Dini Yehovah aladi yu yongu ete

„Tan du den sani di yu leri èn di yu kon bribi fu di sma overtoigi yu.”—2 TIM. 3:14.

1. Fa Yehovah e si a diniwroko fu den yongu Kotoigi di e dini en?

ASANTA diniwroko di yonguwan e du gi Yehovah prenspari so te gi en, taki a meki a psalm skrifiman skrifi wan profeititori di abi fu du nanga den yonguwan disi. A psalm skrifiman ben taki: „A pipel fu yu sa de klariklari fu gi densrefi tapu a dei te yu sa tyari yu srudati legre go na feti. Yu abi yu grupu yongu sma di moi densrefi nanga santafasi, èn di de neleki dowdropu fu musudei” (Ps. 110:3). Iya, Yehovah trutru e warderi yonguwan di de klariklari fu dini en.

2. Fa grontapu kan abi krakti tapu den marki di yonguwan e poti na ini a ten disi?

² Un yonguwan na ini a Kresten gemeente, unu gi unsrefi abra kaba na Yehovah? Furu yonguwan feni taki a muilek fu teki a bosroiti fu dini a tru Gado. Bisnisman, leriman, èn son leisi famiriman nanga mati, e gi yonguwan deki-ati fu feti baka gudu. Te yonguwan e suku fu go na fesi na ini a tru anbegi, dan nofo tron grontapusma e spotu den. Ma fu taki en leti, a moro bun sani di yu kan du nanga yu libi, na fu dini Yehovah (Ps. 27:4). Fu dati ede, a bun fu poti prakseri na den dri aksi disi: Fu san ede yu musu dini Gado? Fa yu kan tan dini Gado na wan getrow fasi, awansi san trawan e taki noso e du? Na sortu moi fasi yu kan dini Yehovah?

A moro bun sani fu du, na fu dini Yehovah

3. Sortu krakti den sani di Yehovah meki musu abi na wi tapu?

³ Fu san ede yu musu dini a libilibi tru Gado? Openbaring 4:11 e sori wi san na a moro prenspari reide fu san ede wi musu du dati. Drape skrifi: „Na yu, Yehovah, iya, wi Gado, warti fu kisi glori, grani nanga makti, bika na yu meki ala sani; den ben kon de èn yu meki den, fu di yu ben wani.” Yehovah na a tumusi bun Mekiman fu ala sani di de. A grontapu moi trutru! Den bon, den bromki, den meti, den se, den bergi, nanga den bigi sula, iya, na Yehovah meki den alamala. Psalm 104:24 e taki: „Grontapu furu nanga den sani di [Gado] meki.” Wi kan de nanga tangi trutru taki Yehovah gi wi wan skin èn taki a gi wi frustan fu di a lobi wi. Na so wi man prisiri fu a libi na grontapu èn fu den bun sani na en tapu! A no de fu taki dati te wi abi trutru warderi gi den tumusi moi sani di Gado meki, dan dati musu gi wi deki-ati fu dini en, a no so?

4, 5. Sortu sani di Yehovah du ben meki taki a bribi fu Yosua kon moro tranga?

⁴ Den wortu fu Yosua, a fesiman fu den Israelsma, e sori wi ete wan reide fu san ede wi musu dini Yehovah. Na a kabapisi fu en libi, Yosua taigi a pipel fu Gado: „Unu sabi heri bun nanga un heri ati èn nanga un heri sili, taki nowan wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu.” Fu san ede Yosua ben kan taki disi?—Yos. 23:14.

