Yu e si trawan soleki fa Yehovah e si den?
Yu e si trawan soleki fa Yehovah e si den?
’Pratifasi no musu de na ini a skin, ma den pisi fu a skin musu broko den ede na a srefi fasi nanga makandra.’—1 KOR. 12:25.
1. Fa yu ben feni en di yu kon na ini a yeye paradijs fu a fosi leisi?
DI WI drai baka gi na ogri grontapu èn wi bigin abi demakandra nanga a pipel fu Yehovah, dan a no de fu taki dati wi ben prisiri fu de na mindri den sma disi di lobi makandra èn di e broko den ede nanga makandra. Dati na wan bigi difrenti te yu e luku den sma di de na ondro a tiri fu Satan! Den sma dati grofu, den abi bita-ati, èn den lobi fu meki trobi. Now wi e libi na ini wan yeye paradijs pe vrede nanga wánfasi de.—Yes. 48:17, 18; 60:18; 65:25.
2. (a) San kan meki taki wi e bigin denki takru fu trawan? (b) San o yepi wi fu kisi a yoisti denki fu sma?
2 Ma fu di wi na sondu libisma, meki baka wan pisi ten wi ben kan bigin denki takru fu den Kresten brada nanga sisa fu wi. A sani dati kan meki taki wi e si soso den fowtu fu wi brada nanga sisa, na presi taki wi e luku den bun fasi di den abi leki sma di e pruberi fu de leki Yehovah. Fu taki en leti, wi e frigiti fu si den soleki fa Yehovah e si den. Efu disi e pasa nanga wi, dan wi musu poti prakseri na a fasi fa wi e si trawan, so taki wi kan du san de fanowdu fu kon abi a srefi denki fu Yehovah.—Ex. 33:13.
A fasi fa Yehovah e si den brada nanga sisa fu wi
3. Nanga san Bijbel e agersi a Kresten gemeente?
3 Soleki fa 1 Korentesma 12:2-26 e sori, dan na apostel Paulus e agersi a gemeente fu salfu Kresten nanga wan skin di abi „furu pisi”. Neleki fa den pisi fu a skin e difrenti fu makandra, na so ibri memre fu a gemeente de tra fasi, èn den man du difrenti sani. Ma toku Yehovah feni den bun. A lobi ibri memre fu a gemeente èn a e warderi den. Dati meki Paulus e gi wi a rai tu taki den memre fu a gemeente musu „broko den ede na a srefi fasi nanga makandra”. Kande disi no sa makriki fu du, fu di trawan kan abi tra fasi leki wi.
4. Fu san ede a kan de fanowdu taki wi e kenki a fasi fa wi e si wi brada nanga sisa?
4 Kande wi de gaw tu fu poti prakseri soso na den swakifasi fu den brada nanga sisa fu wi. Te wi e du dati, dan na wan agersifasi wi e luku soso wan spesrutu pisi fu wan prenki. Ma Yehovah no e luku wan spesrutu pisi nomo. Na presi fu dati, a e luku a heri prenki. Na so a kan de tu taki wi e poti prakseri soso na wan fruferi fasi fu wan sma, ma Yehovah e poti prakseri na ala den fasi fu a sma, sosrefi na ala den bun fasi fu a sma dati. O moro wi e pruberi fu kon de leki Yehovah, o moro wi kan yepi fu sorgu taki lobi nanga wánfasi de na ini a gemeente.—Ef. 4:1-3; 5:1, 2.
5. Fu san ede a no fiti fu krutu trawan?
5 Yesus ben sabi heri bun taki sondu libisma de gaw fu krutu trawan. A ben gi a rai disi: „No krutu sma moro, so taki trawan no krutu unu” (Mat. 7:1). Luku taki Yesus no ben taki: „No krutu sma”, ma a ben taki: „No krutu sma moro.” A ben sabi taki furu fu den sma di ben e arki en ben abi a gwenti kaba fu krutu trawan. A de so taki wi kon abi a gwenti disi? Efu dati de so, dan wi musu du tranga muiti fu kenki a fasi dati, so taki Gado no krutu wi. Fu taki en leti, suma na wi fu krutu wan sma di Yehovah poti fu teki fesi, èn suma na wi fu taki dati a no musu de wan memre fu a gemeente? A kan taki wan brada abi wan tu swakifasi, ma efu Yehovah feni en bun, dan a ben o fiti taki wi e weigri fu si en leki wi brada? (Yoh. 6:44) Wi e bribi trutru taki Yehovah e tiri na organisâsi fu en èn taki efu kenki musu kon, dan A sa du dati na wan ten di ensrefi feni bun?—Leisi Romesma 14:1-4.
