Yu e horibaka gi a reti di Yehovah abi fu tiri?
Yu e horibaka gi a reti di Yehovah abi fu tiri?
„Taki na mindri den pipel: ’Yehovah srefi tron kownu.’”—PSALM 96:10.
1, 2. (a) Sortu tumusi prenspari sani pasa na ini oktober fu a yari 29? (b) San dati ben wani taki gi Yesus?
WAN tumusi prenspari sani pasa na ini oktober fu a yari 29. Noiti ete so wan sani ben pasa na grontapu. Na Evangelie skrifiman Mateyus e taki: „Di Yesus dopu, dan wantewante a opo komoto fu a watra; ne hemel opo èn Yohanes [a Dopuman] si Gado en yeye e saka kon na Yesus tapu leki wan doifi. Luku! Wan sten komoto fu hemel tu, èn a taki: ’Disi na mi Manpikin, a lobiwan di mi feni bun.’” Wan tu tori nomo de di skrifi na ini ala den fo Evangelie, èn disi na wan fu den tori dati.—Mateyus 3:16, 17; Markus 1:9-11; Lukas 3:21, 22; Yohanes 1:32-34.
2 Fu di Yesus ben kisi a santa yeye, meki a tron a Salfuwan, èn a wortu disi wani taki Mesias, noso Krestes (Yohanes 1:33). A „pikin” di Gado ben pramisi ben doro te fu kaba! A sma di Satan ben o masi na en bakafutu, ben e tanapu na fesi Yohanes a Dopuman. A srefi sma dati ben o masi na ede fu a wan di de a moro bigi gensman fu Yehovah èn fu a reti di A abi fu tiri (Genesis 3:15). Sensi a ten dati, Yesus ben sabi krinkrin taki a ben musu sorgu taki den sani di abi fu du nanga a tirimakti fu Yehovah èn nanga a Kownukondre, kon tru soleki fa Yehovah wani.
3. Fa Yesus sreka ensrefi gi a wroko di a ben o du fu horibaka gi a reti di Yehovah abi fu tiri?
3 Fu di Yesus ben wani de srekasreka gi a wroko dati, meki ’a drai kon baka fu a Yordanliba, aladi a ben furu nanga santa yeye, èn a yeye tyari en go waka lontu na ini a sabana’ (Lukas 4:1; Markus 1:12). Yesus ben de drape 40 dei langa fu denki dipi fu a tyalensi di Satan tyalensi a reti di Yehovah abi fu tiri. A denki dipi tu fu a wroko di a ben musu du fu horibaka gi a reti di Yehovah abi fu tiri. Na afersi dati abi fu du nanga ala engel na hemel èn ala libisma na grontapu. Dati meki a bun fu poti prakseri na a getrow diniwroko fu Yesus, èn fu luku san wi musu du fu sori taki wi abi a winsi tu fu horibaka gi a reti di Yehovah abi fu tiri.—Yob 1:6-12; 2:2-6.
Satan tyalensi a reti di Yehovah abi fu tiri
4. Sortu sani di Satan du e sori krin taki a tyalensi a reti di Yehovah abi fu tiri?
4 A no de fu taki dati Satan si ala den sani disi di ben e pasa. A no draidrai fu tesi a moro prenspari „pikin” fu na „uma” fu Gado (Genesis 3:15). Satan tesi Yesus dri leisi, fu di a taigi Yesus fu suku en eigi bun, na presi fu du a wani fu en Tata. Spesrutu a di fu dri tesi ben sori krin taki Satan ben e tyalensi a reti di Yehovah abi fu tiri. Baka di Satan sori Yesus „ala den kownukondre fu grontapu nanga a moi fu den”, dan a prefuru fu taigi Yesus: „Mi o gi yu ala den sani disi efu yu boigi èn anbegi mi wan leisi nomo.” Fu di Yesus ben sabi heri bun taki „ala den kownukondre fu grontapu” ben de na ini a makti fu Didibri, meki a sori en krin taki a e horibaka gi a reti di Yehovah abi fu tiri. A piki Satan: „Gowe fu dya, Satan! Bika Gado Buku taki: ’Na Yehovah yu Gado, yu musu anbegi èn na en wawan yu musu dini.’”—Mateyus 4:8-10.
