A nyun Waktitoren nanga studie-artikel

A TIJDSCHRIFT di yu e leisi now, na a fosi nyun Waktitoren nanga studie-artikel. Wi wani meki yu kon sabi pikinso sortu sani kenki na ini a tijdschrift disi.

A Waktitoren nanga studie-artikel e kon na doro gi Yehovah Kotoigi èn gi bijbelstudie di e go na fesi. A sa kon na doro wán leisi wan mun, èn fo noso feifi studie-artikel sa de na ini. Na tapu a kafti fu a tijdschrift, a sa de fu si o ten den gemeente sa studeri den difrenti studie-artikel disi. Tra fasi leki A Waktitoren gi a publiki, A Waktitoren nanga studie-artikel o abi a srefi kafti ibri mun, fu di a no sa prati na ini a preikiwroko.

Na tapu bladzijde 2 fu a tijdschrift, yu kan leisi syatu san na a marki fu ibri studie-artikel, èn yu kan leisi tu san na den nen fu den tra artikel na ini a tijdschrift. Disi sa de wan bigi yepi gi den brada di e teki fesi na a Waktitoren-studie, te den musu sreka densrefi fu hori wan bun takimakandra fu den artikel disi na a gemeente konmakandra.

Yu sa si taki den studie-artikel kon moro syatu. Na so fasi, moro ten sa de fu poti prakseri na prenspari tekst te a Waktitoren-studie e hori. Wi e gi yu deki-ati fu poti prakseri ibri wiki na ala den tekst di kari na ini na artikel. Te a wortu „leisi” skrifi na fesi wan tekst, dan dati wani taki dati un musu leisi a tekst dati na a Waktitoren-studie èn un musu taki fu en. Efu ten de ete, dan unu kan leisi den tra tekst tu. Son leisi a wortu „luku” sa skrifi na fesi sonwan fu den tekst. Fu di den tekst disi no e poti prakseri na a moro prenspari tori na ini a paragraaf, meki a no de fanowdu fu leisi den tekst disi na a gemeente konmakandra. Ma toku den sortu tekst disi e tyari moro sani kon na krin di abi fu du nanga a tori na ini a paragraaf, noso kande den e horibaka gi a tori dati. Wi e gi yu deki-ati fu leisi den tekst disi te yu e sreka yusrefi gi a Waktitoren-studie. Kande yu kan taki syatu fu den te yu e gi piki.

Na alayari raportu no sa kon moro na ini A Waktitoren. Bigin fu a yari 2008, a sa kon na ini Wi Kownukondre diniwroko èn na ini a Jaarboek. Ma soleki fa wi ben taki kaba, dan tra artikel sa de fu feni tu na ini A Waktitoren nanga studie-artikel. Aladi wi no sa poti furu prakseri na den artikel disi na a gemeente konmakandra, toku wi e gi yu deki-ati fu leisi den artikel disi bun. „A getrow èn koni srafu” skrifi den artikel disi tu fu yepi wi fu kon abi wan tranga bribi.—Mat. 24:45-47.

Leki lasti, a bun fu sabi taki A Waktitoren gi a publiki èn A Waktitoren nanga studie-artikel a no tu difrenti tijdschrift. Den ala tu nen A Waktitoren—A e taki fu Yehovah Kownukondre. Na tapu bladzijde 2 fu den tijdschrift disi skrifi san na a marki fu A Waktitoren. Den ala tu sa kon na ini a jaargang. Èn na artikel „Yu e memre disi ete?” di o kon na ini A Waktitoren nanga studie-artikel, sa taki fu tori di skrifi na ini ala tu Waktitoren.

Sensi 1879, A Waktitoren tan meki den tru tori fu Gado Kownukondre bekènti, srefi na ten di orloku ben de, na ten di sani no ben e go bun na ekonomia sei, èn na ten di sma ben e frufolgu a pipel fu Yehovah. Wi e begi Yehovah fu sorgu taki a nyun Waktitoren disi kan tan meki den tru tori dati bekènti. Èn wi e begi Yehovah fu blesi yu leki leisiman, aladi yu e kisi wini fu a nyun Waktitoren disi nanga studie-artikel.