Ondrofenitori

Mi e hari go na wan nyun grontapu

Soleki fa Jack Pramberg fruteri

Krosibei fu Arboga, wan moi pikin foto di de na a mindrisei pisi fu Sweden, Yehovah Kotoigi abi wan bijkantoro. Moro leki 80 sma e wroko na a bijkantoro disi. Na drape mi nanga mi wefi Karin e libi èn e wroko. Fa wi du doro drape?

NA A kaba fu a di fu 19 yarihondro, wan meisje fu 15 yari di ben e libi na ini Sweden, froisi go na Amerkankondre. Di a ben de na wan presi na ini New York City, pe sma di ben komoto fu tra kondre ben e kisi nyanyan nanga wan tanpresi, dan a miti wan botoman di ben komoto fu Sweden. Den bigin hori nanga makandra, den trow, èn baka dati den kisi wan boi. A boi dati na mi. Mi gebore na ini 1916, na ini a kontren fu Bronx, na ini New York, na Amerkankondre. Dati ben de na a ten fu a Fosi Grontapufeti.

Syatu baka dati wi froisi go na Brooklyn, di de krosibei fu Brooklyn Heights. Bakaten, mi papa fruteri mi taki mi nanga en ben tyari wan pikin boto go seiri, krosibei fu a broki di nen Brooklyn Bridge. Yu ben kan si a broki disi makriki te yu ben de na a edekantoro fu Yehovah Kotoigi. Mi no ben sabi srefisrefi taki a wroko di sma ben e du drape ben o kenki mi libi.

Na ini 1918, a Fosi Grontapufeti kon na wan kaba, èn fu wan pisi ten, sma na ini Europa tapu fu kiri ipi-ipi  trawan fu soso. Den srudati di ben drai go baka na den kondre, kon miti nanga tra problema. Wroko no ben de èn sma ben e pina. Mi papa ben feni taki a ben o moro bun fu drai go baka na Sweden, èn na dati wi du na ini 1923. Wi go libi na ini Erikstad, wan pikin dorpu di ben de krosibei fu wan loko station. A dorpu disi ben de na ini a birti fu Dalsland. Drape mi papa bigin nanga wan bisnis fu meki masyin. Na drape mi gro kon bigi èn na drape mi go na skoro.

Mi kon lobi den sani di mi ben e leri

A bisnis fu mi papa no ben e drai. Sobun, na ini den yari syatu baka 1930 a go wroko baka na se. A libi mi nanga mi mama wawan na oso. Mi mama ben abi furu broko-ede, èn mi ben musu drai a bisnis. Wan dei, mi mama go luku en swagri, namku mi omu Johan. Fu di mi mama ben e broko en ede nanga den sani di ben e pasa na grontapu, meki a aksi mi omu: „Johan, na so a situwâsi o tan?”

Mi omu piki en: „Nôno Ruth.” A fruteri en fu a pramisi di Gado gi taki a o tyari wan kaba kon na ogridu èn taki a o tyari wan regtfardiki tiri kon na grontapu. A o du dati nanga yepi fu wan Kownukondre pe Yesus Krestes o tiri leki Kownu (Yesaya 9:6, 7; Danièl 2:44). Mi omu fruteri mi mama tu taki a Kownukondre na a regtfardiki tiri di o kenki grontapu kon tron wan paradijs, èn Yesus ben leri wi fu begi fu a Kownukondre disi.—Mateyus 6:9, 10; Openbaring 21:3, 4.

Den pramisi disi di skrifi na ini Bijbel, naki na ati fu mi mama wantewante. A heri pasi go na oso, a taki Gado tangi. Ma mi nanga mi papa no ben feni en bun taki mi mama ben e bigin poti prakseri na kerkitori. Pikinmoro na a srefi ten disi, namku na ini den yari syatu baka 1930, mi froisi go na a foto Trollhättan di de na a westsei pisi fu Sweden. Drape mi feni wan wroko na wan bigi bisnis. Syatu baka dati, mi mama nanga mi papa, di ben drai kon baka fu se no so langa pasa, kon tan na ini a foto disi tu. Sobun, na osofamiri fu wi ben de makandra baka.

