Mi meki wan prenspari pramisi

MI NA wan yongu mama na ini Spanyorokondre, èn mi meki wan prenspari pramisi fu miti wan sma baka. Meki mi fruteri fu san ede mi meki a prenspari pramisi disi.

Na ini wi osofamiri, wi no ben abi vrede èn wi no ben libi na ini wánfasi. Wi osofamiri ben sari srefisrefi di mi pikin brada fu fo yari dede na ini wan ongoloku. Boiti dati, mi papa ben abi takru gwenti, èn disi ben meki en muilek gi mi mama fu de koloku na ini a trowlibi. Ma a muilek situwâsi dati, no ben tapu mi mama fu leri mi nanga mi bigi brada fa fu tyari wisrefi na wan bun fasi.

Bakaten, mi brada trow èn mi trow sosrefi. Syatu baka dati, datra kon si taki mi mama abi kanker èn te fu kaba a siki disi meki taki a kon lasi libi. Ma fosi a dede, a libi wan tumusi prenspari sani gi wi na baka.

Wan fu den mati fu en ben taki nanga en fu a Bijbel howpu di abi fu du nanga na opobaka, èn disi meki taki mi mama bigin studeri Bijbel. Syatu bifo a dede, a howpu di Bijbel e gi, meki taki a kisi wan marki na ini en libi èn a yepi en fu de koloku.

Di mi nanga mi brada si taki a Bijbel boskopu ben abi bun krakti na en tapu, dan wi bigin studeri Gado Wortu tu. Wan mun bifo mi meki a di fu tu pikin fu mi, mi teki dopu leki wan Yehovah Kotoigi. Bakaten, mi kisi wan moi meisje èn wi gi en a nen Lucía.

A dei di mi teki dopu ben de wan tumusi prenspari dei gi mi. Wan reide fu san ede dati ben de so, na taki mi ben de fu Yehovah now, fu di mi gi misrefi abra na en fu dini en fu têgo. Wan tra reide ben de taki mi man fruteri mi lobi manpikin nanga umapikin fu a bribi fu mi.

Ma a no langa baka dati wan sari sani pasa. Di Lucía ben abi fo yari, dan a bigin kisi hebi bere-ati. Baka di datra ondrosuku en, dan a kon si taki Lucía ben abi kanker na en lefre, èn a kanker ben o gro moro nanga moro. Na so a bigin, taki seibi yari langa Lucía feti teige kanker èn nofo tron a ben musu didon na ati-oso fu wan langa pisi ten.

A ben lobi fu yepi tra sma

Na ini den muilek yari disi, nofo tron Lucía ben gi mi switi brasa nanga bosi di ben gi mi deki-ati. Aladi a ben siki, toku a fasi fa a ben handri ben naki na ati fu den sma di e wroko na ini na ati-oso. Ala ten a ben de klariklari fu yepi den ati-oso zuster fu tyari nyanyan nanga dringi gi tra siki pikin di ben didon na ini den tra kamra di de krosibei. Den ati-oso zuster ben gi Lucía wan weti dyakti srefi di den gwenti weri na ini na ati-oso, èn den ben gi en wan karta fu poti na a dyakti pe ben skrifi taki a e yepi den ati-oso zuster.

Wan sma di e wroko na ini na ati-oso e memre ete fa Lucía ben de. A taki: „A fasi fa Lucía ben de, naki na ati fu mi. A meisje disi no ben lesi, a ben lobi fu du difrenti sani, èn a ben lobi fu teken. A ben lobi fu taki nanga sma èn a fasi fa a ben handri ben de leki fa wan bigisma ben o handri.”

Gado Wortu gi Lucía deki-ati èn a yepi en fu abi wan korostu firi (Hebr. 4:12). Lucía ben abi na overtoigi taki na ini a nyun grontapu „dede no sa de moro; nowan sari, noso krei, noso pen no sa de moro”, soleki fa Gado Wortu pramisi (Openb. 21:4). Lucía ben broko en ede nanga tra sma èn a ben de klariklari fu prati a Bijbel boskopu nanga den. Fu di Lucía ben abi wan tranga bribi na ini na opobaka, meki taki a no ben lasi-ati tumusi, èn a ben de nanga prisiri,  aladi a ben sabi taki a no ben o kon betre moro (Yes. 25:8). A ben tan handri na a fasi dati, teleki a dei di a dede fu kanker.

