Teki na eksempre fu a moro bigi Zendeling
Teki na eksempre fu a moro bigi Zendeling
„Waka baka na eksempre fu mi, neleki fa mi e waka baka na eksempre fu Krestes.”—1 KOR. 11:1.
1. Fu san ede wi musu teki na eksempre fu Yesus Krestes?
NA APOSTEL Paulus ben teki na eksempre fu a moro bigi Zendeling, Yesus Krestes. Paulus ben gi den Kresten brada nanga sisa fu en a deki-ati disi tu: „Waka baka na eksempre fu mi, neleki fa mi e waka baka na eksempre fu Krestes” (1 Kor. 11:1). Baka di Yesus ben wasi den futu fu den apostel fu en fu sori den taki den ben musu abi sakafasi, dan a taigi den: „Mi gi unu na eksempre, so taki unu kan du tu san mi du gi unu” (Yoh. 13:12-15). Na ini a ten disi, wi leki Kresten abi a frantwortu fu de leki Yesus Krestes te wi e taki èn te wi e du sani. Boiti dati, wi musu sori den srefi fasi fu en.—1 Petr. 2:21.
2. Awansi a Tiri Skin no seni yu fu go dini leki zendeling na wan tra kondre, toku fa yu kan du a preikiwroko?
2 Na ini na artikel fosi a wan disi, wi leri taki wan zendeling na wan sma di kisi a wroko fu tyari a bun nyunsu gi sma na tra presi. Paulus ben poti wan tu prenspari aksi di abi fu du nanga a tori disi. (Leisi Romesma 10:11-15.) Luku san na apostel ben aksi: „Fa den o yere efu wan sma no preiki gi den?” Baka dati, a gebroiki den wortu fu a profeititori fu Yesaya. A taki: „O moi den futu de fu den sma di e preiki bun nyunsu di abi fu du nanga bun sani!” (Yes. 52:7) Awansi yu no kisi a grani fu go dini leki zendeling na wan tra kondre, toku yu kan kon tron wan sma di de fayafaya fu preiki a bun nyunsu, neleki fa a ben de nanga Yesus. A yari di pasa, 6.957.852 Kownukondre preikiman ’preiki a bun nyunsu’ na ini 236 kondre.—2 Tim. 4:5.
„Wi gowe libi ala sani èn wi kon waka na yu baka”
3, 4. Sortu sani Yesus gowe libi na hemel, èn san wi musu du fu man tron bakaman fu en?
3 Fu man du a wroko di a ben kisi fu du na grontapu, Yesus ’gowe libi ala san a ben abi, èn a tron leki wan srafu’. A gowe libi a glori èn a libi di a ben abi na ini hemel (Fil. 2:7). Awansi sortu sani wi e du fu de leki Krestes, toku wi no kan teki den sani dati gersi nanga den sani di Yesus du fu man kon na grontapu. Ma wi kan tan tanapu kánkan leki bakaman fu en, te wi no e angri fu abi a libi di wi ben abi fosi na ini a grontapu fu Satan.—1 Yoh. 5:19.
4 Wan leisi, na apostel Petrus ben taigi Yesus: „Luku! Wi gowe libi ala sani èn wi kon waka na yu baka” (Mat. 19:27). Petrus, Andreas, Yakobus, nanga Yohanes no draidrai fu gowe libi den fisinèt fu den di Yesus kari den fu tron bakaman fu en. Den gowe libi a fisiwroko fu den èn den meki a preikiwroko kon tron a moro prenspari wroko gi den. Soleki fa na evangelietori fu Lukas e sori, dan Petrus ben taki: „Luku! Wi gowe libi den sani fu wi, èn wi kon waka na yu baka” (Luk. 18:28). Furu fu wi no ben abi fu gowe libi ala ’den sani fu wi’ fu man tron bakaman fu Yesus. Ma fu man tron bakaman fu Krestes èn fu man dini Yehovah nanga wi heri ati, wi ben abi fu sori taki wi ’no e teri wisrefi moro’ (Mat. 16:24). A sani disi tyari bigi blesi kon gi wi. (Leisi Mateyus 19:29.) Te wi e preiki a bun nyunsu fayafaya neleki Krestes, dan dati e gi wi prisiri, spesrutu te wi ben man yepi wan sma fu kon krosibei na Gado èn na en lobi Manpikin, awinsi wi du pikinso nomo.