5. Sortu muilek wroko Yesus ben musu du?
5 A fasi fa Yesus ben e libi, ben e sori krin taki a moro prenspari sani gi en ben de fu horibaka gi a reti di Yehovah abi fu tiri. Yesus ben sabi heri bun taki Satan ben o meki sma kiri en, èn taki a ben o abi fu tan getrow te na dede fu man sori taki na Gado abi a reti fu tiri. Disi e kruderi nanga a profeititori di e taki dati Satan ben o masi a „pikin” fu na uma na en bakafutu (Mateyus 16:21; 17:12). A ben o abi fu tyari kon na krin tu taki Yehovah sa gebroiki a Kownukondre fu En fu broko a makti fu Satan di no ben wani saka ensrefi na ondro a tirimakti dati, èn fu tyari vrede kon gi ala mekisani (Mateyus 6:9, 10). Fa Yesus du a muilek wroko disi?
„A kownukondre fu Gado kon krosibei kaba”
6. Fa Yesus meki sma kon sabi taki Gado sa gebroiki a Kownukondre fu „tyari wan kaba kon na den wroko fu Didibri”?
6 A fosi sani di Yesus bigin du, na taki a „go na Galilea fu preiki a bun nyunsu fu Gado, taki: ’A reti ten doro kaba, èn a kownukondre fu Gado kon krosibei kaba’” (Markus 1:14, 15). Fu taki en leti, Yesus ben taki: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Lukas 4:18-21, 43). Yesus ben waka a heri kondre fu „preiki a bun nyunsu fu Gado kownukondre èn fu meki disi bekènti” (Lukas 8:1). Yesus ben du furu bigi wondru tu. A ben gi nyanyan na ipi-ipi sma, a ben abi makti tapu a winti nanga a se, a ben dresi den sikisma, èn a ben gi dedewan wan opobaka. Nanga yepi fu den wondru disi, Yesus sori taki Gado kan tyari wan kaba kon na den problema nanga a pina di kon fu di sma opo densrefi teige Gado na ini Eden. Na so fasi a sa „tyari wan kaba kon na den wroko fu Didibri”.—1 Yohanes 3:8.
7. Sortu wroko Yesus ben gi den bakaman fu en, èn sortu bakapisi den ben abi?
7 Fu di Yesus ben wani taki a bun nyunsu fu a Kownukondre musu preiki na ala sei, meki a tyari wan grupu getrow bakaman kon na wán fu leri den fa fu du a wroko disi. A fosi sani di a du, na taki a teki 12 apostel èn a „seni den go preiki a kownukondre fu Gado” (Lukas 9:1, 2). Baka dati, a seni 70 tra bakaman fu en fu meki bekènti: „A kownukondre fu Gado kon krosibei na unu” (Lukas 10:1, 8, 9). Di den disipel disi drai kon baka fu fruteri Yesus sortu bun bakapisi den ben abi na ini a Kownukondre preikiwroko, dan Yesus taki: „Mi si fa Satan fadon kaba neleki faya di e koti na hemel.”—Lukas 10:17, 18.
8. San a libi fu Yesus sori krin?
8 Yesus ben du ala san a ben man fu gi kotoigi fu a Kownukondre èn a ben e gebroiki ibri okasi fu du dati. A ben e wroko fayafaya, dei nanga neti, èn a no ben e feti baka tra sani di furu sma na ini a ten dati ben abi. A ben taki: „Krabudagu abi olo pe den e tan èn den fowru di e frei na loktu abi sribipresi, ma a Manpikin fu libisma no abi nowan presi fu poti en ede” (Lukas 9:58; Markus 6:31; Yohanes 4:31-34). Syatu bifo a dede, Yesus no ben frede fu taigi Pontius Pilatus: „Na fu disi ede mi gebore èn na fu disi ede mi kon na grontapu, so taki mi kan kotoigi fu a waarheid” (Yohanes 18:37). A heri libi fu Yesus e sori taki a no kon na grontapu soso fu de wan bigi leriman, fu du wondru, noso fu de wan Frulusuman di gi en libi gi a bun fu trawan. Fu taki en leti, a ben kon fu du a wani fu Yehovah èn fu sori sma taki Gado man gebroiki en Kownukondre fu du san A abi na prakseri.—Yohanes 14:6.
„A kaba!”
