Den du wan moro bun sani nanga den libi—Yu kan du dati tu?

MARC na wan brada na ini Kanada. A ben e wroko na wan presi pe den e meki kefalek sortu masyin gi organisâsi di e ondrosuku stari nanga planeiti. A ben wroko wan tu dei na ini a wiki èn a ben de wan gewoon pionier. Wan dei, wan wrokobasi fu Marc ben wani gi en wan moro hei posisi, pe a ben musu wroko moro langa, èn a ben o kisi furu moni. San Marc du?

Amy na wan sisa na ini den Filippijnen. A ben e du a gewoon pionierwroko di a ben de na ini a lasti klas fu a skoro pe a ben go. Baka di a klari a skoro, a ben kan kisi wan bun posisi na wan wrokope. A wroko dati ben o teki furu fu en ten, ma a ben o pai furu moni. San Amy du?

Marc nanga Amy teki difrenti bosroiti. A bakapisi fu a bosroiti di den teki e sori taki a rai di den Kresten fu owruten Korente ben kisi, na wan bun rai. Na apostel Paulus ben skrifi: „Meki den wan di e gebroiki den sani fu grontapu, de leki sma di no e gebroiki den sani fu grontapu dorodoro.”—1 Kor. 7:29-31.

Gebroiki den sani fu grontapu, ma no gebroiki den dorodoro

Fosi wi o go luku san pasa nanga Marc èn nanga Amy, wi o luku syatu san den wortu „den sani fu grontapu” wani taki, soleki fa Paulus gebroiki den wortu dati na ini a brifi gi den Korentesma. Na ini a tekst dati, den sani fu grontapu abi fu du nanga den aladei sani fu a libi di wi abi fanowdu, soleki wan presi fu tan, nyanyan, nanga krosi fu weri. Furu fu wi musu wroko fu man abi den sani dati di wi abi fanowdu aladei. A no de fu taki, dati wi musu gebroiki den sani fu grontapu fu man du san Bijbel taki, namku fu sorgu gi wisrefi nanga wi osofamiri (1 Tim. 5:8). Ma na a srefi ten, wi e frustan taki „grontapu e pasa gowe” (1 Yoh. 2:17). Fu dati ede, wi e gebroiki soso den sani fu a grontapu di de fanowdu, ma wi no e ’gebroiki den dorodoro’.—1 Kor. 7:31.

Furu brada nanga sisa kisi deki-ati fu a rai dati fu Bijbel, di e taki dati wi no musu gebroiki den sani fu grontapu dorodoro. Den brada nanga sisa dati luku a situwâsi fu den, èn den teki  a bosroiti fu no wroko so langa moro, èn fu libi soso nanga den sani di den abi fanowdu trutru. Di den du dati, dan a no teki langa fosi den kon si taki den du wan moro bun sani nanga den libi. Iya, den kon si taki den abi moro ten gi den osofamiri èn gi a diniwroko fu Yehovah. Boiti dati, fu di den e libi soso nanga den sani di den abi fanowdu trutru, meki den e poti den frutrow moro tapu Yehovah na presi fu grontapu. Yu kan du dati tu? Yu kan libi soso nanga den sani di yu abi fanowdu trutru, so taki yu kan du moro sani di e plisi Yehovah?—Mat. 6:19-24, 33.

„Now wi abi wan moro bun matifasi nanga Yehovah”

Marc, di wi ben taki fu en na a bigin, ben gi yesi na a Bijbel rai fu no gebroiki den sani fu grontapu dorodoro. A no ben teki a hei posisi di a ben kan kisi na a wrokope fu en. Baka wan tu dei, Marc en wrokobasi ben wani pai en moro moni soso fu meki Marc teki a wroko dati. Marc taki: „Disi ben de wan tesi, ma mi weigri baka fu teki a wroko.” A e taki fu san ede a du dati: „Mi nanga mi wefi, Paula, ben wani du so furu leki wi man na ini a diniwroko fu Yehovah. Dati meki wi ben teki a bosroiti fu libi soso nanga den sani di wi abi fanowdu trutru. Wi ben begi Yehovah fu gi wi a koni fu doro a marki fu wi, èn wi ben poti wan spesrutu dei te wi ben o bigin du moro na ini a diniwroko fu Yehovah.”

Paula e taki: „Mi ben e wroko dri dei wán wiki leki wan sekretarsi na ini wan ati-oso, èn mi ben e wroko nofo moni. Mi ben du a gewoon pionierwroko tu. Ma neleki Marc, mi ben wani du moro gi Yehovah na wan presi pe moro Kownukondre preikiman de fanowdu. Ma di mi taigi mi wrokobasi taki mi no ben o wroko drape moro, dan a taigi mi taki mi ben kan kisi a wroko leki sekretarsi fu a driktoro. Aladi a wroko dati ben pai moro leki den tra sekretarsi wroko na ini na ati-oso, toku mi ben hori misrefi na a bosroiti di mi teki fu no wroko drape moro. Di mi fruteri mi wrokobasi fu san ede mi no wani a posisi dati, dan a prèise mi gi a bribi di mi abi na ini Gado.”

