„Tanapu kánkan èn luku fa Yehovah o frulusu unu”

„Yehovah de na mi sei; mi no sa frede. San wan sma fu grontapu kan du mi?”​—PSALM 118:6.

1. Sortu rampu o miti a libisma famiri na ini a ten di e kon?

HERI esi libisma sa ondrofeni bigi rampu di den noiti no ondrofeni ete. Di Yesus ben taki fu a ten fu wi, dan a warskow den bakaman fu en: „Wan bigi banawtu o de, di sensi a bigin fu grontapu teleki now no ben de ete, nôno, a no sa kon noiti moro tu. Fu taki en leti, efu Gado no ben o syatu a ten dati, dan nowan sma ben o feni frulusu; ma Gado o syatu a ten gi den sma di a kari.”—Mateyus 24:21, 22.

2. Fu san ede a bigi banawtu no e kon ete?

² Nownowde engel e sorgu taki a bigi banawtu no e kon ete, aladi libisma no man si den engel disi. Di Yesus ben gi na apostel Yohanes wan fisyun, dan na apostel disi ben kisi a grani fu si fu san ede a bigi banawtu no kon ete. Disi na san na owru apostel ben taki: „Mi si fo engel e tanapu na den fo uku fu grontapu èn den ben e hori den fo winti fu grontapu bun steifi . . . Dan mi si wan tra engel e opo kon fu a sei pe son e opo, èn a ben abi wan stampu fu a libi Gado; ne a bari nanga wan tranga sten gi den fo engel . . . ’No du ogri nanga grontapu, nanga a se, noso nanga den bon, teleki wi poti wan marki na tapu a fesi-ede fu den srafu fu wi Gado.’”—Openbaring 7:1-3.

3. San na a fosi sani di o pasa te a bigi banawtu bigin?

³ Dyonsro ala den salfu „srafu fu wi Gado” sa kisi wan marki fu a lasti leisi. Den fo engel de srekasreka fu lusu den winti di o tyari pori kon. San na a fosi sani di o pasa te den o du dati? Wan engel e piki na aksi disi: ’Den o fringi Babilon a bigi foto trowe esi-esi, èn noiti moro sma o feni en’ (Openbaring 18:21). A no de fu taki dati den engel na hemel o prisiri te Babilon a Bigiwan, a grontapumakti fu falsi bribi, kisi pori!—Openbaring 19:1, 2.

4. San o pasa na a kaba fu a bigi banawtu?

⁴ Ala den pipel fu grontapu o bondru kon na wán fu kon feti nanga a pipel fu Yehovah. Den pipel disi o man kiri ala den getrow Kresten? Kande a o gersi leki den o man du dati. Ma luku san o pasa! Yesus Krestes nanga den hemel legre fu en sa pori ala sma di e gens den bakaman fu en (Openbaring 19:19-21). Te fu kaba, Yesus sa trowe Didibri nanga den engel fu en na ini wan agersi dipi peti pe den no sa man du noti. Den no sa man kori libisma moro, fu di Yesus sa tai den wán dusun yari langa. A sani dati sa de wan frulekti trutru gi den ipi-ipi sma di sa tan na libi!—Openbaring 7:9, 10, 14; 20:1-3.

5. Sortu sani o gi den wan di e tan loyaal na Yehovah bigi prisiri?

⁵ Heri esi den tumusi wondru sani disi o pasa. Ala den sani disi o pasa fu di a musu kon na krin taki na Yehovah wawan abi a reti fu tiri hemel nanga grontapu. Èn prakseri a sani disi: Te wi e tan loyaal na Yehovah èn te wi e horibaka gi en leki a Moro Hei Tiriman, dan wi sa man yepi fu santa a nen fu Yehovah, èn fu meki a wani fu en kon tru. A sani dati sa gi wi bigi prisiri!

