Yehovah e yere te wi e bari fu kisi yepi
Yehovah e yere te wi e bari fu kisi yepi
„Den ai fu Yehovah e luku den regtfardikisma, èn den yesi fu en e yere te den e bari fu kisi yepi.”—PS. 34:15.
1, 2. (a) Fa furu sma na ini a ten disi e firi? (b) Fu san ede disi no e fruwondru wi?
YU ABI problema di e gi yu broko-ede? Efu dati de so, dan yu no de yu wawan. Milyunmilyun sma e kisi fu du nanga den aladei broko-ede fu a libi na ini na ogri sistema disi. Gi son sma a libi hebi srefisrefi. Den e firi neleki a psalm skrifiman di ben taki: „Mi no abi nowan krakti moro èn mi e firi brokosaka pasa marki; mi bari tranga fu a dyeme di mi ati e dyeme. Mi eigi ati naki bun tranga, mi krakti gowe libi mi, èn a leti fu mi eigi ai kon dungru.”—Ps. 38:8, 10.
2 Wi leki Kresten sabi taki a libi lai nanga broko-ede. Wi sabi taki na ini a denoya fu Yesus, libisma ben o de na ini „banawtu di de leki a hebi pen fu wan uma di de fu kisi en pikin” (Mark. 13:8; Mat. 24:3). Disi wani taki dati libisma ben o ondrofeni rampu noso bigi problema. A sani disi e sori krin taki libisma ben o pina srefisrefi na ini a „muilek” noso „takru” ten disi di „tranga fu pasa”!—2 Tim. 3:1; Da Bijbel na ini Sranantongo.
Yehovah e frustan sortu broko-ede wi abi
3. San a pipel fu Gado sabi heri bun?
3 A pipel fu Yehovah sabi heri bun taki den sa kisi broko-ede tu, èn a no de fu taki dati den problema disi sa kon moro ogri. Boiti den sani di furu sma e ondrofeni, wi leki futuboi fu Gado e kisi fu du tu nanga „Didibri, a feanti” fu wi, di de nomonomo fu pori a bribi fu wi (1 Petr. 5:8). A ben kan pasa makriki taki wi e bigin firi leki David di ben taki: „Iya, syen srefi broko mi ati, èn a soro no man dresi. Èn mi ben e tan howpu taki wan sma ben o firi gi mi, ma nowan sma no ben du dati; èn mi ben e howpu taki sma ben o trowstu mi, ma mi no feni nowan!”—Ps. 69:20.
4. San kan de wan trowstu gi wi te wi abi broko-ede?
4 Ma a sani disi ben wani taki dati David no ben abi nowan enkri howpu? Nôno. Luku san David e taki moro fara na ini a srefi psalm dati: „Bika Yehovah e arki den pôtiwan, èn trutru a no sa wisiwasi en eigi strafuman”, noso en eigi futuboi di de na ini katibo (Ps. 69:33). Fu taki en leti, son leisi wi kan firi neleki den broko-ede nanga den problema fu wi e hori wi na ini katibo. A kan gersi leki trawan no e frustan na ini sortu situwâsi wi de, èn kande den no e frustan dati trutru. Ma neleki fa a ben de gi David, na so a kan de wan trowstu tu gi wi fu sabi taki Yehovah e frustan trutru sortu broko-ede wi abi.—Ps. 34:15.
5. Sortu frutrow Kownu Salomo ben abi?
5 Di Salomo, a manpikin fu David, ben gi a tempel na ini Yerusalem abra, dan a sori krin taki Yehovah trutru e frustan sortu broko-ede wi abi. (Leisi 2 Kroniki 6:29-31.) A begi Yehovah fu arki den begi fu ibri opregtisma di ben e begi En fu yepi en nanga „en eigi problema nanga en eigi sari”. Gado ben o arki den begi fu den sma disi di ben abi broko-ede? Salomo ben sori taki a ben abi a frutrow taki Yehovah no ben o arki den begi fu den sma dati nomo, ma taki a ben o yepi den sma dati tu. Fu san ede? Fu di Gado trutru sabi san de na ini „na ati fu den manpikin fu libisma”.
6. San kan yepi wi fu horidoro te wi abi broko-ede, èn fu san ede?
6 Te wi abi broko-ede, dan wi kan begi Yehovah tu fu yepi wi nanga ’wi eigi problema nanga wi eigi sari’. A musu de wan trowstu gi wi fu sabi taki a e frustan sortu problema wi abi, èn taki a e broko en ede nanga wi. Na apostel Petrus ben sori taki disi tru, di a taki: „Trowe ala un sorgu na en tapu, bika a e broko en ede nanga unu” (1 Petr. 5:7). Yehovah e broko en ede trutru nanga wi. Yesus ben sori krin taki Yehovah e broko en ede nanga wi fu di a lobi wi. A ben taki: „A no de so, taki sma e seri tu pikin fowru gi wan sensi di no warti furu? Ma toku nowan fu den fowru sa fadon na gron sondro fu un Tata sabi. Ma a Tata teri srefi ala den wiwiri na tapu un ede. Fu dati ede no frede: un warti moro leki wan heri ipi pikin fowru.”—Mat. 10:29-31.
