Heri esi Gado Kownukondre o tyari frulusu kon!
Heri esi Gado Kownukondre o tyari frulusu kon!
„Meki yu kownukondre kon. Meki yu wani pasa na grontapu soleki fa a e pasa na hemel.”—MAT. 6:10.
1. San ben de a moro prenspari sani di Yesus ben leri sma?
DI YESUS KRESTES ben e hori a Bergitaki fu en, dan a gi den disipel fu en wan eksempre fa fu begi. A begi dati tyari kon na krin san na a moro prenspari sani di a ben leri sma. A ben leri den fu aksi Gado a sani disi te den ben e begi: „Meki yu kownukondre kon. Meki yu wani pasa na grontapu soleki fa a e pasa na hemel” (Mat. 6:9-13). Yesus ben „go na ala den foto nanga den dorpu fu preiki a bun nyunsu fu Gado kownukondre èn fu meki disi bekènti” (Luk. 8:1). Krestes ben gi den bakaman fu en a rai fu ’tan suku a kownukondre nanga Gado en regtfardikifasi fosi’ (Mat. 6:33). Te yu e studeri na artikel disi, dan a bun fu luku fa yu kan gebroiki den sani di yu leri na ini yu diniwroko. Fu eksempre, luku fa yu kan piki den aksi disi: O prenspari a Kownukondre boskopu de? Fu sortu sani libisma musu kisi frulusu? Èn fa a Kownukondre fu Gado o tyari frulusu kon?
2. O prenspari a Kownukondre boskopu de?
2 Yesus ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mat. 24:14). A bun nyunsu fu Gado Kownukondre prenspari srefisrefi. Fu taki en leti, a de a moro prenspari boskopu di wan sma ben kan tyari gi trawan! Na ini moro leki 100.000 gemeente fu Yehovah Kotoigi na heri grontapu, sowan seibi milyun futuboi fu Gado e teki prati na wan preikiwroko di noiti ete ben du na so wan fasi. Den e fruteri trawan taki a Kownukondre seti kaba. Disi na bun nyunsu, fu di dati e sori taki Gado seti wan tirimakti na hemel di o tiri heri grontapu. Te a Kownukondre dati o tiri, dan a wani fu Yehovah sa du na heri grontapu soleki fa dati e pasa na hemel.
3, 4. San o de a bakapisi te a wani fu Gado e du na grontapu?
3 San o pasa nanga libisma te a wani fu Gado e du na heri grontapu? Yehovah o „figi ala watra puru na den ai, èn dede no sa de moro; nowan sari, noso krei, noso pen no sa de moro” (Openb. 21:4). Sma no sa kon siki moro, èn den no sa dede moro leki bakapisi fu a sondu di den ben kisi fu Adam. Den dedewan di de na ini Gado en prakseri sa kisi na okasi fu libi fu têgo, fu di Bijbel e pramisi: „Gado sa gi wan opobaka na den regtfardikiwan èn na den onregtfardikiwan” (Tori. 24:15). Orloku, siki, nanga angriten no sa de moro, èn grontapu sa kon tron wan paradijs. Srefi ogri meti no o du ogri moro nanga libisma noso nanga tra meti.—Ps. 46:9; 72:16; Yes. 11:6-9; 33:24; Luk. 23:43.
4 Fu di a Kownukondre o tyari den tumusi moi blesi disi kon, meki a no e fruwondru wi taki wi e kisi trowstu te wi e luku den sani di Bijbel profeititori e taki fu a libi na ini a ten dati. Wan fu den profeititori dati e taki: „Den safri-atisma srefi sa abi grontapu leki a gudu fu den, èn den sa prisiri srefisrefi fu di vrede sa de pasa marki.” Ma fa a de nanga den wan di e tyari problema kon? Bijbel e taki: „Ete wan syatu pisi ten èn na ogrisma no sa de moro.” Ma „den wan di e howpu tapu Yehovah na den wan di sa abi grontapu leki a gudu fu den”.—Ps. 37:9-11.
