Den wan di abi „a yoisti denki” e gi yesi na a bun nyunsu

„Ala den wan di ben abi a yoisti denki fu man kisi têgo libi, tron bribiman.” —TORI. 13:48.

1, 2. San den Kresten fu a fosi yarihondro du baka di Yesus taki dati a bun nyunsu ben o preiki gi sma na a heri grontapu?

A BIJBEL BUKU Tori fu den Apostel abi span tori na ini. Den tori disi e sori wi san den Kresten na ini a fosi yarihondro du baka di Yesus taki dati a bun nyunsu fu a Kownukondre ben o preiki gi sma na heri grontapu (Mat. 24:14). Fu taki en leti, den fayafaya preikiman disi na eksempre gi den wan di ben o tron bribiman bakaten. Fu di den disipel fu Yesus na ini Yerusalem ben e gi kotoigi fayafaya, meki dusundusun sma èn sosrefi „bun furu priester” kon na ini a gemeente fu a fosi yarihondro.—Tori. 2:41; 4:4; 6:7.

² Den zendeling na ini a fosi yarihondro ben yepi moro sma srefi fu teki a Kresten bribi. Filipus fu eksempre, ben go na Samaria pe bun furu sma poti prakseri na den sani di a ben taki (Tori. 8:5-8). Paulus ben e teki waka nanga difrenti bribiman fu preiki a Kresten boskopu na farawe presi soleki Siprus, wan tu kontren na ini Pikin Asia, Masedonia, Grikikondre, nanga Italiakondre. Bun furu Dyu èn sosrefi Grikisma ben e tron bribiman na ini den foto pe Paulus ben preiki (Tori. 14:1; 16:5; 17:4). Titus ben du wan spesrutu wroko na ini den gemeente na Kreita (Tit. 1:5). Petrus ben abi furu fu du na ini Babilon. Di a skrifi a fosi brifi fu en, na a pisi ten fu a yari 62 te go miti a yari 64, dan furu sma na ini den kontren fu Pontus, Galasia, Kapadosia, Asia, nanga Bitinia ben yere a bun nyunsu kaba (1 Petr. 1:1; 5:13). Dati ben de trutru wan moi pisi ten! Den Kresten fu a fosi yarihondro ben e du a diniwroko so fayafaya, taki den feanti fu den ben feni taki den ben e „bruya sma na heri grontapu”.—Tori. 17:6; 28:22.

3. Sortu bakapisi Kownukondre preikiman abi na ini a preikiwroko, èn fa a sani disi e meki yu firi?

³ Na ini a ten disi tu, a Kresten gemeente e gro srefisrefi. A no e gi yu deki-ati te yu e leisi na alayari raportu fu Yehovah Kotoigi èn e si fa a wroko e gro na heri grontapu? A no e gi yu prisiri fu sabi taki Kownukondre preikiman hori moro leki siksi milyun bijbelstudie na ini a dienstyari 2007? Boiti dati, a nomru fu sma di ben de na a Memrefesa fu a dede fu Yesus Krestes a yari di pasa, e sori taki sowan tin milyun sma di no de Yehovah Kotoigi, wani sabi moro fu a bun nyunsu. Disi e sori taki furu wroko de fu du ete.

4. Sortu sma e arki a Kownukondre boskopu?

⁴ Neleki fa a ben de na ini a fosi yarihondro, na so a de tu na ini a ten disi taki ’ala den wan di abi a yoisti denki fu kisi têgo libi’ e gi yesi na a boskopu fu waarheid (Tori. 13:48). Yehovah e tyari den sortu sma disi kon na ini en organisâsi. (Leisi Hagai 2:7.) Efu wi wani teki prati fayafaya na a Kresten diniwroko, dan fa wi musu tan  si a wroko disi di e yepi sma kon na ini a tru anbegi?

Preiki gi ala sma

5. Sortu sma Yehovah feni bun?

⁵ Den Kresten na ini a fosi yarihondro ben frustan taki „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun” (Tori. 10:34, 35). Wan sma di wani kon abi wan matifasi nanga Gado, musu poti bribi na ini a frulusu ofrandi fu Yesus (Yoh. 3:16, 36). Èn Gado wani taki „ala sortu sma musu kisi frulusu èn taki den musu kon sabi a waarheid soifri”.—1 Tim. 2:3, 4.