6. Na sortu tori wi sa poti prakseri, now di bigi sani de fu pasa?

 ⁶ Wi de srekasreka gi den bigi sani dati di o pasa? Wi e bribi taki Yehovah man frulusu wi? Wi abi a frutrow taki a sa yepi wi na a yoisti ten èn na a yoisti fasi? Wi musu hori na prakseri san na apostel Paulus ben taigi den Kresten brada nanga sisa fu en na ini Rome, fu di dati sa yepi wi fu gi piki tapu den aksi disi. A ben taki: „Ala sani di sma skrifi fositen, ben skrifi fu leri wi wan sani, so taki a fasi fa wi e horidoro èn a trowstu di Gado Buku e gi, kan gi wi howpu” (Romesma 15:4). Wan fu den bijbeltori di skrifi fu leri wi wan sani èn di e gi wi trowstu nanga howpu, na a tori di e taki fu a ten di Yehovah frulusu den Israelsma fu den Egeptesma di ben e pina den. Wi sa poti prakseri now na den bigi wondru di Yehovah du fu frulusu den Israelsma. Disi sa gi wi furu deki-ati, aladi wi e wakti a bigi banawtu di sa kon heri esi.

Yehovah e frulusu a pipel fu en

7. Sortu muilek situwâsi kon de na ini Egepte na ini a yari 1513 bifo Krestes?

⁷ Luku san e pasa na ini a yari 1513 bifo Krestes. Yehovah tyari neigi rampu kaba tapu den Egeptesma. Baka a di fu neigi rampu, Farao e yagi Moses gowe. A e taigi en: „Komoto na mi tapu! Luku bun! Mi no wani si yu moro. A dei di mi si yu fesi, yu o dede.” Dan Moses taki: „We, fu di yu taki so, dan mi no o kon na yu moro.”—Exodus 10:28, 29.

8. San den Israelsma musu du fu man tan na libi, èn san na a bakapisi?

⁸ Now Yehovah e taigi Moses taki a sa tyari ete wan rampu kon fu strafu Farao nanga ala den Egeptesma, iya, wan lastiwan. Tapu 14 Abib (Nisan), ala den fosi geborewan fu ibri Egeptesma èn fu ibri meti o dede. Ma a sani disi no o miti den Israelsma efu den e du soifri san Gado taigi Moses. Den musu lobi pikinso fu a brudu fu wan pikin skapu na tapu den tu doropostu èn na tapusei fu a doromofo fu den oso, èn den ben musu tan na ini den oso. San pasa a neti dati? Luku san Moses srefi e taki: „A ben de so now, taki mindrineti Yehovah kiri ibri fosi pikin na ini a kondre Egepte.” Wantewante Farao e seni kari Moses nanga Aron, èn a e taigi den: ’Komoto na mindri mi pipel èn un go dini Yehovah, soleki fa unu taki.’ Èn na dati den Israelsma du tu, iya, a kan taki moro leki dri milyun Israelsma gowe makandra nanga „furu sma fu tra kondre” di ben e libi na ini Egepte.—Exodus 12:1-7, 29, 31, 37, 38.

9. Sortu pasi Gado e meki den Israelsma teki fu komoto na ini Egepte, èn fu san ede?

⁹ A moro syatu pasi di den Israelsma kan teki, na a pasi krosibei fu a Mindrikondre Se, èn a pasi disi e pasa na ini a kondre fu den Filisteasma. Ma dati na a kontren pe den feanti fu den e tan. Sobun,  a kan taki Yehovah tyari den pasa na ini a gran sabana krosibei fu a Redi Se, fu di a wani kibri a pipel fu en gi den feanti di ben o wani kon feti nanga den. Aladi milyunmilyun sma de na pasi e waka, toku den no e waka bruyabruya. Bijbel e taki: „Leki wan legre den manpikin fu Israel komoto na ini Egepte.”—Exodus 13:17, 18.