Fu di mi mama ben wani leri sabi Gado moro bun, meki a du muiti fu miti nanga Yehovah Kotoigi na ini a birti drape. Na a ten dati, den Kotoigi ben e hori konmakandra na ini sma oso, neleki fa den fosi Kresten ben e du dati (Fileimon 1, 2). Ne, mi mama kisi na okasi fu hori a konmakandra na ini wi oso. A ben e frede pikinso di a aksi mi papa efu a ben kan kari den mati fu en kon na wi oso. Mi papa piki en: „Yu mati na mi mati.”

Na so sma bigin kon na wi oso. Te sma ben e kon, dan mi ben e gowe. Ma baka wan pisi ten, mi no ben e gowe moro te sma ben e kon na den konmakandra. A switifasi fu den Kotoigi, èn a makriki fasi fa den ben e fruklari sani, meki taki mi kisi wan tra denki fu den. Mi bigin lobi den sani di mi ben e leri, fu di den ben e gi mi wan howpu gi a ten di e kon.

Mi e go na se

Te fu kaba, mi srefi go na se, èn a ben musu fu de so taki mi abi a sani dati fu mi papa. Mi ben e kon si moro nanga moro tu taki mi ben musu kon leri sabi Gado moro bun. Te a boto fu wi ben doro wan lanpe, dan ala ten mi ben e du muiti fu miti nanga Yehovah Kotoigi. Na ini Amsterdam, na Bakrakondre, mi go na wan postkantoro fu aksi den sma drape pe mi ben kan feni den Kotoigi. Baka di den luku efu den ben kan yepi mi, dan den gi mi wan adres, èn mi go drape wantewante. Di mi doro drape, dan wan meisje fu tin yari gi mi wan switikon. Aladi mi no ben sabi den sma disi bun, toku mi ben e firi wantewante leki wi na mati. A sani disi, ben de wan buweisi fu a wánfasi di de na mindri Kresten brada nanga sisa na heri grontapu!

 Te fu kaba den sma disi tyari wan kalender kon, nanga wan karta di ben e sori na sortu ten den loko ben e waka. Ne den bigin sori mi na tapu papira pe mi ben musu go. Aladi wi no ben e taki a srefi tongo, toku mi kon frustan taki wan bigi konmakandra ben o hori na ini a foto Haarlem di ben de krosibei fu drape. Mi go na a konmakandra dati, èn aladi mi no ben man frustan noti, toku mi ben breiti taki mi ben de drape. Di mi si taki den Kotoigi ben e prati papira fu kari sma kon na a publikitaki di ben o hori a sonde dati, dan mi ben wani yepi tu fu prati den papira disi. Sobun, mi teki den papira di den sma ben trowe, èn mi prati den baka.

Wan leisi, a boto fu wi doro na wan lanpe na ini Buenos Aires, na Argentinia. Drape mi go na a bijkantoro fu Yehovah Kotoigi. Na inisei yu ben abi wan kantoro nanga wan maksin. Wan uma ben e sidon na wan tafra e meki wan krosi, èn wan pikin meisje ben e prei nanga wan popki. A kan taki a meisje disi ben de en umapikin. A ben de lati neti, èn wan man ben e teki wan tu buku fu wan planga na ini wan bukukasi. Wan fu den buku dati ben de a Schepping-buku na ini Sweidsitongo. Di mi si fa den sma disi ben breiti fu si mi, dan mi ben sabi taki mi ben wani tron wan memre fu na organisâsi fu den.

Di wi ben e drai go baka na oso, dan wi teki wan tu man nanga wi na ini wi boto. Den man disi ben frei wan opolani fu a legre fu Kanada, ma na opolani ben fadon krosibei fu a syoro fu Newfoundland. Wan tu dei baka dati, a boto fu wi ben de krosibei fu Skotland, di wan srudatiboto fu Ingrisikondre hori a boto fu wi. Den tyari wi go na Kirkwall na tapu den Orkney-èilanti, fu ondrosuku a boto fu wi. A di fu Tu Grontapufeti ben bigin, èn a legre fu Hitler ben teki Polen abra na ini september fu a yari 1939. Baka wan tu dei, den gi wi primisi fu gowe, èn wi doro baka na Sweden sondro problema.

