Du muiti fu tan santa fu di yu abi frede gi Gado

BIJBEL e sori taki Yehovah Gado na a moro santa wan di de, fu di drape skrifi: „Yehovah . . . de santa, santa, santa” (Yes. 6:3; Openb. 4:8). A Hebrew wortu nanga a Griki wortu di vertaal nanga „santafasi”, abi fu du nanga sani di soifri noso sani di Gado feni bun na ini na anbegi fu en, èn a abi fu du nanga sani di poti aparti fu sani di no krin. A santafasi fu Gado abi fu du nanga a volmaakti fasi fa a e tyari ensrefi, èn a e si dati leki wan tumusi prenspari sani.

Yu no denki taki a santa Gado, Yehovah, e fruwakti fu ala sma di e anbegi en taki den santa? Yu no denki taki den anbegiman fu en musu de krin na skin sei, èn na a fasi fa den e tyari densrefi, so taki den tan krin na ini Yehovah ai? Bijbel e sori krin taki Yehovah wani taki a pipel fu en musu de santa. Na ini 1 Petrus 1:16 wi e leisi: „Un musu de santa, bika mi santa.” A de so trutru taki sondu libisma kan santa leki Yehovah? Iya, dati kan, ma den no man du dati na wan volmaakti fasi. Gado sa si wi leki santa sma te wi e anbegi en na a fasi di a feni bun èn te wi abi wan bun matifasi nanga en.

Ma fa wi kan tan krin na ini wan grontapu pe sma no e tyari densrefi na wan krin fasi? Gi sortu sani wi musu wai pasi? Sortu kenki wi musu tyari kon kande te a abi fu du nanga den sani di wi e taki èn a fasi fa wi e tyari wisrefi? Meki wi go luku san wi kan leri fu den sani di Gado ben fruwakti fu den Dyu di ben komoto fu Babilon èn di ben drai go baka na den kondre na ini a yari 537 bifo Krestes.

’Wan Pasi fu Santafasi sa kon de’

Yehovah ben taki na fesi dati a pipel fu en di ben de na ini katibo na ini Babilon, ben o drai go baka na a kondre fu den fu libi drape. A profeititori di ben abi fu du nanga a sani dati, ben gi a pipel a dyaranti disi: „Fu tru, wan bigi pasi sa kon drape, iya, wan pasi, èn den sa kari en a Pasi fu Santafasi” (Yes. 35:8a). Den wortu disi e sori taki Yehovah ben o opo a pasi gi den Dyu fu go baka na den kondre, ma boiti dati, a ben gi den a dyaranti tu taki a ben o kibri den te den ben o de na pasi.

Yehovah opo „a Pasi fu Santafasi” gi den disiten futuboi fu en na grontapu, fu di a tyari den komoto fu Babilon a Bigiwan, a grontapumakti fu falsi bribi. Na ini 1919, a frulusu den salfu Kresten fu falsi bribi, èn safrisafri den meki a bribi fu den kon krin fu di den puru ala falsi leri na ini. Leki anbegiman fu Yehovah na ini a ten disi, wi e prisiri fu anbegi Yehovah na wan krin fasi na ini vrede, aladi wi abi wan bun matifasi nanga en èn nanga tra sma.

Den memre fu a „pikin ipi” fu salfu Kresten nanga a „bigi ipi” fu den „tra skapu” di e kon bigi moro nanga moro, bosroiti fu tyari densrefi na wan santafasi èn den e gi tra sma a kari fu du dati tu (Luk. 12:32; Openb. 7:9; Yoh. 10:16). „A Pasi fu Santafasi” opo gi ala sma di wani „gi [den] skin na Gado leki wan srakti-ofrandi di e libi, di de santa èn di Gado feni bun”.—Rom. 12:1.