Abi a frutrow taki Yehovah sa yepi yu
7. Sortu dyaranti wi kan abi?
7 A no de fu taki dati wi kan abi a frutrow taki Yehovah wani èn taki a man yepi wi te wi de na ini banawtu. „Gado na wi kibripe nanga wi krakti, wan yepi di de fu feni makriki na ini ten fu banawtu” (Ps. 34:15-18; 46:1). Fa Yehovah e yepi wi? Luku san 1 Korentesma 10:13 e taki: „Gado de getrow, èn a no sa meki unu kisi tesi di hebi moro leki san unu man frudrage; ma te tesi miti unu, dan a sa tyari wan frulekti kon, so taki unu man horidoro.” Yehovah kan meki sani waka na so wan fasi taki wan kaba e kon na a tesi fu wi, noso a kan gi wi a krakti di wi abi fanowdu fu man horidoro. Awansi fa a no fa, Yehovah sa yepi wi.
8. Fa wi kan kisi wini fu a yepi di Gado e gi wi?
8 Fa wi kan kisi wini fu a yepi dati? Luku sortu rai wi e kisi: „Trowe ala un sorgu na en tapu.” Disi wani taki dati na agersifasi wi musu libi ala den broko-ede fu wi gi Yehovah. Wi e pruberi fu no broko wi ede moro, èn wi sa abi a pasensi nanga a frutrow taki Yehovah sa sorgu gi wi (Mat. 6:25-32). Wi musu abi sakafasi fu man frutrow tapu Yehovah, fu di dati e sori taki wi no e frutrow tapu wi eigi krakti, noso tapu wi eigi koni. Te wi e saka wisrefi „na ondro a makti anu fu Gado”, dan wi e sori taki wi abi yepi fanowdu. (Leisi 1 Petrus 5:6.) Boiti dati, disi sa yepi wi fu horidoro awansi san Gado e gi pasi fu miti wi. Kande wi wani kisi frulekti wantewante, ma wi abi a frutrow taki Yehovah sabi heri bun o ten èn fa a sa yepi wi.—Ps. 54:7; Yes. 41:10.
9. Sortu hebi David ben musu trowe tapu Yehovah?
9 Memre den wortu fu David di skrifi na ini Psalm 55:22: „Trowe yu hebi na tapu Yehovah, èn ensrefi sa horibaka gi yu. Noiti a sa gi pasi taki a regtfardikiwan e degedege.” Di David ben skrifi den wortu dati, dan a ben de na ini bigi banawtu (Ps. 55:4). Soleki fa wi sabi, dan a ben skrifi a psalm dati na a ten di Absalom, a manpikin fu en ben e suku fu teki a kownumakti fu en abra. Akitofel, a raiman di David ben e frutrow dorodoro, ben horibaka gi Absalom. David ben musu lowe komoto na ini Yerusalem fu di sma ben wani kiri en (2 Sam. 15:12-14). Srefi na ini a muilek situwâsi dati, David tan frutrow tapu Gado, èn Gado yepi en trutru.
10. San wi musu du te wi de na ini banawtu?
10 A de prenspari trutru taki wi e begi Yehovah tu fu yepi wi te wi de na ini banawtu, neleki fa David ben du dati. Meki wi luku sortu rai na apostel Paulus ben gi wi. (Leisi Filipisma 4:6, 7.) San sa de a bakapisi te wi e begi Gado fayafaya? „A vrede fu Gado di bigi moro leki san libisma man frustan, sa kibri [wi] ati èn [wi] frustan nanga yepi fu Krestes Yesus.”
11. Fa „a vrede fu Gado” e kibri wi ati nanga wi frustan?
11 Ma te wi e begi Gado, dan a de so taki wan kenki sa kon na ini a situwâsi fu wi? Kande. Ma wi musu hori na prakseri taki a no ala ten Yehovah e piki den begi fu wi na a fasi fa wi wani. Toku a sa de so taki te wi e begi Gado, dan dati sa yepi wi fu no bruya. „A vrede fu Gado” kan gi wi wan korostu firi te wi e firi brokosaka srefisrefi. Neleki fa wan legre srudati e kibri wan foto so taki feanti no e teki en abra, na so „a vrede fu Gado” sa kibri wi ati nanga wi frustan. A sa yepi wi tu fu no tweifri, fu no frede, èn fu no denki takru moro fu sani, èn a sa meki taki wi no e handri sondro fu denki.—Ps. 145:18.
