Den warti nofo fu kisi wan Kownukondre
Den warti nofo fu kisi wan Kownukondre
„Disi na wan buweisi fu a regtfardiki fasi fa Gado e krutu sma, èn a bakapisi sa de taki unu sa warti gi a kownukondre fu Gado.”—2 TES. 1:5.
1, 2. Sortu krutu Gado abi na prakseri, èn suma sa de a krutuman?
NA A ten fu a yari 50, na apostel Paulus ben de na ini Ateine. Fu di a no ben lobi en srefisrefi fu si taki den sma drape ben e anbegi wan lo falsi gado, meki a gi den sma dati kotoigi na wan kefalek moi fasi. Na a kaba fu a takimakandra fu en, a taki wan tu sani di ben musu fu hari a prakseri fu den sma disi di ben e anbegi falsi gado. A ben taigi den: „[Gado] e taigi ala libisma now taki den musu abi berow. Bika a poti wan dei pe a o gi wan man a wroko fu krutu ala sma na grontapu na wan regtfardiki fasi, èn na opobaka fu en na wan dyaranti gi ala sma.”—Tori. 17:30, 31.
2 A de wan seryusu tori taki Gado poti wan dei fu krutu libisma na ini a ten di e kon! Di Paulus hori a takimakandra fu en na ini Ateine, dan a no kari a nen fu a sma di sa krutu libisma, ma wi sabi taki a sma dati na Yesus Krestes di kisi wan opobaka. Te Yesus o krutu libisma, dan dati sa tyari dede noso libi kon gi den.
3. Fu san ede Yehovah meki wan frubontu nanga Abraham, èn suma kisi a prenspari frantwortu fu meki a frubontu disi kon tru?
3 A Krutudei dati o teki 1000 yari. Na a pisi ten dati Yesus o teki fesi gi Yehovah leki Kownu fu a Kownukondre fu En, ma a no sa tiri en wawan. Yehovah e teki tra libisma tu fu tiri èn fu krutu sma makandra nanga Yesus, na ini a pisi ten dati fu dusun yari. (Luku Lukas 22:29, 30.) Pikinmoro 4000 yari pasa, Yehovah ben seti sani gi a Krutudei dati, di a meki wan frubontu nanga Abraham, a getrow futuboi fu en. (Leisi Genesis 22:17, 18.) Soleki fa a sori, dan a frubontu dati kon abi krakti na ini 1943 bifo Krestes. A no de fu taki dati Abraham no ben sabi finifini san a frubontu dati ben o wani taki gi a libisma famiri. Ma soleki fa wi na ini a ten disi sabi, dan a frubontu dati e sori taki Gado sa gi den salfu bakapikin fu Abraham a prenspari frantwortu fu krutu a libisma famiri.
4, 5. (a) Suma na a moro prenspari bakapikin fu Abraham, èn san a ben taki fu a Kownukondre? (b) O ten sma bigin kisi a kari fu tron memre fu a Kownukondre?
4 A ben kon na krin taki Yesus ben de a moro prenspari bakapikin fu Abraham. A ben salfu nanga santa yeye na ini a yari 29, èn a tron a Mesias, noso a Krestes di Gado ben pramisi (Gal. 3:16). Na ini den dri nanga afu yari baka dati, Yesus ben o preiki a bun nyunsu fu a Kownukondre gi a Dyu pipel. Baka di den poti Yohanes a Dopuman na strafu-oso, dan Yesus sori taki tra sma ben kan abi a howpu tu fu kisi a Kownukondre dati. Yesus ben taki: „Sensi a ten fu Yohanes a Dopuman teleki now, sma e du furu muiti fu feni a kownukondre fu hemel, èn den wan di e du furu muiti, e kisi en.”—Mat. 11:12.
5 A moi fu si taki, syatu bifo Yesus taki fu den wan di ben o ’kisi’ a Kownukondre fu hemel, a ben taki: „Fu tru, mi e taigi unu: Fu ala den sma di komopo na ini wan uma bere, nowan no opo ete di bigi moro Yohanes a Dopuman; ma toku a moro pikinwan na ini a kownukondre fu hemel, bigi moro en” (Mat. 11:11). Fu san ede Yesus ben kan taki a sani dati? Fu di getrow-wan no ben kisi a kari ete fu tron memre fu a Kownukondre fu Gado. Baka di Gado salfu den nanga santa yeye na a Pinksterfesa fu a yari 33, dan fosi den kisi a kari disi. Na a ten dati, Yohanes a Dopuman no ben de na libi moro.—Tori. 2:1-4.
