Den warti nofo fu go na peti di abi watra di e gi libi
Den warti nofo fu go na peti di abi watra di e gi libi
„A Pikin Skapu . . . o tiri den èn a o tyari den go na den peti di abi watra di e gi libi.”—OPENB. 7:17.
1. Fa a Wortu fu Gado e kari den salfu Kresten, èn sortu frantwortu Yesus gi den?
A WORTU fu Gado e kari den salfu Kresten di e sorgu gi den sani fu Krestes na grontapu „a getrow èn koni srafu”. Di Krestes kon luku a „srafu” na ini 1918, dan a si taki den salfuwan disi na grontapu ben de getrow, fu di den ben e gi den futuboi fu Gado „nyanyan na a reti ten”. Fu dati ede, Yesus, a Masra, ben breiti bakaten taki a ben kan gi den a frantwortu „fu ala den sani di a abi”. (Leisi Mateyus 24:45-47.) Na a fasi disi salfuwan e dini den tra anbegiman fu Yehovah dyaso na grontapu, fosi den go na hemel.
2. San na den sani di Yesus abi?
2 Wan masra abi a reti fu bosroiti san a wani du nanga den sani di a abi. Den sani fu Yesus Krestes, a Kownu di Yehovah poti, na ala sani na grontapu di abi fu du nanga a Kownukondre. Dati na sosrefi „a bigi ipi” di na apostel Yohanes ben si na ini wan fisyun. Disi na san Yohanes e taki fu a bigi ipi: „Mi si wan bigi ipi sma di nowan sma ben man teri; den ben komoto fu ala kondre, lo, pipel, nanga tongo, èn den ben tanapu na fesi a kownusturu èn na fesi a Pikin Skapu; den ben weri langa weti krosi èn den ben hori palmtaki na ini den anu.”—Openb. 7:9.
3, 4. Sortu bigi grani den memre fu a bigi ipi abi?
3 Den sma fu a bigi ipi na den wan di Yesus ben kari den „tra skapu” fu en (Yoh. 10:16). Den abi a howpu fu libi na ini wan paradijs na grontapu. Den abi na overtoigi taki Yesus „o tyari den go na den peti di abi watra di e gi libi, èn taki Gado o figi ala watra puru na den ai”. Fu di den abi a howpu dati, meki den „wasi den langa krosi fu den èn den meki den kon weti na ini a brudu fu a Pikin Skapu” (Openb. 7:14, 17). Den e bribi na ini na ofrandi fu Yesus, èn dati meki Gado e si den leki sma di e weri ’weti langa krosi’. Gado taki dati den de regtfardikisma, fu di neleki Abraham, den na mati fu En.
4 Boiti dati, fu di a bigi ipi fu tra skapu di e kon bigi moro nanga moro, regtfardiki na ini Gado ai, meki den abi a howpu fu tan na libi te a sistema disi e kisi pori na a ten fu a bigi banawtu (Yak. 2:23-26). Den kan kon moro krosibei na Yehovah, èn leki grupu den abi a tumusi moi howpu fu pasa Armagedon libilibi (Yak. 4:8; Openb. 7:15). Den no e dini Gado soleki fa densrefi wani, ma den e saka densrefi ondro a tiri fu a hemel Kownu nanga den salfu brada fu en na grontapu.
5. Fa den sma fu a bigi ipi e horibaka gi den salfu brada fu Krestes?
5 Salfu Kresten kisi bun hebi tesi fu a grontapu fu Satan, èn den sa tan kisi bun hebi tesi. Ma den kan abi a frutrow taki a bigi ipi di e wroko makandra nanga den sa horibaka gi den. Tra fasi leki a grupu salfu Kresten di e kon moro pikin, dusundusun sma e tron memre fu a bigi ipi ibri yari. Den salfuwan srefi no man teki fesi na ini ala den sowan 100.000 Kresten gemeente na heri grontapu. Dati meki wán fu den fasi fa den tra skapu e horibaka gi den salfuwan disi, na taki lepi brada di de fu a bigi ipi e dini leki owruman na ini den gemeente. Den e yepi fu sorgu gi den milyunmilyun Kresten di de na ondro a tiri now fu „a getrow èn koni srafu”.
