Den fasi di wi musu kweki
Den fasi di wi musu kweki
„Du muiti fu de regtfardiki, fu dini Gado na wan getrow fasi, fu abi bribi, fu sori lobi, fu horidoro, èn fu abi safri-ati.”—1 TIM. 6:11.
1. Baka sortu sani sma e feti?
BAKA sortu sani sma fu a ten disi e feti? Soleki fa Bijbel e sori, dan furu sma e feti baka soso sani. Son sma e „feti baka sani di no warti notinoti”, fu di den e bribi taki den sa de koloku te den abi gudu (Odo 28:19). Son sma „e feti fu libi wan yayolibi” fu di den e libi soso fu meki prisiri (Psalm 119:150). A tru taki son sma e du ala san den man fu kon abi den sani disi, ma fu taki en leti, den sma disi „e feti fu kisi a winti”.—Preik. 1:14.
2. (a) Sortu marki Gado wani son Kresten fu doro? (b) Sortu howpu Yehovah e gi furu Kresten na ini a ten disi?
2 Ma tra fasi leki den eksempre di kari na ini a fosi paragraaf, Paulus ben e suku fu doro bun marki. Luku san a ben taki: „Mi e du muiti fu doro a marki, so taki mi kan wini a prijs, namku a kari di Gado gi mi fu go na hemel nanga yepi fu Krestes Yesus” (Fil. 3:14). Bijbel e sori taki 144.000 salfu Kresten e kisi a prijs dati, namku, libi na hemel, èn Paulus na wan fu den salfu Kresten disi. Den sa tiri grontapu makandra nanga Yesus Krestes na ini a Dusun Yari Tiri fu en. Dati na wan tumusi moi grani di den Kresten disi e kisi fu Gado! Fu dati ede den e kisi deki-ati fu du muiti fu doro a marki dati. Ma na ini a ten disi, furu tru Kresten e suku fu doro wan tra marki. Na wan lobi-ati fasi, Yehovah e gi den okasi fu kon abi san Adam nanga Eva lasi, namku a howpu fu libi fu têgo leki volmaakti sma na ini wan paradijs na grontapu.—Openb. 7:4, 9; 21:1-4.
3. Fa wi kan sori warderi gi a bun-ati fu Gado?
Yes. 64:6). A wan-enkri fasi fa wan sma kan kisi têgo libi, na te a e poti bribi na ini den sani di Gado seti na wan lobi-ati fasi nanga yepi fu Yesus Krestes. San wi kan du fu sori taki wi abi warderi gi a bun-ati disi di Gado sori wi? Wan sani di wi kan du, na fu gi yesi na a komando disi: „Du muiti fu de regtfardiki, fu dini Gado na wan getrow fasi, fu abi bribi, fu sori lobi, fu horidoro, èn fu abi safri-ati” (1 Tim. 6:11). Te wi e poti prakseri na den fasi disi, dan dati sa yepi ibriwan fu wi fu abi a fasti bosroiti fu tan du muiti fu kweki den fasi disi „nanga moro faya”.—1 Tes. 4:1.
3 Sondu libisma no e frudini en fu kisi têgo libi, awansi den e meki muiti fu du san reti („Du muiti fu de regtfardiki”
4. Fu san ede wi kan bribi taki a de prenspari fu du muiti fu „de regtfardiki”, èn san na den fosi sani di wan sma musu du fu doro a marki dati?
4 Na ini ala den tu brifi di na apostel Paulus ben skrifi gi Timoteyus, a ben taki fu den fasi di wi musu du muiti fu kweki, èn ibri tron a kari „regtfardikifasi” fosi (1 Tim. 6:11; 2 Tim. 2:22). Boiti dati, na ini tra pisi fu Bijbel wi e kisi deki-ati doronomo fu du muiti fu de regtfardiki (Odo 15:9; 21:21; Yes. 51:1). A fosi sani di wi kan du, na fu „tan leri sabi . . . a wan-enkri tru Gado, èn a sma di a seni kon, Yesus Krestes” (Yoh. 17:3). Wan sma di e du muiti fu de regtfardiki, sa handri, iya, a sa sori berow gi den sondu di a du èn a sa ’drai en libi’ fu man du a wani fu Gado.—Tori. 3:19.
