Yehovah Kotoigi e preiki a bun nyunsu te na tapu a hei Andesbergi

WI BEN de nanga wan grupu fu 18 sma na ini wan pikin maksin, èn wi ben e didon na tapu a gron. Wi ben yere fa a hebi alen ben e fadon na tapu a sinki daki, èn aladi wi ben tapu wisrefi nanga wan deki laken, toku wi ben beifi fu di a ben kowru srefisrefi. Te yu luku a fasi fa a pikin maksin disi ben de, dan wi ben aksi wisrefi efu wi ben de den fosi sma di ben sribi na ini.

Fu san ede 18 sma ben o wani go na a kontren disi? We, wi ben wani du san Yesus komanderi wi, namku fu preiki a bun nyunsu „na den moro farawe presi fu grontapu” (Tori. 1:8; Mat. 24:14). Wi ben go preiki na wan farawe kontren fu na Andesbergi na ini Bolifia.

Fa wi doro na a kontren fu na Andesbergi

A ben muilek fu doro na a kontren drape. Wi ben kon yere taki lantibus no abi wan fasti ten te den e rèi go na den farawe presi dati. Di a bus doro, dan wi si taki a ben de moro pikin leki san wi ben fruwakti, èn fu dati ede wan tu fu wi ben musu tanapu na ini a bus. Ma te fu kaba wi alamala doro na a presi pe wi ben musu go.

Wi ben wani doro na den dorpu na ini den kontren fu a hei Andesbergi na ini Bolifia, fu preiki gi sma drape. Sobun di wi doro drape, a grupu fu wi teki  den lai nanga ala den nyanyan sani, èn safrisafri wi bigin waka baka makandra fu kren a bergi.

Aladi a ben gersi leki den dorpu pikin, toku den oso de fara fu makandra, èn fu dati ede a teki furu yuru fu preiki gi den sma na ini ibri dorpu. Awinsi o fara wi ben waka, ibri tron baka a ben gersi leki wan tra oso ben de fu si farawe. Nofo tron wi ben lasi pasi, fu di wan lo pikinpikin pasi e waka ala sei na ini den gron.

„Fu san ede na now fosi unu kon?”

Wán uma ben fruwondru srefisrefi taki wi waka so fara, èn fu dati ede a gi wi primisi fu gebroiki en kukru so taki wi ben kan bori wi brekten nyanyan na tapu na udufaya fu en. Di wan man kon sabi san Bijbel e fruteri fu san e pasa nanga wan sma te a dede, dan a aksi: „Fu san ede na now fosi unu kon?” A man disi trutru ben wani sabi moro, èn fu dati ede a waka kon nanga wi di wi gowe libi a dorpu fu en, so taki a ben kan poti moro aksi gi wi. Wan tra man di noiti no ben yere fu Yehovah Kotoigi ete, ben wani abi moro fu den publikâsi fu wi. A ben de nanga bigi tangi taki wi kon na en èn a gi wi a sroto fu wan pikin maksin pe wi ben kan sribi a neti dati.

Wán neti a ben dungru so te, taki wi no si taki wi poti wi tenti na tapu wan nesi fu bigi blaka mira. Wantewante den bigin beti wi. Ma wi ben weri tumusi fu skoifi a tenti, èn fosi yu denki den mira no ben beti wi moro.

Na a bigin wi baka nanga wi sei ben hati fu di wi ben sribi na tapu a gron, ma bakaten wi no ben firi a skin-ati moro. Èn di wi opo mamanten wi frigiti ala skin-ati, fu di wi si den moi krin lagi presi nanga den wolku  di e pasa safrisafri na den seibergi, èn sosrefi den moi farawe bergi di abi snew na tapu den ede. A presi ben pî, èn a wan-enkri sani di yu ben kan yere na a watra fu wan kriki èn pikin fowru di ben e singi.

Baka di wi wasi na ini a kriki, wi luku a deitekst makandra, èn wi nyan wi mamanten nyanyan, dan wi bigin kren a bergi safrisafri fu go na den tra farawe dorpu. Wi no kren a bergi fu soso. Wi miti wan grani uma di bigin krei di a leri taki Gado nen, Yehovah, skrifi na ini Bijbel. A sani disi naki en ati trutru. Now a kan kari Gado en nen na ini den begi fu en!