⁵ Di Yosua ben e gro kon bigi na ini Egepte, dan a ben musu fu sabi taki Yehovah ben pramisi den Israelsma taki A ben o gi den wan kondre (Gen. 12:7; 50:24, 25; Ex. 3:8). Baka dati, Yosua luku fa Yehovah bigin du san a ben pramisi den Israelsma. Iya, a si fa Yehovah tyari den Tin Rampu kon tapu Egepte èn fa a dwengi a tranga-ede Farao fu gi den manpikin fu Israel primisi fu gowe libi a kondre fu en.  Yosua ben de wan fu den sma di ben pasa a Redi Se libilibi, èn baka dati a luku fa a se dati swari Farao nanga a legre fu en. Di a pipel ben e teki wan langa waka pasa na ini ’a bigi sabana fu Sinai di ben e meki sma frede’, dan Yosua si fa Yehovah gi den Israelsma ala san den ben abi fanowdu. Nowan fu den dede fu angri noso fu di den no ben abi watra fu dringi (Deut. 8:3-5, 14-16; Yos. 24:5-7). Di a ten ben doro gi den Israelsma fu wini den makti Kanansma èn fu teki a Pramisi Kondre abra, dan Yosua si fa a Gado di en nanga den tra Israelsma ben e anbegi, horibaka gi den.—Yos. 10:14, 42.

6. Fa yu kan kon kisi na angri fu dini Gado?

⁶ Yosua ben sabi taki Yehovah ben du san a ben pramisi. Dati meki Yosua taki: „Mi nanga mi osofamiri, wi sa dini Yehovah” (Yos. 24:15). Fa a de nanga yu? Te yu e prakseri den pramisi fu Gado di kon tru kaba èn di musu kon tru ete, dan dati e meki yu angri fu dini en neleki Yosua?

7. Fu san ede a de wan tumusi prenspari sani te wan sma e teki dopu?

⁷ Te yu e denki dipi fu den tumusi moi sani di Yehovah meki, èn te yu e prakseri den tumusi moi pramisi fu en di sa kon tru seiker, dan dati musu gi yu deki-ati fu gi yusrefi abra na Yehovah èn fu teki dopu. Wan sma di wani dini Gado musu teki dopu, èn dati na wan tumusi prenspari sani. Yesus, na Eksempre fu wi, e tyari disi kon na krin. Syatu bifo a bigin dini leki a Mesias, a go na Yohanes a Dopuman fu teki dopu. Fu san ede Yesus ben du dati? Yesus ben taki bakaten: „Mi no saka komoto fu hemel fu du mi wani, ma fu du a wani fu en di seni mi kon” (Yoh. 6:38). Yesus teki dopu fu sori taki a ben gi ensrefi abra na en Tata fu du a wani fu en.—Mat. 3:13-17.

8. Fu san ede Timoteyus bosroiti fu dini Gado, èn san yu musu du tu?

⁸ Prakseri sosrefi a tori fu Timoteyus, wan yongu Kresten di Yehovah gi furu wroko nanga furu grani te fu kaba. Fu san ede Timoteyus bosroiti fu anbegi a tru Gado? Bijbel e taki dati ’a ben leri sani di a ben kon bribi fu di sma ben overtoigi en’ (2 Tim. 3:14). Efu yu studeri Gado Wortu èn efu yu kon bribi den tru leri fu Bijbel fu di sma overtoigi yu, dan yu de na ini a srefi situwâsi leki Timoteyus. Now yu musu teki wan bosroiti. Fu san ede yu no e fruteri yu papa nanga mama san yu wani du? Makandra nanga den gemeente owruman den kan yepi yu fu kon frustan sortu markitiki fu Bijbel yu musu doro fu man teki dopu.—Leisi Tori fu den Apostel 8:12.

9. Fa trawan sa feni en kande te yu e bosroiti fu teki dopu?

⁹ Efu yu teki dopu, dan disi sa de wan tumusi moi fasi fa yu kan bigin dini a tru Gado. Te yu teki a bosroiti disi, dan na wan agersi fasi yu e bigin nanga wan langa streilon di kan meki yu kisi têgo libi, èn yu sa de koloku fu di yu e du a wani fu Gado (Hebr. 12:2, 3). Yu famiriman di e teki prati kaba na a streilon disi èn sosrefi den mati fu yu na ini a Kresten gemeente, sa prisiri tu. Ma san moro prenspari, na taki yu sa meki na ati fu Yehovah prisiri. (Leisi Odo 23:15.) A no de fu taki dati trawan kande no sa frustan fu san ede yu teki a bosroiti fu anbegi Yehovah, èn kande den sa feni taki yu no teki  wan koni bosroiti. Den kan gens yu tu. Ma yu kan pasa den tesi disi.