6. Fa wan profeititori ben sori taki den salfu Kresten ben o kisi yepi fu den tra skapu di e wroko makandra nanga den?
6 A profeiti Yesaya ben taki dati den tra skapu ben o de klariklari fu horibaka gi den salfu Kresten. A ben skrifi: „Disi na san Yehovah taki: ’Den wrokoman fu Egepte di no kisi pai èn den seriman fu Etiopia èn den langa man fu Seiba, iya, ala den sma dati sa kon na yu, èn den sa kon de fu yu. Den sa waka baka yu’” (Yes. 45:14). Na wan agersi fasi, Kresten di abi a howpu fu libi na grontapu, e waka baka a salfu grupu nanga a Tiri Skin fu en, fu di den e saka densrefi na den ondro. Leki „wrokoman di no kisi pai”, den tra skapu de klariklari fu gebroiki den krakti nanga den gudu fu den fu horibaka gi a preikiwroko di e du na heri grontapu. Krestes ben gi den salfu brada fu en na grontapu a frantwortu fu du a wroko disi.—Tori. 1:8; Openb. 12:17.
7. Fu san ede a bigi ipi e kisi leri?
7 Aladi den sma fu a bigi ipi e horibaka gi den salfu brada fu den, den e kisi leri so taki den kan tron a fondamenti fu a nyun libimakandra di sa de baka Armagedon. A fondamenti dati musu tranga, èn den memre fu en no musu de klariklari nomo fu du den sani di a Masra e taigi den fu du, ma den musu man du den sani dati tu. Ibri Kresten e kisi na okasi fu sori taki a Kownu, Krestes Yesus, kan gebroiki en. Te wan Kresten e sori taki a abi bribi èn taki a de getrow, dan dati na wan buweisi taki a sa de klariklari fu gi yesi te a Kownu e taigi en san fu du na ini a nyun grontapu.
A bigi ipi e sori taki den abi bribi
8, 9. Fa den sma fu a bigi ipi e sori taki den abi bribi?
8 Den tra skapu di e wroko makandra nanga a gemeente fu salfu Kresten, e sori na difrenti fasi taki den abi bribi. Na a fosi presi, den e horibaka gi den salfuwan, fu di den e meki a bun nyunsu fu Gado Kownukondre bekènti (Mat. 24:14; 28:19, 20). Boiti dati, den de klariklari fu teki a tiri fu a Tiri Skin.—Heb. 13:17; leisi Sakaria 8:23.
9 Wan tra fasi fa den e horibaka gi den salfu brada fu den, na taki den e hori densrefi na den regtfardiki markitiki fu Yehovah. Den e kweki fasi soleki ’lobi, prisiri, vrede, langa pasensi, bun-ati, bunfasi, bribi, safri-ati, èn den e leri tu fu dwengi densrefi’ (Gal. 5:22, 23). Na ini a ten disi, sma no gwenti fu sori den fasi disi, ma na presi fu dati den e du „den sani di sondu libisma e du”. Toku den sma fu a bigi ipi abi a fasti bosroiti fu wai pasi gi „hurudu, morsu libi, yayolibi, na anbegi fu falsi gado, afkodrei, feantifasi, kesekese, dyarusu, faya-ati, trobi, pratifasi, a kon di sma e kon nanga falsi leri, bigi-ai, fesa pe sma e dringi sopi pasa marki fu kon drungu, bradyari fesa, èn den sortu sani disi”.—Gal. 5:19-21.
10. Sortu fasti bosroiti den sma fu a bigi ipi abi?
10 Fu di wi na sondu libisma, meki a kan muilek gi wi fu sori den froktu fu a yeye, fu wai pasi gi den sani di sondu libisma e du, èn fu sorgu taki a grontapu fu Satan no abi krakti na wi tapu. Toku wi abi a fasti bosroiti fu sorgu taki den swakifasi fu wi, den fowtu di wi e meki, siki, noso owrudei no e meki wi firi brokosaka. Den sani dati kan swaki a bribi fu wi, noso den kan meki taki a lobi di wi abi gi Yehovah e kon kowru. Wi sabi taki Yehovah sa du san a pramisi, iya, a sa meki a bigi ipi pasa a bigi banawtu libilibi.
