A fasi fa a Tiri Skin seti

NA INI a Tiri Skin fu Yehovah Kotoigi yu abi getrow brada di de salfu futuboi fu Gado. Den futuboi disi e teki presi gi a getrow èn koni srafu grupu, di abi a frantwortu fu sorgu taki sma e kisi sabi di abi fu du nanga Gado. Boiti dati, den e tiri a Kownukondre preikiwroko di e du na heri grontapu èn den e sorgu taki a wroko dati e go na fesi.—Mat. 24:14, 45-47.

Ibri wiki a Tiri Skin e hori konmakandra, èn nofo tron dati e hori tapu dridewroko. Den konmakandra disi e meki taki den brada disi kan wroko makandra na ini wánfasi (Ps. 133:1). Den memre fu a Tiri Skin e dini sosrefi na ini difrenti komte. Ibri komte abi a frantwortu fu sorgu gi wan spesrutu afersi di abi fu du nanga a Kownukondre. Na ondrosei wan tu sani skrifi di abi fu du nanga den frantwortu disi.

▪ FESIMAN KOMTE: Na ini a komte disi yu abi den fesiman fu ala den tra komte fu a Tiri Skin èn sosrefi wan sekretarsi di de wan memre fu a Tiri Skin tu. A komte disi e sorgu taki ala den tra komte e wroko bun èn sondro problema. A komte disi abi a frantwortu tu fu luku fa fu yepi Yehovah Kotoigi na heri grontapu wantewante te den e kisi fu du nanga bigi problema, frufolgu, rampu, nanga tra seryusu afersi.

▪ WROKOMAN KOMTE: Den brada na ini a komte disi abi a frantwortu fu luku taki sani e waka bun nanga den memre fu den Bethelfamiri na heri grontapu. Den e yepi den memre fu den Bethelfamiri fu tan abi wan bun matifasi nanga Yehovah, èn den e gi yepi na tra fasi tu. A komte disi abi a frantwortu fu luku suma den o kari kon na Bethel, èn den e gi piki tapu aksi di abi fu du nanga a Bethelwroko di den sma disi e du.

▪ BUKU KOMTE: A komte disi abi a frantwortu fu luku taki Bijbel publikâsi e meki, èn taki den e doro na difrenti kontren na heri grontapu. A komte disi abi a frantwortu fu den difrenti korporâsi di Yehovah Kotoigi e gebroiki. Den korporâsi disi abi a frantwortu fu den presi di de fu den, èn den e sorgu taki sani e waka bun na den presi pe buku nanga tijdschrift e meki. A komte disi e seti sani taki a moni di sma e gi na heri grontapu fu horibaka gi a Kownukondre wroko, e gebroiki na wan bun fasi.

▪ DINIWROKO KOMTE: Den brada na ini a komte disi abi a frantwortu gi a preikiwroko nanga ala afersi di abi fu du nanga den gemeente, den pionier, den owruman, nanga den opziener di e go na difrenti presi. A komte disi e seti sani fu sreka den sani gi Wi Kownukondre diniwroko. Boiti dati, a komte disi e kari sma fu kon na a Gileadskoro nanga a Dinariskoro èn bakaten den e seni den sma disi go na den presi pe den musu dini.

▪ LERI KOMTE: A komte disi abi a frantwortu fu sorgu gi a leri di e gi na den bigi konmakandra, den kongres, nanga den gemeente konmakandra. A komte disi e sreka Bijbel programa gi den memre fu den Bethelfamiri, èn a abi a frantwortu gi difrenti skoro, soleki a Gileadskoro nanga a Pionierskoro. A komte disi abi a frantwortu tu fu sreka sani di e kon na tapu cassette lolo, CD, nanga video.

▪ SKRIFI KOMTE: A komte disi abi a frantwortu fu skrifi den sani di musu kon na ini den publikâsi di e taki fu Bijbel, èn fu prati den publikâsi dati gi den brada nanga sisa fu wi èn sosrefi gi tra sma di wani leisi den. A Skrifi Komte e gi piki tapu aksi di sma e poti fu Bijbel, èn den e taki efu sani soleki den drama nanga den lezing schema, bun. A komte disi abi a frantwortu tu fu a vertaalwroko di e du na heri grontapu.

Na apostel Paulus ben agersi a gemeente fu salfuwan nanga wan libisma skin. A ben sori taki ala den pisi fu a skin prenspari, èn taki den abi makandra fanowdu. Ibri pisi fu a skin musu lobi makandra, èn musu wroko makandra fu du a wroko di Gado gi den (Rom. 12:4, 5; 1 Kor. 12:12-31). Yesus Krestes, na Ede fu a skin, e gi den tra pisi fu a skin san den abi fanowdu fu man wroko bun nanga makandra, fu man seti sani bun, èn fu kisi leri fu Bijbel (Ef. 4:15, 16; Kol. 2:19). Na a fasi disi a Tiri Skin seti, so taki a e teki fesi na ini a wroko di den musu du soleki fa Yehovah e tiri den nanga yepi fu santa yeye.