5. San o pasa nanga a sistema disi?
5 Fosi ala den sani disi kan pasa, wan kaba sa musu kon na a sistema disi nanga ala den tirimakti, den kerki, èn den bisnis fu en di e strei nanga makandra. Èn dati na soifri san a hemel tirimakti o du. Disi na san a profeiti Danièl taki nanga yepi fu santa yeye: „Na ini den dei fu den kownu dati [di e tiri now], a Gado fu hemel sa opo wan kownukondre [na hemel] di noiti no sa kisi pori. Èn a kownukondre srefi no sa gi na nowan tra pipel. A sa broko ala den kownukondre disi na pisipisi èn a sa tyari wan kaba kon na den, èn ensrefi sa tan te ten di no skotu” (Dan. 2:44). Na a ten dati, Gado Kownukondre, namku wan nyun tirimakti na hemel, sa tiri a nyun libimakandra na grontapu. Iya, ’nyun hemel nanga wan nyun grontapu sa de, èn drape regtfardikifasi o tan’.—2 Petr. 3:13.
A de tranga fanowdu now taki wi e kisi frulusu
6. San Bijbel e taki fu na ogri di sma e du na grontapu?
6 Satan, Adam, nanga Eva, opo densrefi teige Gado fu di den ben wani bosroiti gi densrefi san bun èn san no bun. A sani disi tyari furu problema kon gi libisma. Moro leki 1600 yari baka dati, na a pisi ten fosi a bigi Frudu pasa na grontapu, dan ’libisma ben e du bun furu ogri sani na grontapu èn doronomo den ben e prakseri soso ogri’ (Gen. 6:5). Sowan 1300 yari baka dati, Salomo kon si taki a situwâsi na grontapu ben takru so te, taki a skrifi: „Mi fristeri den sma di dede kaba, na presi fu fristeri den wan di ben de na libi ete. Sobun, a moro bunwan fu den tu, na a wan di no kon de ete, èn di no si den ogri di sma e du na ondro a son” (Preik. 4:2, 3). Now, sowan 3000 yari baka dati, moro nanga moro sma e du ogri na grontapu.
7. Fu san ede a de tranga fanowdu now taki Gado tyari frulusu kon?
7 Aladi sma e du ogri langa ten kaba na grontapu, toku now a de tranga fanowdu moro leki iniwan ten bifo, taki Gado Kownukondre tyari frulusu kon. Na ini den 100 yari di pasa, a situwâsi na grontapu ben ogri moro leki iniwan ten bifo, èn a e kon moro ogri srefi. Fu eksempre, wan organisâsi ben skrifi: „A nomru fu sma di dede na ini orloku na ini a di fu 20 yarihondro, na dri tron so furu leki a nomru fu sma di dede na ini ala den orloku di feti fu a fosi yarihondro te go miti 1899” (Worldwatch Institute). Sensi 1914, moro leki 100 milyun sma dede na ini orloku! Wan buku e taki dati sowan 60 milyun sma dede na ini a di fu Tu Grontapufeti. Fu di son kondre abi ogri-ati fetisani, meki den man kiri ipi-ipi sma wantronso. Èn aladi sabiman kon sabi nyun sani èn den kon feni nyun fasi fa fu dresi siki, toku sowan feifi milyun pikin-nengre e dede ibri yari fu angribere.—Luku kapitel 9 fu a buku San Bijbel e leri wi trutru?