11. Sortu triki Satan gebroiki fu pruberi fu swaki a bribi fu Kresten?
11 Ma toku wi musu de na ai doronomo, fu di wi sabi taki a trutru feanti fu wi na Didibri, èn a no e gi abra makriki (Leisi 1 Petrus 5:8.). Didibri pruberi fu gebroiki sma di fadon komoto na bribi èn tra sma sosrefi, fu overtoigi wi taki den sani di wi e leri fu Gado, na falsi leri. Ma nofo tron a no abi bun bakapisi. Na so a de tu son leisi, taki tru Kresten no man du a preikiwroko fri, fu di sma e frufolgu den. Ma fu taki en leti, a sani dati no meki den lasi-ati, ma nofo tron a tranga a bribi fu den. Dati meki Satan e gebroiki wan tra triki moro nanga moro, fu di a e bribi taki a triki dati sa swaki a bribi fu wi moro makriki. A wani taki wi lasi-ati so te, taki a bribi fu wi e kon swaki. Den fosi Kresten ben kisi a warskow fu luku bun nanga a sani disi. Den ben kisi a rai disi: „Poti prakseri finifini na a sma [Krestes] di ben frudrage den ogri sani di sondari ben taki fu en, aladi dati no ben tyari wini kon gi den.” Fu san ede den ben kisi a rai disi? So taki ’den no ben o kon weri èn lasi-ati’.—Hebr. 12:3.
12. Fa den rai fu Bijbel e tranga den wan di e firi brokosaka?
12 Oiti yu firi fu tapu nanga a dini di yu e dini Yehovah? Yu e feni son leisi taki yu no bun nofo? Efu dati de so, dan no gi pasi taki Satan gebroiki den firi dati fu tapu yu fu dini Yehovah. Te yu e studeri Bijbel finifini, te yu e begi fayafaya, te yu e tan go na den konmakandra, èn te yu abi demakandra nanga den Kresten brada nanga sisa fu yu doronomo, dan dati sa gi yu deki-ati èn a sa yepi yu fu ’no kon weri èn fu no lasi-ati’. Yehovah pramisi taki a sa sorgu taki den wan di e dini en e kisi krakti baka, èn wi kan abi a frutrow taki a sa du dati. (Leisi Yesaya 40:30, 31.) Tan poti prakseri na a Kresten diniwroko fu yu. No lasi ten tapu sani di no de prenspari, èn du ala san yu man fu yepi trawan. Te yu e du dati, dan yu sa kisi a krakti fu horidoro aladi yu e firi brokosaka.—Gal. 6:1, 2.
Den pasa a bigi banawtu èn den e go na ini wan nyun grontapu
13. Sortu wroko e wakti den wan di o pasa Armagedon libilibi?
13 Baka Armagedon, milyunmilyun onregtfardikisma di kisi wan opobaka sa musu kon leri sabi den markitiki fu Yehovah (Tori. 24:15). Den sa musu kon sabi fu a frulusu ofrandi fu Yesus. Boiti dati, den sa musu kon sabi fa fu sori taki den e bribi na ini na ofrandi dati, fu man kisi wini fu dati. Den sa musu tapu fu bribi den falsi kerkileri di den ben e bribi fosi, èn den sa musu drai baka gi a libi di den ben abi fosi. Den musu leri fu kon abi den nyun fasi di tru Kresten musu abi (Ef. 4:22-24; Kol. 3:9, 10). Den tra skapu di sa de na libi na a ten dati, sa abi furu fu du. A sa de wan prisiri trutru fu dini Yehovah na a fasi dati, sondro taki na ogri grontapu disi e kwinsi wi noso e puru wi prakseri fu a wroko di wi musu du!
14, 15. Sortu sani den sma di e pasa a bigi banawtu libilibi, nanga den regtfardikiwan di sa kisi wan opobaka, sa abi fu fruteri makandra?
14 Na a ten dati, getrow futuboi fu Yehovah di dede fosi a ten di Yesus ben e dini na grontapu, sa abi furu fu leri tu. Den sa kon sabi suma na a Mesias di Gado ben pramisi èn di den ben howpu na tapu, ma di den no si noiti. Di den ben de na libi, den ben sori kaba taki den de klariklari fu teki a tiri fu Yehovah. Prakseri o furu prisiri a sa gi wi fu yepi den sma disi. Fu eksempre, wi o man sori Danièl fa den profeititori di a ben skrifi, ma di a no ben e frustan, kon tru!—Dan. 12:8, 9.
