Yesus Krestes—A moro bigi Zendeling
Yesus Krestes—A moro bigi Zendeling
„Na en gi mi a reti fu taki gi en, èn na En seni mi kon.”—YOH. 7:29.
1, 2. San na wan zendeling, èn suma wi kan kari a moro bigi Zendeling?
SAN yu e prakseri te yu e yere a wortu „zendeling”? Son sma e prakseri den zendeling fu Krestenhèit, di furu fu den e bemui na ini den politiek afersi nanga den moni afersi fu den kondre pe den e dini. Ma kande yu leki Yehovah Kotoigi e prakseri den zendeling di a Tiri Skin seni go na difrenti kondre na heri grontapu fu preiki a bun nyunsu (Mat. 24:14). Den zendeling disi de klariklari fu gebroiki den ten nanga den krakti fu du bun gi trawan, fu di den e yepi den fu kon krosibei na Yehovah Gado èn fu abi wan tumusi moi matifasi nanga en.—Yak. 4:8.
2 A wortu „zendeling” no skrifi na ini a Nieuwe-Wereldvertaling van de Heilige Schrift (Nyun-Grontapuvertaling fu den Santa Buku fu Bijbel). Ma na ini a futuwortu na Efeisesma 4:11, a Studiebijbel e sori taki a Griki wortu di vertaal nanga „evangeliepredikers” (preikiman fu a bun nyunsu) kan vertaal tu nanga a wortu „zendelingen” (zendeling). Yehovah na a moro bigi Preikiman, ma wi no kan kari en a moro bigi Zendeling, bika noiti wan sma ben seni en fu go preiki. Ma disi na san Yesus Krestes ben taki fu en hemel Tata: „Na en gi mi a reti fu taki gi en, èn na En seni mi kon” (Yoh. 7:29). Fu di Yehovah abi bigi lobi gi a libisma famiri, meki a seni en wan-enkri gebore Manpikin kon na grontapu (Yoh. 3:16). Wi kan kari Yesus a moro bigi Zendeling, noso a moro bun Zendeling, fu di wan fu den reide fu san ede a ben kon na grontapu, na fu „kotoigi fu a waarheid” (Yoh. 18:37). A ben abi bun bakapisi di a ben e meki a bun nyunsu fu a Kownukondre bekènti, èn te now ete wi e kisi wini fu a diniwroko fu en. Fu eksempre, te wi de na ini a diniwroko, dan wi kan gi sma leri na a fasi fa Yesus ben du dati, awansi wi a no zendeling.
3. Na sortu aksi wi sa poti prakseri?
3 A wroko di Yesus ben du leki Kownukondre preikiman e meki den aksi disi opo kon: San Yesus ondrofeni di a ben de na grontapu? Fa a du kon taki a ben de wan bun leriman? Èn fu san ede a ben abi bun bakapisi na ini a diniwroko fu en?
Yesus ben de klariklari fu go dini na wan tra presi
4-6. Sortu sani ben kenki gi Yesus di a kon na grontapu?
4 Na ini a ten disi, zendeling nanga Kresten di e froisi go na presi pe moro Kownukondre preikiman de fanowdu, kande sa musu kon gwenti fu libi wan tra sortu libi pe den no sa abi en so makriki moro. Ma dati na noti te wi e prakseri a situwâsi fu Yesus. A ben gowe libi hemel pe a ben e libi nanga en Tata èn nanga tra engel di ben e dini Yehovah nanga wan krin ati, èn a kon na grontapu pe a situwâsi ben de heri tra fasi (Yob 38:7). A ben e libi na mindri sondu libisma na ini wan ogri grontapu, èn dati ben de wan bigi difrenti trutru! (Mark. 7:20-23) Yesus ondrofeni srefi taki den disipel fu en di ben e wroko skinskin nanga en, ben e strei nanga makandra (Luk. 20:46; 22:24). A no de fu taki dati a handri na a yoisti fasi na ini ala situwâsi di a miti na grontapu.
5 Yesus no bigin taki a tongo fu libisma nanga yepi fu wan wondru, ma a bigin leri en di a ben pikin. Dati na wan bigi kenki gi wan sma di ben de fesiman fu den engel na ini hemel! Di Yesus ben de na grontapu, dan a ben e taki awinsi wán fu „den tongo fu libisma”. A tongo dati ben e difrenti srefisrefi fu ’a tongo fu engel’ (1 Kor. 13:1). Ma nowan sma ben man taki na so wan switi fasi leki Yesus.—Lukas 4:22.