8. San kon na krin na ini den dusundusun yari di libisma tiri densrefi?
8 Libisma no man tyari wan kaba kon na ogridu. Den tirimakti, den bisnis, nanga den kerki fu a grontapu disi noiti no ben man gi sma den moro prenspari sani di den abi fanowdu, èn dati na sani soleki vrede, wan bun libi, èn wan bun gosontu. Politiek, bisnis, nanga kerki trutru no lusu den bigi problema di libisma abi, ma na presi fu dati den sorgu taki den problema disi kon moro bigi. A no de fu taki dati na ini den dusundusun yari di libisma tiri densrefi, a kon na krin taki a profeiti ben abi leti di a taki: „A no de na libisma fu luku gi ensrefi sortu pasi a wani teki. A no de na wan libisma di e waka srefi fu taki pe a wani poti en futu” (Yer. 10:23). Iya, „a wan libisma tiri a trawan na wan fasi di e tyari takru bakapisi gi en” (Preik. 8:9). Boiti dati, ’ala den sani di Gado meki, e tan geme èn den alamala abi pen’.—Rom. 8:22.
9. Sortu situwâsi tru Kresten e fruwakti na ini den „lasti dei” disi?
9 Luku san Bijbel e taki fu a ten fu wi: „Na ini den lasti dei muilek ten o de di tranga fu pasa.” Baka te a profeititori taki fa a situwâsi o de na ini den lasti dei na ondro a tiri fu libisma, dan a e taki: „Ogri sma nanga bedrigiman o kon ogri moro nanga moro.” (Leisi 2 Timoteyus 3:1-5, 13.) Na a situwâsi dati Kresten e fruwakti, fu di „heri grontapu de na ini a makti fu na ogriwan”, Satan (1 Yoh. 5:19). Ma heri esi, Gado sa frulusu den wan di lobi en, èn dati na bun nyunsu trutru. Gado sa frulusu den fu a grontapu disi di e kon moro ogri dei fu dei.
A wan-enkri Sma di man frulusu wi trutru
10. Fu san ede Yehovah na a wan-enkri Sma di man frulusu wi?
10 Te yu e preiki a bun nyunsu gi sma, dan a bun fu sori den taki Yehovah na a wan-enkri Sma di man frulusu wi trutru. En wawan abi a makti nanga a winsi fu puru den futuboi fu en na ini ibri sortu takru situwâsi (Tori. 4:24, 31; Openb. 4:11). Wi kan abi a dyaranti taki ala ten Yehovah sa frulusu a pipel fu en èn taki a sa du san a abi na prakseri, fu di a ben sweri: „Fu tru, neleki fa mi ben abi na prakseri, na so a musu pasa.” A wortu fu en „no sa drai kon baka na [en] sondro fu du wan sani”.—Leisi Yesaya 14:24, 25; 55:10, 11.
11, 12. Sortu dyaranti Gado e gi den futuboi fu en?
11 Yehovah gi den futuboi fu en a dyaranti taki a sa frulusu den te a o strafu den ogrisma. Luku san Gado ben taigi a profeiti Yeremia di a ben seni en fu tyari wan seryusu warskow gi sma di ben du bigi sondu. Gado ben taki: ’No frede.’ Fu san ede Yeremia no ben musu frede? Fu di Gado ben taigi en: „Mi de nanga yu fu frulusu yu” (Yer. 1:8). Na so a ben de tu taki, di Yehovah ben o pori den ogri foto Sodom nanga Gomora, dan a seni tu engel fu tyari Lot nanga en osofamiri komoto na ini a kontren dati, sondro taki ogri miti den. „Ne Yehovah meki faya nanga ston di ben e bron . . . fadon kon na tapu Sodom nanga Gomora.”—Gen. 19:15, 24, 25.
12 Yehovah man frulusu den wan di e du a wani fu en, srefi te a o pori heri grontapu. Di a pori den ogrisma nanga yepi fu a Frudu, dan a „kibri Noa, wan preikiman fu regtfardikifasi, makandra nanga seibi tra sma” (2 Petr. 2:5). Yehovah sa frulusu opregtisma baka, te a o pori na ogri grontapu disi. Fu dati ede, a Wortu fu en e taki: „Suku Yehovah, ala un safri-atisma fu grontapu . . . Suku regtfardikifasi, suku safri-atifasi. Kande unu sa kisi kibri na a dei fu Yehovah en atibron” (Sef. 2:3). Te a grontapu disi kisi pori, dan ’den reti-ati sma na den wan di sa libi na grontapu, ma Gado sa figi den ogrisma puru fu grontapu’.—Odo 2:21, 22.