Gado e si den bakapikin fu Abraham leki regtfardikisma
6, 7. (a) Fa den salfu bakapikin fu Abraham ben o kon de „leki den stari na hemel”? (b) Sortu blesi Abraham nanga den salfu bakapikin fu en kisi?
6 Gado ben taigi Abraham taki den bakapikin fu en ben o kon furu „leki den stari na hemel”, èn leki den ai-santi na sesyoro (Gen. 13:16; 22:17). Sobun, na ini a ten fu Abraham, nowan sma ben kan sabi omeni sma ben o tron salfu bakapikin fu Abraham. Ma te fu kaba a kon na krin omeni salfu bakapikin Abraham ben o abi. Boiti Yesus, yu ben o abi ete 144.000 salfu bakapikin.—Openb. 7:4; 14:1.
7 Disi na san Gado Wortu e taki fu a bribi di Abraham ben abi: „[Abraham] bribi Yehovah. Fu dati ede Gado si en leki wan regtfardiki sma” (Gen. 15:5, 6). A tru taki nowan libisma regtfardiki dorodoro (Yak. 3:2). Ma fu di Abraham ben abi wan tranga bribi, meki Yehovah ben e si en leki wan regtfardiki sma, èn A kari en srefi wan mati fu En (Yes. 41:8). Yehovah e si den tra salfu bakapikin fu Abraham di sa tiri makandra nanga Yesus, leki regtfardikisma tu. Disi e meki taki den e kisi moro bigi blesi leki Abraham.
8. Sortu blesi den salfu bakapikin fu Abraham o kisi?
8 Gado e si den salfu Kresten leki regtfardikisma, fu di den e poti bribi na ini a frulusu ofrandi fu Yesus (Rom. 3:24, 28). Na ini Yehovah ai, den wan disi kon fri fu den sondu fu den, èn den kan kisi salfu nanga a santa yeye fu kon de manpikin fu Gado, noso brada fu Yesus Krestes (Yoh. 1:12, 13). Den e kon na ini a nyun frubontu, èn den de wan nyun pipel, namku „na Israel fu Gado” (Gal. 6:16; Luk. 22:20). Disi na trutru wan bigi grani di den alamala e kisi! Fu di Gado du a sani disi gi den salfu Kresten, meki den no abi a howpu fu libi fu têgo na grontapu. Den de klariklari fu libi a grani disi, fu di densrefi abi a tumusi moi howpu fu wroko makandra nanga Yesus na a Krutudei, èn fu tiri makandra nanga en na ini hemel.—Leisi Romesma 8:17.
9, 10. (a) O ten Gado bigin salfu Kresten nanga a santa yeye, èn san den ben musu du? (b) Sortu yepi salfu Kresten kisi?
9 Na a Pinksterfesa fu a yari 33, wan grupu getrow man nanga uma kisi na okasi fu tiri makandra nanga Yesus na a Krutudei. Sowan 120 disipel fu Yesus ben dopu nanga santa yeye, èn na so fasi den tron den fosi salfu Kresten. Ma den ben o abi fu du moro sani. Bigin nanga a ten dati, den ben o abi fu sori taki den ben o tan getrow na Yehovah, awansi sortu tesi Satan ben o tyari kon na den tapu. Efu den ben wani taki Gado pai den nanga libi na ini hemel, dan den ben o abi fu tan getrow te na dede.—Openb. 2:10.
10 Dati meki Yehovah gi den salfu Kresten a rai nanga a deki-ati di den ben abi fanowdu fu man tan getrow, èn A e du dati nanga yepi fu en Wortu èn nanga yepi fu a Kresten gemeente. Fu eksempre, na ini wan brifi di na apostel Paulus ben skrifi gi den salfu Kresten na ini Tesalonika, a ben taki: „Neleki fa wan papa e du nanga den pikin fu en, na so wi ben tan frumane ibriwan fu unu, èn wi ben tan trowstu unu èn ben tan kotoigi gi unu, so taki unu kan tan waka na wan fasi di Gado feni bun. Na en kari unu fu kon na ini en kownukondre èn fu kisi a glori fu en.”—1 Tes. 2:11, 12.
