Yu de srekasreka gi a dei fu Yehovah?
Yu de srekasreka gi a dei fu Yehovah?
„A bigi dei fu Yehovah de krosibei. A de krosibei, èn a e hasti ensrefi fu tru.”—SEFANYA 1:14.
1-3. (a) San Bijbel e taki fu a dei fu Yehovah? (b) Sortu „dei fu Yehovah” de krosibei?
A BIGI dei fu Yehovah a no wan dei fu 24 yuru. A de wan langa pisi ten pe Gado sa strafu den ogriwan. Den sma di no sabi Gado abi reide fu frede a dei dati, fu di a de wan dei fu dungru, atibron, faya atibron, banawtu, nanga pori (Yesaya 13:9; Amos 5:18-20; Sefanya 1:15). A profeiti Yoèl ben taki: „Helu fu a dei dati; bika a dei fu Yehovah de krosibei, èn na Almaktiwan sa tyari bigi pori kon na a dei dati!” (Yoèl 1:15) Ma na a bigi dei dati, Gado sa de a Frulusuman fu den wan „di abi wan opregti ati”.—Psalm 7:10.
2 Den wortu „dei fu Yehovah” abi fu du nanga a strafu di Gado strafu ogrisma na difrenti pisi ten. Fu eksempre, wan fu den „dei fu Yehovah” ben doro gi den sma fu Yerusalem, di Yehovah meki den Babilonsma pori a foto dati na ini 607 bifo Krestes (Sefanya 1:4-7). Wan srefi sortu sani pasa na ini a yari 70, di Gado meki a legre fu Rome strafu a Dyu pipel di no ben wani poti bribi na ini a Manpikin fu en (Danièl 9:24-27; Yohanes 19:15). Bijbel e taki tu dati wan „dei fu Yehovah” o kon te a sa ’feti nanga ala den pipel’ (Sakaria 14:1-3). Nanga yepi fu santa yeye, na apostel Paulus ben sori taki a dei dati abi fu du nanga a denoya fu Krestes di bigin na ini 1914, di Yesus tron Kownu na hemel (2 Tesalonikasma 2:1, 2). Fu di a de krin fu si taki a dei fu Yehovah de krosibei, meki a yaritekst di Yehovah Kotoigi ben teki gi a yari 2007, ben fiti trutru. A yaritekst disi teki puru fu Sefanya 1:14, pe skrifi: „A bigi dei fu Yehovah de krosibei.”
3 Fu di a bigi dei fu Gado de krosibei, meki now na a ten fu sori taki yu de srekasreka. Fa yu kan sreka yusrefi gi a dei dati? Sortu tra sani yu musu du ete fu de srekasreka gi a dei fu Yehovah?
Un musu de srekasreka
4. Gi sortu bigi tesi Yesus ben sreka ensrefi?
4 Di Yesus Krestes taki a profeititori di abi fu du nanga a kaba fu a sistema disi, dan a taigi den disipel fu en: „Un musu de srekasreka” (Mateyus 24:44). Di Yesus taki a sani dati, dan ensrefi ben de srekasreka gi wan bigi tesi. A ben o gi en libi leki wan frulusu-ofrandi (Mateyus 20:28). San wi kan leri fu a fasi fa Yesus ben sreka ensrefi?
5, 6. (a) Fa a lobi di wi abi gi Gado èn gi tra sma e yepi wi fu de srekasreka gi a dei fu Yehovah? (b) Fa na eksempre fu Yesus e leri wi fu lobi tra sma?
5 Yesus ben abi bigi lobi gi Yehovah èn gi den regtfardiki markitiki fu En. Hebrewsma 1:9 e taki fu Yesus: „Yu ben lobi regtfardikifasi, èn yu no ben lobi kruktudu kwetikweti. Fu dati ede Gado, yu Gado, salfu yu nanga na oli di e gi bigi prisiri, so taki yu kan prisiri moro leki den kompe fu yu.” Fu di Yesus ben lobi en hemel Tata, meki a tan getrow na En. Te wi abi a srefi lobi disi gi Gado èn te wi e libi soleki fa a wani, dan a sa kibri wi (Psalm 31:23). Te wi abi a lobi disi èn te wi e gi yesi na Yehovah, dan dati sa yepi wi fu de srekasreka gi a bigi dei fu En.