9. Fa Satan ben man masi a bakafutu fu a „pikin” fu na uma fu Gado te fu kaba?
9 A Feanti, Satan Didibri no ben lobi nowan fu den sani di Yesus du gi a bun fu a Kownukondre. Doronomo Satan meki den „pikin” fu en, namku den politiekman nanga den kerki fesiman, gens a wroko fu a „pikin” fu na uma fu Gado. Sensi a ten di Yesus gebore, te na a kaba fu en libi na grontapu, Satan nanga den bakaman fu en ben e suku fu gens en. Te fu kaba, na a mofoyari fu 33 G.T, a ten ben doro taki sma ben o gi a Manpikin fu libisma abra na a Feanti di ben o ’masi en na en bakafutu’ (Mateyus 20:18, 19; Lukas 18:31-33). Den Evangelie e sori krin fa Satan kori sma soleki Yudas Iskariot, den priester, den leriman fu Wet, den Fariseiman, nanga wan tu Romesma, fu di a sorgu taki den krutu Yesus èn taki den meki a dede na wan ogri-ati fasi na wan pina-postu.—Tori fu den Apostel 2:22, 23.
10. San ben de a moro prenspari marki di Yesus doro di a dede na wan pina-postu?
10 San yu e prakseri te yu e denki na ogri-ati fasi fa Yesus dede na a pina-postu? Kande yu e prakseri fa Yesus ben de klariklari fu dede leki wan frulusu-ofrandi gi a bun fu sondu libisma (Mateyus 20:28; Yohanes 15:13). Kande yu e fruwondru fu a bigi lobi di Yehovah sori gi libisma di a seti sani fu meki Yesus tyari na ofrandi dati (Yohanes 3:16). Kande yu e agri nanga a legre edeman fu Rome, di ben taki: „Fu tru, a ben de Gado Manpikin” (Mateyus 27:54). A bun te wi e denki so. Ma memre den lasti wortu tu di Yesus ben taki, di a ben anga na a pina-postu. A ben taki: „A kaba!” (Yohanes 19:30) San ben kaba? Soleki fa wi sabi, dan a fasi fa Yesus libi, èn a dede fu en, meki taki a doro furu marki. Ma san ben de a moro prenspari reide fu san ede a ben kon na grontapu? A ben kon fu sori taki na Yehovah abi a reti fu tiri hemel nanga grontapu. Boiti dati, a profeititori ben sori taki a „pikin”, namku Yesus, ben o abi fu pasa bun hebi tesi fu Satan fu man krin a nen fu Yehovah (Yesaya 53:3-7). Disi na bigi frantwortu di Yesus ben abi, ma toku a du ala san a ben musu du. Iya, Yesus du bigi sani fu tru!
11. San Yesus sa du fu meki a profeititori di Gado taki na ini Eden, kon tru dorodoro?
11 Fu di Yesus tan getrow, meki a no kisi wan opobaka leki wan libisma, ma leki „wan yeye di e gi libi” (1 Korentesma 15:45; 1 Petrus 3:18). Disi na san Yehovah pramisi en Manpikin di ben kisi glori: „Sidon na mi reti-anu, teleki mi poti den feanti fu yu leki wan futubangi gi yu futu” (Psalm 110:1). Den „feanti” disi na Satan, na edeman fu den gensman, èn sosrefi ala den „pikin” fu en. Leki Kownu fu a Mesias Kownukondre fu Yehovah, Yesus Krestes sa teki fesi fu pori Satan nanga den ogri yeye èn sosrefi ala den bakaman fu en na grontapu (Openbaring 12:7-9; 19:11-16; 20:1-3, 10). Te dati pasa, dan a profeititori na ini Genesis 3:15 sa kon tru dorodoro, èn sosrefi a sani di Yesus ben leri den bakaman fu en fu begi gi. Den ben musu begi: „Meki yu kownukondre kon. Meki yu wani pasa na grontapu soleki fa a e pasa na hemel.”—Mateyus 6:10; Filipisma 2:8-11.
Wi musu teki na eksempre fu Yesus
12, 13. (a) Sortu krakti a bun nyunsu fu a Kownukondre abi tapu sma na ini a ten disi? (b) San wi musu aksi wisrefi efu wi wani teki na eksempre fu Krestes?
