Nowan fetisani di den sa meki fu feti nanga yu sa abi bun bakapisi
Nowan fetisani di den sa meki fu feti nanga yu sa abi bun bakapisi
„Nowan fetisani di . . . meki fu feti nanga yu sa abi bun bakapisi.”—YESAYA 54:17.
1, 2. Fa den sani di Yehovah Kotoigi ondrofeni na ini Albania, e sori taki den wortu na Yesaya 54:17 de tru?
NA A pisi ten fu 1945 te go miti 1990, wan grupu Kresten ben e libi na a zuid-owstusei fu Europa, na ini wan pikin kondre di lai nanga bergi. Den Kresten disi ben de sondro frede. A Communist tirimakti fu a kondre dati no ben wani sma fu anbegi Gado, èn fu dati ede a du ala muiti fu tyari wan kaba kon na a grupu disi. A tirimakti meki sma fon den Kresten disi, a poti den na strafuman-kampu, èn a fruteri wan lo lei fu den. Toku den no ben man pori a grupu disi. Suma ben de a grupu sma disi? Den ben de Yehovah Kotoigi na ini Albania. Aladi a no ben makriki srefisrefi gi den fu hori konmakandra èn fu go na ini a preikiwroko, toku den horidoro someni tenti yari langa, èn na so den gi grani na a Kresten bribi èn na a nen fu Yehovah. Di den gi a nyun bijkantoro fu den abra na Yehovah a yari di pasa, dan wan brada di de wan Kotoigi furu yari langa kaba ben taki: „Awansi san Satan e du fu gens wi, a e lasi ala ten, ma Yehovah e wini doronomo!”
2 Ala den sani disi e sori krin taki a pramisi di Yehovah gi a pipel fu en na Yesaya 54:17, de tru. Drape skrifi: „Nowan fetisani di den sa meki fu feti nanga yu sa abi bun bakapisi, èn iniwan tongo di sa opo teige yu na ini a krutu, yu sa krutu.” Den sani di a pipel fu Yehovah ondrofeni na ini a ten di pasa, e sori taki nowan enkri sani di den bakaman fu Satan na grontapu e du, sa man tapu den getrow futuboi fu Yehovah fu anbegi a Gado fu den.
Awansi san Satan e du, a no sa abi bun bakapisi
3, 4. (a) Na sortu fasi Satan e feti nanga wi? (b) Sortu buweisi de taki Satan no abi bun bakapisi?
3 Satan feti na difrenti fasi nanga tru anbegiman. A meki tirimakti tapu a wroko fu den, a meki ipi-ipi sma du ogri-ati sani nanga den, a meki lanti poti den na strafu-oso, èn a meki sma ’drai a wet fu du ogri’ nanga den (Psalm 94:20). Fu taki en leti, na ini son kondre a de so taki, na a srefi momenti disi di Yehovah Kotoigi e studeri na artikel disi, den Kresten brada nanga sisa fu den ’e kisi tesi’ fu di den wani tan getrow na Gado.—Openbaring 2:10.
4 Fu eksempre, wan bijkantoro fu Yehovah Kotoigi ben skrifi taki na ini wán yari nomo, a pasa 32 leisi taki sma du ogri nanga futuboi fu Gado na a ten di den ben de na ini a preikiwroko. Boiti dati, a pasa 59 leisi taki skowtu hori Kotoigi di ben e teki prati na a preikiwroko, èn dati ben de yonguwan nanga owruwan, mansma nanga umasma. Skowtu hori wan tu fu den fu teki den fingamarki, den meki fowtow fu den, èn den poti den na strafu-oso, neleki fa den e du nanga ogriman. Den tapu skreki gi sonwan fu den taki den ben o gi den mankeri. Na ini wan tra kondre, moro leki 1100 afersi de now di e sori taki skowtu hori Kotoigi, taki den naki den butu, noso taki den fon den. Moro leki 200 fu den afersi disi pasa na a dei di den Kotoigi ben kon makandra fu memre a dede fu Krestes! Ma toku a yeye fu Yehovah yepi a pipel fu en na ini den kondre disi èn na ini tra kondre fu horidoro, aladi den kisi wan lo hebi tesi (Sakaria 4:6). Awansi san den feanti e du fu gens den Kotoigi, toku den no sa tapu fu prèise Yehovah. Iya, wi abi a frutrow taki awansi fa sma e feti nanga wi, toku den no o man tapu Gado fu du san a wani.
