San e gi wi trutru prisiri na ini a libi?

„Abi frede gi a tru Gado èn hori yusrefi na den komando fu en.”—PREIK. 12:13.

1, 2. Fa wi kan kisi wini fu den sani di skrifi na ini a buku Preikiman?

PRAKSERI wan man di abi ala sani. A de wan pôpi tiriman, a de wan fu den moro gudusma na grontapu, èn sosrefi a moro koniman fu a ten fu en. Ma aladi a abi ala den sani disi, toku a e aksi ensrefi a sani disi: „San e gi sma trutru prisiri na ini a libi?”

² So wan man ben e libi trutru, èn dati ben de sowan dri dusun yari pasa. A ben nen Salomo, èn na ini a buku Preikiman wi kan leisi san a ben skrifi fu a suku di a ben e suku fu de koloku (Preik. 1:13). Wi kan leri furu fu a libi fu Salomo. A no de fu taki dati den koni rai di skrifi na ini a buku Preikiman kan yepi wi fu poti marki gi wisrefi di sa meki wi de koloku trutru.

A strei di sma e „strei fu kisi a winti”

3. Sortu prenspari tru tori wi alamala musu hori na prakseri te a abi fu du nanga a libi fu wi?

³ Salomo e fruklari taki Gado meki bun furu moi sani na grontapu, èn den sani dati di e tan hari wi prakseri èn di e tan fruwondru wi, noiti e kaba fu gi wi prisiri. Ma fu di a libi syatu tumusi, meki wi noiti no sa man ondrosuku ala den sani di Gado meki (Preik. 3:11; 8:17). Soleki fa Bijbel e taki, a libi fu wi syatu èn neleki a skaduw a e hari gowe esi-esi (Yob 14:1, 2; Preik. 6:12). A prenspari tru tori disi musu gi wi deki-ati fu libi na wan koni fasi. A sani dati no makriki, fu di a grontapu fu Satan kan kori wi fu libi na wan fasi di Gado no feni bun.

4. (a) San a Hebrew wortu di vertaal nanga „fu soso” noso „soso sani” wani taki? (b) Na sortu marki di sma poti na ini den libi, wi sa poti prakseri?

⁴ Salomo e warskow wi fu luku bun taki wi no e libi na wan don fasi. Fu dati ede a e gebroiki a Hebrew wortu di wani taki „fu soso” noso „soso sani” sowan 30 leisi na ini a buku Preikiman. A Hebrew wortu dati abi fu du nanga sani di no warti notinoti, noso sani di no e tyari wini kon (Preik. 1:2, 3). Son leisi Salomo e gebroiki a Hebrew wortu disi te a e taki fu a strei di sma e „strei fu kisi a winti” (Preik. 1:14; 2:11). A de krin taki wi noiti sa man kisi a winti. Te fu kaba, wan sma di e pruberi fu du dati sa si taki a abi noti na ini en anu. Na so a de tu te wi e pruberi fu doro marki di no sa tyari wini kon gi wi. A libi na ini a sistema disi syatu tumusi fu lasi wi ten tapu sani di no sa tyari nowan enkri wini kon gi wi. Dati meki wi sa poti prakseri na wan tu eksempre di Salomo e gi fu sori sortu marki furu sma wani doro na ini a libi. Disi sa yepi wi fu no poti marki di no sa tyari wini kon gi wi. Wi sa poti prakseri fosi na a suku di sma e suku fu meki prisiri èn fu kon abi gudu. Baka dati, wi sa luku fu san ede a de prenspari fu du wroko di Gado feni bun.

Wi sa de koloku te wi e libi soso fu meki prisiri?

5. Fa Salomo ben e pruberi fu de koloku?

⁵ Neleki furu sma na ini a ten disi, Salomo ben e meki prisiri na ala sortu fasi, fu di a ben  wani de koloku. A ben skrifi: „Mi no ben tapu mi ati fu meki iniwan sortu prisiri” (Preik. 2:10). Na sortu fasi a ben e suku fu meki prisiri? Soleki fa Preikiman kapitel 2 e sori, dan Salomo ’ben e dringi win fu meki en skin firi prisiri’, aladi a ben e sorgu taki a no ben e dringi pasa marki. A ben e seti moi dyari, a ben e bow moi palèisi, a ben e arki poku, èn a ben e nyan switi nyanyan.

6. (a) Fu san ede a no fowtu fu nyan bun fu den bun sani fu a libi? (b) San wi musu hori na prakseri te a abi fu du nanga prisiriten?