12 Na ini a ten disi, a bun nyunsu fu a Kownukondre e preiki na ini furu kondre, soleki fa Yesus ben taki (Mateyus 24:14). Leki bakapisi fu dati, milyunmilyun sma gi den libi abra na Gado. Den e prisiri trutru te den e prakseri den blesi di a Kownukondre o tyari kon. Den abi a howpu fu libi fu têgo na ini vrede na ini wan paradijs na grontapu pe ala sani sa waka bun, èn a e gi den prisiri fu fruteri trawan fu a howpu fu den (Psalm 37:11; 2 Petrus 3:13). Yu na wan fu den Kownukondre preikiman disi? Efu dati de so, dan sabi taki yu e du wan heri bun wroko. Ma wan tra sani de di ibriwan fu wi musu hori na prakseri.
13 Na apostel Petrus ben skrifi: „Krestes ben nyan pina gi unu èn a libi wan eksempre gi unu, so taki unu kan waka soifri na en baka” (1 Petrus 2:21). Luku taki dyaso Petrus no e taki fa Yesus ben e preiki fayafaya, noso fa a ben e gi bun leri, ma a e taki fu a pina di a pina. Petrus srefi ben si nanga en eigi ai taki Yesus ben de klariklari fu pasa iniwan tesi fu du a wani fu Yehovah èn fu sori taki Satan na wan leiman. We, fa wi kan de leki Yesus? Wi musu aksi wisrefi: ’Mi de klariklari fu horibaka gi a reti di Yehovah abi fu tiri, awansi sortu tesi e miti mi? A fasi fa mi e libi èn e du a diniwroko fu mi, e sori taki a wani fu Yehovah na a moro prenspari sani gi mi?’—Kolosesma 3:17.
14, 15. (a) San Yesus du di sma ben wani gi en spesrutu rai nanga grani, èn fu san ede a handri so? (b) Sortu prenspari sani wi musu hori na prakseri ala ten? (Taki tu fu a faki di nen „Teki a sei fu Yehovah.”)
14 Ibri dei wi e kisi tesi, èn ibri dei wi musu teki bosroiti. Son leisi dati na bigiwan, ma tra leisi baka, dati na pikinwan. San o yepi wi fu handri bun? Fu eksempre, te wi de na ini wan situwâsi di kan meki taki wi du sani di no fiti gi wan Kresten, dan san wi e du? Di Petrus taigi Yesus fu sorgu bun gi ensrefi, dan san Yesus du? A ben taki: „Komoto na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki” (Mateyus 16:21-23). Noso, kon meki wi taki dati wi e kisi okasi fu meki moro moni, noso fu kon abi wan moro bun wroko di kan meki taki a bribi fu wi kon swaki. Wi e handri neleki Yesus na ini den sortu situwâsi dati? Di Yesus kon frustan taki den sma di ben si den wondru fu en, „ben wani grabu en fu meki a tron kownu”, dan a gowe fu drape esi-esi.—Yohanes 6:15.
15 Fu san ede Yesus ben abi a fasti bosroiti fu no du san tra sma ben wani en fu du? Fu di a ben sabi taki wan sani ben de di prenspari moro en eigi bun. A ben wani du a wani fu en Tata, èn a ben de klariklari fu horibaka gi a reti di Yehovah abi fu tiri, awansi san pasa (Mateyus 26:50-54). Sobun, efu wi no e hori a prenspari sani disi bun na prakseri ala ten, neleki fa Yesus ben e du dati, dan wi ben kan meki fowtu makriki. Fu san ede wi kan taki dati? Fu di Satan kan kori wi makriki nanga den triki fu en. Satan sabi heri bun fa fu meki sma kon si wan ogri sani leki wan bun sani. Na so a ben kori Eva tu.—2 Korentesma 11:14; 1 Timoteyus 2:14.