Di mi doro baka na oso, dan mi ben abi moro ten fu kon leri sabi Gado moro bun. Now mi trutru ben wani tron wan anbegiman fu Gado, èn mi ben wani kon makandra doronomo nanga den (Hebrewsma 10:24, 25). A e gi mi prisiri te mi e prakseri taki di mi ben de na se, mi ben gwenti fu taki nanga den tra botoman fu den sani di mi ben leri fu Gado. Èn mi sabi taki wan fu den botoman dati tron wan Kotoigi tu.

Wan aparti sortu diniwroko

Na a bigin fu 1940, mi go na a bijkantoro fu Yehovah Kotoigi na ini Stockholm. Johan H. Eneroth di ben e tiri a preikiwroko na ini Sweden na a ten dati, gi mi wan switikon. Di mi fruteri en taki mi ben wani go na ini a furuten diniwroko, dan a luku mi wan pisi ten èn a aksi mi: „Yu e bribi taki disi na Gado en organisâsi?”

Mi piki en: „Iya”. Na so a du kon taki mi teki dopu tapu 22 yuni 1940, èn mi bigin wroko na a bijkantoro. Mi ben e prisiri fu wroko na a moi presi drape, makandra nanga brada nanga sisa di ben de wan bun eksempre gi mi. Ala satra nanga sonde, wi ben e go na ini a preikiwroko. Na ini a waran pisi ten fu a yari, wi ben e rèi baisigri go na farawe kontren, èn ala den tu dei dati wi ben e du a preikiwroko èn wi ben e sribi tapu bondru drei grasi.

Ma moro furu, wi ben e preiki oso fu oso na ini Stockholm èn na ini den kontren lontu a foto disi. Wan leisi mi si fa wan man na ini wan ondrogron kamra ben e feti fu tapu wan olo na a sani di ben e meki fayawatra. Sobun, mi lolo den mow fu mi empi èn mi go yepi a man. Di wi kaba tapu na olo, dan a man ben breiti èn a taki: „A musu fu de so taki yu kon dyaso gi wan tra sani. Meki wi go wasi wi anu na sodro, dan wi o dringi pikinso kofi.” Wi du dati èn aladi wi ben e dringi kofi, mi fruteri a man disi fu a bribi fu mi. A tron wan Kotoigi te fu kaba.

Aladi Sweden ben taki dati den no ben o teki prati na a orloku, toku den sma fu a kondre ondrofeni den bakapisi fu a feti. Moro nanga moro mansma ben e kisi kari fu go na ini a legre, èn mi kisi wan kari tu. Te mi ben e weigri fu gi yesi na den komando fu den srudati, dan den ben e meki mi koti strafu fu wan syatu pisi ten. Bakaten, den seni mi go na wan strafuman kampu. Nofo tron, yongu Kotoigi ben musu go na fesi krutu, èn na so den ben e kisi na okasi fu gi kotoigi fu Gado en Kownukondre. Disi ben de wan kontru fu a sani di Yesus ben taki, namku: „Den o srepi unu go na fesi granman nanga kownu, so taki unu kan de wan kotoigi gi den èn gi den trakondre sma.”—Mateyus 10:18.

Mi libi e kenki

Na ini 1945, wan kaba kon na a feti na ini Europa. Moro lati na ini a yari dati, Nathan H. Knorr di  ben e teki fesi na ini a wroko di e du na heri grontapu, komoto fu Brooklyn fu kon luku wi. A ben kon makandra nanga en sekretarsi Milton Henschel. A sani disi ben tyari wan bigi kenki kon na ini a fasi fa a preikiwroko ben orga na ini Sweden, èn a tyari wan bigi kenki kon tu na ini mi libi. Di mi yere taki brada nanga sisa ben kan go na a Waktitoren Bijbelskoro Gilead, dan wantewante mi poti mi nen.