6. Fa Yehovah e si den futuboi fu en?
6 Wan moi sani fu Yehovah, na taki a kan si sortu sma ibri Kresten kan tron te den kon volmaakti na ini a nyun grontapu. A sabi tu fa den go na fesi kaba fu di den e fiti den sani di den e leri fu Bijbel. Fu dati ede, a no feni en fanowdu fu poti prakseri na ibri swakifasi fu wi. Psalm 103:12 e taki: „So fara leki son-opo de fu sondongo, na so fara fu wi a poti den sondu fu wi.” Ibriwan fu wi kan de nanga tangi trutru gi a sani dati!—Ps. 130:3.
7. San wi e leri fu a fasi fa Yehovah ben e si David?
7 Bijbel e sori taki Yehovah sabi heri bun fa fu poti prakseri na den bun fasi fu wan sma. Gado ben taki fu David: ’Mi futuboi David ben hori den komando fu mi, èn a ben gi yesi na mi nanga en heri ati, fu du ala san mi feni bun’ (1 Kow. 14:8). A no de fu taki dati David ben du wan tu sani di no ben bun kwetikweti. Ma toku Yehovah poti prakseri na den bun fasi fu David, fu di a ben sabi taki David en ati ben bun.—1 Kron. 29:17.
Yu musu si yu brada nanga sisa soleki fa Yehovah e si den
8, 9. (a) Fa wi kan de leki Yehovah? (b) Nanga sortu agersitori wi kan tyari disi kon na krin, èn san wi kan leri fu na agersitori dati?
8 Yehovah sabi san de na ini sma ati, ma wi no man du dati. A sani disi e sori wi krin taki wi no musu krutu trawan. Wi no sabi soifri fu san ede wan sma e handri na wan spesrutu fasi. Wi musu pruberi fu de leki Yehovah, fu di wi no e poti prakseri soso na den swakifasi fu trawan, fu di den no sa abi den swakifasi dati fu ala ten. A ben o moro bun te wi e pruberi fu teki na eksempre fu Yehovah, a no so? Dati sa yepi wi fu libi bun nanga wi Kresten brada nanga sisa.—Ef. 4:23, 24.
9 Prakseri wan oso di a daki fu en no bun moro, den fensre broko, èn a plafon pori. Furu fu den sma di e si na oso, ben kan feni taki na oso musu broko puru, fu di a no moi fu si. Ma wan tra sma ben kan abi wan heri tra denki fu na oso. Kande a no e poti tumusi furu prakseri na den sani di broko na a oso, ma a e si taki a fondamenti fu na oso bun èn taki na oso kan meki baka. A e bai na oso èn a e meki den sani di broko na a oso, so taki na oso e kon bun baka. Baka dati, sma di e pasa e taki fa na oso moi. Fu san ede wi no e teki na eksempre fu a sma disi di meki muiti fu meki den sani baka di ben broko na a oso? Na presi taki wi e poti prakseri soso na den swakifasi di de makriki fu si na den brada nanga sisa fu wi, a ben o moro bun fu poti prakseri na den bun fasi fu den, a no so? Fu san ede wi no e pruberi fu abi a frutrow taki den man kweki den fasi fu Gado? Te wi e du dati, dan wi sa kon lobi den brada nanga sisa fu wi neleki fa Yehovah lobi den, fu di den e meki muiti fu kon de leki En.—Leisi Hebrewsma 6:10.
10. Fa a rai na ini Filipisma 2:3, 4 kan yepi wi?
10 Na apostel Paulus ben gi wan tu rai di kan yepi wi fu abi bun matifasi nanga ala sma na ini a gemeente. A ben gi Kresten a rai disi: „No strei nanga makandra èn no prakseri tumusi furu fu unsrefi, ma nanga sakafasi un musu si trawan moro hei leki unsrefi. Un no musu poti prakseri na un eigi afersi wawan, ma un musu poti prakseri na den afersi fu trawan tu” (Fil. 2:3, 4). Te wi abi sakafasi, dan dati sa yepi wi fu si sma na a yoisti fasi. Te wi e poti prakseri na trawan èn na den bun fasi fu den, dan dati sa yepi wi fu si den soleki fa Yehovah e si den.
11. Sortu kenki abi krakti tapu son gemeente?
11 Na ini a ten disi, a situwâsi na heri grontapu kon kenki èn dati meki taki bun furu sma go libi na tra kondre. Nownowde a de so taki na ini son bigi foto, sma fu difrenti kondre e libi. Sonwan fu den sma disi di kon libi na ini a kontren fu wi, ben wani kon sabi den tru tori fu Bijbel, èn now den e anbegi Yehovah makandra nanga wi. Den sma disi e „komoto fu ala kondre, lo, pipel, nanga tongo” (Openb. 7:9). Leki bakapisi fu dati, furu fu den gemeente fu wi abi sma fu difrenti kondre.
