Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Fu san ede na „Owru Testamenti” e gi wi wini srefi na ini a ten disi?

A Skrifiman fu en no de wan ogri-ati gado, ma a lobi-ati Gado, Yehovah. Yesus nanga den fosi bakaman fu en, ben tan taki fu den Hebrew Buku fu Bijbel. Den abi bun rai na ini di wi kan gebroiki na ini na aladei libi èn den e gi wi wan moi howpu gi a ten di e kon.—1/9, bladzijde 4-7.

• San kon na krin fu di Gado meki wan heri pisi ten pasa sensi di Adam nanga Eva sondu?

Na ini den sowan 6000 dusun yari di pasa, a kon na krin taki Satan na wan leiman. Adam nanga Eva èn milyunmilyun bakapikin fu den kon dede. Na ini den someni yari di pasa a kon na krin taki sani no e waka bun nanga libisma te Gado no e tiri den, èn libisma no abi a reti èn den no man du san den wani.—15/9, bladzijde 6, 7.

• Fu san ede Gado no krutu Yakob di a taigi en papa taki en na Esau?

Yakob ben abi a reti fu kisi a blesi fu en papa, fu di a ben bai a reti disi fu Esau. Di Isak kon si taki a ben blesi Yakob, dan a libi a sani so. Èn Gado, di ben kan sorgu taki Esau kisi a blesi, no du noti fu kenki a tori disi. A de krin fu si taki Gado ben wani taki Yakob kisi a blesi.—1/10, bladzijde 31.

• Fa a abi di wi abi wan konsensi e sori taki na evolutie-leri no tru?

Sma fu ala ras nanga kulturu de klariklari fu yepi makandra, awinsi dati kan tyari problema kon gi den. Libisma e broko den ede nanga trawan, ma meti no e du dati. Efu libisma ben de meti, dan den no ben o yepi trawan, fu di meti e feti fu du ala san den man fu tan na libi.—15/10, bladzijde 20.

• Fu san ede wi kan taki dati Gado abi sakafasi èn na sortu fasi a sori a fasi disi?

Leki a Moro Hei Tiriman èn leki a Mekiman, Gado no abi swakifasi neleki wi. Ma soleki fa a skrifi na ini 2 Samuel 22:36, Gado abi sakafasi fu di a e broko en ede nanga mofinasma di e pruberi fu du a wani fu en, èn a e sori sari-ati gi den. Na wan agersi fasi, Gado e langa en anu komoto fu hemel fu sori switifasi gi den wan di abi frede gi en.—1/11, bladzijde 4, 5.

• Fa pisipisi broko prapi fu owruten e sori taki den tori na ini Bijbel de tru?

Ondrosukuman ben feni pisipisi broko prapi na ini Samaria di ben abi den nen fu seibi lo soleki fa a skrifi na ini Yosua 17:1-6. Den pisipisi broko prapi fu Arad e sori taki den sani di Bijbel e taki fu den priester famiri èn sosrefi fu a nen fu Gado, de tru. Pisipisi broko prapi fu a kondre Lakis e sori fa a situwâsi ben de na politiek sei, èn sortu dyugudyugu ben de na ini Yuda bifo den Babilonsma go feti nanga den.—15/11, bladzijde 12-14.

• Sortu buweisi de taki Lukas skrifi a buku Tori fu den Apostel?

Na Evangelie fu Lukas èn a buku Tori fu den Apostel, na brifi di skrifi gi Teofilus. Disi e sori taki na Lukas skrifi den tu buku disi. Den vers pe wortu soleki „wi”, nanga „un” skrifi, e sori taki Lukas ben e teki prati na son sani di skrifi na ini den buku disi (Tori fu den Apostel 16:8-15).—15/11, bladzijde 18.

• A bun te wan Kresten e onti meti noso e fanga fisi?

Sensi a ten fu Noa, Gado gi libisma primisi fu kiri èn fu nyan meti. Ma a gi a komando taki den musu meki a brudu lon komoto na ini a skin fu den meti disi, èn disi e sori krin taki wi musu lespeki a libi fu den meti, fu di na Gado gi den a libi disi. Kresten no musu kiri meti na wan ogri-ati fasi, soso fu abi prisiri, noso fu firi switi te den fanga fisi noso kiri wan meti. A de prenspari taki Kresten e gi yesi na den wet fu „Caesar” èn taki den e hori a konsensi fu trawan na prakseri (Romesma 14:13).—1/12, bladzijde 31.