Sma di e taki lei fu wi e kisi krutu
5. Sortu lei sma ben e fruteri fu den futuboi fu Yehovah na ini a fosi yarihondro?
5 A profeiti Yesaya ben meki bekènti taki a pipel fu Gado ben o krutu iniwan sma di e taki lei fu den. Na ini a fosi yarihondro, sma ben gwenti fu denki takru fu Kresten, èn den ben e si den leki sma di e du ogri. Den wortu na ini Tori fu den Apostel 16:20, 21 e sori krin fa sma e denki fu Kresten: „Den man disi . . . e tyari bun furu bruya kon na ini wi foto; den e leri sma tra gwenti di wi no kan teki abra èn di wi no kan du, fu di wi na Romesma.” Na wan tra okasi, sma fu tra bribi pruberi fu meki den tiriman fu a foto gens den bakaman fu Krestes. Den sma disi ben taki: „Den man disi di bruya sma na heri grontapu de dyaso tu, [èn den] e pasa den wet fu Caesar” (Tori fu den Apostel 17:6, 7). Sma ben e si na apostel Paulus leki „wan takru siki” èn den ben feni taki a ben de a fesiman fu wan grupu di ben e tyari bruya kon „na heri grontapu”.—Tori fu den Apostel 24:2-5.
6, 7. San na wán fasi fa Kresten e krutu den lei di sma e fruteri fu den?
6 Dati meki a no e fruwondru wi taki tru Kresten na ini a ten disi e ondrofeni taki sma e denki bun takru fu den, taki sma e fruteri ogri-ati lei fu den, èn taki sma e gi den porinen. Fu san ede wi kan taki dati wi e krutu den sani disi di sma e taki?—Yesaya 54:17.
7 Nofo tron a bun fasi fa Yehovah Kotoigi e tyari densrefi, e sori taki den sani di sma e fruteri fu den no tru (1 Petrus 2:12). Te Kresten e hori densrefi na den wet fu a kondre, te den e tyari densrefi na wan fasi di fiti, èn te den e sori taki den e broko den ede trutru nanga trawan, dan sma sa kon si taki den sani di trawan e fruteri fu den no tru. Fu di wi e tyari wisrefi na wan fasi di fiti, meki wi e sori taki wi na opregtisma. Te sma e si taki wi e tan du bun, dan nofo tron den e gi glori na wi hemel Tata èn den e agri taki den futuboi fu en e libi wan moro bun libi.—Yesaya 60:14; Mateyus 5:14-16.
8. (a) Na sortu fasi wi musu opo taki gi a bribi fu wi son leisi? (b) Fa wi kan teki na eksempre fu Yesus di ben e krutu den sma di ben e gens en?
8 Boiti taki wi e tyari wisrefi na wan fasi di Gado feni bun, a kan de fanowdu son leisi taki wi e opo taki nanga deki-ati gi a bribi fu wi di e kruderi nanga Bijbel. Wán fasi fa wi e du dati, na taki wi e suku yepi na den tirimakti èn na den krutubangi (Ester 8:3; Tori fu den Apostel 22:25-29; 25:10-12). Di Yesus ben de na grontapu, dan na wan tu okasi a sori sma krin taki den sani di den ben e fruteri fu en, no tru (Mateyus 12:34-37; 15:1-11). Neleki Yesus, wi e suku okasi tu fu fruklari a bribi fu wi gi trawan (1 Petrus 3:15). Awansi sma e spotu wi na skoro, na wrokope, noso awansi famiriman e spotu wi, noiti wi musu tapu fu fruteri sma den tru tori di skrifi na ini Gado Wortu.—2 Petrus 3:3, 4.
Yerusalem—„Wan hebi ston”
9. Sortu Yerusalem a „hebi ston” e prenki di kari na Sakaria 12:3, èn suma e teki presi gi a Yerusalem dati na grontapu?
9 A profeititori fu Sakaria e tyari kon na krin fu san ede den pipel e gens den tru Kresten. Luku san skrifi na Sakaria 12:3: „A musu pasa na a dei dati taki mi sa meki Yerusalem tron wan hebi ston gi ala pipel.” Nanga sortu Yerusalem den wortu disi abi fu du? A profeititori fu Sakaria di e taki fu Yerusalem, abi fu du nanga a „Yerusalem na hemel”, a hemel Kownukondre pe salfu Kresten kisi wan kari fu go (Hebrewsma 12:22). Wan pikin fikapisi fu den Kresten disi di sa kisi a Mesias Kownukondre, de na grontapu ete. Makandra nanga den „tra skapu” di de kompe fu den, den e gi sma deki-ati fu saka densrefi na ondro a Kownukondre fu Gado, now di ten de ete fu du dati (Yohanes 10:16; Openbaring 11:15). Den pipel teki a kari disi? Èn na sortu fasi Yehovah e yepi tru anbegiman na ini a ten disi? Meki wi go ondrosuku dati, aladi wi e luku moro fara san wi kan leri fu Sakaria kapitel 12. Te wi e du dati, dan wi sa kisi a dyaranti taki „nowan fetisani” di sma sa meki fu feti nanga den salfuwan fu Gado èn den getrow kompe fu den, „sa abi bun bakapisi”.