„Luku fa Yehovah o frulusu unu”

10. Fu san ede Gado e taigi den Israelsma fu seti tenti na fesi Pi-Hakirot?

¹⁰ Now den Israelsma musu du wan sani di den no e fruwakti. Yehovah e taigi Moses: „Taigi den manpikin fu Israel taki den musu drai baka èn seti kampu na fesi Pi-Hakirot, na mindri Mikdol nanga a se, èn na fesi Bâal-Seifon.” Te a bigi ipi sma disi e du san Yehovah e taigi den, dan den e doro na mindri den bergi nanga wan pisi fu a Redi Se. A gersi leki nowan presi no de fu lowe go. Ma Yehovah sabi san a e du. A e taigi Moses: „Mi o meki taki Farao kon tranga-ede, èn a sa lon na den baka fu kisi den. Èn mi o kisi glori fu di mi o wini Farao nanga den legre fu en. Den Egeptesma o sabi taki mi na Yehovah.”—Exodus 14:1-4.

11. (a) San Farao e du, èn san den Israelsma e taigi Moses? (b) San Moses e piki den Israelsma di e kragi gi en?

¹¹ Farao feni taki a meki wan fowtu di a seni den Israelsma gowe fu Egepte. Dati meki a e hasti ensrefi fu go na den baka, èn a e go nanga 600 fu den moro bun fetiwagi fu en. Te den Israelsma e si a legre fu Egepte e kon, dan den e bigin frede èn den e bari gi Moses: „Na fu di beripe no de na ini Egepte, meki yu tyari wi kon dede dyaso na ini a sabana?” Fu di Moses abi a frutrow taki Yehovah sa frulusu den, meki a e piki den: „No frede. Tanapu kánkan èn luku fa Yehovah o frulusu unu tide. . . . Yehovah srefi sa feti gi unu. Un musu tan pî èn un no musu du noti.”—Exodus 14:5-14.

12. Fa Yehovah e frulusu a pipel fu en?

¹² Soleki fa Moses ben taigi den Israelsma, Yehovah srefi ben o feti gi a pipel fu En. A e seni engel fu go yepi a pipel fu en. Na wan wondru fasi na engel fu Yehovah e meki taki a wolku di de leki wan pilari èn di ben e sori den Israelsma a pasi, dribi go na bakasei fu a grupu. A wolku dati e meki taki den Egeptesma de na dungru, aladi a e meki leti de na a sei fu den Israelsma (Exodus 13:21, 22; 14:19, 20). Now Moses e gi yesi na a komando fu Gado, èn a e langa en anu go na fesi. Bijbel e taki moro fara: „Yehovah meki wan tranga winti fu owstusei dribi a watra heri neti . . . Te fu kaba, den manpikin fu Israel waka na ini a se na tapu drei gron, aladi a watra ben de leki wan skotu na den reti-anusei èn na den kruktu-anusei.” Den Egeptesma e tan hari go baka a pipel fu Israel, ma Yehovah e horibaka gi a pipel fu en. A e tyari bruya kon na mindri den Egeptesma, èn baka dati a e taigi Moses: „Langa yu anu go na a se, so taki a watra kan tapu den Egeptesma, den fetiwagi nanga den fetiman fu den.” Yehovah sorgu taki nowan enkri srudati fu a legre fu Farao tan na libi!—Exodus 14:21-28; Psalm 136:15.

Leri wan sani fu a frulusu di Israel kisi

13. San den manpikin fu Israel du baka di den kisi frulusu?

¹³ Sortu krakti a ben abi tapu den Israelsma di tan na libi, di Yehovah frulusu den na wan wondru fasi? We, wantewante Moses nanga den manpikin fu Israel bigin singi prèisesingi gi Yehovah! Den ben e singi: „Meki mi singi gi Yehovah, bika a kisi bigi  glori. . . . Yehovah sa tiri leki kownu fu ala ten, iya, fu têgo” (Exodus 15:1, 18). Iya, a fosi sani di den ben du, na fu prèise Gado. A sani di den ben ondrofeni ben tyari kon na krin taki Yehovah na a Moro Hei Tiriman.