12. Fa wi musu tan si trawan, èn fu san ede disi kan muilek gi wi son leisi?
12 Kande wi musu du moro muiti fu tan si trawan na ini a gemeente fu wi na a yoisti fasi. Dati wani taki dati wi musu hori a rai na prakseri di na apostel Petrus ben gi wi. A ben taigi wi fu ’lobi wi brada sondro fu hoigri’ èn fu ’lobi makandra komoto fu a dipi fu wi ati’ (1 Petr. 1:22). Ma a no makriki fu kon abi trutru lobi gi sma fu wan tra kondre. Son leisi, wi Kresten brada nanga sisa kweki na wan heri tra fasi leki wi, èn kande den no kisi a srefi skoroleri leki wi, kande den pôti moro wi, kande den gudu moro wi, noso kande den de fu wan tra ras. A muilek gi yu fu frustan fu san ede den sma disi e denki èn e handri na wan spesrutu fasi? Kande den e denki so tu fu yu. Toku wi alamala e kisi a rai disi: „Lobi ala brada”.—1 Petr. 2:17.
13. Sortu kenki wi musu tyari kon na ini a fasi fa wi e denki?
13 Kande wi sa musu tyari wan tu kenki kon na ini a fasi fa wi e denki, so taki wi kan kon abi lobi gi ala den brada nanga sisa fu wi. (Leisi 2 Korentesma 6:12, 13.) Oiti wi taki: „Mi no e krutu sma, ma . . . ”, èn baka dati wi e taki fu wan tu fu den fruferi fasi di wi feni taki furu fu den sma fu wan spesrutu ras abi? Te wi e denki so fu sma, dan dati kan sori taki dipi na ini wi ati wi e denki takru ete fu trawan, èn wi musu meki muiti fu tapu nanga a denki dati. Kande wi kan aksi wisrefi: ’Mi lobi fu meki muiti fu leri sabi sma di de fu wan tra ras?’ Te wi e ondrosuku wisrefi na a fasi disi, dan dati kan yepi wi fu sori moro lespeki nanga warderi gi den brada nanga sisa fu wi di komoto fu wan tra kondre.
14, 15. (a) Gi wan tu eksempre fu sma di ben kenki a fasi fa den ben e denki fu trawan. (b) Fa wi kan teki na eksempre fu den sma disi?
14 Bijbel e gi wi moi eksempre fu sma di kenki a denki fu den, èn na apostel Petrus ben de wan fu den sma disi. Leki wan Dyu, Petrus noiti no ben o go na ini na oso fu wan sma di no ben de wan Dyu. Prakseri fa a ben firi di a ben musu go na a oso fu Kornelius, wan man di no ben de wan Dyu èn di no ben besnèi! Petrus kenki a fasi fa a ben denki, fu di a ben sabi taki Gado ben wani taki sma fu ala sortu kondre ben musu tron memre fu a Kresten gemeente (Tori. 10:9-35). Saulus, di bakaten tron na apostel Paulus, ben musu tapu tu fu denki takru fu trawan. A ben taki dati a ben abi so furu bita-ati gi den Kresten, ’taki a ben e tan frufolgu a gemeente fu Gado pasa marki èn taki a ben pruberi fu puru a gemeente na pasi’. Ma di Masra Yesus sori Paulus taki a no ben e handri bun, dan a tyari bigi kenki kon èn a bigin teki rai srefi fu sma di a ben e frufolgu fosi.—Gal. 1:13-20.
15 A no de fu taki dati a yeye fu Yehovah kan yepi wi fu kenki a fasi fa wi e denki. Te wi si taki son leisi wi e denki takru fu trawan, dan wi musu meki muiti fu tapu nanga a denki dati, èn wi musu ’tan abi wán fasi fu denki, so taki wi kan abi a vrede di e tyari sma kon na wán’ (Ef. 4:3-6). Bijbel e gi wi deki-ati fu ’abi lobi, èn a musu de leki wan krosi na wi skin, bika lobi na wan volmaakti banti di e meki sma kon de wán’.—Kol. 3:14.
Wi musu teki na eksempre fu Yehovah na ini a diniwroko fu wi
16. San Gado wani gi libisma?
16 Na apostel Paulus ben skrifi: „Gado no lobi a wan sma moro a trawan” (Rom. 2:11). Yehovah wani taki sma fu ala kondre e anbegi en. (Leisi 1 Timoteyus 2:3, 4.) Fu dati ede, a seti sani so taki a „têgo bun nyunsu” kan meki bekènti „gi [sma fu] ala kondre, lo, tongo, nanga pipel” (Openb. 14:6). Yesus ben taki: „A gron na grontapu” (Mat. 13:38). San disi wani taki gi yu nanga yu osofamiri?