Wan grani man ben taki dati Gado no frigiti en, èn wantronso a bigin singi wan singi di e taki dati na den engel seni wi kon na en. Wan tra man di ben siki tumusi fu komoto na ini en oso, fruteri wi taki nowan sma fu en eigi dorpu du muiti fu kon luku en. A ben fruwondru taki wi komoto te na La Paz fu kon luku en. Wan tra man ben fruwondru trutru taki Yehovah Kotoigi e go fu miti sma na den oso, aladi sma fu tra kerki e loi den gengen nomo fu kari den kon na kerki.

Fu di nowan fu den oso na ini a kontren dati abi faya, meki sma e go sribi te a dungru èn den e wiki fruku te son e opo. Fu dati ede, efu wi ben wani miti sma na oso, dan wi ben musu bigin preiki na wan ten fu siksi yuru mamanten. Efu wi no ben o du dati, dan wi no ben o miti furu sma, fu di den ben o go na den gron kaba fu wroko. Bakaten, sonwan fu den sma di ben de tapu den gron kaba, ben de klariklari fu tapu nanga den wroko, èn fu arki a boskopu fu Gado Wortu di wi ben tyari. Na so fasi den mankaw ben kan rostu pikinso fu a plugu di den ben hari. Furu fu den sma di wi ben miti na oso ben poti wan skapububa na gron fu wi sidon na tapu, èn den ben kari a heri osofamiri fu kon arki. Son gronman ben gi wi bigi saka nanga karu, fu sori taki den ben de nanga tangi gi den Bijbel publikâsi di wi ben libi gi den.

„Unu no frigiti mi”

A no de fu taki, dati efu sma wani kisi moro sabi fu Bijbel, dan a no nofo efu wi go wán leisi nomo na den. Furu sma ben begi wi fu kon baka na den fu leri den moro fu Bijbel. Fu dati ede, wi go wan tu leisi baka na a kontren disi na ini Bolifia.

Wan tra leisi di wi go baka na a kontren dati, dan wan grani uma ben breiti taki wi go baka na en, èn a taki: „Unu de leki mi pikin. Unu no frigiti mi.” Wan man taki wi tangi gi a wroko di wi du, èn a gi wi wan kari fu tan na en oso wan tra leisi te wi e go baka na ini a kontren dati. Wán fu den moro bigi blesi di wi kisi fu a muiti di wi du, na taki wi yere dati wan uma di wi ben taki nanga en wán fu den leisi, froisi go na a foto èn now a e preiki a bun nyunsu.

Tapu a lasti dei fu a fosi leisi di wi go na a kontren dati, wi no ben abi karsinoli moro fu leti a faya fu bori, èn wi ben abi pikinso nyanyan nomo. Wi suku nofo udu fu bori a lasti nyanyan di wi ben abi, èn baka dati wi bigin waka go baka fu teki a bus. Wi ben de furu kilometer fu a foto pe wi ben kan teki wan bus. Te fu kaba wi doro drape di a ben dungru kaba.

Wi e drai go baka na oso

Wi kisi problema di wi drai go baka na oso, fu di a bus broko na pasi. Baka wan pisi ten, wan sma ben tyari wi na ini a baki fu wan truck di ben lai nanga sma. Na so fasi wi kisi na okasi fu preiki gi tra sma na ini a truck, fu di den ben wani sabi fu san ede wi ben de na ini a kontren dati. Aladi den sma disi e syensyen, toku nofo tron den abi switifasi.

Baka di wi ben de sowan neigi yuru na pasi na ini a baki fu a truck, wi doro oso. Wi ben nati èn wi ben kowru srefisrefi. Ma aladi dati ben de so, toku wi ben kisi bun bakapisi. Di wi ben de na pasi, wi ben man seti sani so taki wan uma di e libi na ini a foto ben kan bigin studeri Bijbel.

A ben de wan moi grani fu preiki a bun nyunsu gi sma na den farawe presi dati. Wi ben preiki na ini fo bigi dorpu nanga furu pikinpikin dorpu. Ala den sani di miti wi ben meki wi prakseri den wortu disi: „O switi den futu fu a sma de di e tyari bun nyunsu kon na tapu den bergi, a sma di e meki vrede bekènti, a sma di e tyari bun nyunsu kon di abi fu du nanga wan moro bun sani, a sma di e meki frulusu bekènti.”—Yes. 52:7; Rom. 10:15.

[Prenki na tapu bladzijde 17]

Wi de klariklari fu preiki a bun nyunsu