6 Wan fu den prenspari fasi di Yesus ben abi, na taki a ben lobi tra sma. Iya, „a ben sari den, bika sma ben pina den èn den ben waka bruyabruya leki skapu di no abi skapuman” (Mateyus 9:36). Fu dati ede Yesus ben e preiki a bun nyunsu gi den sma, neleki fa wi e preiki a Kownukondre boskopu gi trawan, fu di wi lobi den. Te wi lobi Gado èn tra sma, dan wi sa de fayafaya preikiman èn dati sa yepi wi fu de srekasreka gi a bigi dei fu Yehovah.—Mateyus 22:37-39.
7. Fu san ede wi kan abi prisiri, aladi wi e wakti a dei fu Yehovah?
7 Yesus ben e prisiri fu du a wani fu Yehovah (Psalm 40:8). Efu wi de neleki Yesus, dan wi sa prisiri fu du santa diniwroko gi Gado. Neleki Yesus, wi sa lobi fu gi sma sani, èn disi sa meki wi de koloku trutru (Tori fu den Apostel 20:35). Iya, ’a prisiri di Yehovah e gi de leki wan fortresi gi wi’. Te wi abi a prisiri disi, dan dati sa yepi wi tu fu de srekasreka gi a bigi dei fu Yehovah.—Nehemia 8:10.
8. Fu san ede wi musu begi Yehovah doronomo?
8 Fu di Yesus ben e begi Gado fayafaya, meki a ben de srekasreka gi den tesi di a ben o kisi. A ben e begi di Yohanes ben e dopu en. Yesus begi wan heri neti, fosi a bosroiti suma ben o tron apostel fu en (Lukas 6:12-16). Èn a no de fu taki dati te wi e leisi na ini Bijbel fa Yesus ben e begi fayafaya na a lasti neti di a ben de na grontapu, dan dati e naki wi ati trutru, a no so? (Markus 14:32-42; Yohanes 17:1-26) Yu gwenti fu begi Gado, neleki fa Yesus ben gwenti fu du dati? Begi Yehovah doronomo èn teki yu ten te yu e begi. Aksi Yehovah fu meki a santa yeye tiri yu. Te yu e si fa a e tiri yu nanga en santa yeye, dan no draidrai fu teki a yepi dati. Na ini a prenspari ten disi pe a bigi dei fu Yehovah e kon krosibei, a de tumusi prenspari fu abi wan bun matifasi nanga wi hemel Tata. Sobun, begi Gado doronomo, so taki yu kan tan kon moro krosibei na en.—Yakobus 4:8.
9. Fu san ede wi musu si en leki wan prenspari sani taki a nen fu Yehovah kon santa?
9 Wan tra sani di yepi Yesus fu de srekasreka gi den tesi di a ben o kisi, na a wani di a ben wani taki a nen fu Yehovah musu kon santa. Fu taki en leti, a leri den bakaman fu en taki den ben musu aksi Gado a sani disi: „Meki yu nen kon santa” (Mateyus 6:9). Te wi wani trutru taki a nen fu Yehovah musu kon santa, noso taki sma e tan sori lespeki gi a nen dati, dan wi musu sorgu taki wi no e du nowan enkri sani di sa pori a nen dati. Disi sa yepi wi fu de srekasreka gi a bigi dei fu Yehovah.
Yu musu tyari wan tu kenki kon?
10. Fu san ede wi musu ondrosuku wi libi?
10 Kon meki wi taki dati a dei fu Yehovah e kon tamara. Yu sa de srekasreka trutru? Ibriwan fu wi musu ondrosuku ensrefi fu kon sabi efu a musu tyari wan tu kenki kon na ini a fasi fa a e libi noso e denki. Fu di a libi syatu èn fu di wi no sabi san a tamara o tyari kon, meki ibriwan fu wi musu du muiti ibri dei fu kon moro krosibei na Gado (Preikiman 9:11, 12; Yakobus 4:13-15). Sobun, meki wi go luku wan tu sani di wan sma kande ben sa musu kenki na ini en libi.