A yari baka dati mi ben e sidon na ini wan klas na a skoro disi di ben de krosibei fu South Lansing, na New York na a ten dati. Na ini den feifi mun di mi ben de na a skoro, mi kisi leri di meki taki mi kisi moro warderi gi Bijbel èn gi na organisâsi fu Gado. Mi kon si taki den wan di e teki fesi na ini a preikiwroko di e du na heri grontapu, na sma di abi switifasi èn di e broko den ede nanga trawan. Den e wroko tranga makandra nanga wi (Mateyus 24:14). Aladi mi ben sabi dati kaba, toku mi ben breiti taki mi si nanga mi eigi ai taki dati ben de so.

Fosi yu denki, den studenti klari a di fu aiti klas fu a Gileadskoro tapu 9 februari 1947. Brada Knorr meki bekènti na sortu kondre den studenti ben o go. Di a ben musu taki fu mi, dan a taki: „Brada Pramberg e go baka na Sweden fu go dini den brada nanga sisa fu en drape.” Fu taki en leti, mi no ben wani go baka na mi kondre.

Mi musu du wan hebi wroko

Di mi drai go baka na Sweden, dan mi kon yere taki wan nyun wroko ben o du na ini difrenti kondre na heri grontapu. Dati ben de a distriktwroko. Mi kisi a grani fu dini leki a fosi distrikt-opziener na ini Sweden, èn mi ben musu luku a wroko na ini a heri kondre. Mi ben e orga bigi konmakandra di wi sabi now leki kring konmakandra, èn mi ben e sorgu tu taki ala sani ben e waka bun na den konmakandra dati. Den konmakandra disi ben e hori na ini difrenti foto na ini Sweden. Fu di a seti disi ben de wan nyunwan, meki den brada no ben taigi mi finifini san fu du. Mi nanga Brada Eneroth wroko makandra fu sreka a programa so bun leki wi ben man. Fu di mi ben e broko mi ede nanga a wroko disi, meki mi begi Yehovah bun furu leisi fu yepi mi. Mi ben abi a grani 15 yari langa fu dini leki distrikt-opziener.

Na a ten dati, a no ben makriki fu feni bun presi pe wi ben kan hori konmakandra. Wi ben abi fu hori den konmakandra disi na presi pe sma ben e hori dansi nanga den sortu sani dati. Nofo tron den presi disi ben kowru tumusi èn den no ben bun nofo. A sani di pasa na wan bigi konmakandra di ben hori na ini Rökiö, na Fensikondre, e sori krin fa a situwâsi ben de. Wi ben e hori a konmakandra na wan presi pe sma fu a kontren drape ben e kon makandra fu teki leri èn fu du tra sani. Wan heri pisi ten den no ben e gebroiki a presi dati moro. Hebi snew ben e fadon, èn a ben kowru srefisrefi. Sobun, wi meki wan faya na ini tu bigi oli bari. Ma wi no ben sabi srefisrefi taki pikin fowru ben meki nesi na ini a peipi na tapu a daki pe a smoko ben musu komoto na ini. A heri presi ben lai nanga smoko! Ma aladi den brada nanga sisa ben weri dyakti èn aladi den ai ben e bron den, toku nowan fu den gowe libi a konmakandra. Noiti wi frigiti a konmakandra dati.

Wan fu den sani di ben musu pasa na den dri-dei kring konmakandra disi, na taki den sma di ben kon na a konmakandra disi ben musu kisi nyanyan. Na ini a bigin, wi no ben abi den sani di ben de fanowdu fu du a wroko disi èn wi no ben sabi tu fa fu du a wroko. Ma wi ben abi lobi-ati brada nanga sisa di ben de klariklari fu teki a  frantwortu disi na den tapu. Wan dei fosi a konmakandra, yu ben kan si fa den ben e sidon na fesi wan bigi beki e piri patata, aladi den ben e fruteri ondrofenitori èn den ben abi prisiri. Na so den brada nanga sisa disi di ben e wroko tranga, meki bun mati fu ala ten.