13. Fa Yehovah o frulusu den futuboi fu en di dede?
13 Ma furu fu den futuboi fu Gado dede leki bakapisi fu siki, frufolgu, noso tra sani (Mat. 24:9). Fa den sma dati o kisi frulusu dan? Soleki fa wi ben si kaba, dan „Gado sa gi wan opobaka na den regtfardikiwan” (Tori. 24:15). A e gi trowstu trutru fu sabi taki noti kan tapu Yehovah fu frulusu den futuboi fu en!
Wan regtfardiki tirimakti
14. Fu san ede wi kan abi a dyaranti taki a Kownukondre fu Gado na wan regtfardiki tirimakti?
14 Te yu de na ini a preikiwroko, yu kan sori sma taki a hemel Kownukondre fu Yehovah na wan regtfardiki tirimakti. Disi de so fu di a Kownukondre dati e tyari den tumusi moi fasi fu Gado kon na krin, èn wan tu fu den fasi disi na retidu, regtfardikifasi, nanga lobi (Deut. 32:4; 1 Yoh. 4:8). Gado poti Yesus Krestes leki Kownu fu a Kownukondre, fu di en na a moro bun sma di man tiri grontapu. Yehovah seti sani tu so taki 144.000 salfu Kresten na grontapu sa go libi na hemel fu tiri grontapu makandra nanga Krestes.—Openb. 14:1-5.
15. Sori fu san ede a Kownukondre fu Gado e tiri heri tra fasi leki libisma tirimakti.
15 A no de fu taki dati Yesus nanga den 144.000 salfu brada fu en sa tiri heri tra fasi leki sondu libisma! Nofo tron, den tiriman fu a sistema disi du ogri-ati sani èn den meki den kondreman fu den go feti na ini orloku. Disi ben abi leki bakapisi taki milyunmilyun sma lasi den libi. Fu dati ede, a no e fruwondru wi taki Bijbel e gi wi a rai fu no poti frutrow tapu libisma ’di no man frulusu wi’! (Ps. 146:3) Ma a no de fu taki dati Krestes o tiri na wan lobi-ati fasi! Yesus ben taki: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti.”—Mat. 11:28-30.
Heri esi den lasti dei o kon na wan kaba!
16. Fa den lasti dei disi o kon na wan kaba?
16 Sensi 1914, wi e libi na ini den lasti dei fu a grontapu disi, noso na ini „a kaba fu a grontapu sistema disi” (Mat. 24:3). A pisi ten di Yesus ben kari a „bigi banawtu”, o bigin heri esi. (Leisi Mateyus 24:21.) A banawtu dati di noiti ete ben de na grontapu, sa tyari wan kaba kon na a heri grontapu sistema fu Satan. Ma fa a bigi banawtu o bigin? Èn fa a o kon na wan kaba?
17. Fa a bigi banawtu o bigin, soleki fa Bijbel e sori?
17 A bigi banawtu o bigin wantronso. Iya, „a dei fu Yehovah” sa kon sondro taki sma fruwakti dati, èn dati o pasa „te den e taki: ’Vrede de èn ala sani e waka bun!’” (Leisi 1 Tesalonikasma 5:2, 3.) A banawtu di Yesus ben taki fu dati, sa bigin te den kondre fu grontapu e denki taki a no o teki langa moro fosi den lusu wan tu fu den bigi problema fu den. Te „Babilon a Bigiwan”, a grontapumakti fu falsi bribi, o kisi pori wantronso, dan heri grontapu sa skreki. Den kownu fu grontapu èn tra sma sosrefi, sa fruwondru te Babilon a Bigiwan o kisi pori.—Openb. 17:1-6, 18; 18:9, 10, 15, 16, 19.