10. (a) Fu san ede sma e du ogri nanga a pipel fu Gado? (b) San pasa nanga den sma di pruberi fu puru a „hebi ston” na pasi?
10 Sakaria 12:3 e sori taki den pipel e kisi „dipi koti”. Fa disi e pasa? Gado gi den futuboi fu en a komando taki den musu preiki a bun nyunsu fu a Kownukondre. Yehovah Kotoigi e si a sani disi leki wan seryusu frantwortu. Ma a de leki wan „hebi ston” gi den sma fu grontapu taki den Kotoigi e meki a Kownukondre boskopu bekènti leki a wan-enkri howpu gi libisma. Fu di den wani puru a ston disi na pasi, meki den e du ogri nanga den Kownukondre preikiman. A sani disi meki taki den sma fu grontapu kisi „dipi koti na den skin”, teleki den heri skin kon lai nanga koti. Den kisi syen srefi fu di den no ben man doro a marki fu den. Den no man tapu a wroko fu den tru anbegiman di e warderi a grani di den abi fu meki a „têgo bun nyunsu” fu Gado en Mesias Kownukondre bekènti, fosi a kaba fu a sistema disi doro (Openbaring 14:6). Di wan waktiman fu wan strafu-oso na ini wan kondre na ini Afrika si sortu ogri sma e du nanga den futuboi fu Yehovah, dan a taki: ’Yu e lasi yu ten fu frufolgu den sma disi. Den no sa gi abra noiti. Na presi fu dati, den e kon moro furu.’
11. Fa Gado du san a ben pramisi na Sakaria 12:4?
11 Leisi Sakaria 12:4. Yehovah e pramisi wi taki na wan agersi fasi a sa breni den wan di e du ogri nanga den Kownukondre boskopuman fu en di abi deki-ati, èn taki a sa bruya den. Na dati Yehovah du tu. Fu eksempre, na ini wan kondre pe lanti ben tapu a tru anbegi, den gensman no ben man tapu pasi gi a pipel fu Gado fu kisi buku nanga tra sani di den abi fanowdu fu anbegi Gado. Wan koranti ben taki srefi dati Yehovah Kotoigi ben e gebroiki ballon fu tyari Bijbel publikâsi kon na ini a kondre! A sani di Gado ben pramisi den getrow futuboi fu en, kon tru. Gado ben taigi den: „Mi sa poti prakseri na [unu], èn mi sa breni ibri asi fu den pipel.” Fu di den feanti fu a Kownukondre e atibron so te, meki den no sabi san fu du. Ma wi abi a dyaranti taki Yehovah sa kibri a pipel fu en leki wan grupu, èn a sa sorgu taki sani e waka bun nanga den.—2 Kownu 6:15-19.
12. (a) Na sortu fasi Yesus leti wan faya di a ben de na grontapu? (b) Fa a salfu fikapisi leti wan agersi faya, èn san ben de a bakapisi?
12 Leisi Sakaria 12:5, 6. Den wortu „den granman fu Yuda” abi fu du nanga den wan di e teki fesi na mindri a pipel fu Gado. Yehovah e gi den man disi a krakti fu wroko fayafaya na grontapu, fu a bun fu a Kownukondre. Na wán okasi Yesus ben taigi den disipel fu en: „Mi kon fu leti wan faya na grontapu” (Lukas 12:49). Èn a leti wan faya fu tru. Fu di Yesus preiki fayafaya, meki a sori sma taki a Kownukondre fu Gado na a moro prenspari sani. A sani disi tyari bigi dyugudyugu kon na mindri den Dyu (Mateyus 4:17, 25; 10:5-7, 17-20). Na so a de tu taki den futuboi fu Krestes na ini a ten disi, „de leki wan faya-patu na mindri bon èn leki wan frambo na ini a lin fu karu di koti no so langa ete”, fu di den e leti wan agersi faya tu. A buku The Finished Mystery * di skrifi na ini 1917, tyari a hoigrifasi fu Krestenhèit kon na krin. A sani dati meki taki den kerki fesiman kisi bigi atibron. No so langa pasa, Kownukondre Nyunsu Nr. 37 di nen „A kaba fu falsi kerki de krosibei!”, meki taki furu sma tron bakaman noso gensman fu Gado Kownukondre.
„Den tenti fu Yuda” e kisi kibri
13. San den wortu „den tenti fu Yuda” wani taki, èn fu san ede Yehovah e kibri den wan di de na ini den tenti disi?
13 Leisi Sakaria 12:7, 8. Na ini Israel fu owruten, tenti ben de fu si na ala presi na ini a kondre, fu di skapuman nanga gronman ben e gebroiki den son leisi. Den sma dati ben o de den fosiwan di ben o kon na ini problema èn di ben o abi yepi fanowdu te feanti ben o kon feti nanga Yerusalem. Den wortu „den tenti fu Yuda” e sori taki na agersifasi, a salfu fikapisi na ini a ten disi no de na ini foto di abi skotu na den lontu, ma taki den de na den opo presi. Drape den e feti sondro frede gi a Mesias Kownukondre. Yehovah fu den legre sa kibri „den tenti fu Yuda fosi”, fu di Satan e suku fu pori den wan di de na ini den tenti disi.