11. San yu poti leki marki te a abi fu du nanga a leisi di yu e leisi Bijbel?
11 Wan prenspari sani di wi musu du, na taki wi musu leisi Bijbel ibri dei, soleki fa ’a getrow srafu’ taigi wi fu du (Mateyus 24:45). Yu kan poti leki marki fu leisi Bijbel fu Genesis te go miti Openbaring ibri yari, èn fu denki dipi fu den sani di yu e leisi. Te yu e leisi fo kapitel ibri dei, dan yu kan leisi ala 1189 kapitel fu Bijbel na ini wán yari. Ibri kownu fu Israel ben musu leisi a Wet fu Yehovah „ala den dei fu en libi”. Soleki fa a sori, dan Yosua ben e du a srefi sani (Deuteronomium 17:14-20; Yosua 1:7, 8). A prenspari trutru taki Kresten owruman e leisi Gado Wortu ibri dei, fu di dati sa yepi den fu gi sma „a bun leri”!—Titus 2:1.
12. San yu musu du, now di a dei fu Yehovah de krosibei?
12 Fu di a dei fu Yehovah de krosibei, meki yu musu go na den Kresten konmakandra doronomo èn yu musu du ala muiti fu teki prati na den (Hebrewsma 10:24, 25). Dati sa yepi yu fu tron wan moro bun Kownukondre preikiman di e suku sma di abi a yoisti denki fu man kisi têgo libi, èn yu sa man yepi den sma disi tu (Tori fu den Apostel 13:48). Kande yu kan du moro na ini a gemeente. Fu eksempre, yu kan yepi den owruwan èn yu kan gi yonguwan deki-ati. Yu sa kisi prisiri trutru te yu e du dati!
A fasi fa yu e handri nanga tra sma
13. Sortu sani wi musu aksi wisrefi, te a abi fu du nanga a rai di wi kisi fu tron nyun sma?
13 Fu di a dei fu Yehovah e kon heri esi, dan a kan de fanowdu taki yu e meki moro muiti fu „tron wan nyun sma di de soleki fa Gado wani, nanga trutru regtfardikifasi èn loyaalfasi” (Efeisesma 4:20-24). Te yu e kon kisi den fasi fu Gado, dan trawan o si taki yu e ’waka nanga a yeye’ èn taki yu e sori a froktu fu a yeye dati (Galasiasma 5:16, 22-25). Yu kan kari wan tu sani di yu nanga yu osofamiri du fu kon tron nyun sma? (Kolosesma 3:9, 10) Fu eksempre, trawan sabi yu leki wan sma di e du bun sani gi den Kresten brada nanga sisa fu yu èn gi tra sma? (Galasiasma 6:10) Te yu e studeri Bijbel doronomo, dan dati sa yepi yu fu kon kisi den fasi fu Yehovah di sa yepi yu fu de srekasreka gi a dei fu en.
14. Fu san ede wan sma musu begi Gado fu gi en a santa yeye so taki a kan leri fu dwengi ensrefi?
14 Kon meki wi taki dati yu e atibron esi, èn yu e kon si taki yu musu leri fu dwengi yusrefi moro. San yu kan du dan? A santa yeye kan yepi yu fu dwengi yusrefi, fu di dati na wan froktu fu a yeye. Fu dati ede, teki a rai di Yesus e gi yu fu aksi Gado fu gi yu en santa yeye. Yesus ben taki: „Tan aksi, dan unu sa kisi; tan suku, dan unu sa feni; tan naki na tapu a doro, dan a doro sa opo gi unu. . . . Efu unu di abi takru fasi, sabi fa fu gi un pikin bun sani, dan a no abi misi taki a Tata di de na hemel sa gi santa yeye na den sma di e aksi en!”—Lukas 11:9-13.