6 Luku wan tu tra sani di ben kenki dorodoro gi a Manpikin fu Gado di a kon na grontapu. Aladi Yesus no ben kisi sondu fu Adam, toku a tron wan libisma, neleki den wan di bakaten ben o tron en „brada” noso en salfu bakaman. (Leisi Hebrewsma 2:17, 18.) Na a lasti neti di Yesus ben de na libi na grontapu, a ben kan aksi en hemel Tata fu seni „moro leki twarfu bigi legre engel” fu kon yepi en, ma a no du dati. Prakseri den engel di ben de na ondro a tiri fu en leki a Gran engel Mikael! (Mat. 26:53; Yudas 9) Iya, a tru taki Yesus ben du wondru, ma toku den sani di a du na grontapu, na pikin sani te yu e teki den gersi nanga den sani di a ben o man du na ini hemel.
7. Fa den Dyu ben si a Wet?
7 Fosi Yesus ben kon na grontapu, a ben de „a Wortu”, èn a kan taki na en ben de a Sma di ben e taki gi Gado, di a ben e tyari den Israelsma pasa na ini a gran sabana (Yoh. 1:1; Ex. 23:20-23). Den ben „kisi a Wet nanga yepi fu engel, ma [den no ben] du san a wet e taki” (Tori. 7:53; Hebr. 2:2, 3). Fu taki en leti, den Dyu kerki fesiman fu a fosi yarihondro, no ben kon frustan san a Wet ben wani taki trutru. Fu eksempre, luku a wet fu a Sabat. (Leisi Markus 3:4-6.) Den leriman fu Wet nanga den Fariseiman ben „frigiti den moro prenspari sani fu a Wet, namku retidu nanga sari-ati nanga getrowfasi” (Mat. 23:23). Ma toku Yesus tan meki muiti fu yepi den sma disi, èn a tan meki den tru tori fu Gado bekènti.
8. Fu san ede Yesus kan yepi wi?
8 Yesus ben de klariklari fu yepi trawan. Fu di a ben abi lobi gi sma, meki a ben e angri fu yepi den. A tan preiki a bun nyunsu fayafaya, awansi san ben pasa. Èn fu di Yesus ben de getrow na Yehovah di a ben de na grontapu, meki a „kisi a frantwortu fu gi têgo frulusu na ala den sma di o gi yesi na en”. Boiti dati, „fu di ensrefi nyan pina di a kisi tesi, meki a man kon yepi den sma [leki wi] di e kisi tesi”.—Hebr. 2:18; 5:8, 9.
Yesus ben de wan bun leriman
9, 10. Sortu leri Yesus kisi bifo Gado seni en kon na grontapu?
9 Bifo Kresten na ini a ten disi e go dini leki zendeling na ini wan tra kondre, a Tiri Skin e seti sani fu gi den leri. Yesus Krestes ben kisi leri? Iya, ma a no ben go na den skoro fu den Dyu leriman fosi Gado salfu en leki a Mesias. A no ben kisi leri tu fu wan tu fu den pôpi kerki fesiman (Yoh. 7:15; luku Tori. 22:3.) We dan, fa a du kon taki Yesus ben de so wan bun leriman?
10 Awansi san Yesus ben leri fu en mama, Maria, èn fu en kwekipapa Yosef, a moro prenspari leri di a ben kisi fu man du a diniwroko fu en, ben komoto fu Yehovah, a moro bun Sma di ben kan gi en leri. Luku san Yesus ben taki fu a tori disi: „Mi no taki san misrefi e prakseri, ma a Tata srefi di seni mi kon, taigi mi san mi musu taki” (Yoh. 12:49). Luku taki Gado ben taigi en Manpikin krin san a ben musu leri sma. A no de fu taki dati, bifo Yesus ben kon na grontapu, a ben teki furu ten fu arki en Tata di ben e taigi en san a ben musu du. Yesus no ben kan kisi moro bun leri, a no so?
11. Fa Yesus sori taki a abi den srefi firi di en Tata abi gi libisma?
11 Fu sensi a ten di a Manpikin meki, a ben abi wan bun matifasi nanga en Tata. Fosi Yesus ben kon na grontapu leki libisma, a ben sabi fa Yehovah ben e firi gi libisma, fu di a ben si fa A ben e handri nanga den. A Manpikin ben sori a srefi lobi gi libisma leki a lobi di Gado abi gi den, èn leki a Sma di e prenki koni a ben kan taki: „Den sani di mi ben lobi trutru, ben de den manpikin fu libisma.”—Odo 8:22, 31.