18. San Yehovah o du te Satan o kon feti nanga a pipel fu En?
18 Na a prenspari pisi ten dati, „marki o de fu si na a son, a mun nanga den stari” èn „a marki fu a Manpikin fu libisma o kon de fu si na hemel”. Na a ten dati, wi o man ’opo tanapu leti-opo, bika a frulusu fu wi de krosibei’ (Luk. 21:25-28; Mat. 24:29, 30). Satan, noso Gog, sa meki den legre fu en go feti nanga a pipel fu Gado. Ma luku san Yehovah e taki fu den wan di e feti nanga den getrow futuboi fu en: „A sma di e fasi unu, e fasi a popki fu mi ai” (Sak. 2:8). Fu dati ede, te Satan o pruberi fu pori den futuboi fu Gado, dan a no sa abi bun bakapisi. Fu san ede? Fu di Yehovah, a Moro Hei Masra, sa handri wantewante fu frulusu den futuboi fu en.—Esek. 38:9, 18.
19. Fu san ede wi kan abi a frutrow taki den legre fu Gado o pori a sistema fu Satan?
19 Te Gado o strafu den grontapusma, dan ’den o sabi taki en na Yehovah’ (Esek. 36:23). A sa seni den legre fu en, namku den milyunmilyun engel di abi Krestes Yesus leki fesiman, fu pori san tan abra fu a grontapu sistema fu Satan (Openb. 19:11-19). Na wán okasi, wán engel nomo ben „kiri wán hondro aiti-tenti na feifi dusun” feanti fu Gado na ini wán neti. Te wi e hori a sani dati na prakseri, dan wi kan abi a frutrow taki a no sa muilek gi den engel fu Gado fu pori a grontapu sistema fu Satan dorodoro te a bigi banawtu e doro en heimarki na ini Armagedon (2 Kow. 19:35; Openb. 16:14, 16). Satan nanga den ogri yeye fu en sa fringi go na ini wan dipi peti pe den sa tan wan dusun yari langa. Te fu kaba, den sa kisi pori.—Openb. 20:1-3.
20. San Yehovah o du nanga yepi fu a Kownukondre?
20 Na so ogridu sa kon na wan kaba na grontapu, èn regtfardiki libisma sa libi fu têgo na grontapu. Den sani dati sa buweisi taki Yehovah na a Bigi Frulusuman (Ps. 145:20). Nanga yepi fu a Kownukondre, a sa sori taki na en abi a reti fu tiri hemel nanga grontapu. Boiti dati, a sa krin en nen èn a sa santa en, èn a sa du den bigi sani di a abi na prakseri gi grontapu. Meki a de so taki yu e abi prisiri na ini a diniwroko fu yu aladi yu e meki a bun nyunsu disi bekènti èn e yepi den wan di „abi a yoisti denki fu man kisi têgo libi”, fu kon frustan taki heri esi Gado Kownukondre o tyari frulusu kon!—Tori. 13:48.
Yu e memre disi ete?
• Fa Yesus tyari kon na krin o prenspari a Kownukondre de?
• Fu san ede a de tranga fanowdu now taki wi kisi frulusu?
• Sortu sani wi kan fruwakti na a ten fu a bigi banawtu?
• Fa Yehovah e sori taki en na a Bigi Frulusuman?
[Aksi fu a tori disi]
[Prenki na tapu bladzijde 12, 13]
Gado Wortu ben taki dati na ini a ten fu wi, wan preikiwroko ben o du na heri grontapu di noiti ete ben du na so wan fasi
[Prenki na tapu bladzijde 15]
Yehovah ben frulusu Noa nanga en osofamiri, èn A kan frulusu wi tu
[Prenki na tapu bladzijde 16]
Yehovah „o figi ala watra puru na den ai, èn dede no sa de moro”.—Openb. 21:4