12. Fruteri fa wan sma kan abi wan korostu firi.
12 Fa wi kan abi wan korostu firi te wi de na ini banawtu? Luku wan agersitori di gersi a situwâsi di wi de na ini. Kande wan sma e wroko ondro wan basi di grofu. Ma a wrokoman disi e fruteri na eiginari fu a wrokopresi fa a e firi. A man disi abi switifasi, èn a de opregti. Na eiginari disi e gi a wrokoman a dyaranti taki a e frustan fa a e firi, èn a e taigi en taki heri esi a sa puru a tra man leki basi. Fa a wrokoman sa firi te a e yere dati? Fu di a e bribi san na eiginari taigi en, èn fu di a sabi san o pasa, meki a sa kisi deki-ati fu horidoro pikinso moro langa, srefi te a e kisi wan tu tra problema na ini a pisi ten dati. Na so a de tu taki wi sabi taki Yehovah e frustan sortu situwâsi wi de na ini, èn a e gi wi a dyaranti taki heri esi „a tiriman fu a grontapu disi o trowe go na dorosei” (Yoh. 12:31). A sani disi na wan trowstu trutru!
13. Boiti taki wi e begi Gado, san wi musu du moro?
13 Ma te wi begi Yehovah fu yepi wi nanga den problema fu wi, dan dati nofo? Nôno. Moro de fanowdu. Wi musu handri na wan fasi di e kruderi nanga den begi fu wi. Di Kownu Saul ben seni mansma go na David en oso fu kiri en, dan David begi: „Frulusu mi fu mi feanti, o mi Gado; kibri mi gi den wan di e opo densrefi teige mi. Frulusu mi fu den wan di e du san ogri, èn frulusu mi fu den man di abi brudu-paiman” (Ps. 59:1, 2). Boiti taki David begi Gado, a arki a wefi fu en tu èn a du san ben de fanowdu fu man lowe gowe (1 Sam. 19:11, 12). Na so a de tu taki wi kan begi Gado fu gi wi a koni fu sabi san wi musu du te wi de na ini banawtu.—Yak. 1:5.
Wi kan kisi a krakti fu horidoro
14. San kan yepi wi fu horidoro te wi abi problema?
14 Son leisi Gado no e puru den problema fu wi wantewante. Kande den e tan wan heri pisi ten srefi. Efu dati de so, dan san sa yepi wi fu horidoro? A fosi sani di sa yepi wi, na fu hori na prakseri taki te wi e tan dini Yehovah na wan getrow fasi awansi problema e miti wi, dan dati e sori taki wi lobi en (Tori. 14:22). No frigiti san Satan ben taki fu Yob: „Na fu soso Yob sori taki a e frede Gado? A no yusrefi poti wan skotu lontu en, lontu en oso, èn lontu ala sani di a abi? Yu blesi a wroko fu en anu, èn srefi den meti fu en kon furu na grontapu. Grantangi, langa yu anu now èn fasi ala sani di a abi, dan yu o si efu a no o fluku yu leti na ini yu fesi” (Yob 1:9-11). Fu di Yob ben de getrow, meki a sori taki a sani di Satan ben taki ben de wan krinkrin lei. Te wi e horidoro te wi de na ini banawtu, dan wi e kisi na okasi tu fu sori taki Satan na wan leiman. Boiti dati, wi e kisi wan moro tranga howpu èn wan moro tranga bribi.—Yak. 1:4.
15. Sortu eksempre kan gi wi deki-ati?
15 A di fu tu sani di sa yepi wi fu horidoro, na fu hori na prakseri taki „sma e du den srefi sani fu pina ala den brada fu unu na heri grontapu” (1 Petr. 5:9). Iya, „nowan tesi kon na un tapu, boiti den sani di gwenti fu miti libisma” (1 Kor. 10:13). Fu dati ede, yu kan kisi krakti nanga deki-ati te yu e denki dipi fu den eksempre fu trawan, na presi taki yu e tan poti prakseri na yu eigi problema (1 Tes. 1:5-7; Hebr. 12:1). Teki ten fu poti prakseri na a eksempre fu den wan di yu sabi leki sma di horidoro na wan getrow fasi, aladi den ben e kisi hebi tesi. Kande yu kan suku ondrofenitori di kon na doro na ini a tijdschrift disi, èn di e taki fu brada nanga sisa di kisi pikinmoro den srefi tesi leki yu. Den ondrofenitori disi kan gi yu furu deki-ati.