5. San wi musu du so taki Gado kan si wi leki regtfardikisma, èn fa wi kan sorgu taki a e tan si wi na a fasi dati?
5 Milyunmilyun sma di e du trutru muiti fu de regtfardiki, teki dopu na ini watra fu sori taki den gi den libi abra na Gado. Efu yu na wan dopu Kresten now, dan a no de fu taki dati yu e hori na prakseri taki a fasi fa yu e libi musu tyari kon na krin taki yu e du muiti doronomo fu de regtfardiki, a no so? Wan fasi fa yu e sori dati, na taki te yu e teki prenspari bosroiti na ini yu libi, dan yu e pruberi fu kon sabi san „bun èn san ogri” soleki fa Bijbel e tyari dati kon na krin. (Leisi Hebrewsma 5:14.) Fu eksempre, efu yu na wan Kresten di owru nofo fu trow, dan yu abi a fasti bosroiti fu no hori nanga wan sma di no de wan dopu Kresten? Efu yu e du muiti fu de regtfardiki, dan yu sa abi a fasti bosroiti dati.—1 Kor. 7:39.
6. O ten wi kan taki dati wan sma e du trutru muiti fu de regtfardiki?
6 Ma wan sma di de regtfardiki no e denki taki a bun moro trawan, èn a no de „tumusi regtfardiki”. Yesus ben warskow den Kresten di ben e du neleki den regtfardiki, soso fu meki sma denki taki den ben bun moro trawan (Mat. 6:1). Te wan sma e du trutru muiti fu de regtfardiki, dan a sma dati sa du muiti fu kon abi wan krin ati. Iya, a sma dati sa kenki takru denki nanga takru fasi, a sa du muiti fu de opregti, èn a sa basi den takru lostu fu en. Te wi e tan du muiti fu du den sani disi, dan a no o pasa makriki taki wi e du seryusu sondu. (Leisi Odo 4:23; luku Yakobus 1:14, 15.) Boiti dati, Yehovah sa blesi wi èn a sa yepi wi fu kweki tra prenspari fasi di Kresten musu abi.
„Du muiti . . . fu dini Gado na wan getrow fasi”
7. San a wani taki fu „dini Gado na wan getrow fasi”?
7 Wan sma di de getrow na wan trawan e horibaka fayafaya gi a sma dati. Wan Bijbel wortubuku e taki dati a Griki wortu di vertaal nanga „dini Gado na wan getrow fasi”, abi fu du nanga „a muiti di wan sma e du fu no lasi a frede di a abi gi Gado”. Nofo tron den Israelsma no ben e dini Gado na so wan fasi, èn wi kan si dati krin te wi e luku a fasi fa den trangayesi Gado, srefi baka di a puru den na ini katibo na Egepte.
8. (a) Sortu aksi opo kon di Adam sondu? (b) Fa Gado tyari a „santa kibritori” disi kon na krin?
8 Na ini den dusundusun yari baka di a volmaakti man Adam sondu, wan spesrutu aksi no ben kisi piki ete, namku, „Wan libisma kan de getrow na Gado na wan volmaakti fasi?” Na ini den hondrohondro yari di pasa, nowan-enkri sondu libisma ben man de getrow na Gado na wan volmaakti fasi. Ma na a reti ten, Yehovah tyari a „santa kibritori” disi kon na krin. A poti a libi fu en wan-enkri hemel Manpikin abra na ini a bere fu Maria, so taki a ben kan gebore leki wan volmaakti libisma. Nanga yepi fu a libi fu en na grontapu, èn nanga yepi fu a syen fasi fa a dede, Yesus sori san a wani taki fu horibaka fayafaya gi a tru Gado èn fu de getrow na en dorodoro. Den begi fu en ben e sori taki a ben abi bigi lespeki gi en lobi-ati hemel Tata (Mat. 11:25; Yoh. 12:27, 28). Sobun, Yehovah meki Paulus tyari kon na krin taki a libi fu Yesus na wan eksempre gi wi fu di a ben e „dini Gado na wan getrow fasi”.—Leisi 1 Timoteyus 3:16.
9. Fa wi kan du muiti fu dini Gado na wan getrow fasi?
9 Wi leki sondusma no man de getrow na Gado na wan volmaakti fasi. Ma wi kan du muiti fu doro a marki dati. Fu man doro a marki dati, wi sa musu waka soifri baka Krestes (1 Petr. 2:21). Na so fasi wi no sa de leki den hoigriman di ’e du neleki den e dini Gado na wan getrow fasi, aladi a libi fu den e sori taki dati no de so’ (2 Tim. 3:5). Disi no wani taki dati wan sma di e dini Gado na wan getrow fasi no abi fu broko en ede nanga den krosi di a e weri, noso nanga a fasi fa a e moi ensrefi. Dati no de so kwetikweti. Fu eksempre, te wi e bosroiti sortu trow-yapon wi o bai, noso san wi o weri te wi e go na strati fu go bai sani, dan den krosi di wi e weri musu sori taki wi ’e anbegi Gado’ trutru (1 Tim. 2:9, 10). Iya, te wi e du muiti fu dini Gado na wan getrow fasi, dan wi musu hori wisrefi na den regtfardiki markitiki fu en ibri dei.