11. San Yehovah meki sma skrifi gi „na Israel fu Gado”?
11 Na ini den moro leki 60 yari baka di den fosi Kresten ben kisi a kari fu go na hemel, dan Yehovah bosroiti taki sma ben musu skrifi fu a diniwroko fu Yesus na grontapu. Yehovah meki sma skrifi tu fu den fasi fa a handri nanga den salfu Kresten fu a fosi yarihondro, èn fu den rai di a gi den. Sobun, Yehovah sorgu taki den Griki Buku fu Bijbel nanga den Hebrew Buku fu Bijbel di ben skrifi kaba, kon tron wán. Na a fosi presi den Hebrew Buku fu Bijbel ben skrifi gi a pipel Israel na a ten di den ben abi wan spesrutu matifasi nanga Gado. Den Griki Buku fu Bijbel ben skrifi spesrutu gi „na Israel fu Gado”, namku gi den wan di salfu leki brada fu Krestes, èn leki manpikin fu Gado. Ma dati no wani taki dati sma di no de Israelsma no kan kisi furu wini te den e studeri den Hebrew Buku fu Bijbel. Na so a de tu taki Kresten di no salfu nanga santa yeye e kisi bun furu wini te den e studeri den Kresten Griki Buku fu Bijbel, èn te den e libi akruderi den rai di de fu feni na ini den buku disi.—Leisi 2 Timoteyus 3:15-17.
12. Na sortu sani Paulus ben memre den salfu Kresten?
12 Gado si den Kresten fu a fosi yarihondro leki regtfardikisma èn a salfu den nanga santa yeye, so taki den ben kan kisi a grani fu libi na hemel. Te Gado ben salfu den, dan dati no ben wani taki dati den ben tron kownu fu den tra salfu brada fu den, aladi den ben de makandra nanga den na grontapu. Soleki fa a sori, dan sonwan fu den fosi Kresten ben frigiti a sani dati, èn den ben bigin suku fu kisi hei posisi na mindri den brada fu den na ini a Kresten gemeente, aladi den no ben abi a reti fu du dati. A sani disi meki taki Paulus aksi den: „Unu abi kaba san un wani, a no so? Unu gudu kaba, a no so? Unu bigin tiri leki kownu sondro wi, a no so? Mi ben winsi trutru taki unu ben bigin tiri leki kownu, so taki wi tu ben kan tiri makandra nanga unu leki kownu” (1 Kor. 4:8). Fu dati ede, Paulus memre den salfuwan na ini a ten fu en na a sani disi: „A no de so taki wi na basi fu un bribi, ma wi e wroko makandra nanga unu so taki unu kan de nanga prisiri.”—2 Kor. 1:24.
Ala den salfuwan e kon na wán
13. Fa sani waka nanga a kari di den salfuwan ben e kisi baka a yari 33?
13 Gado no tyari ala den 144.000 salfu Kresten kon na wán na ini a fosi yarihondro. Furu Kresten kisi wan kari na ini a ten fu den apostel. Èn na ini den yari baka dati, a ben de krin fu si taki a nomru fu den wan di ben e kisi wan kari, ben e kon moro mendri. Ma Gado tan gi Kresten wan kari na ini den hondrohondro yari di pasa baka dati, teleki a ten disi (Mat. 28:20). Baka di Yesus bigin tiri leki Kownu na ini 1914, dan moro nanga moro Kresten kisi wan kari te fu kaba.
14, 15. San e pasa na ini a ten fu wi te a abi fu du nanga den wan di e kisi wan kari fu tron salfuwan?
14 A fosi sani di Yesus du, na taki a fringi ala den engel di ben e opo densrefi teige a tirimakti fu Gado, komoto na hemel. (Leisi Openbaring 12:10, 12.) Baka dati a bigin tyari a fikapisi fu den salfuwan kon na wán di sa kisi a grani fu tiri makandra nanga en na ini a Kownukondre, so taki a heri grupu fu 144.000 salfuwan ben kan seti. Soleki fa a sori, dan pikinmoro ala den salfuwan ben tyari kon na wán kaba na ini den yari baka 1935, èn furu fu den wan di ben teki a bun nyunsu no ben abi a firi fu go na hemel. A yeye fu Gado no ben e taigi den wan disi taki den ben de manpikin fu Gado. (Luku Romesma 8:16.) Na presi fu dati, den kon si taki den na memre fu den „tra skapu” di abi a howpu fu libi fu têgo na ini wan paradijs na grontapu (Yoh. 10:16). Sobun, baka a yari 1935, dan a moro prenspari marki fu a preikiwroko ben de now fu tyari „wan bigi ipi sma” kon na wán. Na den sma disi na apostel Paulus ben si na ini wan fisyun, èn na den o tan na libi baka „a bigi banawtu”.—Openb. 7:9, 10, 14.
15 Toku, na ini den yari baka 1930, Gado gi wan tu Kresten a kari fu go na hemel. Fu san ede? Son leisi a ben kan de so taki den Kresten disi kon na ini a presi fu tra salfuwan di no tan getrow na Yehovah. (Luku Openbaring 3:16.) Paulus ben taki srefi fu son sma di a ben sabi èn di ben gowe libi a tru bribi (Fil. 3:17-19). Suma Yehovah ben o gi wan kari fu kon na ini a presi fu den wan disi? A no de fu taki dati na Yehovah srefi e bosroiti dati. Toku wi kan frustan taki Yehovah no ben o teki sma di tron Kresten no so langa pasa. Ma a ben o teki Kresten di tan getrow furu yari kaba, neleki den disipel di ben de nanga Yesus na a ten di a seti a Memrefesa. *—Luk. 22:28.