 „A wan di no krin no sa waka na en tapu”

Na ini a yari 537 bifo Krestes, den Dyu di ben komoto na ini katibo ben musu doro wan prenspari markitiki. Te a abi fu du nanga den sma di doro a markitiki fu waka na tapu „a Pasi fu Santafasi”, Yesaya 35:8b e taki: „A wan di no krin no sa waka na en tapu. Èn a sa de gi a sma di e waka na tapu a pasi, èn nowan don sma sa waka na en tapu.” Fu di den Dyu ben drai go baka na Yerusalem fu seti a tru anbegi kon bun baka, meki wan presi no ben o de gi sma di ben suku wini gi densrefi nomo, gi sma di no ben abi lespeki gi santa sani, noso gi sma di ben du sani di no krin. Den sma di ben drai go baka na Yerusalem ben musu hori densrefi na den hei markitiki fu Yehovah. Den sma di wani kisi a bun-ati fu Gado na ini a ten disi musu hori densrefi na a srefi markitiki dati. Den musu ’meki a frede di den abi gi Gado meki taki den kon santa’ (2 Kor. 7:1). Gi sortu sani di no krin wi musu wai pasi?

Na apostel Paulus ben skrifi: „Den sani di sondu libisma e du de krin fu si, èn den na hurudu, morsu libi, yayolibi” (Gal. 5:19). Hurudu abi fu du nanga ala den fasi fa wan sma e gebroiki en syenpresi fu abi seks nanga sma di no de en trowpatna. Yayolibi abi fu du nanga „sma di e libi wan morsu sekslibi; sma di gridi fu seks; sma di no abi syen; sma di e du fisti seks tori”. A de krin fu si taki hurudu nanga yayolibi na sani di no e kruderi kwetikweti nanga a santafasi fu Yehovah. Fu dati ede, den sma di e du den sortu sani disi no mag tron memre fu a Kresten gemeente, noso den e puru den sma disi fu a gemeente. A srefi e pasa nanga sma di e du kefalek morsu sani, èn disi abi fu du nanga sma di „gridi fu du wan lo morsu sani”.—Ef. 4:19.

„Morsu sani”, abi fu du nanga furu difrenti sondu di sma e du. A Griki wortu di vertaal nanga „morsu sani” abi fu du nanga iniwan sani di doti èn di no krin, soleki a fasi fa sma e tyari densrefi, den sani di sma e taki, èn a moksi di bribiman e moksi den anbegi nanga tra bribi. Disi abi fu du tu nanga morsu sani di wan sma e du, aladi a de wan pikin sani nomo, pe a no abi fu go kande na fesi wan krutu komte. * Ma a de so taki den sma di e du den sani disi di no krin, e meki muiti fu tyari densrefi na wan santa fasi?

Kon meki wi taki dati wan Kresten e bigin luku morsu seks prenki noso seks felem, èn a e du dati kibrikibri. Safrisafri a e kweki takru lostu di no krin, èn disi e meki taki a no abi a fasti bosroiti moro fu tan krin na fesi Yehovah. A kan taki a no go so fara ete taki a du wan seryusu sondu, ma a no e tan poti prakseri na ’ala sani di krin, ala sani di sma e taki bun fu den, ala sani di Gado feni bun èn ala sani di warti fu sma prèise den’ (Fil. 4:8). Seks prenki nanga seks felem na sani di no krin èn a no de fu taki dati den sani disi e pori a matifasi di wan sma abi nanga Gado. Wi no musu taki srefi fu nowan enkri sani di no krin.—Ef. 5:3.

Poti prakseri na wan tra eksempre. Kon meki wi taki dati wan Kresten kon teki en leki wan gwenti fu prei nanga en syenpresi soso fu kisi wan switi firi, èn kande a e luku seks prenki noso seks felem te a e du a sani disi. Aladi Bijbel no e taki fu a sani disi, toku wan sma no kan  tweifri taki so wan sani e doti en denki èn taki a e meki a abi firi di no krin, a no so? A no de so taki te wan sma e tan du a sani disi, a e pori a matifasi di a abi nanga Yehovah èn a e kon tron wan sma di no krin na ini Gado ai? Meki wi poti seryusu prakseri na a rai fu na apostel Paulus, di e taki dati wi musu „krin wisrefi fu ibri sani di kan doti wi skin nanga wi denki”, èn taki wi musu „kiri den firi di de na ini den pisi fu un skin na grontapu, èn di abi fu du nanga hurudu, morsu libi, seks lostu, takru lostu, nanga bigi-ai”.—2 Kor. 7:1; Kol. 3:5.