Syatu baka dati, Marc nanga Paula kisi na okasi fu dini leki spesrutu pionier na ini wan gemeente di de na wan farawe presi fu Kanada. Sortu bakapisi den kisi fu di den froisi go drape? Marc e taki: „Mi ben gowe libi wan wroko di ben pai bun èn di mi ben du pikinmoro mi heri libi langa. Mi ben e tweifri di mi teki a bosroiti dati, ma Yehovah blesi a diniwroko fu wi. A e gi wi furu prisiri fu yepi tra sma fu dini Gado. A furuten diniwroko yepi wi tu fu abi wan moro bun trowlibi. A moro prenspari sani di wi e taki nanga makandra, abi fu du nanga a diniwroko di wi e du gi Yehovah. Now wi abi wan moro bun matifasi nanga Yehovah” (Tori. 20:35). Paula e taki tu: „Te yu e gowe libi a wroko fu yu èn te yu e gowe libi yu bunbun oso pe yu abi ala sani, dan yu musu poti ala yu frutrow tapu Yehovah. Na dati wi du, èn Yehovah blesi wi. Den lobi brada nanga sisa fu wi na ini a nyun gemeente e sori taki den lobi wi trutru, èn taki den abi wi fanowdu. A krakti di mi ben e gebroiki fosi gi a wroko di mi ben e du, mi e gebroiki now fu yepi sma fu kon leri sabi Gado.  Mi breiti trutru fu dini leki wan spesrutu pionier.”

’Mi ben abi furu moni, ma mi no ben de koloku’

Amy, di wi ben taki fu en na a bigin, ben teki wan tra bosroiti. A ben teki a wroko di ben o pai bun furu moni, èn pe a ben musu wroko langa. Amy e taki: „A fosi yari mi ben de fayafaya ete na ini a diniwroko, ma safrisafri a diniwroko fu Yehovah no ben de a moro prenspari sani na ini mi libi moro. Na presi fu dati mi ben e du muiti fu kisi wan moro hei posisi na wrokope. Mi kisi ala sortu moi okasi fu abi wan moro hei posisi na wrokope, èn mi bigin du ala muiti fu doro a marki dati. Fu di mi ben kisi moro frantwortu na mi wrokope, meki safrisafri mi no ben abi ten moro gi a diniwroko. Te fu kaba mi no ben preiki moro srefi.”

Te Amy e prakseri a ten dati, a e taki: „Mi ben abi furu moni. Mi go na furu presi, èn mi ben lobi mi libi fu di mi ben abi wan hei posisi. Ma toku mi no ben de koloku. Aladi mi ben abi furu moni, toku mi ben abi furu problema. Mi ben e aksi misrefi fu san ede den sani disi ben pasa nanga mi. Te fu kaba mi kon frustan taki a feti di mi ben feti fu kisi wan hei posisi na ini a grontapu disi, pikinmoro meki taki mi ’gowe libi a bribi’. Leki bakapisi fu dati mi ben ondrofeni ’furu sari nanga pen’, soleki fa Gado Wortu e taki.”—1 Tim. 6:10.

San Amy du? A e taki: „Mi aksi den owruman fu yepi mi fu kon abi wan matifasi baka nanga Gado, èn mi bigin go baka na den konmakandra. Wan leisi di wi ben e singi na a konmakandra, dan mi bigin krei. Mi ben e memre taki mi ben de koloku trutru na ini den feifi yari dati di mi ben e pionier, aladi mi ben pôti na ini a ten dati. Mi ben sabi taki mi ben musu tapu fu feti fu kisi moni èn taki mi ben musu poti Kownukondre afersi na a fosi presi. Mi bigin du wan tra wroko drape pe mi no ben abi so furu frantwortu moro, aladi dati ben wani taki dati mi ben o kisi afu fu a moni di mi ben wroko fosi. Mi bigin teki prati baka na a preikiwroko.” Nanga prisiri Amy e taki: „Mi ben prisiri fu di mi ben dini wan tu yari leki pionier. Te now ete mi e firi koloku trutru èn noiti mi ben abi a firi disi di mi ben gi furu fu mi ten na a grontapuwroko fu mi.”

Yu kan kenki wan tu sani na ini yu libi, so taki yu kan libi soso nanga den sani di yu abi fanowdu trutru? A ten di yu sa abi dan, yu kan gebroiki fu du moro na ini a diniwroko fu Yehovah, èn leki bakapisi fu dati yu o du wan moro bun sani nanga yu libi.—Odo 10:22.

[Prenspari pisi na tapu bladzijde 19]

Yu kan kenki wan tu sani na ini yu libi, so taki yu kan libi soso nanga den sani di yu abi fanowdu trutru?

[Faki/​Prenki na tapu bladzijde 19]

„Mi lobi en nownow kaba!”

David, wan Kresten owruman na ini Amerkankondre, ben wani go na ini a furuten diniwroko, neleki en wefi nanga den pikin fu en. A ben man seti sani so taki a ben man wroko wan tu dei na ini a wiki, na a wrokope fu en. Baka dati a bigin du a pionierwroko. A sani disi meki taki a kon abi wan moro bun libi? Wan tu mun baka dati, David ben skrifi wan brifi gi wan mati fu en, èn a ben taki: „Nowan enkri tra sani e gi mi so furu prisiri leki fu du furuten diniwroko gi Yehovah makandra nanga mi osofamiri. Mi ben denki taki a ben o teki wan heri pisi ten fosi mi kon gwenti a pionierwroko, ma mi kan taigi yu taki mi lobi en nownow kaba! Iya, a e gi mi bun furu prisiri.”

[Prenki na tapu bladzijde 18]

Marc nanga Paula na ini a preikiwroko