Oiti wánfasi sa de na heri grontapu?

SAN o pasa nanga a grontapu disi? A de so taki vrede sa de, noso taki rampu o miti grontapu? Soleki fa a sori, dan ala tu sani kan pasa.

Na a wan sei, sonwan fu den tiriman fu grontapu e taki nanga overtoigi taki den man tyari vrede kon na heri grontapu. Kande den e taki dati, fu di den e si taki a situwâsi na grontapu o kon moro ogri efu vrede no e kon. Na a tra sei, furu fu den tiriman e broko den ede nanga aksi soleki: Sortu kondre abi ogri-ati fetisani di man kiri ipi-ipi sma? Den o prefuru gebroiki den fetisani dati? San o pasa efu den du dati?

Na ini a ten di pasa, a kon na krin taki den moro prenspari reide fu san ede wánfasi no de na grontapu, na fu di libisma e strei nanga makandra èn fu di den e denki takru fu trawan. Dati de so langa ten kaba. Boiti dati, kerki no yepi sma fu libi na ini vrede, ma na presi fu dati den tyari moro pratifasi kon. Nyunsuman James A. Haught, e skrifi: „Iniwan sani di e tyari pratifasi kon, kan meki taki sma e tron feanti fu makandra, èn kerki na wan fu den moro prenspari sani di e tyari pratifasi kon. Aladi furu sma e denki taki kerki e yepi sma fu tron bun sma, toku a de krin fu si taki kerki e meki son sma du tumusi ogri-ati sani.” Skrifiman Steven Weinberg abi wan srefi sortu denki. A e skrifi: „Na soso a pratifasi di kerki e tyari kon, kan meki taki sma di ben gwenti du bun, e tron sma di e du ogri-ati sani.”

Wi kan bribi taki oiti wánfasi sa de na heri grontapu? Iya, wi kan bribi dati! Ma soleki fa wi sa si, dan a no libisma, noso den kerki fu den sa tyari a wánfasi dati kon.

[Prenspari pisi na tapu bladzijde 3]

Grontapu de leki wan bom di o sutu?