14. (a) San den sani di Israel ondrofeni e leri wi fu Yehovah? (b) San na a yaritekst fu 2008?

¹⁴ San wi e leri fu den tumusi bigi sani disi di pasa? Fa den e trowstu wi, èn sortu howpu wi e kisi? Wi kan si trutru taki Yehovah man frulusu a pipel fu en, awansi sortu tesi den e kisi. A sabi san fu du na ini ibri situwâsi di kan miti den. A Redi Se no ben tapu pasi gi Israel, fu di Yehovah meki a tranga winti di e komoto fu owstusei wai, fu opo a pasi gi den. Èn A ben meki a watra fu a Redi Se kiri den legre fu Farao. Te wi e prakseri den tori disi, dan neleki a psalm skrifiman wi o man taki: „Yehovah de na mi sei; mi no sa frede. San wan sma fu grontapu kan du mi?” (Psalm 118:6) Wi kan feni trowstu tu te wi e leisi den wortu fu Paulus di skrifi na Romesma 8:31: „Efu Gado de nanga wi, dan suma o man feti nanga wi?” Den wortu disi di skrifi nanga yepi fu santa yeye e tranga a bribi fu wi trutru! Den e puru iniwan frede noso tweifri di wi kan abi, èn den e gi wi howpu. Dati meki a fiti srefisrefi taki a yaritekst fu 2008, na: „Tanapu kánkan èn luku fa Yehovah o frulusu unu”!—Exodus 14:13.

15. Fu san ede den Israelsma ben musu fu gi yesi so taki Yehovah ben kan frulusu den fu Egepte, èn o prenspari a de taki wi na ini a ten disi e gi yesi?

¹⁵ Sortu tra sani wi kan leri fu a ten di den Israelsma gowe fu Egepte? Wi e leri taki wi musu gi yesi na Yehovah, awansi san a e taigi wi fu du. Den Israelsma ben gi yesi fu di den ben sreka sani finifini gi a Paskafesa. Den gi yesi fu di den tan na ini den oso na a neti fu 14 Nisan. Di den gowe libi Egepte te fu kaba, dan den ben musu komoto drape „leki wan legre” (Exodus 13:18). Na ini a ten disi, a de prenspari trutru taki wi e teki a rai di wi e kisi nanga yepi fu „a getrow èn koni srafu”! (Mateyus 24:45) Wi musu arki a wortu fu Gado bun di de leki wan sten di e taki na wi baka: „’Disi na a pasi. Waka na tapu, un pipel’, efu unu musu go na un reti-anusei noso efu unu musu go na un kruktu-anusei” (Yesaya 30:21). Aladi a bigi banawtu e kon moro krosibei, a kan pasa taki wi e kisi wan tu finifini rai. Fu man pasa a muilek ten dati sondro problema, dan wi sa abi fu de na ini wánfasi nanga den tra loyaal futuboi fu Yehovah.

16. San wi kan leri fu a fasi fa Gado seti sani fu frulusu den Israelsma?

¹⁶ Hori na prakseri tu taki Yehovah ben  tyari den Israelsma go na ini wan situwâsi pe a ben gersi leki den no ben abi nowan sei fu go, fu di den bergi ben de na a wan sei, èn a Redi Se na a tra sei. A ben gersi leki a sani disi no ben de wan koni sani fu du. Ma Yehovah ben sabi san a ben e du, èn ala sani waka na wan fasi di meki taki a kisi prèise, èn taki a pipel fu en kisi frulusu. Na ini a ten disi, a kan pasa taki wi no man frustan son leisi fu san ede son sani fu na organisâsi seti na wan spesrutu fasi. Ma wi kan abi ala frutrow taki Yehovah e tiri wi nanga yepi fu a getrow èn koni srafu fu en. Son leisi, a kan gersi leki den feanti fu wi abi bun bakapisi nanga den sani di den e du fu gens wi. Ma fu di wi leki libisma no sabi ala sani, meki a kan taki wi no man frustan krin san e pasa. Toku Yehovah man tyari wan kenki kon na a yoisti ten, neleki fa a ben du dati gi den manpikin fu Israel na ini owruten.—Odo 3:5.