⁶ A de so taki Bijbel e sori taki a no bun fu abi wan switi ten nanga mati? Kwetikweti. Fu eksempre, Salomo e sori taki te wi e sidon nyan na wan tiri presi baka di wi wroko tranga, dan dati na wan presenti fu Gado. (Leisi Preikiman 2:24; 3:12, 13.) Boiti dati, Yehovah srefi e taigi yonguwan fu ’meki prisiri èn fu meki den ati firi bun’, ma den musu du dati na wan frantwortu fasi (Preik. 11:9). A de fanowdu fu rostu èn fu meki prisiri. (Luku Markus 6:31.) Ma wi no musu libi soso fu meki prisiri. Na presi fu dati wi musu si prisiri ten leki a sowtu di wi e poti na ini wan supu. Awansi fa wan sma lobi sowtu, toku a no de fu taki dati te a e poti tumusi furu sowtu na ini wan supu, dan a supu dati no sa switi èn a no sa bun fu nyan. Salomo ben kon si tu taki wan sma di ben e libi soso fu meki prisiri, ben e „strei fu kisi a winti”.—Preik. 2:10, 11.

7. Fu san ede wi musu luku bun fa wi e meki prisiri?

⁷ Boiti dati, a no ala fasi fu meki prisiri e tyari wini kon. Furu fu den fasi fa sma e meki prisiri, trutru kan tyari takru bakapisi kon gi wi. Iya, a bribi fu wi kan kon swaki, noso wi kan du sani di no fiti. Milyunmilyun sma pori den libi soso fu di den ben wani meki prisiri. Den sma disi gebroiki drugs, den dringi sopi pasa marki, noso den go dòbel. Yehovah e warskow wi na wan switi fasi taki efu wi e meki wi ati noso wi ai kori wi fu du sani di no bun, dan wi sa musu ondrofeni den takru bakapisi fu dati.—Gal. 6:7.

8. Fu san ede a bun fu poti prakseri na a libi fu wi?

⁸ Wan tra sani di wi musu hori na prakseri, na taki te wi e gebroiki tumusi furu ten fu meki prisiri, dan wi no sa man poti nofo prakseri na den moro prenspari sani. No frigiti taki a libi fu wi syatu èn wi no abi a dyaranti taki wi sa de gosontu fu ala ten èn taki problema no sa miti wi. Dati meki den sani di Salomo e taki moro fara, e sori taki a moro bun fu go na wan beri, spesrutu a beri fu wan getrow Kresten brada noso sisa, leki fu go na wan ’oso pe wan fesa e hori’. (Leisi Preikiman 7:2, 4.) Te wi e arki a beritaki èn e prakseri a libi fu a sma di ben de wan getrow futuboi fu Yehovah, dan dati kan gi wi deki-ati fu prakseri wi eigi libi. Na so wi kan kon si taki wi musu kenki den marki di wi poti na ini a libi, fu man libi na wan moro koni fasi.—Preik. 12:1.

Wi sa de koloku te wi abi gudu?

9. San Salomo kon si te a abi fu du nanga den gudu di sma abi?

⁹ Di Salomo skrifi a buku Preikiman, dan a ben de wan fu den moro gudu sma na grontapu (2 Kron. 9:22). Fu di a ben gudu, meki a ben man abi iniwan sani di a ben wani. A ben skrifi: „Iniwan sani di mi ai ben aksi, mi no ben weigri fu gi den dati” (Preik. 2:10). Toku Salomo kon si taki te wan sma abi gudu, dan a no abi fu de so taki a de koloku trutru. A ben taki te fu kaba: „Wan sma di lobi solfru nomo, no sa de tevrede nanga solfru, èn a sma di lobi gudu no sa de tevrede nanga a moni di a e meki.”—Preik. 5:10.

10. O ten wan sma sa de koloku trutru èn o ten a sa abi trutru gudu?

¹⁰ Aladi gudu no e tyari wini kon fu ala ten, toku furu sma wani abi gudu. Wan ondrosuku di du no so langa pasa na ini Amerkankondre, tyari kon na krin san ben de a moro prenspari marki fu 75 procent fu den studenti di ben de na a universiteit a fosi yari. Den studenti disi ben wani „kon gudu”. Awansi den doro a marki fu den, dan dati wani taki dati den sa de koloku trutru? Dati no abi fu de so. Ondrosukuman kon si taki te sma e feti baka gudu, dan fu taki en leti, dati e tapu den fu de koloku trutru. Salomo  ben kon frustan a tori dati kaba langa ten na fesi. A ben skrifi: „Mi tyari sosrefi solfru nanga gowtu kon na wán gi misrefi, èn sosrefi sani di soso kownu abi . . . Èn luku! ala sani ben de fu soso èn a ben de neleki mi ben e feti fu kisi a winti” (Preik. 2:8, 11). * Ma te wi e gebroiki wi libi fu dini Yehovah nanga wi heri ati, èn te a e blesi wi leki bakapisi fu dati, dan wi sa kisi trutru gudu.—Leisi Odo 10:22.