6. San Kownukondre preikiman no musu du, èn fu san ede?

⁶ A no ben o fiti te preikiman fu a bun nyunsu e krutu sma na fesi, soso fu di den sma dati de fu wan tra ras, fu di den gudu noso pôti, fu di den no lobi fa den sma dati tan, fu di den abi wan tra bribi, noso fu di den e difrenti na tra fasi. Prakseri a sani disi pikinso: Yu no breiti taki a sma di fruteri yu den tru tori fu Bijbel a fosi leisi, no ben denki takru fu yu? Sobun, fu san ede yu no e prati a boskopu di kan gi sma libi, nanga iniwan sma di wani arki?—Leisi Mateyus 7:12.

7. Fu san ede wi no musu krutu den sma di wi e miti na ini a preikiwroko?

⁷ Yehovah poti Yesus leki Krutuman, èn fu dati ede wi no abi a reti fu krutu nowan sma. A sani disi fiti, fu di wi kan krutu „sani di den ai fu [wi] e si nomo”, noso „sani di den yesi fu [wi] e yere nomo”, ma Yesus sabi fa sma e denki èn fa sma e firi dipi na ini den ati.—Yes. 11:1-5; 2 Tim. 4:1.

8, 9. (a) Fa Saulus ben de, fosi a tron wan Kresten? (b) San na eksempre fu na apostel Paulus e leri wi?

⁸ Ala sortu sma tron futuboi fu Yehovah. Wan heri moi eksempre na a di fu Saulus fu Tarsus di sma kon sabi bakaten leki na apostel Paulus. Saulus, di ben de wan Fariseiman, ben abi bita-ati gi den Kresten èn a ben e frufolgu den. A man disi ben e bribi tranga taki den Kresten no ben de tru anbegiman fu Yehovah, èn fu dati ede a bigin frufolgu a Kresten gemeente (Gal. 1:13). Leki libisma wi ben kan denki taki so wan man noiti no ben o tron wan Kresten. Ma Yesus ben si wan bun sani na ini Saulus, èn fu dati ede a teki en fu du wan prenspari wroko. Leki bakapisi fu dati, Saulus kon tron wan memre fu a fosi yarihondro Kresten gemeente, èn a ben de wan fu den moro fayafaya Kresten.

⁹ San na eksempre fu na apostel Paulus e leri wi? Kande grupu sma na ini a kontren pe wi e preiki, no lobi a boskopu di wi e tyari. Aladi a kan gersi leki noiti wan fu den sma disi o tron wan tru Kresten, toku wi musu tan meki muiti fu yepi den fu kon frustan Bijbel. Son leisi, srefi sma di wi ben denki taki den noiti no ben o arki wi, e gi yesi na a boskopu. A wroko di wi kisi fu du, na taki wi musu „tan” preiki gi ala sma.—Leisi Tori fu den Apostel 5:42.

Den wan di e „tan” preiki sa kisi furu blesi

10. Fu san ede wi musu abi a deki-ati fu preiki gi sma di e tyari densrefi na wan ogri-ati fasi? Fruteri wan tu ondrofenitori fu yu eigi kondre.

¹⁰ A fasi fa wan sma tan, kan kori wi. Luku a tori fu Ignacio. * A man disi ben bigin studeri Bijbel nanga Yehovah Kotoigi di a ben de na strafu-oso na ini wan fu den kondre na ini Zuid-Amerika. Sma ben e frede en, fu di a ben ogri srefisrefi. Fu dati ede, strafuman di ben e meki sani fu seri gi tra strafuman ben e gebroiki Ignacio fu tapu skreki gi den strafuman di ben e draidrai fu pai den paiman fu den. Ma di Ignacio bigin go na fesi nanga a studeri di a ben e studeri Bijbel èn di a bigin fiti den sani di a ben e leri, dan a man disi di ben lobi fu du ogri nanga trawan, kon tron wan sma di abi switifasi. Nowan sma no e seni Ignacio moro fu go dwengi sma fu pai den paiman fu den, èn a breiti srefisrefi taki den tru tori fu Bijbel èn a yeye fu Gado, yepi en fu kon tron wan nyun sma. A de nanga tangi tu taki den Kownukondre preikiman no ben e denki takru fu en, ma taki den ben de klariklari fu studeri nanga en.

11. Fu san ede wi e tan go baka na sma?

 ¹¹ Wan fu den reide fu san ede wi e tan go na den sma di wi ben fruteri kaba fu a bun nyunsu, na taki a situwâsi nanga a denki fu den kan kenki, èn na dati e pasa tu. A kan taki sensi a lasti leisi di wi ben de na den sma disi, sonwan fu den kon siki seryusu, den lasi den wroko, noso wan lobiwan fu den dede. (Leisi Preikiman 9:11.) Den problema fu a grontapu kan meki tu taki sma e bigin denki seryusu fu a tamara fu den. Den sani disi kan meki taki wan sma di no ben e arki fosi, noso di ben e gens wi srefi, e arki a bun nyunsu. Fu dati ede, wi noiti no musu draidrai fu prati a bun nyunsu nanga trawan na ibri okasi di wi e kisi.

