Sma na heri grontapu e kon de na ini wánfasi—Fa dati e pasa?

SAN „wánfasi” wani taki gi yu? Gi son sma, a wortu disi wani taki nomo dati feti nanga strei no de. Fu eksempre, efu tu noso moro kondre meki wan kruderi taki den o libi na ini vrede nanga makandra, dan sma ben kan taki dati wánfasi de na mindri den kondre disi. Ma dati de so trutru? A no abi fu de so.

Luku a tori disi: Na ini a ten di pasa, difrenti kondre meki dusundusun kruderi nanga tra kondre taki den ben o libi na ini vrede nanga makandra, ma den no hori densrefi na den kruderi disi. Fu san ede dati pasa? Nofo tron, dati e kon fu di den tiriman fu grontapu feni en moro prenspari fu kisi moro makti, leki fu libi na ini wánfasi nanga tra kondre. Dan yu abi son kondre tu di e broko den ede nanga san kan pasa te a legre fu tra kondre e kon makti moro a di fu den.

Sobun, te tu kondre no e feti nanga makandra, dan dati no wani taki dati den abi vrede nanga makandra. A de a srefi leki te tu man e hori gon gi makandra. Wi kan taki dati den man disi abi vrede nanga makandra, soso fu di den no sutu tapu makandra? A ben o de wan don sani fu denki dati! Ma na dati e pasa nanga furu kondre now. Fu di moro nanga moro kondre no e frutrow makandra, meki den e frede taki wan dei wan tra kondre sa gebroiki den ogri-ati fetisani fu den fu feti nanga den. San den tiriman du fu sorgu taki a sani disi no e pasa?

Den ogri-ati fetisani e tapu pasi gi wánfasi

Furu sma e poti den howpu tapu a kruderi di nen Non-Proliferatieverdrag (NPV). A kruderi disi di meki na ini 1968, e taki dati den kondre di no abi ogri-ati fetisani no mag meki den fetisani disi, èn den kondre di abi den kaba, no mag meki tumusi furu fu den. A marki fu a NPV kruderi disi di moro leki 180 kondre meki, na fu sorgu taki te fu kaba nowan kondre abi den fetisani disi moro.

Aladi a marki dati na wan bun marki, toku son sma feni taki a NPV kruderi meki soso fu sorgu taki den kondre di no abi ogri-ati fetisani no e meki den sani disi. Fu taki en leti a kruderi disi wani tapu pasi gi den kondre disi fu no meki den fetisani disi. Dati meki den tiriman e frede taki sonwan fu den kondre di meki a kruderi disi sa kenki den prakseri. Iya, son kondre no feni en bun srefisrefi taki den no mag meki ogri-ati fetisani fu kibri densrefi.

Wan sani di e meki a tori moro muilek  srefi, na taki ala kondre mag meki kernenergie, èn disi kan tyari moro bigi problema kon srefi. A sani disi meki taki son tiriman e frede taki den kondre di e taki dati den e gebroiki kernenergie fu du bun sani, e meki ogri-ati fetisani kibrikibri.

Srefi kondre di abi ogri-ati fetisani kaba, kan bosroiti fu no hori densrefi moro na a NPV kruderi. Sma e taki dati a ben o de wan don sani fu denki taki den kondre di abi den fetisani disi o pori den, noso taki den no o meki moro fu den. Soleki fa wan buku e taki, dan „fu man kisi den kondre so fara fu du wan sani nanga den fetisani fu den, dan den kondre di de feanti fu makandra, sa musu meki vrede èn den sa musu frutrow makandra dorodoro. Ma te wi e luku fa sani de now, dan a muilek fu bribi taki a sani disi o pasa oiti”.

Na opregti muiti di libisma du fu tyari wánfasi kon, ben de fu soso. A sani disi no e fruwondru sma di e studeri Bijbel, fu di Gado Wortu e taki: „A no de na wan libisma di e waka srefi fu taki pe a wani poti en futu” (Yeremia 10:23). Bijbel e taki krin tu: „Wan pasi de di de reti na ini na ai fu wan man, ma den pasi fu dede na a kaba fu en te fu kaba” (Odo 16:25). Fu taki en leti, libisma tirimakti no man tyari wánfasi kon. Ma toku howpu de.