Te sma e poti aksi gi yu noso te den e gens yu

10, 11. (a) Sortu sani sma kan aksi yu fu di yu bosroiti fu dini Gado? (b) San yu kan leri fu a fasi fa Yesus piki aksi di ben abi fu du nanga a tru anbegi?

¹⁰ A bosroiti di yu teki fu dini Yehovah kan fruwondru skoromati, birtisma, nanga famiriman. Kande den sa aksi yu fu san ede yu teki a bosroiti dati, èn kande den sa poti aksi gi yu di abi fu du nanga a bribi fu yu. San yu musu piki den? A no de fu taki dati yu musu sabi krin fosi fu san ede yu teki a bosroiti dati. Na so yu o man gi den wan bun piki. Èn te yu e piki den aksi di abi fu du nanga a bribi fu yu, dan a moro bun eksempre di yu kan teki, na a di fu Yesus, a no so?

¹¹ Di den Dyu kerki fesiman di no ben e bribi na ini na opobaka ben e poti aksi gi Yesus fu a tori dati, dan Yesus taki fu wan tekst di den no ben prakseri fu dati (Ex. 3:6; Mat. 22:23, 31-33). Di wan leriman fu Wet ben aksi Yesus san ben de a moro prenspari komando, dan Yesus kari spesrutu bijbeltekst fu tyari dati kon na krin. A man ben breiti taki Yesus ben piki na aksi fu en (Lef. 19:18; Deut. 6:5; Mark. 12:28-34). A fasi fa Yesus ben e gebroiki Bijbel, èn a fasi fa a ben e taki nanga sma, meki taki „den sma bigin meki trobi fu en ede”, èn den gensman fu en no ben man du en ogri (Yoh. 7:32-46). Te yu e piki aksi di abi fu du nanga a bribi fu yu, dan a bun fu gebroiki Bijbel èn fu gi sma piki „na wan safri fasi èn nanga bigi lespeki” (1 Petr. 3:15). Efu yu no man piki wan aksi, dan a bun fu taigi sma dati, èn pramisi den taki yu sa ondrosuku a tori dati. Bakaten, yu kan gebroiki na Index van Wachttoren-publicaties (Index nanga tori fu A Waktitoren), noso a Watchtower Library na tapu CD-ROM, efu a de fu kisi na ini a tongo fu yu. Te yu sreka yusrefi bun, dan yu sa ’sabi fa yu musu piki ibriwan sma’.—Kol. 4:6.

12. Fu san ede yu no musu lasi-ati te sma e frufolgu yu?

¹² Ma boiti taki sma sa aksi yu sani di abi fu du nanga a bosroiti di yu teki èn nanga a bribi fu yu, moro sani kan miti yu. Hori na prakseri taki Satan Didibri, a feanti fu Gado, e tiri grontapu. (Leisi 1 Yohanes 5:19.) A no ben o bun fu fruwakti taki ala sma o prèise yu, noso taki den sa agri nanga a bosroiti di yu teki. Boiti dati, sma kan gens yu tu. Kande son sma sa ’taki ogri fu yu’, èn kande den sa tan du dati wan heri pisi ten (1 Petr. 4:4). Ma hori na prakseri taki yu no de yu wawan. Yesus Krestes ben kisi frufolgu tu. A srefi sani disi ben miti na apostel Petrus, èn a ben skrifi: „Un lobiwan, no fruwondru fu a tesi di e kon na un tapu leki wan faya, neleki na wan freimde sani e pasa nanga unu. Na presi fu dati, un musu tan prisiri, fu di unu e pina tu neleki fa Krestes ben pina.”—1 Petr. 4:12, 13.