Sortu wroko sa meki wi de koloku trutru?

11. Fa Bijbel e sori taki a de prenspari fu wroko?

¹¹ Yesus ben taki: „Mi Tata tan wroko teleki now èn misrefi e tan wroko tu” (Yoh. 5:17). A no de fu taki dati a wroko di Yehovah nanga Yesus e du e gi den prisiri. Luku fa Bijbel e sori fa Yehovah e prisiri nanga den sani di a meki: „Gado luku ala den sani di a meki, èn a si taki den ben de heri bun” (Gen. 1:31). Di den engel si san Gado ben du, dan den „bigin bari fu di den ben breiti srefisrefi” (Yob 38:4-7). Salomo ben frustan tu fu san ede a de prenspari fu du bun wroko.—Preik. 3:13.

12, 13. (a) San tu sma e taki fu sori taki den e kisi prisiri fu a tranga wroko di den e du? (b) Fu san ede a grontapuwroko fu wi kan meki wi lasi-ati son leisi?

¹² Furu sma sabi sortu bun firi a e gi te den meki tranga muiti fu du wan bun wroko. Luku na eksempre fu José, wan man di abi bun bakapisi nanga a wroko di a e du fu meki skedrei. A ben taki: „Te yu meki wan skedrei soifri soleki fa yu ben abi na prakseri, dan yu e firi neleki yu ben man kren wan hei bergi.” Wan bisnisman di nen Miguel, * e taki: „Te yu e wroko, dan yu e firi bun fu di yu man sorgu gi yu osofamiri. A kan gi yu a firi tu taki yu doro wan marki.”

¹³ Ma aladi dati de so, toku furu wroko di sma e du, na wroko di no e gi den prisiri, èn di no e gi den okasi fu leri nyun sani. Son leisi a situwâsi na a wrokope fu den sma e meki taki den e lasi-ati, èn kande sani no e waka na wan reti fasi srefi. Soleki fa Salomo e sori, dan a kan taki a lesisma e kisi a pai, aladi a sma di e wroko tranga ben musu kisi dati. Kande dati e kon fu di a lesisma e gebroiki den mati fu en di abi makti, fu kisi san a wani (Preik. 2:21). Tra sani de tu di kan meki wan sma lasi-ati. Kande wan sma e kisi wan moi okasi di sa tyari bun bakapisi kon gi en na ini a bisnislibi, ma te fu kaba sani no e waka bun fu di na ekonomia fu a kondre go na baka, noso fu di tra sani e pasa di a sma no e fruwakti. (Leisi Preikiman 9:11.) Nofo tron, a sma di e feti fu go na fesi, e atibron èn a e lasi-ati te fu kaba, fu di a e kon si taki a tan „wroko tranga soso fu kisi a winti”.—Preik. 5:16.

14. Sortu wroko e gi sma trutru prisiri ala ten?

¹⁴ Wan wroko de di noiti sa meki wi lasi-ati? José, a man di e meki skedrei èn di wi ben kari kaba na ini na artikel, e taki: „Baka wan pisi ten, skedrei kan lasi, noso den kan pori. Ma dati no de so nanga den sani di wi kan du na ini a  diniwroko fu Gado. Fu di mi e preiki a bun nyunsu soleki fa Yehovah ben taigi wi, meki mi ben man yepi trawan fu tron getrow Kresten di abi frede gi Gado. Disi e tyari wini kon gi den fu ala ten. A sani dati trutru na wan bigi blesi” (1 Kor. 3:9-11). Miguel e taki tu dati a preikiwroko e gi en moro prisiri leki a grontapuwroko fu en. A e taki moro fara: „Noti kan gi yu so furu prisiri leki te yu e fruteri wan sma wan tru tori fu Bijbel, èn te yu e si taki a sani dati e naki en ati.”

„Trowe yu brede na tapu a watra”

15. San e gi wan sma trutru prisiri na ini a libi?

¹⁵ Sobun, san e gi sma trutru prisiri na ini a libi? Wi sa firi prisiri trutru te wi e gebroiki a syatu pisi ten di wi abi na ini a sistema disi fu du bun èn fu plisi Yehovah. Wi kan kon moro krosibei na Gado, wi kan leri den pikin fu wi den gronprakseri fu Bijbel, wi kan yepi trawan fu kon sabi Yehovah, èn wi kan tron bun mati fu wi brada nanga sisa (Gal. 6:10). Ala den marki disi e tyari wini kon fu ala ten, èn den wan di doro den e kisi furu blesi. Salomo ben gebroiki wan moi agersitori fu sori fu san ede a de prenspari fu du bun gi trawan. A ben taki: „Trowe yu brede na tapu a watra, bika baka furu dei yu sa feni en baka” (Preik. 11:1). Yesus ben gi den disipel fu en a rai disi: „Abi a gwenti fu gi sma sani, dan sma sa gi unu sani tu” (Luk. 6:38). Boiti dati, Yehovah srefi e pramisi den wan di e du bun gi trawan, taki a sa pai den baka.—Odo 9:17; leisi Hebrewsma 6:10.

