Satan e pruberi fu wai Kresten puru neleki aleisibuba

SYATU bifo Yesus dede, a warskow en disipel: ’Satan de fayafaya fu kisi unu, so taki a kan wai unu puru neleki fa wan sma e wai aleisibuba puru’ (Luk. 22:31). San a ben wani taki nanga den wortu dati?

Na ini a ten fu Yesus, gronman ben musu wroko langa èn den ben musu wroko tranga fu du a kotiwroko. A fosi sani di den gronman ben du na a kotiwroko, na fu tyari ala aleisitiki fu a gron kon na wán. Baka dati, den ben naki den aleisitiki na tapu wan tranga gron so taki den ben broko na pisipisi. Son leisi, den ben gebroiki wan kaw, noso wan tra meti fu hari wan wagi na tapu den aleisitiki, so taki den broko na pisipisi. Na so fasi na aleisi ben lusu fu den aleisitiki. Baka dati, den gronman ben trowe na aleisi nanga den aleisitiki go na loktu. Na so, na aleisi ben fadon baka na tapu a gron, aladi winti ben wai den aleisibuba nanga den aleisitiki gowe. Te fu kaba, den gronman ben meki na aleisi pasa na ini wan manari fu puru ston nanga tra sani di no de fanowdu.

Soleki fa Yesus ben taki, dan Satan ben tan du ala muiti fu tesi den disipel fu Yesus na ini a ten dati, èn a e du dati tu na ini a ten disi (Ef. 6:11). A tru taki, a no Satan e meki wi kisi ibriwan fu den problema di wi abi na ini wi libi (Preik. 9:11). Ma toku, Satan de fayafaya fu du ala san a man fu meki wi drai baka gi Yehovah. Fu eksempre, a kan kori wi fu feti baka gudu, fu luku felem noso fu arki poku di kan pori wi denki, noso a kan kori wi fu du hurudu. A kan gebroiki sma na skoro noso na wrokope, nanga famiriman di no de na bribi, fu dwengi wi so taki wi e du muiti fu kisi a moro bun skoroleri noso a moro bun wroko di de fu kisi na ini a grontapu disi. Boiti dati, Satan kan gebroiki sma fu frufolgu wi so taki wi drai baka gi Gado. A no de fu taki dati Satan e du furu tra sani fu kori wi, so taki a kan wai wi puru neleki fa wan sma e wai aleisibuba puru.

Fa wi kan kakafutu gi a tranga feanti disi? Wi no tranga nofo fu kakafutu gi en. Satan tranga moro wi, ma wi sabi taki Yehovah tranga omeni tron moro Satan. Te wi e frutrow dorodoro tapu Yehovah, te wi e begi en fayafaya fu kisi a koni nanga a deki-ati fu man horidoro, èn te wi e teki a tiri fu en, dan A sa gi wi a krakti fu man kakafutu gi den tesi fu Satan.—Ps. 25:4, 5.

Te wi e kisi tesi, dan wi musu kon „sabi san bun èn san no bun”, èn na so fasi Satan no sa man kori wi (Hebr. 5:13, 14). Yehovah kan yepi wi fu kon kisi a sabi dati. Te wi sabi kaba san bun èn san no bun, dan wi no musu meki nowan sani tapu wi fu tan du san bun. Efu wi e teki a tiri fu Yehovah, dan a sa horibaka gi wi fu di wi teki a fasti bosroiti fu du san bun.—Ef. 6:10.

Satan kan pruberi fu wai wi puru neleki fa wan sma e wai aleisibuba puru. Ma nanga a krakti fu Yehovah wi o man kakafutu gi Satan, èn wi o abi wan tranga bribi (1 Petr. 5:9). Iya, a Wortu fu Yehovah e gi wi a dyaranti disi: „Kakafutu gi Didibri, èn a sa lon gowe fu unu.”—Yak. 4:7.