Frutrow tapu Yehovah

17. Fu san ede wi kan abi ala frutrow taki Gado e tiri wi?

¹⁷ A no de fu taki dati te den Israelsma ben e si a wolku na deiten èn a pilari fu faya na neti, dan dati ben musu gi den a frutrow taki sani ben o waka bun nanga den. A ben de krin fu si taki „na engel fu a tru Gado” ben e tiri den aladi den ben de na pasi (Exodus 13:21, 22; 14:19). Na ini a ten disi, wi kan abi a frutrow taki Yehovah e tiri a pipel fu en, taki a e kibri den, èn taki a e frulusu den. Wi kan bribi a pramisi disi: „[Yehovah] no sa gowe libi den loyaalwan fu en. Fu tru den sa kisi kibri te ten di no skotu” (Psalm 37:28). Noiti wi musu frigiti taki den makti legre fu den engel e horibaka gi den futuboi fu Gado na ini a ten disi. Den e yepi wi fu ’tanapu kánkan èn fu luku fa Yehovah o frulusu wi’.—Exodus 14:13.

18. Fu san ede wi musu sorgu taki wi ’abi ala den sani di Gado gi wi fu feti’?

¹⁸ San o yepi wi alamala fu „tanapu kánkan” na ini a tru anbegi? Wi musu abi ala den sani di Gado gi wi fu feti, èn Paulus e taki fu den sani disi na ini a brifi di a skrifi gi den Efeisesma. Luku taki na apostel e gi wi a rai fu ’sorgu taki wi abi ala den sani di Gado gi wi fu feti’. Wi abi ala den fetisani disi? Na ini a yari 2008, a ben o bun te ibriwan fu wi e luku gi ensrefi efu a abi ala den fetisani disi, èn efu a sabi fa fu gebroiki den. A feanti fu wi, namku Satan Didibri, sabi den swakifasi fu wi, èn a e suku okasi fu meki wi naki futu. Wi musu „feti nanga” ogri yeye. Ma nanga yepi fu a krakti di Yehovah e gi wi, wi kan tron winiman!—Efeisesma 6:11-18; Odo 27:11.

19. Sortu grani wi sa kisi te wi e horidoro?

¹⁹ Yesus ben taigi den bakaman fu en: „Te unu horidoro, dan unu o kisi libi” (Lukas 21:19). Meki a de so taki wi na wan fu den sma di e horidoro na wan getrow fasi, awansi sortu tesi miti wi. Te wi e du dati, dan Yehovah sa yepi wi na wan lobi-ati fasi fu ’tanapu kánkan èn fu si fa a o frulusu wi’.

Fa yu ben sa piki?

• Sortu tumusi moi sani o pasa heri esi?

• Fa Yehovah sori na ini 1513 bifo Krestes, taki a man frulusu sma?

• Sortu fasti bosroiti yu abi?

[Aksi fu a tori disi]

[Prenspari pisi na tapu bladzijde 20]

A yaritekst gi 2008 sa de: „Tanapu kánkan èn luku fa Yehovah o frulusu unu.”—Exodus 14:13.

[Prenki na tapu bladzijde 17]

„Ala sani di sma skrifi fositen, ben skrifi fu leri wi wan sani”

[Prenki na tapu bladzijde 18]

Fu di Farao ben trangayesi, meki Yehovah tyari rampu kon gi den Egeptesma

[Prenki na tapu bladzijde 19]

Den Israelsma tan na libi fu di den ben du ala san Yehovah ben taigi den fu du