„Du muiti fu . . . abi bribi”
10. San wi musu du fu sorgu taki wi e tan abi wan tranga bribi?
10 Leisi Romesma 10:17. Fu man abi wan tranga bribi, èn fu man tan abi a bribi dati, dan wan Kresten musu tan denki dipi fu den warti tru tori di skrifi na ini Gado Wortu. „A getrow èn koni srafu” tyari furu moi publikâsi kon na doro. Tu heri moi buku na A moro bigi man di oiti ben libi èn Teki leri fu a Bigi Leriman. Den buku disi skrifi fu yepi wi fu kon sabi Krestes moro bun, so taki wi kan teki na eksempre fu en (Mat. 24:45-47). A srafu grupu seti sosrefi gemeente konmakandra nanga bigi konmakandra, èn furu fu den konmakandra dati e poti prakseri na ’den sani fu Krestes’. Yu e poti ’moro prakseri leki san yu gwenti’ na den sani di Gado e gi wi, so taki yu kan kisi moro wini fu den konmakandra disi?—Hebr. 2:1.
11. Fu san ede a de prenspari fu begi Gado èn fu gi yesi na en te wi e du muiti fu abi bribi?
Luk. 17:5). Fu man abi moro bribi, wi musu begi Gado fu yepi wi nanga en santa yeye, fu di bribi na wan fu den „froktu fu a yeye” (Gal. 5:22). Ete wan sani di kan yepi wi fu kisi wan tranga bribi, na te wi e gi yesi na den komando fu Gado. Fu eksempre, wi kan du muiti fu du moro na ini a preikiwroko. A no de fu taki dati wi sa de koloku trutru te wi e du dati. Èn te wi e prakseri den blesi di wi e kisi fu di wi e „suku a kownukondre nanga [Gado] en regtfardikifasi fosi”, dan a bribi fu wi sa kon moro tranga.—Mat. 6:33.
11 Wan tra sani di kan yepi wi fu kon abi wan tranga bribi, na te wi e begi Gado. Wan leisi, den bakaman fu Yesus ben begi en: „Gi wi moro bribi.” Wi kan begi Gado nanga sakafasi fu gi wi bribi tu („Du muiti . . . fu sori lobi”
12, 13. (a) San na a nyun komando di Yesus ben gi? (b) Na sortu prenspari fasi wi musu du muiti fu sori lobi neleki Krestes?
12 Leisi 1 Timoteyus 5:1, 2. Paulus ben gi Kresten bun rai fu leri den fa den kan sori lobi gi makandra. Te wi e dini Gado na wan getrow fasi, dan wi musu gi yesi tu na a nyun komando di Yesus ben gi den bakaman fu en. A ben taki dati wi musu „lobi makandra” soleki fa a ben lobi wi (1 Yoh. 13:34). Na apostel Yohanes ben taki: „Efu wan sma abi grontapu gudu èn a e si taki en brada de na nowtu, ma a no wani abi sari-ati gi en, dan fa a lobi fu Gado e tan na ini en?” (1 Yoh. 3:17) Yu man memre wan tu okasi pe yu du wan sani gi wan sma fu sori en taki yu lobi en?
13 Wan tra fasi fa wi kan du muiti fu sori lobi gi sma, na te wi de klariklari fu gi trawan pardon, èn te wi no e hori wi brada noso sisa na ati. (Leisi 1 Yohanes 4:20.) Na presi fu dati, wi wani fiti a rai disi di skrifi na ini Bijbel: „Tan frudrage makandra èn gi makandra pardon nanga un heri ati te wan sma feni taki wan trawan du en wan ogri. Soleki fa Yehovah e gi unu pardon nanga en heri ati, na so unu musu du tu” (Kol. 3:13). Kande yu abi wan kesekese nanga wan sma na ini yu gemeente. Yu sa de klariklari fu gi a sma dati pardon, soleki fa a rai fu Paulus e taki?
