe presi.”—Mateyus 18:21, 22.

Di Nicole kon frustan san ben kan meki taki Gabrielle bari en so, dan a kon abi sari-ati nanga en èn a bosroiti fu bel Gabrielle fu aksi en pardon. Michelle e taki: „Now Nicole de koloku fu di a e hori den firi fu trawan na prakseri, èn fu di a e du bun sani gi den so taki den kan firi moro bun.”—Filipisma 2:3, 4.

Yepi den pikin fu yu fu no kisi atibron te trawan e meki fowtu noso te den kon abi wan kesekese nanga trawan. Kande yu sa si fa den pikin fu yu e sori trutru switifasi nanga lobi gi trawan, èn disi sa gi yu prisiri.—Romesma 12:10; 1 Korentesma 12:25.

Sori den taki a de wan moi sani fu gi trawan pardon

Odo 19:11 e taki: ’A de wan moi sani te wan sma e gi wan trawan pardon gi den fowtu di a meki.’ Srefi na a moro muilek momenti fu en libi, Yesus gi trawan pardon neleki fa en Tata e du dati (Lukas 23:34). Te den pikin fu yu e firi fa a switi te yu e gi den pardon, dan dati sa yepi den fu kon frustan taki a de wan moi sani fu gi trawan pardon.

Luku na eksempre fu Willy di abi feifi yari. A boi disi lobi fu kloru prenki makandra nanga en granmama. Wan leisi en granmama tapu fu kloru wantronso, a bari Willy, èn a waka gowe. A sani dati hati Willy. Sam, a papa fu en, taki: „Willy en granmama abi a siki fu Alzheimer. Sobun, wi meki Willy kon frustan san dati ben wani taki.” Sam memre Willy taki ensrefi ben kisi pardon furu leisi, èn a taigi en tu taki a ben musu gi trawan pardon tu. Sam ben fruwondru fu si san Willy du baka dati. Sam e taki: „Mi nanga mi wefi no ben man bribi di wi si taki a pikin boi fu wi waka go na en granmama fu 80 yari, èn baka di a taki na wan switi fasi nanga en, a teki en anu èn a tyari en go baka na a tafra.”

A de wan moi sani trutru te pikin e leri fu „tan frudrage” den swakifasi nanga den  fowtu fu trawan èn te den e gi trawan pardon (Kolosesma 3:13). Srefi te sma e du espresi sani nanga den pikin fu yu, toku yu musu meki den pikin kon frustan taki den kan abi bun bakapisi te den e sori switifasi gi den sma dati. Den kan bribi disi fu di Bijbel e taki dati „te Yehovah feni den pasi fu wan sma bun, dan a e meki srefi den feanti fu a sma dati abi vrede nanga en”.—Odo 16:7.

Tan leri yu pikin fu lobi vrede

Te papa nanga mama e gebroiki Gado Wortu fu gi den pikin fu den leri na ten „te vrede de”, èn leki „sma di e meki vrede nanga trawan”, dan a no de fu taki dati den na wan trutru blesi gi den pikin fu den (Yakobus 3:18). Den papa nanga mama dati e leri den pikin fu den fa fu lusu problema èn fa fu libi na ini vrede nanga trawan. Na so den pikin disi sa de koloku trutru èn den sa de nanga prisiri den heri libi langa.

Dan nanga Kathy abi dri tini pikin di e dini Yehovah fayafaya. Dan e taki: „A no ben makriki fu kweki den di den ben pikin ete, ma wi breiti taki a e go bun nanga den pikin fu wi. Now den man feni en nanga trawan, èn te kesekese de, dan den de klariklari fu gi trawan pardon.” Kathy e taki: „A sani disi e gi wi deki-ati trutru fu di vrede na wán fu den froktu fu a yeye fu Gado.”—Galasiasma 5:22, 23.

Fu dati ede, Kresten papa nanga mama, no „tapu fu du san bun” èn no „kon weri” te unu e leri den pikin fu unu fu libi na ini vrede nanga trawan. Tan horidoro awinsi a gersi leki den pikin no e go na fesi na ini a bigin. Te unu e du dati, dan unu kan abi a dyaranti taki „a Gado fu lobi èn fu vrede sa de nanga unu”.—Galasiasma 6:9; 2 Korentesma 13:11.

[Futuwortu]

[Faki na tapu bladzijde 20]

SAN DEN PIKIN FU YU E LERI?

Na organisâsi di nen Media Awareness Network, tyari wan raportu kon na doro di nen „Violence in Media Entertainment” (Den ogridu na ini felem). Na organisâsi disi e poti prakseri na den sani di de fu si tapu telefisi èn na ini felem. A raportu disi e taki: „Den sani di de fu si tapu telefisi e sori doronomo fa takru sma nanga deki-ati man e du ogri, èn na so den e leri sma taki a bun fu lusu problema nanga yepi fu feti.” Sowan 10 procent nomo fu den programa, den felem, nanga den video clip tapu telefisi, e poti prakseri na den takru bakapisi fu ogridu. A raportu e taki moro fara: „Den tra programa nanga felem ben e sori nomo taki ogridu bun, èn taki sma kon gwenti en, iya, a de a moro bun fasi fu lusu wan problema.”

Yu feni taki den felem di yu nanga yu osofamiri e luku tapu telefisi na bun felem? No meki den felem di de fu si tapu telefisi tapu yu fu leri yu pikin fu de sma di lobi vrede.

[Prenki na tapu bladzijde 17]

Leri den pikin fu yu fu kisi na angri fu plisi „a Gado fu vrede”

[Prenki na tapu bladzijde 18]

Du muiti fu leri yu pikin fu no taki noso du sani di e hati den firi fu trawan

[Prenki na tapu bladzijde 19]

Den pikin fu yu musu leri fu aksi pardon èn fu gi trawan pardon tu