16. Sortu sani di abi fu du nanga den salfuwan e meki wi de nanga tangi, èn sortu overtoigi wi kan abi?
16 Ma soleki fa a sori, dan a no ala den wan di kisi wan kari fu go na hemel na ini den yari baka 1930, na sma di e kon na ini a presi fu den wan di fadon komoto na bribi. Soleki fa wi sabi, dan Yehovah sorgu taki wi sa abi salfu Kresten na wi mindri na ini den lasti dei fu a sistema disi, teleki „Babilon a Bigiwan” kisi pori (Openb. 17:5). * Èn wi kan abi na overtoigi taki ala den 144.000 salfuwan sa kon na wán na a ten di Yehovah feni bun, èn taki ala den salfuwan sa tiri na ini a Kownukondre te fu kaba. Boiti dati, wi kan bribi a profeiti wortu di e taki dati a bigi ipi di e tan gro doronomo, sa tan getrow leki grupu. Heri esi, a bigi ipi disi sa „komoto na ini a bigi banawtu” di o kon na tapu a grontapu fu Satan, èn den sa go nanga prisiri na ini a nyun grontapu fu Gado.
Dyonsro a hemel tirimakti fu Gado sa abi ala en memre!
17. Soleki fa 1 Tesalonikasma 4:15-17 nanga Openbaring 6:9-11 e sori, dan san pasa nanga den salfu Kresten di tan getrow te na dede?
17 Sensi a yari 33, dusundusun salfu Kresten sori taki den abi wan tranga bribi, èn den tan getrow te na dede. Den getrow-wan disi kisi a hemel Kownukondre kaba, fu di Gado ben feni taki den warti nofo fu kisi a grani dati. Soleki fa a sori, dan dati pasa sensi a bigin fu a denoya fu Krestes.—Leisi 1 Tesalonikasma 4:15-17; Openbaring 6:9-11.
18. (a) Sortu overtoigi den salfuwan di de ete na grontapu abi? (b) Fa den tra skapu e si den salfu Kresten brada fu den?
18 Den salfuwan di de ete na grontapu abi a tranga overtoigi taki efu den tan getrow, dan heri esi Gado sa pai den nanga libi na ini hemel. Te den milyunmilyun tra skapu e poti prakseri na a bribi fu den salfu brada fu den, dan den e agri nanga den sani di na apostel Paulus ben taki fu den salfu brada na ini Tesalonika. A ben taki: „Wisrefi e prèise unu na den tra gemeente fu Gado, fu di unu e horidoro èn unu e tan bribi awinsi un musu frudrage someni frufolgu nanga pina. Disi na wan buweisi fu a regtfardiki fasi fa Gado e krutu sma, èn a bakapisi sa de taki unu sa warti gi a kownukondre fu Gado, bika na fu dati ede unu e pina tu” (2 Tes. 1:3-5). Te a lasti memre fu a salfu grupu dede èn e go na hemel, dan a hemel tirimakti fu Gado sa abi ala en memre, awinsi o ten dati o pasa. A sani disi sa meki taki prisiri sa de na ini hemel èn na grontapu!
[Futuwortu]
^ paragraaf 15 Luku De Wachttoren fu 1 maart 1992, bladzijde 20, paragraaf 17.
^ paragraaf 16 Luku „Aksi fu leisiman” na ini A Waktitoren fu 1 mei 2007.
Yu kan tyari disi kon na krin?
• Sortu sani di abi fu du nanga a Krutudei, Gado ben taigi Abraham?
• Fu san ede Gado ben si Abraham leki wan regtfardiki sma?
• Sortu blesi den salfu bakapikin fu Abraham e kisi fu di Gado e si den leki regtfardikisma?
• Sortu overtoigi ala Kresten abi?
[Aksi fu a tori disi]
[Prenki na tapu bladzijde 20]
Yesus ben gi den bakaman fu en deki-ati fu meki muiti fu kisi a Kownukondre
[Prenki na tapu bladzijde 21]
Na a Pinksterfesa fu a yari 33, Yehovah bigin tyari den tra salfu bakapikin fu Abraham kon na wán
[Prenki na tapu bladzijde 23]
Den tra skapu de nanga tangi taki salfu Kresten de makandra nanga den na ini den lasti dei