Wan sma e yepi yu fu tan abi wan tranga bribi?

USIA ben abi 16 yari nomo di a tron Kownu fu a zuidsei kownukondre fu Yuda. A tiri moro leki 50 yari, namku fu 829 bifo Krestes te go miti 778 bifo Krestes. Sensi di a ben de wan yongu boi, Usia „tan du san ben reti na ini na ai fu Yehovah”. San ben yepi Usia fu libi na wan opregti fasi? Bijbel e taki: „Doronomo [Usia] ben e du muiti fu suku Gado na ini den dei fu Sakaria, a sma di ben leri en fu frede a tru Gado; èn na a ten di a ben e suku Yehovah, a tru Gado ben blesi en.”—2 Kroniki 26:1, 4, 5.

Disi na a wan-enkri sani di Bijbel e fruteri fu Sakaria, a leriman fu a kownu. Ma leki ’a sma di ben e leri Usia fu frede a tru Gado’, Sakaria ben abi wan bun krakti tapu a yongu tiriman disi, so taki a ben kan du san bun. Soleki fa wan Bijbel e sori, dan a de krin taki Sakaria ben de „wan man di ben sabi den santa leri heri bun, a ben abi furu ondrofeni na ini na anbegi fu Yehovah, èn a ben sabi fa fu leri trawan den sani di a ben sabi” (The Expositor’s Bible). Wan sabiman fu Bijbel e taki disi fu Sakaria: „A ben sabi profeititori heri bun . . . a ben de wan koni èn opregti man, èn soleki fa a sori, a ben abi furu krakti tapu Usia.”

Fu di Usia ben de getrow, meki Yehovah blesi en na difrenti fasi, èn a „ben abi bun furu makti” fu di „a tru Gado ben tan yepi en”. Iya, „na ini den dei fu Sakaria”, Usia ben abi bun bakapisi tu na ini den tra sani di a ben e du, fu di a ben de wan getrow anbegiman fu Yehovah (2 Kroniki 26:6-8). Di sani ben e go bun nanga Usia, dan a frigiti den sani di a ben leri fu Sakaria, a leriman fu en. Usia „ati kon kisi so furu bigimemre taki a sani dati tyari pori kon gi en, èn a meki taki a no handri na wan getrow fasi nanga Yehovah”. A sani di Usia du, ben sori taki a no ben abi nowan lespeki gi Gado. Fu dati ede, Yehovah meki a kisi wan takru siki na en skin, so taki a no ben man tyari ala den frantwortu fu en moro leki kownu.—2 Kroniki 26:16-21.

Yu abi wan sma di de leki wan leriman gi yu, wan sma di e gi yu deki-ati „fu suku Gado?” Kande yu leki yonguwan, owruwan, mansma, noso umasma abi so wan leriman. Efu dati de so, dan yu musu warderi a leriman dati, fu di den rai di a e gi yu kan yepi yu fu tan du san bun na ini Yehovah ai. Arki te so wan lepi Kresten e taki nanga yu, èn poti bun prakseri na den rai di a e gi yu. Meki a de so taki noiti yu e tapu yu yesi gi den bun rai fu a ’sma di e leri yu fu frede a tru Gado’.—Odo 1:5; 12:15; 19:20.