Aksi fu leisiman

Na apostel Paulus ben taki dati ’heri Israel ben o kisi frulusu’ (Rom. 11:26). A de so taki Paulus ben wani taki nanga den wortu disi dati ala Dyu ben o teki a Kresten bribi te fu kaba?

Nôno, a no dati Paulus ben taki. Leki pipel, den bakapikin fu Abraham no ben teki Yesus leki a Mesias. Na ini den yari baka a dede fu Yesus, a kon na krin taki leki pipel, den Dyu no ben o teki a Kresten bribi. Ma toku, di Paulus taki dati ’heri Israel ben o kisi frulusu’, dan a sani dati pasa trutru. Na sortu fasi?

Yesus ben taigi den kerki fesiman na ini a ten fu en: „Den sa puru a kownukondre fu Gado na un anu èn den sa gi en na wan pipel di e meki den froktu fu a kownukondre” (Mat. 21:43). Fu di leki pipel, den Israelsma no ben teki Yesus leki a Mesias, meki Yehovah ben o poti prakseri na wan nyun pipel, namku wan pipel di salfu nanga a yeye fu En. Paulus ben kari a pipel disi „na Israel fu Gado”.—Gal. 6:16.

Tra tekst na ini den Kresten Griki Buku fu Bijbel, e sori taki na ini „na Israel fu Gado” yu abi 144.000 Kresten di salfu nanga santa yeye (Rom. 8:15-17; Openb. 7:4). Openbaring 5:9, 10 e sori taki na ini a grupu disi yu ben o abi sma tu di no de Dyu, fu di a tekst disi e taki dati den salfu Kresten komoto „fu ibri lo, tongo, pipel, nanga kondre”. Gado ben teki den memre fu na Israel disi, spesrutu fu tron ’wan kownukondre nanga priester’ èn fu „tiri grontapu leki kownu”. Aladi Yehovah no ben si den Israelsma moro leki a spesrutu pipel fu en, toku a ben o feni son sma fu a pipel dati bun. Na so a ben de nanga den apostel èn furu tra Kresten fu a fosi yarihondro. A no de fu taki dati neleki ala tra sma, Gado ben bai den Dyu disi nanga a brudu fu Yesus Krestes, so taki den ben kan kisi frulusu.—1 Tim. 2:5, 6; Hebr. 2:9; 1 Petr. 1:17-19.

Aladi moro furu fu den Dyu fu a fosi yarihondro lasi na okasi fu tiri makandra nanga Yesus, toku dati no tapu Gado fu meki den sani di a abi na prakseri kon tru. Noti no man tapu Yehovah fu du san a abi na prakseri, fu di a taki nanga yepi fu en profeiti: „Na so a sa de tu nanga a wortu di e komoto na mi mofo. A no sa drai kon baka na mi sondro fu du wan sani, ma seiker a sa du a sani di mi wani, èn trutru a sa du a sani di mi seni en fu go du.”—Yes. 55:11.

Disi de so tu nanga a prakseri di Gado abi fu poti 144.000 sma fu tiri makandra nanga en Manpikin na hemel. Bijbel e sori krin taki Gado ben o salfu ala nanga ala 144.000 sma. Nowan fu den ben o misi na ini a grupu dati!—Openb. 14:1-5.

Sobun, di Paulus skrifi taki ’heri Israel ben o kisi frulusu’, dan a no ben taki dati ala den Dyu ben o teki a Kresten bribi. Na presi fu dati, a ben wani sori taki san Gado abi na prakseri ben o kon tru, namku taki 144.000 sma fu na Israel fu Gado ben o tiri makandra nanga En Manpikin, Yesus Krestes, na hemel. Na a ten di Gado feni bun, ala den sma fu na Israel fu Gado, noso „heri Israel”, o kisi frulusu, èn te fu kaba den o tiri leki kownu nanga priester na ini a Mesias Kownukondre.—Ef. 2:8.

[Prenki na tapu bladzijde 28]

Den salfuwan e komoto „fu ibri lo, tongo, pipel, nanga kondre”