15 A no de fu taki dati wi sa man leri den sma di sa kisi wan opobaka furu sani, ma wi sa abi furu sani fu aksi den tu. Den kan fruteri wi moro finifini tori di abi fu du nanga den sani di skrifi na ini Bijbel. Prakseri fa a sa gi wi prisiri fu kon sabi san Yohanes a Dopuman srefi sa abi fu fruteri fu en neef, Yesus! A no de fu taki dati den sani di wi sa leri fu den getrow kotoigi disi sa yepi wi fu kon frustan Gado Wortu moro bun. Getrow futuboi fu Yehovah di dede, sosrefi den wan fu a bigi ipi di dede na a ten fu a kaba, sa kisi „wan moro betre opobaka”. Den ben bigin dini Yehovah na ini wan grontapu di ben de na ondro a makti fu Satan. A sa de wan prisiri gi den fu tan dini Gado na ini a nyun grontapu pe sani sa waka moro bun!—Hebr. 11:35; 1 Yoh. 5:19.
16. San o pasa na a Krutudei, soleki fa profeititori e sori?
16 Na a Krutudei, wan ten sa doro taki bukulolo sa opo. Gado sa gebroiki Bijbel nanga den bukulolo disi fu krutu ala sma di sa de na libi, fu si efu den warti fu kisi têgo libi (Leisi Openbaring 20:12, 13). Na a kaba fu a Krutudei, ibri sma sa kisi nofo okasi kaba fu sori efu a e horibaka gi a reti di Gado abi fu tiri hemel nanga grontapu. Wi sa saka wisrefi na ondro a Kownukondre fu Gado? Wi sa meki a Pikin Skapu tyari wi go na „den peti di abi watra di e gi libi”? Noso wi sa weigri fu du den sani disi? (Openb. 7:17; Yes. 65:20) Na a ten dati, a sa de so taki ala sma na grontapu kisi na okasi fu teki wan bosroiti, sondro taki sondu noso ogrisma abi krakti na den tapu. Nowan sma sa man taki dati Yehovah no krutu sma na wan leti fasi na a kaba fu a Krutudei. Soso den ogrisma sa kisi pori fu têgo.—Openb. 20:14, 15.
17, 18. Fu san ede den salfu Kresten nanga den tra skapu e wakti a Krutudei nanga prisiri?
17 Fu di salfu Kresten na ini a ten disi sabi taki den warti nofo fu kisi a Kownukondre, meki den e wakti fayafaya fu tiri na a ten fu a Krutudei. Dati sa de wan bigi grani di den sa kisi! A howpu dati e gi den deki-ati fu teki a rai di Petrus ben gi den brada fu den na ini a fosi yarihondro. Petrus ben taki: „Du moro muiti srefi fu sorgu taki unu e tan sma di Gado kari èn di a teki; bika efu unu e tan du den sani disi, dan noiti unu sa fadon. Fu taki en leti, a doro sa opo bradi gi unu fu go na ini a têgo kownukondre fu wi Masra èn Frulusuman Yesus Krestes.”—2 Petr. 1:10, 11.
18 Den tra skapu e prisiri makandra nanga den salfu brada fu den. Den abi a fasti bosroiti fu horibaka gi den. Leki mati fu Gado na ini a ten disi, den e du ala san den man na ini a diniwroko fu Gado. Na a ten fu a Krutudei, den sa prisiri fu horibaka fayafaya gi den seti fu Gado, aladi Yesus e tyari den go na den peti fu watra di e gi libi. Te fu kaba, Yehovah sa feni den bun nofo fu de futuboi fu en fu têgo na grontapu!—Rom. 8:20, 21; Openb. 21:1-7.
Yu e memre disi?
• San na den sani di Yesus abi?
• Fa den sma fu a bigi ipi e horibaka gi den salfu brada fu den?
• Sortu grani èn sortu howpu den sma fu a bigi ipi abi?
• Fa yu e si a Krutudei?
[Aksi fu a tori disi]
[Prenki na tapu bladzijde 25]
Den sma fu a bigi ipi wasi den langa krosi fu den èn den meki den kon weti na ini a brudu fu a Pikin Skapu
[Prenki na tapu bladzijde 27]
San yu sa wani leri fu den getrowsma di sa kisi wan opobaka?