Yonguwan, memre un Gran Mekiman now

„Memre yu Gran Mekiman now na ini den dei fu yu yongu yari.”—PREIK. 12:1.

1. Fa Yehovah e sori taki a e frutrow den yonguwan di e anbegi en?

KRESTEN yonguwan warti na ini Yehovah ai èn a e si den leki switi dowdropu fu musudei. Iya, a ben taki dati te en Manpikin ben o kon nanga a „srudati legre” fu en, dan yongu man nanga yongu uma ben o „de klariklari fu gi densrefi” na ini a diniwroko fu Krestes (Ps. 110:3). A profeititori dati ben abi fu du nanga a ten fu wi. Na ini a ten disi, furu sma no wani sabi noti fu Gado, den lobi densrefi, den lobi moni, èn den e trangayesi Gado. Ma Yehovah ben sabi taki yonguwan di ben o anbegi en, ben o de tra fasi. Yongu brada nanga sisa, Yehovah trutru e frutrow unu!

2. San a wani taki fu memre Yehovah?

² Prakseri fa Gado e prisiri te a e si fa yonguwan e memre en leki den Gran Mekiman (Preik. 12:1). Fu taki en leti, te wi e memre Yehovah, dan dati no wani taki dati wi e prakseri en nomo. Te wi e memre Yehovah, dan dati wani taki dati wi e handri, iya, wi e du san a feni bun, èn wi e meki den wet nanga den gronprakseri fu en tiri wi na ini wi aladei libi. Boiti dati, wi e frutrow tapu Yehovah, fu di wi sabi taki a abi a bun fu wi na prakseri (Ps. 37:3; Yes. 48:17, 18). Na so yu e denki fu yu Gran Mekiman?

„Frutrow tapu Yehovah nanga yu heri ati”

3, 4. Fa Yesus sori taki a ben e frutrow tapu Yehovah, èn fu san ede a prenspari fu frutrow tapu Yehovah na ini a ten disi?

³ A no de fu taki dati a moro bun eksempre fu wan sma di ben e frutrow tapu Gado, na Yesus Krestes. A ben e libi na wan fasi di ben e kruderi nanga san skrifi na Odo 3:5, 6. Drape skrifi: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.” Syatu baka di Yesus dopu, Satan go fu tesi en. A ben wani gi en makti nanga glori na grontapu (Luk. 4:3-13). Yesus no meki Satan kori en. A ben sabi taki wan sma kan kisi trutru „gudu, glori nanga libi” te a abi ’sakafasi èn te a abi frede gi Yehovah’.—Odo 22:4.

⁴ Na ini a ten disi, furu sma gridi èn den e denki densrefi nomo. Fu di wi e libi na ini so wan grontapu, meki a de wan koni sani fu teki na eksempre fu Yesus. Hori na prakseri tu taki Satan sa du iniwan sani fu kori den futuboi fu Yehovah, so taki den e gowe libi a smara pasi di e tyari sma go na têgo libi. A wani taki ala sma musu waka na tapu a bradi pasi di e tyari sma go na dede. No meki a kori yu! Na presi fu dati, abi a fasti bosroiti fu memre yu Gran Mekiman. Frutrow na en tapu dorodoro, èn grabu „a trutru libi” hori bun steifi, bika a de heri krosibei.—1 Tim. 6:19.

Yonguwan, sori taki unu koni!

5. Fa yu e si a tamara fu a grontapu disi?

⁵ Yonguwan di e memre den Gran Mekiman koni srefisrefi. (Leisi Psalm 119:99, 100.) Fu di den e si sani soleki fa Gado e si sani, meki den sabi heri bun taki a grontapu disi o kisi pori heri esi. Yonguwan, aladi unu yongu ete, toku unu e si taki furu sma e frede moro nanga moro, fu di den no sabi san o pasa na ini a ten di e kon. Efu yu e go na skoro ete, dan a no de fu taki dati yu leri fa sma e doti a grontapu, fa grontapu e kon waran moro nanga moro, fa sma e koti bigi busi trowe, noso yu e leri fu tra problema di abi fu du nanga den tori disi. Sma e broko den ede trutru nanga den sani disi, ma Yehovah Kotoigi wawan e frustan krin taki den sani disi abi fu du nanga a marki di e sori taki a grontapu fu Satan o kon na wan kaba.—Openb. 11:18.