5. Fruteri wan ondrofenitori di e sori san wan sma di froisi go tan na wan tra kondre kan bosroiti fu du te a kon sabi den tru tori fu Bijbel.
5 Valmir, wan man fu Brasyonkondre, ben e libi na ini a busikondre fu Sranan pe a ben e wroko gowtu. A ben de wan sopiman di ben e libi wan yayolibi. Wan leisi di a ben de na foto, dan Yehovah Kotoigi bigin studeri Bijbel nanga en. A ben e studeri ibri dei, a tyari furu kenki kon, èn a no teki langa fosi a teki dopu. Ma a kon si taki a wroko fu en ben e meki en muilek gi en fu libi akruderi den leri fu Bijbel. Dati meki a seri a bisnis fu en di ben e drai bun, èn a froisi go baka na Brasyonkondre fu yepi den famiriman fu en fu kon sabi den tru tori fu Bijbel. Furu sma di ben froisi go tan na wan gudu kondre èn di kon sabi den tru tori fu Bijbel, de klariklari fu libi a wroko di den feni drape. Den e drai go baka na a mamakondre fu den fu go yepi den famiriman nanga tra sma fu kon sabi Gado. Den Kownukondre preikiman disi e sori taki den de fayafaya trutru fu preiki a bun nyunsu.
6. San wi kan du te wi no man froisi go na wan kontren pe moro Kownukondre preikiman de fanowdu?
6 Wan tu Kotoigi ben man froisi go na tra kontren pe moro Kownukondre preikiman de fanowdu. Sonwan fu den e dini na tra kondre srefi. Kande wi srefi no man du dati, ma wi kan du ala san wi man fu preiki a bun nyunsu, neleki fa Yesus ben du dati.
Yehovah e gi wi a leri di wi abi fanowdu
7. Sortu skoro seti fu yepi den wan di wani tron moro bun Kownukondre preikiman?
7 Neleki Yesus di ben kisi leri fu en Tata, wi kan kisi wini tu fu a leri di Yehovah e gi wi na ini a ten disi. Yesus srefi ben taki: „Den Profeiti skrifi: ’Yehovah o gi den alamala leri’” (Yoh. 6:45; Yes. 54:13). Na ini a ten disi, spesrutu skoro seti fu yepi wi fu tron moro bun Kownukondre preikiman. A no de fu taki dati wi alamala kisi wini fu a Theokrasia Diniwroko-skoro di e hori na ini a gemeente fu wi. Pionier e kisi a grani fu go na a Pionierskoro. Difrenti preikiman di de pionier wan heri pisi ten kaba, kisi a grani fu go na a skoro disi a di fu tu leisi. Owruman nanga dinari ini a diniwroko go na a Kownukondre Diniwroko-skoro fu kisi leri fa fu tron moro bun leriman èn fa fu dini den brada nanga sisa moro bun. Furu owruman nanga dinari ini a diniwroko di no trow ete, go na a Dinariskoro pe den kisi leri fa fu yepi trawan na ini a preikiwroko. Èn furu fu den brada nanga sisa di kisi a grani fu go dini leki zendeling, kisi leri na a Waktitoren Bijbelskoro Gilead.