12. Te wi e preiki gi sma, dan fa wi musu si den, èn fu san ede?

¹² Libisma gwenti fu krutu sma di de fu wan spesrutu grupu noso ras. Ma Yehovah e luku ibri sma aparti. A e si den bun sani di ibri sma abi. (Leisi 1 Samuel 16:7.) Wi musu pruberi fu du a srefi na ini a diniwroko fu wi. Furu ondrofenitori e sori den bun bakapisi di wi sa abi te wi no e denki takru fu den sma di wi e preiki gi.

13, 14. (a) Fu san ede wan pionier sisa no go studeri moro nanga wan uma di a ben miti na ini a preikiwroko? (b) San wi kan leri fu na ondrofenitori disi?

¹³ Sandra, wan pionier sisa, ben e preiki oso fu oso na tapu wan Karibis èilanti, di a miti Ruth, wan uma di ben lobi teki prati na karnafal. Tu leisi Ruth ben wini a fosi prijs fu a karnafal fesa di ben hori na ini a kondre fu en. Na uma disi ben sori trutru taki a ben wani sabi moro fu den sani di Sandra ben e taki. Èn na so Sandra bigin studeri Bijbel nanga en. Sandra e memre san ben pasa: „Di mi waka go na ini a foroisi fu Ruth, dan mi si wan bigi fowtow fu Ruth pe a ben weri den karnafal krosi fu en. Mi si sosrefi den prijs di a ben wini. Mi ben abi a fowtu denki taki wan sma di ben pôpi so èn di ben e gebroiki so furu fu en ten gi karnafal, noiti no ben o wani kon sabi den tru tori fu Bijbel. Sobun, mi no go moro na en.”

¹⁴ Wan pisi ten baka dati, Ruth go na a Kownukondre zaal, èn di a konmakandra kaba, a go na Sandra èn a aksi en: „Fu san ede yu no kon studeri moro nanga mi?” Sandra aksi en pardon èn a seti sani fu go studeri baka nanga en. Ruth go na fesi heri esi, iya, a puru den karnafal fowtow na ini en oso, a bigin go na ala den konmakandra, a bigin teki prati na a preikiwroko, èn te fu kaba a gi en libi abra na Yehovah. A no de fu taki dati Sandra kon si taki a fasi fa a ben e denki fosi fu Ruth, no ben bun.

15, 16. (a) San ben de a bakapisi di wan preikiman preiki gi wan famiriman fu en? (b) Fu san ede wi musu preiki gi famiriman, awinsi fa den e libi?

¹⁵ Furu Kresten di gi kotoigi na famiriman di no de na bribi, ben abi bun bakapisi, aladi a ben gersi leki den famiriman disi noiti no ben o arki a boskopu. Luku na eksempre fu Joyce, wan Kresten sisa na ini Amerkankondre. Sensi di a swagri fu en ben de wan tini, a ben koti strafu omeni leisi. Joyce e memre: „Sma ben e taki dati a man disi ben pori en libi, fu di a ben e seri drugs, a ben e fufuru, èn a ben e du wan lo tra ogri sani. Ma toku mi tan fruteri en den tru tori fu Bijbel 37 yari langa.” Fu di Joyce  ben abi a pasensi fu tan yepi en swagri, meki te fu kaba a ben abi bun bakapisi. A man disi bigin studeri Bijbel nanga Yehovah Kotoigi èn a tyari bigi kenki kon na ini en libi. No so langa pasa, a swagri fu Joyce teki dopu na wan distrikt kongres na ini California, na Amerkankondre èn a ben abi 50 yari na a ten dati. Joyce e taki: „Mi krei fu di mi ben breiti. Mi breiti so te taki mi tan meki muiti fu yepi en!”

¹⁶ A kan taki yu e draidrai fu taki fu den tru tori fu Bijbel nanga son famiriman, fu di a libi fu den no bun. Ma a sani disi no ben tapu Joyce fu taki nanga a swagri fu en. Boiti dati, fa wan sma kan sabi san de na ini na ati fu wan trawan? Kande a sma disi trutru wani kon sabi san na a tru bribi. Fu dati ede, no draidrai fu preiki gi ala sma so taki den e kisi na okasi fu feni a tru bribi.—Leisi Odo 3:27.