15. San yu musu du te yu nanga wan tra Kresten no man feni en nanga makandra?
15 Kon meki wi taki dati yu nanga wan tra Kresten no man feni en nanga makandra. Efu dati de so, dan du ala san yu man fu meki sani bun baka nanga en, èn na so a vrede nanga a wánfasi o tan na ini a gemeente (Psalm 133:1-3). Fiti a rai di Yesus gi na Mateyus 5:23, 24 noso na Mateyus 18:15-17. Efu yu abi a gwenti fu meki a son dongo aladi yu e mandi tapu wan sma, dan no draidrai fu meki sani kon bun baka. Nofo tron, ala san de fanowdu, na fu gi a sma pardon. Paulus ben skrifi: „Tron sma di e du bun gi makandra, èn sori sari-ati na wan lobi fasi; un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes.”—Efeisesma 4:25, 26, 32.
16. Fa trowpatna musu sori taki den lobi makandra trutru?
16 Trowpatna musu sori taki den lobi makandra trutru, èn son leisi a de fanowdu taki den e gi makandra pardon. Efu a de so taki yu musu sori moro lobi nanga switifasi gi yu trowpatna, dan suku yepi na Gado èn na ini a Wortu fu en. Luku a rai di skrifi na 1 Korentesma 7:1-5. Yu e fiti a rai disi? Noso yu musu du wan sani fu sorgu taki a trowlibi fu yu e waka bun, èn taki yu nanga yu patna e tan getrow na makandra? A no de fu taki dati disi na wan afersi pe wan masra noso wan wefi musu sori taki a lobi en patna trutru.
17. San wan sma musu du te a du wan seryusu sondu?
17 Fa a de te yu du wan seryusu sondu? No draidrai fu poti sani kon reti baka. Go suku yepi na den Kresten owruman. Den begi fu den owruman èn den rai di den o gi yu, sa yepi yu fu kon krosibei baka na Gado (Yakobus 5:13-16). Begi Yehovah èn sori berow. Efu yu no e du dati, dan yu no sa firi bun èn yu sa abi konsensi fonfon. Na dati ben pasa nanga David. Ma a no de fu taki dati a ben firi bun di a fruteri Yehovah fu den sondu fu en! David ben skrifi: „Koloku fu a sma di kisi pardon gi na ogri di a du, èn gi a sondu fu en. Koloku fu a man di no abi fowtu na ini Yehovah ai, èn di no e prakseri fu du bedrigi sani” (Psalm 32:1-5). Yehovah e gi pardon na den wan di abi trutru berow fu den sondu fu den.—Psalm 103:8-14; Odo 28:13.
No tron wan pisi fu grontapu
18. Fa yu musu denki fu a grontapu?
18 A no de fu taki dati yu e fruwakti a nyun grontapu di wi hemel Tata pramisi wi. Ma fa yu e denki fu a grontapu disi di lai nanga sma di no sabi Gado? Satan, „a tiriman fu a grontapu”, no ben abi makti na Yesus tapu (Yohanes 12:31; 14:30). A no de fu taki dati yu no wani taki Didibri nanga a grontapu fu en abi krakti na yu tapu. Dati meki yu musu gi yesi na a rai fu na apostel Yohanes, di ben skrifi: „No lobi grontapu nanga den sani fu grontapu.” Dati na bun rai, fu di „grontapu e pasa gowe nanga den lostu fu en, ma a sma di e du a wani fu Gado sa tan fu têgo”.—1 Yohanes 2:15-17.
19. Sortu marki Kresten yonguwan musu poti gi densrefi?
19 Yu e yepi den pikin fu yu fu ’no meki grontapu flaka den’? (Yakobus 1:27) Satan e pruberi fu hari den pikin fu yu komoto na Gado sei, neleki fa wan fisiman e hari fisi komoto na ini a watra. Difrenti grupu nanga tra organisâsi seti fu meki yonguwan teki a denki fu a grontapu fu Satan abra. Ma futuboi fu Yehovah na memre kaba fu a wan-enkri organisâsi di sa tan abra te na ogri sistema disi sa kisi pori. Sobun, wi musu gi Kresten yonguwan deki-ati fu abi „furu fu du na ini a wroko fu Masra” (1 Korentesma 15:58). Papa nanga mama di lobi Gado musu yepi den pikin fu den fu poti marki gi densrefi di sa meki taki den abi wan koloku libi di e tyari wini kon gi den. Na so den pikin o man gi grani na Gado èn den sa man de srekasreka gi a dei fu Yehovah.