14. Fa Yehovah e kibri den wan di de na ini „den tenti fu Yuda”, èn fa a e sorgu taki den no e naki futu?
14 A no de fu taki dati den sani di a pipel fu Gado ondrofeni na ini a ten di pasa, e sori taki Yehovah e kibri den salfuwan di e teki presi gi a Kownukondre dyaso na grontapu èn di de na ini den „tenti” fu den na ini den opo presi. * A e gi den krakti nanga deki-ati, neleki fa a ben du nanga David, a fetiman kownu, so taki den no e „naki futu”.
15. Fu san ede Yehovah e ’suku fu figi ala den nasi puru’, èn o ten a sa du disi?
15 Leisi Sakaria 12:9. Fu san ede Yehovah e ’suku fu figi ala den nasi puru’? Fu di den e tan gens a Mesias Kownukondre. Gado e krutu den fu di den e du ogri nanga a pipel fu En, èn fu di den e frufolgu den. Heri esi, den bakaman di Satan abi na grontapu sa pruberi wan lasti leisi fu du ogri nanga den tru anbegiman fu Gado, èn a sani dati sa tyari a situwâsi kon na grontapu di Bijbel e kari Har–Magedon (Openbaring 16:13-16). Te dati pasa, dan a Moro Hei Krutuman sa feti gi den futuboi fu en, èn a sa meki a nen fu en kon santa na mindri den pipel.—Esekièl 38:14-18, 22, 23.
16, 17. (a) San na „a famirigudu fu den futuboi fu Yehovah”? (b) Te wi e horidoro aladi Satan e du wi ogri, dan san dati e sori?
16 Awansi fa Satan e pruberi fu feti nanga a pipel fu Gado na heri grontapu, a no o man swaki a bribi fu den, èn a no o man tapu den fu du a wroko fu den. Na fu di wi sabi taki Yehovah man frulusu wi, meki wi abi wan korostu firi, èn a firi disi na „a famirigudu fu den futuboi fu Yehovah” (Yesaya 54:17). Nowan enkri sani di sma e du kan puru a korostu firi dati, èn kan swaki a bribi fu wi (Psalm 118:6). Satan sa tan sutu faya gi sma fu gens wi, èn a sa tan tyari problema kon gi wi. Te wi e tan horidoro na wan getrow fasi te sma e spotu wi, dan dati e sori taki a yeye fu Gado de na wi tapu (1 Petrus 4:14). Wi e preiki a bun nyunsu fu a Kownukondre di Gado seti, èn wi e du dati na heri grontapu. Na wan agersi fasi, sma di ben wani gens a pipel fu Gado fringi furu „ston” na den tapu fu bruya den. Ma Yehovah e gi den a krakti so taki den ston disi no e bruya den (Sakaria 9:15). A salfu fikapisi nanga den getrow kompe fu den no sa tapu fu meki a boskopu fu Gado bekènti!
17 Wi e wakti a ten te Gado sa sorgu taki Didibri no man du wi ogri moro. A de wan trowstu trutru fu sabi taki ’nowan fetisani di Satan meki fu feti nanga wi sa abi bun bakapisi, èn taki wi sa krutu iniwan tongo di sa opo teige wi’!
[Futuwortu]
^ paragraaf 12 Yehovah Kotoigi tyari en kon na doro, ma den no e meki en moro.
^ paragraaf 14 Efu yu wani leisi moro fu a tori disi, dan luku a buku Jehovah’s Getuigen — Verkondigers van Gods Koninkrijk, bladzijde 675, 676. Yehovah Kotoigi tyari en kon na doro.
Fa yu ben sa piki?
• San e sori taki Satan no ben abi bun bakapisi di a kon feti nanga wi?
• Fa a Yerusalem fu hemel e tron „wan hebi ston”?
• Fa Yehovah e kibri „den tenti fu Yuda”?
• Sortu dyaranti yu abi, now di Armagedon e kon moro krosibei?
[Aksi fu a tori disi]
[Prenki na tapu bladzijde 21]
A pipel fu Yehovah na ini Albania tan getrow aladi Satan du ogri nanga den
[Prenki na tapu bladzijde 23]
Yesus krutu den sma di ben e taki lei fu en
[Prenki na tapu bladzijde 24]
Awansi fa sma e gens den wan di e meki a bun nyunsu bekènti, toku den no sa abi bun bakapisi