Wan buku di e yepi sma fu kon frustan Bijbel

17, 18. (a) San den ondrofenitori fu preikiman na heri grontapu e tyari kon na krin fu a buku San Bijbel e leri wi trutru? (b) Sortu moi ondrofenitori yu ben abi fu di yu gebroiki a buku disi?

¹⁷ Den ondrofenitori fu preikiman na heri grontapu e sori taki a buku San Bijbel e leri wi trutru? yepi furu opregtisma fu du san Bijbel e leri. Penni, wan pionier sisa na ini Amerkankondre, ben bigin studeri a buku disi nanga difrenti sma. Tu fu den sma disi, ben de bigisma di ben de fayafaya na ini a kerki fu den. Penni no ben sabi efu den sma disi ben o bribi den tru tori fu Bijbel di de fu feni na ini a Bijbel leri-buku. Ma toku Penni e skrifi: „Fu di a buku e fruklari sani syatu èn na wan makriki fasi, meki a makriki gi den sma disi fu bribi taki den sani di den e leri na tru tori, èn den e du dati sondro fu haritaki noso fu bruya.”

¹⁸ Pat, wan preikiman na ini Ingrisikondre, ben bigin studeri Bijbel nanga wan uma di ben lowe gowe fu wan fu den kondre na ini Asia. Na uma disi ben musu gowe libi a kondre fu en nanga tranga fu di srudati di ben opo densrefi teige a tirimakti, tyari a masra nanga a boi fu en gowe, èn noiti moro a no si den. Sma ben tapu skreki gi na uma disi, den ben bron en oso, èn wan grupu ogri-ati man ben abi seks nanga en, aladi a no ben wani dati. Ala den sani dati ben meki taki na uma disi no ben wani libi moro, èn difrenti leisi a prakseri fu kiri ensrefi. Ma di a bigin studeri Bijbel, dan a kisi howpu. Pat e taki: „A makriki fasi fa a Bijbel leri-buku e fruklari sani, èn den prenki na ini a buku disi, ben abi furu krakti na en tapu.” Na uma go na fesi heri esi, a doro den markitiki fu tron wan preikiman di no dopu ete, èn a taigi den brada taki a ben wani teki dopu na a bigi konmakandra di ben o kon. A e gi prisiri trutru fu yepi opregtisma fu kon frustan a howpu di Bijbel e gi èn fu warderi dati tu.

 „Meki wi no tapu fu du san bun”

19. Fu san ede wi musu du ala san wi man fu preiki a bun nyunsu?

¹⁹ Ibri dei, wi e kon frustan moro nanga moro taki wi musu du ala san wi man fu preiki a bun nyunsu èn fu meki disipel. Ibri yari, dusundusun sma di wani kon sabi Gado e gi yesi na a boskopu fu wi. Ma „a bigi dei fu Yehovah de krosibei”, èn disi wani taki dati den wan di no kon leri sabi Gado èn den sani di a pramisi, sa „slinger go fu meki sma srakti den”.—Sef. 1:14; Odo 24:11.

20. Sortu fasti bosroiti ibriwan fu wi musu abi?

²⁰ Wi kan yepi den sortu sma disi ete. Ma efu wi wani du dati, dan wi musu teki na eksempre fu den Kresten fu a fosi yarihondro di „ben e tan fruteri sma a bun nyunsu fu Yesus, a Krestes” (Tori. 5:42). Iya, neleki den Kresten disi, yu musu horidoro awinsi problema e miti yu, yu musu abi „a koni fu gi sma leri”, èn yu musu preiki gi ala sortu sma! „No meki wi tapu fu du san bun”, bika efu wi horidoro, dan Yehovah sa blesi wi bogobogo fu di a feni wi bun.—2 Tim. 4:2; leisi Galasiasma 6:9.

[Futuwortu]

San yu ben sa piki?

• Sortu sma e arki a bun nyunsu?

• Fu san ede wi no musu krutu den sma di wi e miti na ini a preikiwroko?

• Sortu bun bakapisi preikiman e kisi nanga yepi fu a buku San Bijbel e leri wi trutru?

[Aksi fu a tori disi]

[Prenki na tapu bladzijde 13]

Dusundusun opregtisma e gi yesi na a bun nyunsu

[Prenki na tapu bladzijde 15]

San wi kan leri fu den kenki di na apostel Paulus tyari kon na ini en libi?

[Prenki na tapu bladzijde 16]

Preikiman fu a bun nyunsu no e krutu sma na fesi