8. San son brada de klariklari fu du fu man kisi wini fu a leri di Yehovah e gi?
8 Furu Kotoigi fu Yehovah tyari kenki kon na ini den libi fu man go na den skoro disi. Di Yugu ben wani go na a Dinariskoro na ini Kanada, dan a gowe libi a grontapuwroko fu en, fu di a wrokobasi fu en no ben wani gi en fri fu a wroko fu en. „Mi no e sari taki mi teki a bosroiti dati”, na so Yugu taki. „Fu taki en leti, efu den ben gi mi fri fu a wroko fu mi, dan kande den ben o fruwakti taki mi ben o tan wroko drape fu ala ten, soso fu di den ben du mi wan bun. Ma now mi kan du iniwan wroko di mi e kisi fu Yehovah.” Fu di furu preikiman ben wani kisi wini fu a leri di Gado e gi den, meki den ben de klariklari fu gowe libi sani di den ben e si leki tumusi prenspari sani fosi.—Luk. 5:28.
9. Gi wan eksempre di e sori fa sma kan go na fesi te den e kisi leri fu Bijbel èn te den e meki muiti fu kisi wini fu a leri dati.
9 Te sma e kisi leri fu Bijbel èn te den e meki seryusu muiti fu kisi wini fu a leri dati, dan den kan go na fesi trutru (2 Tim. 3:16, 17). Luku san pasa nanga Saulo di e libi na ini Gwatemala. A boi disi gebore nanga wan siki di e meki taki a no man leri so bun. Dati meki wan fu den skoromisi fu en taigi en mama taki a no ben musu dwengi en fu leri leisi, fu di dati ben o meki a boi lasi-ati. Saulo gowe libi skoro sondro taki a ben leri leisi. Ma wan Kotoigi gebroiki a brochure Du Muiti fu Leisi èn fu Skrifi fu leri Saulo fa fu leisi. Saulo go na fesi, èn te fu kaba a bigin hori lezing na a Theokrasia Diniwroko-skoro. Bakaten, di Saulo en mama ben e preiki oso fu oso, dan a miti a skoromisi fu a boi. Di a skoromisi yere taki Saulo ben leri leisi, dan a aksi en mama fu tyari Saulo kon na en a wiki baka dati. Di Saulo ben de na a skoromisi en oso, dan na uma disi aksi en, „San yu o leri mi?” Saulo bigin leisi wan paragraaf fu a buku San Bijbel e leri wi trutru? A skoromisi ben taki: „Mi no man bribi taki yu e gi mi leri now.” A ben breiti so te, taki a bigin krei èn a brasa Saulo.
Leri di e naki na ati fu sma
10. Sortu tumusi moi publikâsi de now di wi kan gebroiki fu leri sma den tru tori fu Bijbel?
10 Yesus ben e leri sma sani di Yehovah srefi ben leri en, èn a ben e gebroiki a Wortu fu Gado tu (Luk. 4:16-21; Yoh. 8:28). Te wi e fiti den rai fu Yesus èn te wi e leri sma san skrifi na ini Bijbel, dan wi e teki na eksempre fu Yesus. Na so den sani di wi alamala e taki èn e denki sa kruderi nanga makandra, èn disi e yepi wi fu tan na ini wánfasi (1 Kor. 1:10). Wi de nanga tangi trutru taki „a getrow èn koni srafu” e meki Bijbel publikâsi di e yepi wi fu gi ala sma a srefi leri èn fu du a preikiwroko fu wi na a yoisti fasi! (Mat. 24:45; 28:19, 20) Wan fu den publikâsi disi na a Bijbel leri-buku, di de fu kisi now na ini 179 tongo.