16. San na a moro prenspari sani di wi musu yepi trawan fu kon frustan?
16 Te wi de na ini a preikiwroko, dan wi e suku fu taki nanga sma fu den broko-ede fu den, èn wi e suku tu fu sori den san Bijbel e taki. Disi na wan bun fasi fa wi kan yepi den fu kisi na angri fu studeri Bijbel. Ma fu taki en leti, a moro prenspari sani di wi e pruberi fu du, a no fu meki sma kon sabi nomo san Bijbel e taki, noso sortu blesi Gado Kownukondre o tyari kon. Wi musu yepi den fu kon frustan taki Satan tyalensi a reti di Yehovah abi fu tiri. Den wani tron tru Kresten di de klariklari fu teki a „pina-postu” fu den èn fu nyan pina gi a bun fu a Kownukondre? (Markus 8:34) Den de klariklari fu horibaka tu gi a reti di Yehovah abi fu tiri, èn fu sori na a fasi dati taki Satan na wan ogri-ati leiman? (Odo 27:11) A de wan grani taki wi kan du den sani dati, èn taki wi kan yepi trawan fu du a srefi.—1 Timoteyus 4:16.
Te Gado e tron „ala sani gi ala sma”
17, 18. Sortu moi ten wi kan fruwakti te wi e tan sori taki wi e horibaka gi a reti di Yehovah abi fu tiri?
17 Fu di wi wani sori taki wi e horibaka gi Yehovah, meki wi e du ala san wi man fu tyari wisrefi na wan fasi di fiti èn fu du a diniwroko fu wi na a yoisti fasi. Na a srefi ten, wi abi a howpu taki wan ten o kon pe Yesus Krestes „sa gi a kownukondre abra na en Gado èn Tata”. O ten dati o pasa? Na apostel Paulus e fruklari: „Te a tyari wan kaba kon na ala tirimakti, na ala makti, èn na ala krakti. Bika a musu tiri leki kownu teleki Gado poti ala den feanti fu en na ondro en futu. . . . Dan a Manpikin srefi o saka ensrefi tu na ondro a Sma di ben poti ala sani na en ondro, so taki Gado kan de ala sani gi ala sma.”—1 Korentesma 15:24, 25, 28.
18 Te Gado tron „ala sani gi ala sma”, dan dati o de wan tumusi moi ten! Na a ten dati, a Kownukondre sa klari a wroko fu en. Nowan gensman fu Yehovah sa de moro. Vrede o de na hemel nanga grontapu èn ala sani o waka na wan orga fasi. Ala mekisani o singi neleki a psalm skrifiman di ben singi: „Gi Yehovah a glori di en nen musu kisi . . . Taki na mindri den pipel: ’Yehovah srefi tron kownu.’”—Psalm 96:8, 10.
Yu kan gi piki?
• Fa Yesus sori taki a moro prenspari sani gi en, na fu tan horibaka gi a reti di Gado abi fu tiri?
• San na a moro prenspari marki di Yesus doro nanga yepi fu a diniwroko èn a dede fu en?
• Fa wi kan sori taki wi e horibaka gi a reti di Yehovah abi fu tiri, neleki fa Yesus ben e du dati?
[Aksi fu a tori disi]
[Faki na tapu bladzijde 29]
TEKI A SEI FU YEHOVAH
Furu brada nanga sisa na ini Korea èn na tra presi, sabi taki te Kresten e kisi hebi tesi, dan a bun fu hori na prakseri fu san ede den e kisi den sortu tesi disi.
Wan Kotoigi fu Yehovah, di ben de na ini strafu-oso na a ten fu a Sovjet tirimakti fu fosi, e taki: „A sani di yepi wi fu horidoro, na taki wi ben frustan krin sortu problema ben opo kon na ini Eden, namku taki sma tyalensi a reti di Gado abi fu tiri. . . . Wi sabi taki wi ben abi na okasi fu teki a sei fu Yehovah en tirimakti. . . . A sani dati gi wi a krakti fu horidoro èn fu tan getrow na Gado.”
Wan tra Kotoigi e fruteri san ben yepi en nanga tra brada nanga sisa fu horidoro di den ben de na ini wan strafuman kampu. A e taki: „Yehovah ben e horibaka gi wi. Aladi a situwâsi ben muilek, toku wi ben e sorgu taki wi tan abi wan tranga bribi na ini Yehovah. Ala ten wi ben e gi makandra deki-ati, fu di wi ben e memre makandra taki wi ben teki a sei fu Yehovah fu sori taki na en abi a reti fu tiri hemel nanga grontapu.”
[Prenki na tapu bladzijde 26]
Fa Yesus sori taki a teki a sei fu Yehovah, di Satan tesi en?
[Prenki na tapu bladzijde 28]
Fu san ede Yesus taki: „A kaba”?