6. Na ini sortu trapu son yonguwan fadon?

 ⁶ A de wan sari sani taki son yongu futuboi fu Gado no tan na ai èn taki den frigiti taki heri esi a grontapu disi o kisi pori (2 Petr. 3:3, 4). Trawan fadon na ini wan trapu èn den du seryusu sondu, fu di den ben abi takru kompe èn fu di den ben e luku seks tori na ini buku èn tapu telefisi nanga Internet (Odo 13:20). A ben o de wan sari sani trutru efu Gado no ben o feni wi bun moro, now di a kaba de so krosibei! Na presi fu dati, teki leri fu den sani di pasa nanga den Israelsma na ini a yari 1473 bifo Krestes. Na a ten dati den ben seti kampu na den opo presi fu Moab, leti na a mofodoro fu a Pramisi Kondre. San ben pasa drape?

Den fadon leti na a mofodoro fu a Pramisi Kondre

7, 8. (a) Fa Satan kori den Israelsma di ben de na den opo presi fu Moab? (b) Fa Satan e kori sma na ini a ten disi?

⁷ Na a ten dati, a ben de krin taki Satan ben wani tapu pasi gi den Israelsma fu go na ini a Pramisi Kondre di den ben o kisi leki gudu. Satan ben wani a profeiti Bileam fu fluku den, ma di sani no waka soleki fa a ben wani, dan a pruberi fu kori den na wan moro triki fasi. A pruberi fu meki den naki futu, so taki Yehovah no ben o feni den bun moro. Satan gebroiki den uma fu Moab fu kori a pipel, èn disi leisi Didibri ben man kori wan tu fu den. A pipel bigin du hurudu nanga den umapikin fu Moab, èn den bigin boigi gi a Bâal fu Peor! Aladi a warti gudu fu den, namku a Pramisi Kondre, ben de so krosibei, toku sowan 24.000 Israelsma lasi den libi. Dati ben de wan sari sani trutru!—Num. 25:1-3, 9.

⁸ Na ini a ten disi wi de heri krosibei fu wan moro bun pramisi kondre, namku a nyun sistema. Soleki fa Satan gwenti, a e gebroiki hurudu agen fu pori a denki fu a pipel fu Gado. Fu di sma na ini grontapu no sabi srefisrefi moro san bun èn san no bun, meki den e si hurudu leki wan sani di no fowtu, èn den feni taki sma no musu krutu trawan di e libi wan homo-sekslibi. Wan Kresten sisa ben taki: „Soso na oso èn na ini a Kownukondre zaal den pikin fu mi e leri taki Gado no feni en bun taki sma abi wan homo-sekslibi èn taki den abi seks nanga sma di no de a trowpatna fu den.”

9. San kan pasa te wan sma de na ini en „yongu yari”, èn san yonguwan kan du te dati e pasa?

⁹ Yonguwan di e memre den Gran Mekiman sabi taki seks na wan santa presenti di abi fu du nanga libi èn nanga a meki di sma man meki pikin. Fu dati ede, den sabi taki wan sma mag abi seks demakandra soso te a trow, soleki fa Gado taki (Hebr. 13:4). Ma te wan sma de na ini en „ yongu yari”, namku a pisi ten te den seks firi e kon moro tranga èn kan bruya a denki fu wan sma, dan a kan muilek gi a sma dati fu tan krin (1 Kor. 7:36). San yu kan du te yu e bigin denki fu sani di no fiti? Begi Yehovah fayafaya fu yepi yu fu poti  prakseri na sani di krin. Ala ten Yehovah e arki den wan di e suku yepi na en na wan opregti fasi. (Leisi Lukas 11:9-13.) Te yu e taki fu bun sani di kan tranga a bribi fu yu, dan dati kan yepi yu tu fu poti prakseri na sani di krin.