Wan tra wroko di wi ben e du na a ten dati, na taki wi ben e waka nanga bigi bord na strati fu meki bekènti taki den bigi konmakandra disi ben o hori. Wi ben e waka ini grupu pasa na ini wan foto noso dorpu, fu gi den sma di ben e tan drape wan kari fu kon arki a publikitaki. Nofo tron, den sma ben e sori switifasi èn den ben abi lespeki. Wan leisi di wi ben e waka pasa na ini a foto Finspång, dan wan bigi grupu wrokoman ben e komoto na ini wan fabriki. Wantronso, wan fu den wrokoman disi bari taki: „Luku, disi na den sma di Hitler no man puru na pasi”!

Wan prenspari sani pasa na ini mi libi

Syatu baka di mi miti nanga Karin, wan yongu uma di ben abi switifasi, dan a libi fu mi leki distrikt-opziener kenki. Wi ala tu ben kisi wan kari fu go na a internationaal kongres di ben o hori na ini yuli 1953, na a Yankee Stadion na ini New York City. Tapu munde 20 yuli, Milton Henschel trow mi nanga Karin na ini wan fu den pauze fu a kongres disi. A sani disi ben de wan aparti sani di pasa na ini a prenspari stadion disi pe sma ben gwenti hori wan sport di den e kari baseball. Baka di mi nanga Karin du a distriktwroko makandra teleki 1962, dan wi kisi a kari fu go dini na Bethel na ini Sweden. Na a bigin, mi ben e wroko na a afdeling pe den e seni tijdschrift gi den gemeente. Èn fu di mi ben kisi leri fu meki masyin nanga tra sani, dan mi kisi a frantwortu fu luku den drukpers nanga den tra masyin na a bijkantoro. Karin wroko wan tu yari langa na ini a presi pe den e wasi krosi. Now a e dini furu yari langa kaba na a Vertaalafdeling.

Na ini den moro leki 54 yari di wi du diniwroko leki trowpaar gi Yehovah, furu prenspari sani pasa na ini wi libi, èn wi de koloku trutru! A no de fu taki dati Yehovah blesi na organisâsi fu en di lai nanga lobi-ati futuboi di e wroko tranga. Na ini 1940, di mi bigin wroko na a bijkantoro, dan 1500 Kotoigi nomo ben de na ini Sweden. Ma now, moro leki 22.000 Kotoigi de na ini a kondre dati. A nomru fu Kotoigi gro moro esi drape leki na ini tra kondre, èn a sani dati meki taki now moro leki siksi nanga afu milyun Kotoigi de na heri grontapu.

A yeye fu Yehovah e horibaka gi a wroko fu wi, èn na wan agersi fasi a e bro winti na ini den seiri fu wi doronomo. Wi e tan du san de fanowdu fu abi wan tranga bribi, èn aladi wi e si fa libisma de leki wan krasi se, toku wi no e frede. Wi e tan hari go na fesi, èn wi e si a nyun grontapu fu Gado krinkrin. Mi nanga Karin e taki Gado tangi gi ala den bun sani di a du gi wi, èn wi e begi en ibri dei fu gi wi a krakti fu tan getrow na en so taki wi kan doro a marki fu wi te fu kaba. Iya, wi wani taki Gado feni wi bun èn taki a gi wi têgo libi!—Mateyus 24:13.

[Prenki na tapu bladzijde 12]

Mi e sidon na tapu mi mama en bowtu

[Prenki na tapu bladzijde 13]

Mi nanga mi papa e seiri wan pikin boto na a pisi ten syatu baka 1920

[Prenki na tapu bladzijde 15]

Mi nanga Herman Henschel (a papa fu Milton) na Gilead, na ini 1946

[Prenki na tapu bladzijde 16]

Wi trow na ini Yankee Stadion, tapu 20 yuli 1953