Wan heiden fesa kan kon tron wan Kresten fesa?

NA KRESNETITEN, na a kowru pisi ten fu a yari 2004, sma na ini Italiakondre ben e haritaki nanga makandra fu wan spesrutu tori. Son leriman ben feni taki den skoro no musu poti so furu prakseri moro na den Kresneti gwenti, èn sonwan fu den ben feni srefi taki skoro no musu abi nowan enkri sani fu du moro nanga den sortu gwenti disi. Den ben wani a sani disi, fu di den ben e si taki moro nanga moro fu den pikin di e kon tapu den skoro, no abi a Lomsu noso a Protestant bribi, èn den ben wani hori den pikin disi na prakseri. Ma tra grupu fu leriman nanga sma di e du tra wroko, ben feni taki den skoro musu lespeki den gwenti disi èn den musu tan hori densrefi na den gwenti disi.

Ma te yu e luku en bun, dan pe furu fu den gwenti fu Kresneti komopo? Di a haritaki disi ben e kon moro faya, dan a koranti fu a Vatikaan taki wan tu moi sani (L’Osservatore Romano).

Luku san a Lomsu koranti disi ben skrifi fu a dei te sma e hori Kresneti: „Wi no kan taki soifri sortu dei Yesus gebore, fu di buweisi no de di e sori sortu sma gebore na ini a Gran Kownukondre Rome na a ten dati, èn den sani di sma ondrosuku fu den hondrohondro yari  bakaten, no tyari dati kon na krin tu. . . . Soleki fa furu sma sabi, dan a Kerki fu Rome ben poti 25 december leki a dei di Yesus gebore, èn a kerki du dati na ini a di fu fo yarihondro. Na a ten dati di sma na ini Rome ben e anbegi difrenti gado, 25 december ben de wan dei fu gi grani na a gado fu a Son . . . Aladi Constantijn ben gi sma na ini Rome primisi kaba fu abi a Kresten bribi, toku furu sma, èn spesrutu srudati, ben e bribi na anansitori ete di abi fu du nanga . . . a gado fu a Son. Ala den fesa disi di sma ben e hori tapu 25 december ben abi den rutu na ini pôpi gwenti fu a ten dati. A sani disi meki taki a Kerki fu Rome bosroiti fu meki 25 december tron wan Kresten fesadei, fu di den poti a tru Son fu Retidu, namku Yesus Krestes, na ini a presi fu a gado fu a Son. Iya, den poti 25 december leki a dei di a gebore.”

Fa a de nanga a Kresnetibon di Lomsusma na ini a ten disi e gebroiki na ini na anbegi fu den?

Na artikel na ini a Lomsu koranti skrifi taki na ini owruten, sma ben e bribi taki „furu fu den bon di e tan grun a heri yari, abi krakti di kan kibri sma gi siki”. A koranti e taki moro fara: „Tapu 24 december, a dei fosi Kresneti, sma ben gwenti fu fruteri a pôpi tori fu a bon na ini a paradijs na grontapu, fu gi grani na Adam nanga Eva. Fu taki en leti, a bon ben musu de wan aprabon, ma fu di aprabon no ben o fiti gi a kowru pisi ten fu a yari, meki den ben e poti wan pinabon, èn den ben e poti wan tu apra na den taki fu a bon disi. Èn fu prenki taki na ini a ten di e kon libisma o kisi frulusu èn o kon bun baka nanga Gado, meki den ben e poti sosrefi spesrutu sortu brede di ben meki fu buskutu di sma ben masi, èn den brede disi ben musu prenki taki Yesus ben de na den mindri. Den ben e poti tra sani tu gi pikin-nengre, soleki switi sani nanga kado.” Ma fa den ben e hori a fesa disi baka a ten dati?

A Lomsu koranti sori taki a gwenti di sma abi fu gebroiki wan Kresnetibon, bigin na ini Doisrikondre na ini a di fu 16 yarihondro. A koranti taki moro fara: „Italiakondre na wan fu den lasti kondre pe sma bigin gebroiki a Kresnetibon. Wan reide fu san ede den no ben e gebroiki a bon disi, na taki furu sma ben feni taki a sani dati na wan gwenti fu a Protestant bribi. Fu dati ede, den Lomsusma ben feni taki wan nyanyan-baki [wan fu den sani di e prenki a ten di Krestes gebore] ben musu kon na ini a presi fu a Kresnetibon” Pawsu Paulus VI, bigin nanga a gwenti fu poti wan bun bigi Kresnetibon [na tapu Sint-Pietersplein, na ini Rome] na sei den popki nanga den tra sani di e prenki a ten di Yesus gebore.

Yu feni en wan bun sani taki wan kerki fesiman e moksi owruten heiden gwenti nanga a Kresten bribi? Bijbel e sori tru Kresten san na a yoisti sani fu du. A e taki: „San regtfardikifasi abi fu du nanga kruktudu? Noso, san leti abi fu du nanga dungru?”—2 Korentesma 6:14-17.

[Prenki na tapu bladzijde 8, 9]

A Kresnetibon na a Vatikaan (na tapu a tra bladzijde) èn den sani di e prenki a ten di Krestes gebore

[Sma di abi a reti fu a prenki]

© 2003 BiblePlaces.com

[Prenki na tapu bladzijde 9]

A gado fu a son

[Sma di abi a reti fu a prenki]

Museum Wiesbaden