16. Fa Gado e gi wi krakti te wi de na ini banawtu?
16 A di fu dri sani di kan yepi wi, na fu hori na prakseri taki Yehovah na „a Tata di abi bigi sari-ati, èn en na a Gado fu ala trowstu, di e trowstu wi na ini ala den banawtu fu wi, so taki nanga yepi fu a trowstu di wisrefi e kisi fu Gado, wi man trowstu den sma di de na ini iniwan sortu banawtu” (2 Kor. 1:3, 4). A de neleki Gado e tanapu na wi sei fu gi wi deki-ati nanga krakti, èn a no e yepi wi nomo na ini den banawtu di wi e kisi nownowde, ma a e yepi wi „na ini ala den banawtu fu wi”. Disi e yepi wi fu trowstu trawan di de „na ini iniwan sortu banawtu”. Paulus srefi ben ondrofeni taki den wortu disi tru.—2 Kor. 4:8, 9; 11:23-27.
17. Fa Bijbel kan yepi wi te wi e kisi tesi?
17 A di fu fo sani di e yepi wi, na taki wi abi Gado Wortu, Bijbel, di „bun fu gi leri, fu frumane sma, fu poti sani kon reti, fu gi trangaleri na wan regtfardiki fasi, so taki a sma di de fu Gado kan kon bun dorodoro èn de srekasreka fu du ibri bun wroko” (2 Tim. 3:16, 17). Gado Wortu no e yepi wi nomo fu de sma di „bun” èn di de „srekasreka”. A e yepi wi tu fu horidoro te wi e kisi tesi. A e yepi wi fu de sma di „bun dorodoro” èn di „ de srekasreka fu du ibri bun wroko”. A Griki wortu di vertaal nanga „de srekasreka” wani taki dati wan sma noso wan sani ’abi ala san de fanowdu fu man du wan spesrutu sani’. A kan taki sma na ini owruten ben e gebroiki a wortu disi te den ben e taki fu wan boto di ben abi ala sani di ben de fanowdu fu man go na se. Kande den ben e gebroiki a wortu disi tu fu taki fu wan masyin di ben man du iniwan sani di sma ben wani en fu du. Na so Yehovah e gebroiki a Wortu fu en tu fu gi wi ala san wi abi fanowdu fu man horidoro na ondro iniwan tesi di e miti wi. Fu dati ede, wi kan taki, „Efu Gado e gi pasi taki a tesi disi miti mi, dan a sa yepi mi fu pasa en”.
Wi sa kisi frulusu fu ala den problema fu wi
18. San e yepi wi moro fara fu horidoro na wan getrow fasi?
18 A di fu feifi sani di sa yepi wi, na disi: Ala ten tan hori a moi dyaranti na prakseri di wi kisi taki heri esi Yehovah sa tyari wan kaba kon na ala den problema di libisma abi (Ps. 34:19; 37:9-11; 2 Petr. 2:9). Te fu kaba, wi no sa kisi frulusu nomo fu den problema fu wi, ma wi sa kisi na okasi tu fu libi fu têgo na ini hemel makandra nanga Yesus, noso na ini wan paradijs na grontapu.
19. San e yepi wi fu horidoro na wan getrow fasi?
19 Teleki a ten dati doro, wi e tan kisi fu du nanga den problema fu na ogri grontapu disi. Wi e angri trutru gi a ten te ala den sani disi no sa de moro! (Ps. 55:6-8) Meki wi no frigiti taki te wi e horidoro na wan getrow fasi, dan wi e sori taki Didibri na wan leiman. Meki a de so taki wi e kisi krakti te wi e begi Gado fu yepi wi, èn meki a de so tu taki wi e kisi deki-ati fu wi Kresten brada nanga sisa, aladi wi e hori na prakseri taki den e ondrofeni den srefi tesi leki wi. Tan gebroiki a Wortu fu Gado bun, so taki yu kan de wan sma di bun dorodoro èn di de srekasreka. Noiti gi pasi taki yu e lasi a frutrow taki „a Gado fu ala trowstu” sa sorgu yu na wan lobi-ati fasi. Hori na prakseri taki „den ai fu Yehovah e luku den regtfardikisma, èn den yesi fu en e yere te den e bari fu kisi yepi”.—Ps. 34:15.
Yu kan gi piki?
• Fa David ben e firi di a ben de na ini banawtu?
• Sortu overtoigi Kownu Salomo ben abi?
• San kan yepi wi fu horidoro te Yehovah e gi pasi taki wi e kisi tesi?
[Aksi fu a tori disi]
[Prenki na tapu bladzijde 13]
Salomo ben abi a frutrow taki Yehovah ben o yepi a pipel fu En di ben de na ini banawtu
[Prenki na tapu bladzijde 15]
David ben trowe en hebi na tapu Yehovah èn a handri na wan fasi di ben e kruderi nanga a begi fu en