A Sma di e tyari trutru wánfasi kon

Bijbel e taki fu a pramisi di Gado gi taki grontapu sa kon de na ini wánfasi, ma a no libisma o tyari a wánfasi dati kon. A Mekiman, di wani taki vrede musu de na heri grontapu, sa du wan sani di libisma no man du. Ma son sma feni taki a sani dati no kan. Toku, a de so taki sensi a bigin, Gado ben wani taki vrede nanga wánfasi ben musu de na heri grontapu. * Furu bijbeltekst e sori taki Gado abi na prakseri ete fu tyari wánfasi kon na mindri ala libisma. Luku wan tu fu den tekst disi:

• „Unu kon, luku den wroko fu Yehovah, fa a poti fruwondru sani di pasa, na grontapu. A e meki feti kon na wan kaba te na a moro farawe presi fu grontapu. A e broko a bo èn a e koti a lansri trutru na pisipisi; a e bron den wagi na ini faya.”—PSALM 46:8, 9.

• „Sma no sa du nowan enkri ogri èn den no sa pori nowan enkri sani na tapu heri mi santa bergi; bika grontapu sa kon furu trutru nanga a sabi fu Yehovah, soleki fa watra e tapu se.”—YESAYA 11:9.

• „A sa swari dede trutru fu têgo, èn a Moro Hei Masra Yehovah trutru sa figi den watra-ai puru fu ala den fesi. Èn a syen di en pipel e kisi, a sa puru en na heri grontapu, bika Yehovah srefi taki en.”—YESAYA 25:8.

• „Ma wi e fruwakti nyun hemel nanga wan nyun grontapu, soleki fa a ben pramisi, èn drape regtfardikifasi o tan.”—2 PETRUS 3:13.

• „[Gado] o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.”—OPENBARING 21:4.

 Wi kan bribi den pramisi disi. Fu san ede? Fu di leki a Mekiman, Yehovah Gado abi a krakti èn a makti fu tyari wánfasi kon na mindri libisma (Lukas 18:27). A e angri tu fu du dati. Fu taki en leti, Bijbel e taki dati Gado ’feni en bun fu tyari ala sani kon makandra baka na ondro Krestes, namku den sani na ini hemel nanga den sani di de na grontapu’.—Efeisesma 1:8-10.

A pramisi di Gado gi wi taki „wan nyun grontapu” sa kon pe „regtfardikifasi o tan” no de wan winsi nomo (2 Petrus 3:13). Yehovah Gado e taki fu den pramisi fu en: „A no sa drai kon baka na mi sondro fu du wan sani, ma seiker a sa du a sani di mi wani, èn trutru a sa du a sani di mi seni en fu go du.”—Yesaya 55:11.

A Wortu fu Gado e tyari wánfasi kon

Soleki fa wi si na ini a fosi artikel, dan den kerki nofo tron tyari pratifasi kon na mindri libisma, na presi taki den tyari wánfasi kon. Wi musu denki bun fu a sani disi, bika efu wi e bribi taki wan Mekiman de, dan wi musu fruwakti tu taki den anbegiman fu en e libi na ini vrede nanga makandra, a no so? Iya, na so a de!

A pratifasi di den kerki e tyari kon, no e gi grani na Yehovah Gado, èn a no e kruderi tu nanga a Wortu fu en. Na presi fu dati, a sani disi e krutu den kerki di e kori sma taki wánfasi sa kon na grontapu, na presi taki den e leri sma san Gado o du. Yesus ben taki dati den kerki fesiman fu a ten fu en ben de „hoigriman” èn a ben taigi den: „A profeiti Yesaya ben abi leti di a ben taki fu unu: ’A pipel disi e gi mi grani nanga den mofo, ma den ati no de nanga mi kwetikweti. Na fu soso den e tan anbegi mi, bika na den komando fu libisma den e leri trawan.’”—Mateyus 15:7-9.

Tra fasi leki den kerki dati, a tru anbegi e tyari wánfasi kon na mindri sma. A profeiti Yesaya ben taki: „A musu pasa na ini a kabapisi fu den dei taki a bergi fu na oso fu Yehovah sa poti kon steifi moro hei leki na ede fu den bergi, èn fu tru den sa opo en kon moro hei leki den pikin bergi; èn na en ala den nâsi musu go. Èn fu tru, a sa hori krutu na mindri den nâsi èn a sa poti afersi kon reti ini a tori fu furu pipel. Èn den sa musu naki den feti-owru fu den kon tron plugu èn den lansri fu den kon tron grasi-nefi. Nâsi no sa opo feti-owru fu feti nanga nâsi, sosrefi den no sa leri orloku moro.”—Yesaya 2:2, 4.