A grontapu disi di Satan e tiri no e si en leki wan ogri te sma e tyari densrefi na wan fasi di no krin èn den e gi sma deki-ati srefi fu tyari densrefi na a fasi dati. A kan muilek srefisrefi fu kakafutu gi a tesi fu tyari wisrefi na wan fasi di no krin. Ma tru Kresten no musu „libi moro leki den grontapusma di e denki sani di de fu soso” (Ef. 4:17). Soso te wi e luku bun fu no tyari wisrefi na wan fasi di no krin, awansi tra sma e si wi noso den no e si wi, Yehovah sa meki wi tan waka na tapu „a Pasi fu Santafasi”.

„Nowan lew sa de drape”

Fu man kisi a bun-ati fu a santa Gado, Yehovah, a kan de fanowdu taki son sma tyari bigi kenki kon na ini a fasi fa den e tyari densrefi èn na den sani di den e taki. Yesaya 35:9, e taki: „Nowan lew sa de drape, èn a krasi busimeti no sa kon na en tapu.” Iya, den no sa kon na tapu „a Pasi fu Santafasi”. Na wan agersifasi, sma di lobi du ogri èn di lobi taki ogri sani, de leki krasi busimeti. A no de fu taki dati den sma disi no sa abi wan presi na ini a nyun grontapu fu Gado pe retidu o de (Yes. 11:6; 65:25). Fu dati ede, a de tumusi prenspari taki sma di wani kisi a bun-ati fu Gado musu kenki den fasi di de leki den fasi fu busimeti, èn den musu du muiti fu tyari densrefi na wan santa fasi.

Bijbel e gi wi a rai fu „puru ala takru bita-ati nanga mandi nanga atibron nanga babari nanga kosikosi na [wi] mindri, èn sosrefi ala takrudu” (Ef. 4:31). Na ini Kolosesma 3:8, wi e leisi: „Un musu poti ala den sani disi na wan sei trutru, namku atibron, ogridu, nanga kosikosi, èn un no musu taki dotitaki moro.” A wortu „kosikosi” na ini den tu vers disi abi fu du nanga sani di sma e taki fu pori tra sma nen, fu lagi sma, noso fu taki ogri fu Gado.

Na ini a ten disi, a de wan aladei sani taki sma e taigi trawan hati sani, taki den e taki dotitaki, èn dati e pasa srefi na ini osofamiri. Trowpatna e taki grofu nanga makandra, den e taigi makandra hati sani, noso den e wisiwasi makandra, èn papa nanga mama e du dati tu te den e taki nanga den pikin. Den sma na ini Kresten osofamiri no musu taki na so wan fasi nanga makandra.—1 Kor. 5:11.

A de wan blesi trutru te wi e tan santa, fu di wi abi frede gi Gado

A de wan bigi grani fu dini a santa Gado, Yehovah! (Yos. 24:19) A paradijs na yeye fasi pe Yehovah tyari wi go na ini, na wan tumusi aparti sani. A no de fu taki dati a moro bun fasi fu libi na te wi e tyari wisrefi na wan santa fasi na ini na ai fu Yehovah.

Heri esi a pramisi fu Gado o kon tru, namku taki grontapu o tron wan Paradijs (Yes. 35:1, 2, 5-7). Den sma di e angri fu go na ini a Paradijs èn di e tan du muiti fu tyari densrefi soleki fa Gado wani, sa kisi a blesi fu de drape (Yes. 65:17, 21). Fu dati ede, meki wi tan tyari wisrefi na wan krin fasi na ini na anbegi fu Gado, èn meki wi tan abi wan bun matifasi nanga en.

[Futuwortu]

[Prenki na tapu bladzijde 26]

San den Dyu ben musu du fu tan waka na tapu „a Pasi fu Santafasi”?

[Prenki na tapu bladzijde 27]

Wan sma di e luku seks prenki nanga seks felem e pori a matifasi di a abi nanga Yehovah

[Prenki na tapu bladzijde 28]

„Puru ala . . . babari nanga kosikosi na un mindri”