Na a dei dati mi meki a tumusi prenspari pramisi. Pikinmoro Lucía no ben man opo en ai. A papa fu en ben hori wan fu den anu fu en, aladi mi ben hori en tra anu. „No frede, mi no’o gwe libi yu”, na so mi taki nanga wan safri sten. „Hari blo safrisafri. Te yu o wiki baka, yu o de gosontu. Yu no o abi pen moro, èn mi o de nanga yu.”

Now mi abi fu hori misrefi na a pramisi dati di mi meki. Mi sabi taki a no o makriki fu wakti teleki a dei te a o kisi wan opobaka. Ma mi sabi taki te mi abi pasensi, te mi e frutrow tapu Yehovah, èn te mi tan getrow, dan mi sa de drape te a o kisi wan opobaka.

A moi eksempre di Lucía libi na baka

A deki-ati di Lucía ben abi èn sosrefi a moi fasi fa a gemeente horibaka gi wi, ben abi furu krakti tapu mi masra di no ben de na bribi. A dei di Lucía dede, mi masra taigi mi taki a musu go denki en libi. Wan tu wiki baka dati a aksi wan owruman na ini a gemeente fu studeri Bijbel nanga en. Syatu baka dati mi masra bigin go na ala den konmakandra. Aladi mi masra ben pruberi bifo fu tapu nanga smoko, toku a no ben man du dati. Ma te fu kaba, na Yehovah gi en a krakti fu tapu nanga smoko.

Te now ete mi e sari fu di Lucía dede, ma toku mi e taki Yehovah tangi taki Lucía libi so wan moi eksempre na baka. Mi nanga mi masra e trowstu makandra nanga a tumusi moi howpu fu na opobaka. Wi e si kaba fa a o de na ini a ten te wi o si Lucía baka, iya, wi o si den moi ai fu en, nanga a moi lafu fu en.

A sari sani di pasa nanga mi umapikin, ben abi krakti tu tapu wan sma fu a birti. Wan satra mamanten di alen ben fadon, wan uma, di a boi fu en ben go na a srefi skoro leki Lucía, kon na wi oso. Wan tra manpikin fu en di ben abi 11 yari, dede fu a srefi siki di Lucía ben abi. Di na uma yere san pasa nanga Lucía, a suku pe wi e libi èn a kon na wi oso. A ben wani sabi fa mi e du now di Lucía dede, èn a ben wani taki wi seti wan grupu fu trowstu tra mama di de na ini a srefi situwâsi disi.

Mi ben taigi en taki mi kisi trowstu trutru fu wan fu den pramisi fu Bijbel, èn a pramisi disi bun moro iniwan trowstu di libisma kan gi. Di mi leisi den wortu fu Yesus na ini Yohanes 5:28, 29, dan yu ben kan si na en fesi taki a tekst dati gi en howpu trutru. A bigin studeri Bijbel èn heri esi a ben firi „a vrede fu Gado di bigi moro leki san libisma man frustan” (Fil. 4:7). Nofo tron te wi e studeri Bijbel, wi e taki fa wi e si wisrefi kaba na ini a nyun grontapu te wi o miti baka nanga den lobiwan fu wi di o kisi wan opobaka.

Iya, aladi Lucía no libi langa, toku a libi wan moi eksempre gi wi na baka. A bribi fu en yepi wi osofamiri fu dini Gado na ini wánfasi, èn mi kisi wan moro fasti bosroiti fu tan tanapu kánkan na ini a bribi. A no de fu taki dati wi alamala di lasi lobiwan na ini dede di kan kisi wan opobaka, meki wan tumusi prenspari pramisi tu fu miti den sma dati baka.

[Prenki na tapu bladzijde 20]

Wan prenki di Lucía meki fu a Paradijs