12, 13. (a) San Yesus leri fu di a luku fa en Tata ben e handri nanga den Israelsma? (b) Fa Yesus gebroiki a leri di a ben kisi?
12 A Manpikin ben leri tu fu luku fa en Tata ben e handri te sani no ben e waka soleki fa A ben wani. Fu eksempre, luku fa Yehovah ben handri nanga den trangayesi Israelsma. Nehemia 9:28 e taki: „Te sani ben e waka bun gi den, dan agen den ben e go du sani di yu [Yehovah] no feni bun. Dati meki yu ben e libi den gi den feanti fu den di ben e du ogri-ati sani nanga den. Dan agen den ben e bari kari yu fu suku yepi na yu èn na ini hemel yu ben yere a babari fu den. Ibri tron baka yu ben e frulusu den fu di yu abi sari-ati trutru.” Fu di Yesus ben e wroko makandra nanga Yehovah, èn fu di a ben e luku fa a ben e handri nanga libisma, meki a ben sori sari-ati gi libisma na grontapu, neleki fa Yehovah e du dati.—Yoh. 5:19.
13 Di Yesus sori sari-ati gi den disipel fu en, dan na so a du san a ben leri. A neti fosi a dede, ala den apostel di a ben lobi so te, „lon gowe libi en” (Mat. 26:56; Yoh. 13:1). Na apostel Petrus ben taki dri leisi srefi taki a no ben sabi Krestes! Ma toku Yesus gi den apostel fu en na okasi fu drai kon baka na en. A ben taigi Petrus: „Mi begi fayafaya gi yu taki yu no o lasi a bribi fu yu; te yu drai kon baka, dan yu musu tranga den brada fu yu” (Luk. 22:32). Na Israel fu Gado seti na tapu a fondamenti fu „den apostel nanga den profeiti” èn den stonfutu fu a skotu fu a Nyun Yerusalem abi den nen fu den twarfu apostel fu a Pikin Skapu, Yesus Krestes, na den tapu. Te nanga a dei fu tide, salfu Kresten nanga den „tra skapu” di e wroko makandra nanga den, e go na fesi leki wan organisâsi fu Kownukondre preikiman di e kisi tiri fu Gado èn fu en lobi Manpikin.—Ef. 2:20; Yoh. 10:16; Openb. 21:14.
A fasi fa Yesus ben e gi leri
14, 15. Fa a fasi fa Yesus ben e gi leri ben e difrenti fu a fasi fa den leriman fu wet nanga den Fariseiman ben e gi leri?
14 Fa Yesus gebroiki a leri di a ben kisi, fu leri den bakaman fu en? Te wi e agersi a fasi fa Yesus ben e gi leri nanga a fasi fa den Dyu kerki fesiman ben e gi leri, dan wi e si krin taki Yesus ben de wan moro bun leriman leki den. Den leriman fu wet nanga den Fariseiman ’ben e meki a wortu fu Gado lasi krakti, fu di den ben e hori den srefi na den gwenti fu den’. Tra fasi leki den leriman dati, Yesus no ben e leri sma en eigi denki, ma a ben e leri sma sani di ben e kruderi nanga Gado wortu, noso a boskopu fu En (Mat. 15:6; Yoh. 14:10). Na dati wi musu du tu.
15 Ete wan reide de fu san ede Yesus ben de heri tra fasi leki den kerki fesiman. Luku san a ben taki fu den leriman fu Wet nanga den Fariseiman: „Du ala san den e taigi unu, ma no du soleki fa den e du, bika den e taki, ma den no e du” (Mat. 23:3). Yesus ben du san a ben leri. Meki wi luku wan eksempre di e sori taki na so a ben de trutru.
16. Fu san ede wi kan taki dati Yesus ben e fiti a rai na Mateyus 6:19-21, na ini en eigi libi?
16 Yesus ben gi den disipel fu en a rai fu „kibri . . . gudu na ini hemel”. (Leisi Mateyus 6:19-21.) Yesus srefi ben fiti a rai disi na ini en eigi libi? Iya, a ben du dati, bika a ben kan taki na wan opregti fasi: „Krabudagu abi olo pe den e tan èn den fowru di e frei na loktu abi sribipresi, ma a Manpikin fu libisma no abi nowan presi fu poti en ede” (Luk. 9:58). Yesus no ben e libi wan gudu libi. A moro prenspari sani gi en ben de fu preiki a bun nyunsu fu a Kownukondre, èn a sori san a wani taki fu no abi den broko-ede di sma e kisi fu di den e kibri gudu na grontapu. Yesus ben sori fu san ede a moro bun fu kibri gudu na ini hemel „pe woron nanga frustu no man pori en èn pe fufuruman no man go fufuru en”. Yu e teki a rai di Yesus e gi fu kibri gudu na ini hemel?