Poti bun marki gi yusrefi!

10. Sortu fowtu denki wi no musu abi, èn san wi kan aksi wisrefi?

¹⁰ Wán reide fu san ede furu yonguwan na ini grontapu no e tyari densrefi na wan fasi di fiti èn e libi soso fu plisi den lostu fu a skin, na taki den no e teki a tiri fu Gado, noso den no abi wan trutru howpu gi a ten di e kon. Den de leki den Israelsma fu a ten fu Yesaya. A pipel dati no ben e teki a tiri fu Gado moro, ma den ben e libi soso fu meki ’prisiri, fu nyan meti, èn fu dringi win’ (Yes. 22:13). Na presi taki wi e dyarusu tapu den sortu sma disi, a ben o moro bun fu poti prakseri na a tumusi moi howpu di Yehovah gi den wan di e tan getrow na en, a no so? Efu yu na wan yonguwan di e dini Yehovah, dan yu abi a tranga howpu fu libi na ini a nyun grontapu? Yu e meki tranga muiti fu ’libi nanga wan krin frustan aladi yu e wakti a kontru fu a tumusi moi howpu’ di Yehovah gi yu? (Tit. 2:12, 13) A piki di yu e gi tapu den aksi disi, sa abi krakti tapu den marki di yu e poti gi yusrefi, èn a sa tyari kon na krin san na den moro prenspari sani gi yu.

11. Fu san ede yongu Kresten di e go na skoro ete musu studeri fayafaya?

¹¹ Grontapu wani taki yonguwan musu gebroiki ala den ten nanga krakti fu feti baka grontapu sani. A no de fu taki dati den wan di e go na skoro ete musu meki tranga muiti fu teki bun leri. Hori na prakseri taki yu no e go na skoro soso fu man feni wan bun wroko, ma yu e du dati fu de wan yepi na ini a gemeente, èn fu man preiki a bun nyunsu fu a Kownukondre na wan bun fasi. Fu man du dati, yu musu man taki bun nanga sma, yu musu man denki krin, èn yu musu man taki-go-taki-kon nanga sma na wan safri fasi èn na wan lespeki fasi. Ma toku yonguwan di e studeri Bijbel èn di e meki muiti fu fiti den Bijbel gronprakseri na ini den libi, e kisi a moro bun leri di de fu kisi, èn den kan abi a dyaranti taki sani sa waka bun nanga den fu têgo.—Leisi Psalm 1:1-3. *

12. Sortu eksempre Kresten osofamiri musu teki?

¹² Na ini Israel a ben de tumusi prenspari taki papa nanga mama ben e gi den pikin fu den leri. Den pikin ben e kisi leri fu pikinmoro ibri afersi fu a libi, èn spesrutu fu sani di ben abi fu du nanga Gado èn den wet fu En (Deut. 6:6, 7). Sobun, te yonguwan na ini Israel ben e gi yesi na den papa nanga mama èn na tra owruwan di ben abi frede gi Gado, dan boiti taki den ben e kisi sabi, den ben e kisi koni èn a koni fu man si sani krin. Den ben e leri tu fu gebroiki den frustan bun. Fu di den ben e kisi leri fu Gado, meki den ben e kon abi den fasi disi di furu sma no abi (Odo 1:2-4; 2:1-5, 11-15). Kresten papa nanga mama na ini a ten disi musu gi den pikin fu den a srefi sortu leri disi.