17. Fa wi kan yepi ala sortu sma?
17 A no ala sma man go na farawe presi na grontapu fu preiki a Kownukondre boskopu gi trawan. Toku a kan de so taki wi abi na okasi fu preiki a boskopu disi gi trakondre sma di e libi na ini a kontren fu wi. Wi e teki okasi fu gi kotoigi na ala sortu sma, boiti den sma di wi preiki omeni yari langa gi den? Fu san ede yu no e teki a bosroiti fu go preiki gi trawan di no yere a boskopu ete?—Rom. 15:20, 21.
18. Fa Yesus ben sori taki a ben e broko en ede nanga sma?
18 Yesus ben sabi heri bun taki a ben de fanowdu fu yepi ala sma. A no ben e preiki na ini wán kontren nomo. Bijbel e taki dati a ben „go na ala den foto nanga dorpu”. Èn baka dati, „di a si ala den sma, a ben sari den” èn a ben sori taki a ben de fanowdu fu yepi den sma disi.—Mat. 9:35-37.
19, 20. San na wan tu fu den fasi fa wi kan sori taki wi e broko wi ede nanga ala sortu sma, neleki fa Yehovah nanga Yesus e du dati?
19 San na wan tu fasi fa wi kan sori a srefi denki leki Yesus? Son sma meki muiti fu preiki na presi na ini a kontren fu den pe kotoigi no e preiki so furu. Kande den e preiki na ini kontren pe furu bisnis de, na presi pe sma lobi fu go koiri, na presi pe bigi loko e stop, noso na fesi gebow pe sma no man doro den ososma makriki. Tra preikiman meki muiti fu leri wan nyun tongo fu man preiki gi sma fu tra ras di e libi now na ini a kontren fu den, noso gi grupu sma di no ben gwenti yere a boskopu. Te wi e leri fa fu taki den sma disi odi na ini a tongo fu den, dan dati kan yepi kaba fu sori den taki wi trutru e broko wi ede nanga den. Te wi no abi na okasi fu leri wan tra tongo, dan kande wi kan gi den wan di e du dati deki-ati, a no so? A no de fu taki dati wi no sa krutu den wan di e meki muiti fu preiki gi sma fu wan tra kondre. Ala sma warti na ini Gado ai, èn wi wani abi a srefi denki leki En.—Kol. 3:10, 11.
20 Te wi e si sma soleki fa Gado e si den, dan dati wani taki dati wi sa preiki gi ala sma awansi sortu situwâsi den de na ini. Kande son sma no abi wan tanpresi, kande den dotidoti pikinso, noso kande a de krin fu si taki den e libi na wan fasi di no fiti. Te son sma no e handri bun nanga wi, dan dati no musu meki taki wi e bigin denki takru fu a kondre noso fu a ras fu den. Son sma ben handri takru nanga Paulus, ma toku dati no tapu en fu tan preiki gi den sma fu a ras dati (Tori. 14:5-7, 19-22). A ben abi a frutrow taki kande son sma ben o wani arki a boskopu te fu kaba.
21. Sortu wini yu sa kisi te yu e leri fu si trawan soleki fa Yehovah e si den?
21 Now a de krin fu si taki wi musu abi a yoisti denki fu wi brada nanga sisa na ini a kondre fu wi, fu den wan na heri grontapu, èn fu den sma di wi e miti na ini a preikiwroko. Iya, wi musu kon abi a denki fu Yehovah. O moro wi e kon abi a denki fu Yehovah, o moro wi sa man yepi fu sorgu taki vrede nanga wánfasi de. Èn wi sa man yepi trawan moro bun fu kisi warderi gi Yehovah, a Gado di „no lobi a wan sma moro a trawan”, ma di e sori taki a e broko en ede na wan lobi-ati fasi nanga ala sma. Dati e kon fu di „den alamala na a wroko fu en anu”.—Yob 34:19.
Yu kan gi piki?
• Fa wi no musu denki fu den brada nanga sisa fu wi?
• Fa wi kan leri si wi brada nanga sisa na a fasi fa Yehovah e si den?
• San yu leri te a abi fu du nanga a fasi fa wi musu si den brada nanga sisa fu wi na heri grontapu?
• Te wi de na ini a preikiwroko, dan fa wi kan si trawan soleki fa Yehovah e si den?
[Aksi fu a tori disi]
[Prenki na tapu bladzijde 26]
Fa yu kan kon sabi sma fu tra ras?
[Prenki na tapu bladzijde 28]
Na sortu fasi yu kan preiki a bun nyunsu gi moro sma?