Yesus ben abi fasi di sma ben lobi
17. Sortu fasi di Yesus ben abi, meki taki a ben de wan tumusi bun preikiman?
17 Sortu fasi di Yesus ben abi, meki taki a ben de wan tumusi bun preikiman? Wan fu den, na a fasi fa a ben e handri nanga den sma di a ben yepi. Yesus ben sori den moi fasi fu Yehovah, èn wan tu fu den fasi dati ben de sakafasi, lobi, nanga sari-ati. Luku fa den fasi disi meki taki sma kon lobi Yesus.
18. Fu san ede wi kan taki dati Yesus ben abi sakafasi?
18 Di Yesus bosroiti fu kon na grontapu, dan „a gowe libi ala san a ben abi, a tron leki wan srafu èn a ben tron leki libisma”(Fil. 2:7). Na so fasi Yesus ben sori taki a abi sakafasi. Boiti dati, Yesus no ben e wisiwasi sma. A no ben e denki ’Mi komoto te na hemel, sobun un musu fu arki mi’. Tra fasi leki den sma di e kari densrefi mesias, Yesus no ben e waka fruteri ala sma taki a ben de a tru Mesias. Son leisi a ben e taigi sma fu no fruteri trawan suma na en èn san a ben du (Mat. 12:15-21). Yesus ben wani taki sma ben musu bosroiti gi densrefi efu den ben o tron en bakaman, baka te den ben si nanga den eigi ai san a ben e du. A tyari furu wini gi den disipel taki a Masra fu den no ben e fruwakti taki den ben musu de leki den volmaakti engel na hemel!
19, 20. Fa a lobi nanga a sari-ati di Yesus ben abi gi sma meki taki a yepi den?
19 Yesus Krestes ben sori lobi tu, èn dati na wan fu den moro prenspari fasi fu en hemel Tata (1 Yoh. 4:8). Yesus ben gi sma leri fu di a ben lobi den. Fu eksempre, luku fa a ben e firi gi wan spesrutu yongu tiriman. (Leisi Markus 10:17-22.) Yesus „kon firi lobi gi en” èn a ben wani yepi en, ma a yongu tiriman no ben wani gowe libi den furu gudu fu en fu kon tron wan bakaman fu Krestes.
20 Wan tra moi fasi di Yesus ben abi, na a sari-ati di a ben abi gi trawan. Neleki ala sondu libisma, den sma di ben e gi yesi na den leri fu en, ben abi furu problema. Fu di Yesus ben sabi disi, meki a ben e gi leri na wan fasi di ben e sori taki a ben firi gi den èn taki a ben abi sari-ati gi den. Luku wan eksempre: Wan leisi, Yesus nanga den apostel fu en ben abi so furu fu du taki den no ben abi ten srefi fu nyan. Ma san Yesus du di a si taki wan heri ipi sma ben kon na en? „A ben sari den, bika den ben de leki skapu di no abi wan skapuman. Dan a bigin leri den furu sani” (Mark. 6:34). Yesus ben si sortu takru situwâsi den sma na ini a kontren dati ben de na ini, èn a gebroiki en krakti fu gi den leri èn fu du wondru gi a bun fu den. Den moi fasi fu en hari son sma, den wortu fu en naki den ati, èn na so den tron en disipel.
21. Na sortu sani wi sa poti prakseri na ini a tra artikel?
21 Bun furu sani de ete di wi kan leri fu a diniwroko di Yesus ben du na grontapu, soleki fa a tra artikel sa sori. Na sortu tra fasi wi kan teki na eksempre fu Yesus Krestes, a moro bigi Zendeling?
San yu ben sa piki?
• Sortu leri Yesus kisi fosi a kon na grontapu?
• Fa a fasi fa Yesus ben e gi leri ben bun moro a fasi fa den leriman fu wet nanga den Fariseiman ben e gi leri?
• Sortu fasi fu Yesus sma ben lobi?
[Aksi fu a tori disi]
[Prenki na tapu bladzijde 15]
Fa Yesus ben gi den ipi-ipi sma leri?