13. Fu san ede Kresten kan prisiri te den e kisi frufolgu?

¹³ Te sma e frufolgu yu èn e gens yu fu di yu na wan Kresten, dan dati na wan reide fu prisiri. Fu san ede? Fu di efu grontapu feni yu bun, dan dati wani taki dati yu no e libi soleki fa Gado wani, ma taki yu e libi soleki fa Satan wani. Yesus ben warskow: „Helu fu unu, te ala  sma e taki bun fu unu, bika na den srefi sani disi den afo fu den ben du nanga den falsi profeiti” (Luk. 6:26). Te yu e kisi frufolgu, dan dati wani taki dati Satan nanga a grontapu fu en e atibron nanga yu fu di yu e dini Yehovah. (Leisi Mateyus 5:11, 12.) Èn efu sma e ’kosi yu fu Krestes nen ede’, dan dati na wan sani di musu gi yu prisiri.—1 Petr. 4:14.

14. Sortu wini a e tyari kon te wan sma e tan getrow na Yehovah aladi a e kisi frufolgu?

¹⁴ Te yu e tan getrow na Yehovah aladi sma e frufolgu yu, dan dati e tyari fo wini kon. A fosiwan, na taki yu e gi kotoigi fu Gado nanga en Manpikin. Wan tra wini, na taki yu de wan deki-ati gi den Kresten brada nanga sisa fu yu, fu di yu e horidoro. Boiti dati, son sma di e luku yu èn di no sabi Yehovah, ben kan kisi deki-ati fu leri sabi en. (Leisi Filipisma 1:12-14.) Èn leki lasti, te yu e si fa Yehovah e gi yu a krakti fu horidoro na ondro tesi, dan a lobi di yu abi gi en sa kon moro tranga.

„Wan bigi doro” opo gi yu

15. Sortu „bigi doro” ben opo gi na apostel Paulus?

¹⁵ Luku san na apostel Paulus ben skrifi fu a diniwroko di a du na ini Efeise: „Wan bigi doro opo gi mi fu go wroko” (1 Kor. 16:8, 9). Na agersi fasi, a doro dati ben gi en okasi fu preiki a bun nyunsu gi bun furu sma èn fu meki disipel na ini a foto dati. Fu di Paulus pasa go na ini a doro dati, meki a ben man yepi furu sma fu kon leri sabi Yehovah èn fu tron anbegiman fu en.

16. Fa a salfu fikapisi pasa go na ini ’wan opo doro’ na ini 1919?

¹⁶ Na ini 1919 Yesus Krestes di ben kisi glori, ben „opo wan doro” gi a salfu fikapisi (Openb. 3:8). Den pasa go na ini a doro dati, iya, den bigin preiki a bun nyunsu èn den bigin leri sma den tru tori fu Bijbel fayafaya, moro leki iniwan ten bifo. San ben de a bakapisi fu a diniwroko fu den? Now a bun nyunsu preiki te na den farawe presi fu grontapu, èn sowan seibi milyun sma abi a howpu fu kisi têgo libi na ini a nyun grontapu fu Gado.

17. Fa yu kan pasa go na ini ’a bigi doro di e gi sma okasi fu go wroko’?

¹⁷ „Wan bigi doro opo” ete gi ala futuboi fu Yehovah, èn a doro disi e gi den okasi „fu go wroko”. Den wan di e teki na okasi dati e kisi prisiri èn den de koloku fu di den e du moro fu preiki a bun nyunsu. Unu yonguwan di e dini Yehovah, omeni warderi unu abi gi a tumusi moi grani di unu kisi fu yepi trawan fu „bribi a bun nyunsu”? (Mark. 1:14, 15) Yu prakseri fu dini leki gewoon pionier noso leki yepi pionier? Furu fu unu kan yepi tu fu bow Kownukondre zaal, unu kan go dini na Bethel, noso unu kan go dini leki zendeling. Fu di a ten e kon syatu gi na ogri grontapu fu Satan, meki a e kon moro prenspari ibri dei fu teki prati na wan fu den wroko disi, fu horibaka gi a Kownukondre. Yu sa pasa go na ini a „bigi doro” now di ten de ete?