11. Fa wan sisa na ini Etiopia gebroiki a Bijbel leri-buku fu yepi wan sma di ben e gens en?
11 Te wi e gebroiki a Bijbel leri-buku fu studeri Bijbel nanga sma, dan dati kan kenki srefi na ati fu sma di e gens wi. Wan leisi di Lula, wan pionier sisa na ini Etiopia, ben e studeri Bijbel nanga wan sma, dan wan famiriman fu a sma dati broko kon na ini na oso, èn a taigi a bijbelstudie taki a no ben musu studeri Bijbel. Lula taki na wan switi fasi nanga a famiriman dati, èn a gebroiki wan agersitori di ben skrifi na ini kapitel 15 fu a Bijbel Leri-buku. Na agersitori dati ben abi fu du nanga falsi moni. Na uma en ati kon kowru èn a gi den okasi fu studeri go doro. Fu taki en leti, a tra leisi di Lula go studeri baka nanga a sma, dan a famiriman disi ben de drape tu, èn a aksi Lula fu studeri Bijbel nanga en. A ben wani pai srefi! Fosi yu denki a ben e studeri Bijbel dri leisi na ini wan wiki, èn a go na fesi na ini a tru anbegi.
12. Gi wan eksempre fu sori fa yonguwan kan abi bun bakapisi te den e leri sma den tru tori fu Bijbel.
12 Yonguwan kan gebroiki a Bijbel leri-buku fu yepi trawan. Keanu, wan boi fu 11 yari di e libi na ini Hawai, ben e leisi a buku disi na skoro. Ne wan fu den pikin fu en klas aksi en, „Fu san ede yu no e hori fesadei?” Keanu leisi a piki langalanga fu a pisi di nen „Wi musu hori fesadei?”, di de na bakasei fu a buku. Baka dati, a sori a boi a bladzijde pe den nen fu den kapitel skrifi, èn a aksi en sortu kapitel ben e hari en prakseri. Keanu bigin studeri Bijbel nanga a boi. A dienstyari di pasa, Yehovah Kotoigi hori 6.561.426 bijbelstudie, èn furu fu den Kotoigi disi gebroiki a Bijbel leri-buku. Yu e gebroiki a buku disi fu studeri Bijbel nanga sma?
13. Fa den sani di sma e leri te den e studeri Bijbel kan abi krakti na den tapu?
13 Te wi e gebroiki a Bijbel leri-buku fu studeri Bijbel nanga sma di wani du a wani fu Gado, dan dati kan abi furu krakti na den tapu. Wan trowpaar di e dini leki spesrutu pionier na ini Noorwegen, bigin studeri Bijbel nanga wan osofamiri di komoto fu Sambia. A trowpaar fu Sambia ben abi dri umapikin, èn den no ben wani kisi moro pikin. Sobun, di na uma kon de nanga bere, dan den bosroiti fu puru a bere. Wan tu dei fosi den ben o go na datra, den studeri a kapitel di nen „Si a libi soleki fa Gado e si en”. A kapitel dati abi wan fowtow fu wan beibi di de na ini en mama bere, èn a fowtow dati naki na ati fu a trowpaar disi so te, taki den bosroiti fu no puru a bere moro. Den tan go na fesi nanga a studie fu den, èn di a beibi gebore, den gi a boi dati a nen fu a brada di ben e studeri nanga den.
14. Fruteri fa wi sa abi bun bakapisi te wi srefi e du den sani di wi e leri trawan.
14 Wan prenspari reide fu san ede Yesus ben de so wan bun leriman, na fu di a ben e du den sani di a ben e leri sma. Furu sma lobi a fasi fa Yehovah Kotoigi e tyari densrefi, fu di den Kotoigi e tyari densrefi na wan bun fasi, neleki fa Yesus ben e du dati. Fufuruman ben broko go na ini na oto fu wan bisnisman na ini Nyun Zeeland, èn den fufuru a kofru fu en. A bisnisman disi go na skowtu, èn skowtu taigi en: „A wan-enkri fasi fa yu o kisi a kofru baka, na te wan Yehovah Kotoigi feni en.” Wan Kotoigi di ben e tyari koranti go gi sma, feni a kofru. Di a bisnisman kon sabi dati, dan a kon na a oso fu a sisa. A ben breiti taki wan prenspari papira fu en ben de ete na ini a kofru. A sisa taigi en, „A fiti taki mi gi yu a kofru baka, fu di mi na wan Kotoigi fu Yehovah.” A bisnisman no ben man bribi san a yere, fu di a ben sabi ete san a skowtu ben taigi en a srefi mamanten dati. A de krin taki tru Kresten e fiti den leri fu Bijbel na ini den libi, èn taki den e teki na eksempre fu Yesus.—Hebr. 13:18.