Arki den wan di lobi yu

13. Sortu rai son yonguwan e kisi, èn fu san ede den musu luku bun nanga den rai dati?

¹³ Yonguwan e kisi rai fu ala sortu sma. Den e kisi rai tu fu sma na skoro di abi a wroko fu gi den studenti rai, so taki den kan abi bun bakapisi na skoro. Ma nofo tron a rai di den sma disi e gi, na soso fu sori den yonguwan fa fu meki en na ini a grontapu. Te yu e kisi den sortu rai disi, dan grantangi begi Gado fu yepi yu fu kon si efu den rai dati e kruderi nanga a Wortu fu en èn nanga a leri di wi e kisi fu a getrow èn koni srafu. Fu di yu e studeri Bijbel, meki yu sabi taki Satan e pruberi fu kori spesrutu den yonguwan èn den wan di no abi furu ondrofeni. Fu eksempre, na ini a dyari fu  Eden, Eva, di no ben abi furu ondrofeni, ben arki Satan, wan freimde sma di no ben sori lobi gi en srefisrefi. A no de fu taki dati sani ben o waka heri tra fasi efu Eva ben gi yesi na Yehovah, a Sma di ben sori na furu difrenti fasi taki a ben lobi en!—Gen. 3:1-6.

14. Fu san ede wi musu arki Yehovah èn wi papa nanga mama di de na bribi?

¹⁴ A Gran Mekiman fu yu lobi yu tu, èn a no de fu taki dati a abi a bun fu yu na prakseri ala ten. A no wani taki yu musu de koloku nownowde wawan, ma fu têgo! Fu dati ede, leki wan lobi-ati papa di e broko en ede nanga den pikin fu en, Yehovah e taigi yu èn sosrefi ibri anbegiman fu en: „Disi na a pasi. Waka na tapu” (Yes. 30:21). Efu yu abi papa nanga mama di trutru lobi Yehovah, dan dati na ete wan blesi di yu abi. Arki den na wan lespeki fasi te den e gi yu rai di abi fu du nanga den marki di yu wani poti gi yusrefi, èn te den wani leri yu san na den moro prenspari sani (Odo 1:8, 9). Te yu luku en bun, dan den wani taki yu musu kisi têgo libi, wan sani di warti omeni tron moro gudu noso biginen di wan sma kan kisi na ini a grontapu disi.—Mat. 16:26.

15, 16. (a) Sortu frutrow wi kan abi na ini Yehovah? (b) Sortu prenspari sani wi e leri fu na eksempre fu Baruk?

¹⁵ Den wan di e memre den Gran Mekiman no e feti baka gudu, fu di den abi a frutrow taki Yehovah ’no sa libi den kwetikweti èn taki noiti a sa gowe fu den’. (Leisi Hebrewsma 13:5.) Fu di a bun denki disi e difrenti fu a denki fu grontapu, meki wi no musu gi pasi taki a yeye fu grontapu abi krakti na wi tapu (Ef. 2:2). Luku na eksempre fu Baruk, a sekretarsi fu Yeremia. Baruk ben e libi na ini a muilek pisi ten syatu bifo Yerusalem kisi pori na ini 607 bifo Krestes.

¹⁶ A kan taki Baruk ben e suku gudu fu di a ben wani abi wan moro switi libi. Yehovah ben si disi, èn a warskow Baruk na wan switi fasi fu no tan suku „bigi sani” gi ensrefi. Baruk sori sakafasi èn a sori tu taki a koni, fu di a arki Yehovah. A sani disi meki taki a tan na libi di Yerusalem kisi pori (Yer. 45:2-5). Ma den tra sma di ben e libi na ini a ten fu Baruk, no ben e poti Yehovah na a fosi presi, ma den ben e suku „bigi sani” gi densrefi. Te fu kaba den lasi ala den sani dati, di den Kaldeasma (Babilonsma) teki Yerusalem abra. Furu fu den lasi den libi tu (2 Kron. 36:15-18). Na eksempre fu Baruk e yepi wi fu kon frustan taki wan bun matifasi nanga Gado prenspari moro gudu nanga biginen na ini a grontapu disi.