16. San na a moro bun ten fu bosroiti san wi o du nanga wi libi?

¹⁶ Bijbel e gi wi deki-ati fu teki koni bosroiti te a abi fu du nanga a fasi fa wi sa gebroiki wi libi, èn wi musu du dati te wi yongu ete. Na so wi sa man wai pasi gi broko-ede te wi kon moro owru (Preik. 12:1). A ben o de wan sari sani te wi ben o gebroiki den moro bun yari fu wi libi fu feti baka den sani fu grontapu, soso fu kon si bakaten taki wi ben e feti fu kisi a winti!

17. San sa yepi yu fu teki a bosroiti fu libi na a moro bun fasi?

¹⁷ Neleki iniwan lobi-ati papa, Yehovah wani yu fu nyan bun fu a libi, fu du bun, èn fu wai pasi gi problema (Preik. 11:9, 10). Fa yu kan du dati? Poti en leki marki fu du moro na ini a diniwroko fu Yehovah, èn du ala san yu man fu doro den marki dati. Pikinmoro 20 yari pasa, Javier ben musu bosroiti efu a ben o tron wan datra di ben o meki furu moni, noso efu a ben o go na ini a furuten diniwroko. A e taki: „Aladi a datrawroko kan gi sma prisiri, toku noti kan gi mi a prisiri di mi ben firi di mi yepi difrenti sma fu kon na ini a tru anbegi. A furuten diniwroko yepi mi fu abi trutru prisiri na ini a libi. A wan-enkri sani di e hati mi, na taki mi no go na ini a furuten diniwroko moro fruku.”

18. Fu san ede Yesus en libi na grontapu ben gi en trutru prisiri?

 ¹⁸ We, san na a moro prenspari sani di wi musu pruberi fu abi? A buku Preikiman e taki: „Wan nen bun moro leki bun oli, èn a dei fu dede bun moro leki a dei te wan sma gebore” (Preik. 7:1). A libi fu Yesus na a moro bun eksempre fu dati. A no de fu taki dati a ben abi wan heri bun nen na Yehovah. Di Yesus dede, dan a sori taki na en Tata ben abi a reti fu tiri hemel nanga grontapu, èn a gi en libi leki wan lusu-paiman so taki sma ben kan kisi frulusu (Mat. 20:28). Na ini a syatu pisi ten di Yesus ben de na grontapu, a gi wi a moro bun eksempre, fu di a ben libi na wan fasi di ben gi en trutru prisiri. Wi musu pruberi fu teki na eksempre fu en.—1 Kor. 11:1; 1 Petr. 2:21.

19. Sortu koni rai Salomo gi wi?

¹⁹ Wi kan kon abi wan bun nen na Gado tu. A de moro prenspari gi wi fu abi wan bun nen na Gado, leki fu abi gudu. (Leisi Mateyus 6:19-21.) Ibri dei wi kan feni fasi fu du sani di Yehovah feni bun èn di sa meki wi firi koloku. Fu eksempre, wi kan preiki a bun nyunsu gi trawan, wi kan du muiti fu meki sani waka moro bun na ini a trowlibi fu wi èn na ini na osofamiri fu wi. Boiti dati, wi kan studeri Bijbel èn wi kan go na den konmakandra, so taki a bribi fu wi kan kon moro tranga (Preik. 11:6; Hebr. 13:16). Sobun, yu wani abi trutru prisiri na ini a libi? Efu dati de so, dan tan fiti a rai disi di Salomo e gi: „Abi frede gi a tru Gado èn hori yusrefi na den komando fu en. Bika disi na a plekti fu libisma.”—Preik. 12:13.

[Futuwortu]

San yu ben sa piki?

• Fu san ede wi musu poti seryusu prakseri na den marki di wi poti na ini wi libi?

• Fa wi musu si a feti di sma e feti fu meki prisiri èn fu kon gudu?

• Sortu wroko sa meki wi de koloku fu ala ten?

• Sortu prenspari sani wi musu pruberi fu abi?

[Aksi fu a tori disi]

[Prenki na tapu bladzijde 23]

Fa wi musu si prisiriten?

[Prenki na tapu bladzijde 24]

Fu san ede a preikiwroko e gi wi trutru prisiri?