De leki Yesus te yu e handri nanga sma
15, 16. San wi kan du fu meki taki sma wani arki a boskopu di wi e preiki?
15 A fasi fa Yesus ben e handri nanga sma ben e meki taki sma ben wani arki a boskopu fu en. Fu eksempre, fu di a ben abi lobi nanga sakafasi, meki mofinasma ben lobi en. A ben e sori sari-ati gi den wan di ben kon na en, a ben e taki na wan switi fasi nanga den, èn a ben e dresi furu sma di ben siki. (Leisi Markus 2:1-5.) Wi no kan du wondru, ma wi kan sori lobi, sakafasi, nanga sari-ati gi trawan te wi e handri nanga den, èn den fasi disi sa meki taki sma sa wani kon sabi den tru tori fu Bijbel.
16 Di Tariua, wan spesrutu pionier, go na a oso fu wan owru man di nen Beere, dan a ben abi bun bakapisi fu di a sori sari-ati gi a man dati. A man disi e libi na tapu wan fu den moro farawe èilanti fu Kiribati na ini a Stille Zuidzee. A man no ben wani arki, ma di Tariua si taki a ben lan na wan sei fu en skin, dan a firi sari gi en. Tariua aksi a man: „Yu sabi san Gado pramisi fu du gi sikisma nanga owrusma?” Ne a leisi wan pisi fu a profeititori fu Yesaya. (Leisi Yesaya 35:5, 6.) A man ben lobi san a yere, èn a taki: „Mi leisi Bijbel omeni yari kaba, èn wan zendeling fu mi eigi kerki kon na mi furu yari langa, ma noiti mi leisi a pisi dati na ini Bijbel.” Tariua bigin studeri Bijbel nanga Beere, èn a go na fesi na ini a tru anbegi. Iya, a man disi ben malengri, ma now a dopu, èn a e teki fesi na ini wan grupu di de na wan farawe presi. Boiti dati, a man e waka a heri èilanti fu preiki a bun nyunsu gi sma.
Tan teki na eksempre fu Krestes
17, 18. (a) San kan yepi yu fu abi bun bakapisi leki preikiman? (b) San den wan di e preiki fayafaya sa kisi?
17 Den moi sani di preikiman e ondrofeni na ini a preikiwroko e sori doronomo taki wi kan abi bun bakapisi te wi e kweki den fasi di Yesus ben abi, èn te wi e sori den fasi dati tu. Fu dati ede, a fiti srefisrefi taki wi e preiki a bun nyunsu fayafaya neleki fa Krestes ben du dati!
18 Di son sma tron disipel fu Yesus na ini a fosi yarihondro, dan Petrus poti na aksi disi: „San wi o kisi dan?” Yesus piki en: „Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati, èn a sma dati o kisi têgo libi leki gudu” (Mat. 19:27-29). Na dati wi sa ondrofeni tu te wi e tan teki na eksempre fu a moro bigi Zendeling, Yesus Krestes.
San yu ben sa piki?
• Fa Yehovah e leri wi fu preiki a bun nyunsu?
• Fu san ede wi abi bun bakapisi te wi e gebroiki a Bijbel leri-buku na ini a preikiwroko?
• Fa wi kan de leki Yesus te wi e handri nanga sma?
[Aksi fu a tori disi]
[Prenki na tapu bladzijde 17]
Di Yesus gi Petrus, Andreas, Yakobus, nanga Yohanes a kari fu tron bakaman fu en, dan den no draidrai fu du dati
[Prenki na tapu bladzijde 19]
Publikâsi soleki a „Bijbel leri”-buku e yepi wi leki Kresten fu gi ala sma a srefi leri