Luku pasa a bigi dei fu Yehovah
20. Fu san ede wi musu hori a têgo libi na prakseri?
20 Te yu e hori a têgo libi na prakseri, dan dati o yepi yu fu wakti a dei fu Yehovah nanga wan korostu ati (Yudas 20, 21). Fu di yu e fruwakti taki yu sa libi fu têgo na ini a Paradijs, meki yu abi a howpu taki yu sa kon krakti baka neleki di yu ben yongu, èn taki yu sa abi ala ten fu du sani di e tyari wini kon gi yu. Yu sa abi ala ten tu fu leri moro fu Yehovah. Fu taki en leti, yu o man leri moro fu Gado fu têgo, bika nownowde libisma sabi soso „wan tu fu den sani di a du” (Yob 26:14). Dati na wan moi howpu trutru!
21, 22. San yu nanga sma di kisi wan opobaka o man leri fu makandra?
21 Na ini a Paradijs, den sma di kisi wan opobaka o man fruteri wi moro fini fa a ben de na ini a ten di den ben de na libi. Heinok o man fruteri wi san yepi en fu de sondro frede di a ben e meki a boskopu fu Yehovah bekènti gi den ogrisma (Yudas 14, 15). A no de fu taki dati Noa o fruteri wi fa a ben de fu bow na ark. Abraham nanga Sara o man fruteri wi fa den ben e firi di den ben musu gowe libi a switi libi fu den na ini Ur, fu go libi na ini tenti. Prakseri den sani di Ester o man fruteri wi fu a fasi fa a opo taki gi a pipel fu en, èn san a du fu sorgu taki Haman no kisi na okasi fu kiri den Dyu (Ester 7:1-6). Yona o man fruteri wi fu den dri dei di a ben de na ini a bere fu a bigi fisi, èn Yohanes a Dopuman o man fruteri wi fa a ben e firi di a dopu Yesus (Lukas 3:21, 22; 7:28). Dati na tumusi moi sani di wi sa leri!
22 Na ini a Dusun Yari Tiri fu Krestes, yu kan abi a grani fu yepi den wan di kisi wan opobaka, fu kon abi „a sabi fu Gado” (Odo 2:1-6). Na ini a ten disi, a e gi prisiri trutru fu si taki sma e kon leri sabi Yehovah Gado, èn taki den e du san den e leri! Ma na ini a ten di e kon, yu sa man gi leri na sma di ben e libi langa ten pasa. Prakseri fa a sa gi yu prisiri te Yehovah sa blesi a muiti di yu e meki fu gi den sma disi leri, èn te den e gi yesi na den sani di den e leri!
23. Sortu fasti bosroiti wi musu abi?
23 Den blesi di wi leki a pipel fu Yehovah e kisi now, furu so te taki wi leki onvolmaakti sma no man kari den alamala (Psalm 40:5). Wi de nanga tangi spesrutu gi ala den sani di Gado seti, so taki wi kan anbegi en (Yesaya 48:17, 18). Awinsi na ini sortu situwâsi wi de, meki wi du santa diniwroko gi Yehovah nanga wi heri ati, aladi wi e wakti a bigi dei fu en.
San yu ben sa piki?
• San na „a dei fu Yehovah”?
• Fa yu kan sorgu taki yu de srekasreka gi a dei fu Yehovah?
• Sortu kenki wi musu tyari kon kande, now di a bigi dei fu Gado de so krosibei?
• Sortu blesi yu ben o wani ondrofeni, baka te a dei fu Yehovah pasa?
[Aksi fu a tori disi]
[Prenki na tapu bladzijde 12]
Yesus ben de srekasreka gi den tesi di a ben o kisi
[Prenki na tapu bladzijde 15]
A sa de wan bigi grani fu yepi den wan di kisi wan opobaka fu kon leri sabi Yehovah!