Yu e memre disi ete?
Yu e memre disi ete?
Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:
• O ten den lukuman di ben e ondrosuku den stari go luku Yesus?
Wan Bijbel e taki: „Den lukuman no ben go luku Yesus na ini a nyanyan-baki, tapu a neti di a gebore èn di den skapuman go luku en. Den go luku en wan tu mun baka dati.” Na a pisi ten dati Yesus ben de wan „pikin” èn a ben e tan na ini wan oso (Mat. 2:7-11). Efu den lukuman ben tyari gowtu nanga tra diri kado gi Yesus tapu a dei di a gebore, dan yu denki taki Maria ben o gi tu pikin fowru nomo leki ofrandi di a ben tyari Yesus go na a tempel 40 dei baka di a gebore?—1/1, bladzijde 31.
• San furu sma kan du so taki den e du wan moro bun sani nanga den libi?
Wan sma kan aksi ensrefi: ’Mi kan kenki wan tu sani na ini mi libi, so taki mi kan libi soso nanga den sani di mi abi fanowdu trutru?’ Na dati Amy ben du. A ben gudu, ma toku a no ben de koloku. A ben kon frustan taki a feti di a ben feti fu kisi wan hei posisi na ini a grontapu disi, pikinmoro meki taki a gowe libi a bribi. Fu dati ede, a teki a bosroiti fu poti Kownukondre afersi na a fosi presi na ini en libi èn a ben man pionier fu wan pisi ten. Amy e taki: „Te now ete mi e firi koloku trutru èn noiti mi ben abi a firi disi di mi ben gi furu fu mi ten na a grontapuwroko fu mi.”—15/1 bladzijde 19.
• San kan yepi son mama fu de koloku trutru?
Furu mama abi wan wroko. Sonwan fu den abi wan wroko fu di den musu yepi pai gi den kostu fu na osofamiri, ma trawan e du dati fu di den wani abi den eigi moni, noso fu di den wani bai diri sani. Trawan baka, e wroko fu di den lobi a wroko fu den. Soleki fa a Kresten bribi e sori, dan mama abi wan tumusi prenspari frantwortu na ini na osofamiri, spesrutu te den abi yongu pikin ete. Sonwan fu den bosroiti fu no wroko moro, noso den e du afudei wroko so taki den kan poti ala den prakseri na den osofamiri. Èn dati e tyari furu koloku gi den.—1/2, bladzijde 28-31.
• Suma na „den sma fu a ten disi” di Yesus ben taki fu den na ini Mateyus 24:34?
Nofo tron Yesus ben e gebroiki den wortu „den sma fu a ten disi”, te a ben taki nanga ogrisma, noso te a ben taki fu den sortu sma disi. Ma a no ben e du dati di a ben e taki nanga en disipel, di heri esi ben o salfu nanga santa yeye. Den ben de den moro bun sma di ben man frustan san den wortu di skrifi na ini Mateyus 24:32, 33, wani taki. A sani disi e sori wi taki Yesus ben musu fu taki fu den salfu bakaman fu en na ini a fosi yarihondro èn na ini a ten disi.—15/2, bladzijde 23, 24.
• Fa a Wet ben de leki wan leriman, soleki fa a skrifi na ini Galasiasma 3:24?
Nofo tron na ini owruten, wan leriman ben de wan getrow srafu di ben musu sorgu taki ogri no miti a pikin, èn a ben musu sorgu taki den marki di a papa fu a pikin wani taki a pikin doro, pasa trutru. Na a srefi fasi, a Wet ben e kibri den Dyu gi den sani di ben kan abi takru krakti na den tapu, soleki den takru bakapisi di den ben o kisi te den ben o trow nanga sma di no e anbegi Gado. Ma soleki fa a ben de nanga a leriman fu a pikin, na so a Wet ben de fu wan syatu pisi ten nomo, teleki Krestes ben doro.—1/3, bladzijde 18-21.
• Soleki fa Yakobus 3:17 e taki, dan sortu fasi wi musu abi?
Wan sma di e tyari ensrefi na wan krin fasi, e wai pasi wantewante gi sani di ogri (Gen. 39:7-9). Wi musu lobi vrede, wi no sa atibron esi-esi èn wi musu luku bun gi sani di e pori a vrede. A ben o bun efu wi ben o aksi wisrefi: ’A de so taki den brada nanga sisa na ini a gemeente sabi mi leki wan sma di lobi fu meki vrede, noso leki wan sma di lobi fu pori a vrede? A de so taki furu tron mi abi kesekese nanga trawan? Mi na wan sma di no e frudrage sani makriki noso mi lobi fu hati den firi fu trawan? Noso mi de klariklari fu gi trawan pardon, èn mi no de gaw fu dwengi trawan fu du sani soleki fa misrefi wani?’—15/3, bladzijde 24, 25.
• Fu san ede Yesus meki wan breniman si baka safrisafri? (Markus 8:22-26)
Bijbel no e taki krin fu san ede a du dati. Ma a kan de so taki di Yesus meki a breniman si baka safrisafri, dan a ben e gi a man nofo ten fu kon gwenti den someni nyun sani di a ben e si. A sani disi e sori taki Yesus ben e broko en ede nanga a man.—1/4, bladzijde 21.