Leri fu a bun eksempre fu trawan

17. Fu san ede Yesus, Paulus, nanga Timoteyus na bun eksempre gi den futuboi fu Yehovah na ini a ten disi?

¹⁷ Na ini Gado Wortu wi kan leisi fu sma di de bun eksempre gi wi. Den eksempre disi kan yepi wi fu waka na tapu a pasi di kan meki sma kisi têgo libi. Fu eksempre, Yesus ben de a moro konisma di ben libi oiti, ma toku a ben poti prakseri na a wan-enkri sani di kan tyari têgo wini kon gi sma, namku „a bun nyunsu fu a kownukondre” (Luk. 4:43). Fu di Paulus ben wani plisi Yehovah dorodoro, meki a no teki na okasi di a ben abi fu meki en na ini a grontapu, ma a gebroiki en ten nanga en krakti fu preiki a bun nyunsu.  Timoteyus, „wan trutru pikin na ini a bribi”, ben teki a bun eksempre fu Paulus (1 Tim. 1:2). A de so taki Yesus, Paulus, nanga Timoteyus ben sari di den bosroiti fu libi na a fasi dati? Kwetikweti! Fu taki en leti, Paulus ben taki dati gi en, den sani fu grontapu ben de leki „wan ipi doti” te a ben e teki den gersi nanga a grani di a ben abi fu dini Gado.—Fil. 3:8-11.

18. Sortu bigi kenki wan yongu brada tyari kon, èn fu san ede a no e sari taki a tyari den kenki dati kon?

¹⁸ Furu yongu Kresten na ini a ten disi, sori taki den abi bribi neleki Yesus, Paulus, nanga Timoteyus. Fu eksempre, wan yongu brada di ben e meki furu moni nanga a wroko di a ben e du, ben skrifi: „Fu di mi e fiti Bijbel gronprakseri na ini mi libi, meki heri esi mi kisi wan moro hei posisi. Aladi mi ben e meki furu moni, toku mi ben feni taki mi ben e strei fu kisi a winti. Di mi go taigi den basi fu mi taki mi ben wani go na ini a furuten diniwroko, dan wantewante den ben wani pai mi moro moni, fu di den ben howpu taki mi ben o tan wroko gi den. Ma mi ben teki wan bosroiti kaba. Furu sma no ben man frustan fu san ede mi libi so wan bun wroko fu go na ini a furuten diniwroko. Mi piki den taki mi gi mi libi abra na Gado, èn taki mi wani hori misrefi na a pramisi dati. Now, a moro prenspari sani gi mi, na fu dini Yehovah, èn a sani disi meki taki mi de koloku trutru. Awinsi omeni moni mi ben o abi, noso awinsi sortu posisi mi ben o abi, toku mi no ben o de so koloku.”

19. Sortu koni bosroiti yonguwan kan teki?

¹⁹ Na heri grontapu, dusundusun tra yonguwan teki den srefi sortu koni bosroiti disi. Sobun, yonguwan, te yu e denki a tamara fu yu, dan hori a dei fu Yehovah bun na prakseri (2 Petr. 3:11, 12). No dyarusu tapu den wan di abi wan switi libi na ini a grontapu disi. Na presi fu dati, arki den wan di trutru lobi yu. A moro bun sani di yu kan du, na fu kibri „gudu na ini hemel”, èn dati na a wan-enkri sani di kan meki yu kisi wini fu têgo. (Mat. 6:19, 20; leisi 1 Yohanes 2:15-17.) Iya, memre yu Gran Mekiman. Te yu e du dati, dan Yehovah sa blesi yu.

[Futuwortu]

Yu kan memre disi ete?

• Fa wi kan sori taki wi e frutrow tapu Gado?

• Sortu leri na a moro bunwan?

• San wi kan leri fu na eksempre fu Baruk?

• Sortu sma na bun eksempre gi wi, èn fu san ede wi kan taki dati?

[Aksi fu a tori disi]

[Prenki na tapu bladzijde 13]

Yehovah e gi sma a moro bun leri

[Prenki na tapu bladzijde 15]

Baruk ben arki Yehovah èn a ben tan na libi di Yerusalem kisi pori. San yu kan leri fu na eksempre disi?