A di fu 123 klas fu a Gileadskoro

Den studenti di kaba a Gileadskoro e kisi a deki-ati fu du san den leri

TAPU satra 8 september 2007, wan grupu fu 6352 sma fu 41 kondre, ben de drape di a di fu 123 klas fu a Waktitoren Bijbelskoro Gilead kaba a skoro. Tin yuru mamanten, Anthony Morris fu a Tiri Skin èn fesiman fu a programa, ben gi den arkiman wan switikon. Baka di a taki syatu fu wan tu sani, a kari a fosi takiman, Gary Breaux fu a Bijkantoro Komte fu Amerkankondre.

Brada Breaux ben gi den studenti a dyaranti taki awansi fa den de, efu den moi noso den no moi na skin fasi, den sma di e du a wani fu Yehovah moi na ini En ai (Yer. 13:11). A gi den studenti a deki-ati fu du muiti fu tan de moi na ini Gado ai. Baka dati, Gerrit Lösch fu a Tiri Skin, ben sori taki a fiti fu abi a howpu taki wi o kisi pai te wi e dini Yehovah (Hebr. 11:6). Ma a reide fu san ede wi wani dati, musu de fu di wi lobi Yehovah èn tra sma nanga wi heri ati.

Baka dati, na opziener fu a Bijbelskoro kantoro, William Samuelson, gi den studenti deki-ati fu tan getrow te den e du a warti wroko fu preiki fu a Kownu di e tiri now. A taigi den tu fu sori nanga yepi fu a bun fasi fa den e tyari densrefi, taki den warti fu du a wroko dati. * Sam Roberson, a brada di e yepi na opziener fu a Bijbelskoro kantoro, ben gi den studenti deki-ati fu tan du muiti fu si den bun fasi fu trawan. Na a fasi dati den studenti o man sori moro bun taki den „lobi ala brada”.—1 Petr. 2:17.

Baka den lezing dati di gi den arkiman deki-ati, wan fu den leriman fu a Gileadskoro, Mark Noumair, ben abi wan takimakandra nanga wan tu fu den studenti di ben fruteri san den ondrofeni na ini a preikiwroko na a ten di den ben de na a Gileadskoro. Ala den arkiman ben kan si krin taki den studenti lobi a preikiwroko èn taki den wani yepi trawan trutru. Baka dati, Kent Fischer fu a Bethel Kantoro fu Patterson, ben abi wan takimakandra nanga memre fu Bijkantoro Komte fu dri kondre pe zendeling ben go. Den moi sani di den brada disi taki ben gi den arkiman a dyaranti taki den brada o sorgu bun gi den nyun zendeling disi te den de na ini a kondre pe den musu go. Spesrutu den papa nanga mama fu den studenti ben kisi deki-ati fu yere den sani dati. Baka dati, Izak Marais, fu a kantoro di e gi yepi so taki a vertaalwroko du moro bun, ben taki nanga wan tu sma di e du a zendelingwroko langa ten kaba. Den ondrofenitori fu den zendeling disi meki den studenti si sortu prisiri sani den kan fruwakti.

Brada Geoffrey Jackson fu a Tiri Skin, ben hori a moro prenspari lezing fu a programa, di nen „Now di yu yere ala sani, san yu o du?” Brada Jackson, di ben e dini leki zendeling pikinmoro 25 yari na a kontren fu a Stille Zuidzee, ben taki fu a lasti pisi fu a Bergitaki. A lezing dati ben taki fu na agersitori fu Yesus di ben abi  fu du nanga tu man di ben bow oso. Wán fu den man ben koni, ma a trawan ben don. A takiman ben sori taki kande den tu oso ben bow na a srefi kontren. Ma a don man bow en oso na tapu santi, aladi a koni man diki a gron teleki a feni ston-gron fu bow na tapu. Di wan bigi winti wai, dan na oso di ben bow na tapu ston no fadon, ma a wan di ben bow na tapu santi, fadon.—Mat. 7:24-27; Luk. 6:48.

Yesus ben tyari kon na krin taki a don man e prenki den sma di e arki Yesus wawan, ma di no e du san a taki. A koni man ben de leki den sma di e arki Yesus, èn di e du sosrefi san a taki. Brada Jackson taigi den studenti: „Te yu e du a zendelingwroko soleki fa yu leri fu Bijbel, dan yu sa de leki a koni man.” Fu dati ede, na a kaba fu a lezing a gi den studenti a deki-ati fu du san den leri te den doro na a kondre pe den o go leki zendeling.

Na a lasti pisi fu a programa, den studenti kisi den diploma èn den kisi fu yere na sortu kondre den o go. Baka dati, Brada Morris gi den wan tu rai ete. A ben gi den studenti deki-ati fu tan waka baka Yesus èn fu frutrow ala ten tapu Yehovah fu gi den krakti. Dan a programa fu a Gileadskoro ben kon na wan kaba.

[Futuwortu]

 [Faki na tapu bladzijde 31]

WAN TU SANI FU A KLAS

A nomru fu den kondre pe den studenti komoto: 10

A nomru fu den kondre pe den studenti o go: 24

A nomru fu studenti: 56

Gemiddeld yari di den abi: 33,5

Gemiddeld yari di den dopu: 17,9

Gemiddeld yari di den de na ini a furuten diniwroko: 13,8

[Prenki na tapu bladzijde 32]

A di fu 123 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7)Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.