Na ini a ten disi, Yehovah Kotoigi na ini moro leki 230 kondre, e fiti den rai fu Yehovah Gado di e yepi den fu libi na ini wánfasi nanga makandra. Fa a du kon taki den sma disi e libi na ini wánfasi nanga makandra? Na apostel Paulus ben skrifi: „Un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán” (Kolosesma 3:14). A Griki wortu di Paulus gebroiki gi „banti” kan abi fu du nanga den titei na ini wi skin. Den titei disi tranga srefisrefi, èn den e du tu tumusi prenspari sani. Den e hori den pisi fu wi skin èn sosrefi den bonyo fu wi na wán.

Na so a de tu nanga lobi. Lobi no e tapu sma nomo fu no kiri makandra. A lobi di Kresten abi e meki taki sma fu difrenti kulturu e libi nanga makandra na ini vrede. Fu eksempre, lobi e meki taki sma e hori densrefi na wan fu den moro prenspari gronprakseri na ini Bijbel. Soleki fa Mateyus 7:12 e sori, dan Yesus Krestes ben taki: „Fu dati ede, ala sani di unu wani meki sma du gi unu, na dati un musu du gi den tu.” Fu di furu sma e hori densrefi na a gronprakseri disi, meki den no e denki takru moro fu trawan.

’Un musu lobi makandra’

Yehovah Kotoigi abi a fasti bosroiti fu sori taki den na disipel fu Krestes, èn fu dati ede den e du san Yesus ben taki: „Na a fasi disi ala sma o sabi taki unu na mi disipel, te unu lobi makandra” (Yohanes 13:35). Den sori a lobi disi na wan tumusi moi fasi na ini pisi ten di sma fu difrenti lo ben e feti nanga makandra, èn di dyugudyugu ben de na ini a kondre. Fu eksempre, na ini 1994, di sma ben e kiri ipi-ipi  trawan na ini Rwanda, dan Yehovah Kotoigi sori lobi gi makandra. Kotoigi fu a Hutu lo kibri den Tutsi brada nanga sisa fu den, aladi den ben kan lasi den eigi libi!

A no de fu taki dati wi no kan fruwakti taki den kondre fu grontapu sa kon lobi makandra so te taki dati sa tyari wánfasi kon na grontapu. Soleki fa Bijbel e taki, dan na Gado sa tyari wánfasi kon, èn a sa du dati na a reti ten. Ma nownowde kaba, ibriwan fu wi kan weri lobi leki wan krosi, èn wi kan libi na ini wánfasi nanga trawan.

Na ini a yari di pasa, Yehovah Kotoigi gebroiki moro leki wán milyard yuru fu go na sma oso fu fruteri den fu Bijbel èn fu a fasi fa Bijbel kan yepi sma na ini den aladei libi. Milyunmilyun sma e libi na ini wánfasi nanga makandra now, fu di den kisi soifri sabi fu Gado Wortu, èn sonwan fu den sma disi ben abi bita-ati gi makandra fosi. Wan tu fu den sma dati na Arabiri nanga Dyu, Armeniasma nanga Torku, Doisrisma nanga Rosiasma.

Yu wani sabi moro fini fa Gado Wortu, Bijbel, e tyari wánfasi kon na mindri sma? Efu dati de so, dan grantangi suku fu miti nanga Yehovah Kotoigi na ini a kontren fu yu, noso skrifi go na a yoisti adres na tapu bladzijde 2.

[Futuwortu]

[Prenspari pisi na tapu bladzijde 4]

Dusundusun kruderi meki fu tyari vrede kon, ma sma no hori densrefi na den kruderi disi

[Prenspari pisi na tapu bladzijde 7]

A hori di sma e hori densrefi na Bijbel gronprakseri, tyari wánfasi kon, aladi libisma tirimakti no man du dati

[Prenki na tapu bladzijde 5]

Gado Wortu e sori suma na a Sma di kan tyari trutru wánfasi kon

[Prenki na tapu bladzijde 7]

Yehovah Kotoigi fu a Hutu nanga a Tutsi lo e wroko makandra fu bow wan presi fu anbegi