„Tesi èn si taki Yehovah bun”

18, 19. (a) San meki taki David kisi a tranga winsi fu dini Yehovah? (b) Fa wi du sabi taki David noiti ben sari taki a ben dini Gado?

¹⁸ Nanga yepi fu a santa yeye, a psalm skrifiman ben gi sma deki-ati fu ’tesi èn fu si taki Yehovah bun’ (Ps. 34:8). Di Kownu David fu owruten Israel ben de wan yongu skapuman, dan Yehovah kibri en gi ogri meti di ben wani kiri en. Gado horibaka gi en di a ben e feti nanga Goliat, èn a puru en na ini furu tra muilek situwâsi (1 Sam. 17:32-51; Ps. 18:1, Da Bijbel na ini Sranantongo). Fu di Yehovah abi bigi bun ati, meki David ben skrifi: „Yusrefi du furu wondruwroko  gi wi, o Yehovah, mi Gado, èn yu e prakseri wi trutru; nowan sma de leki yu.”—Ps. 40:5.

¹⁹ A lobi di David ben abi gi Yehovah kon tranga srefisrefi, èn a ben wani prèise en nanga en heri ati èn nanga ala en frustan. (Leisi Psalm 40:8-10.) Na ini den yari baka dati, David noiti ben sari taki a ben gebroiki en libi fu anbegi a tru Gado. A moro prenspari sani gi en ben de fu dini Gado na wan getrow fasi, èn nowan tra sani ben kan gi en so furu prisiri. Di David kon owru, dan a taki: „Yu na mi howpu, o Yehovah, a Moro Hei Masra, yu na mi frutrow fu sensi mi yongu yari. Srefi teleki mi kon owru èn mi wiwiri kon weti, o Gado, no gowe libi mi” (Ps. 71:5, 18). Aladi a skin fu David ben kon swaki, toku a kisi moro frutrow na ini Yehovah èn a kon moro krosibei na En.

20. Fu san ede a moro bun sani di yu kan du nanga yu libi, na fu dini Gado?

²⁰ A libi fu Yosua, David, nanga Timoteyus e sori tu taki a moro bun sani di wi kan du nanga wi libi, na fu dini Yehovah. A no de fu taki dati te wi e suku fu meki en na ini a grontapu disi, dan dati e tyari wini kon fu wan syatu pisi ten. Ma dati na noti te yu e agersi dati nanga den wini di wi sa kisi fu wan langa pisi ten, te wi e ’dini Yehovah nanga wi heri ati èn nanga wi heri sili’ (Yos. 22:5). Efu yu no gi yusrefi abra ete na Yehovah, dan aksi yusrefi: ’San e tapu mi fu tron wan Kotoigi fu Yehovah?’ Efu yu na wan anbegiman fu Yehovah di dopu kaba, dan yu wani kisi moro prisiri na ini a libi? Efu dati de so, dan du moro na ini a diniwroko, èn tan go na fesi na ini a tru anbegi. Na artikel di e kon sa sori yu fa yu kan go na fesi na ini a tru anbegi te yu e teki na eksempre fu na apostel Paulus.

San yu ben sa piki?

• Kari tu reide fu san ede wi musu dini Gado.

• San yepi Timoteyus fu teki a bosroiti fu dini Gado?

• Fu san ede yu musu horidoro te yu e kisi frufolgu?

• Na sortu fasi yu kan du moro na ini a diniwroko gi Gado?

[Aksi fu a tori disi]

[Prenki na tapu bladzijde 18]

A moro bun sani di yu kan du nanga yu libi, na fu dini Yehovah

[Prenki na tapu bladzijde 19]

Yu kan piki aksi di abi fu du nanga a bribi fu yu?