„Du muiti . . . fu horidoro”
14. San wi kan leri fu a gemeente na ini Filadelfia?
14 Te wi musu du muiti wan syatu pisi ten fu doro wan marki, dan dati na wan heri tra sani leki te wi musu du muiti wan heri pisi ten fu doro wan marki di muilek fu doro. A de krin taki wi musu horidoro fu man kisi têgo libi. Masra Yesus ben taigi a gemeente na ini Filadelfia: „Fu di yu ben horidoro soleki fa mi ben taigi yu, meki mi o kibri yu sosrefi te a yuru fu tesi kon” (Openb. 3:10). Iya, Yesus ben leri den bakaman fu en taki den musu horidoro, fu di dati sa yepi wi fu no gi abra te wi e kisi tesi. A no de fu taki dati na ini a fosi yarihondro, den brada na ini a gemeente fu Filadelfia ben horidoro na wan getrow fasi aladi den ben e kisi bun furu tesi. Sobun, Yesus gi den a dyaranti taki a ben o tan horibaka gi den te den ben o kisi wan moro bigi tesi.—Luk. 16:10.
15. Fa Yesus ben leri den bakaman fu en taki den ben musu horidoro?
15 Yesus ben sabi taki den bakaman fu en ben o kisi fu du nanga a bita-ati di famiriman nanga tra sma di no ben de na bribi ben o abi gi den. Fu dati ede, na awansi tu okasi, a gi den deki-ati na a fasi disi: „A sma di horidoro te na a kaba, na en o kisi frulusu” (Mat. 10:22; 24:13). Yesus ben sori tu fa den disipel fu en ben kan kisi krakti fu horidoro na a ten dati. Na ini wan agersitori, a taki fu sma di e „teki [Gado] Wortu nanga prisiri”, ma di e gowe libi a tru anbegi baka te den e kisi tesi tapu a bribi fu den. A agersi den sma disi nanga ston-gron. Ma a agersi den getrow bakaman fu en nanga bun doti fu di den „e du san” a wortu fu Gado e taki, èn den e „meki froktu fu di den e horidoro”.—Luk. 8:13, 15.
16. Sortu lobi-ati seti yepi milyunmilyun sma fu horidoro?
16 Yu si san kan yepi wi fu horidoro? Wi musu „du san” Gado wortu e taki, iya, wi musu meki a wortu disi abi krakti tapu wi ati èn tapu wi frustan. Wan sani di e yepi wi fu du dati, na a Nieuwe-Wereldvertaling van de Heilige Schrift (Nyun-Grontapuvertaling fu den Santa Buku fu Bijbel), di de fu kisi na ini moro nanga moro tongo. A Bijbel disi na wan soifri vertaling, èn a makriki fu leisi. Te wi e denki dipi ibri dei fu wan pisi di wi leisi na ini Gado Wortu, dan dati sa yepi wi fu kon abi a krakti di wi abi fanowdu fu man „horidoro”, so taki wi e tan meki froktu.—Ps. 1:1, 2.
„Du muiti . . . fu abi safri-ati fasi” nanga vrede
17. (a) Fu san ede a de prenspari fu abi „safri-ati fasi”? (b) Fa Yesus ben sori taki a ben abi safri-ati fasi?
17 Nowan sma lobi te trawan e krutu en fu wan sani di a no taki noso di a no du. Furu sma e atibron te trawan e du dati nanga den, èn den e opo taki gi densrefi. A no ben o moro bun fu sori „safri-ati fasi”? (Leisi Odo 15:1.) A no makriki srefisrefi fu sori safri-ati fasi te wan sma e krutu wi gi wan sani, aladi wi no du nowan ogri. Wi kan leri furu fu na eksempre fu Yesus Krestes. „Te sma ben e kosi en, dan a no ben e kosi den baka. Te a ben e nyan pina, dan a no ben e taigi den sma taki a ben o du den ogri, ma a ben tan saka ensrefi na ondro a sma di e krutu sani na wan regtfardiki fasi” (1 Petr. 2:23). A no de fu taki dati wi no o man handri soifri soleki fa Yesus ben handri, ma wi kan du muiti fu sori moro safri-ati fasi, a no so?
18. (a) Sortu bun bakapisi a e tyari kon te wi abi safri-ati fasi? (b) Sortu tra fasi wi musu du muiti fu kon abi?
18 Meki wi teki na eksempre fu Yesus, fu di wi ’ala ten de srekasreka fu opo taki’ gi a bribi fu wi, èn wi musu „du dati na wan safri fasi èn nanga bigi lespeki” (1 Petr. 3:15). Iya, te wi abi safri-ati fasi, dan wi no sa atibron esi-esi. Disi sa yepi wi fu no haritaki nanga sma di wi e miti na ini a preikiwroko, èn wi no sa haritaki tu nanga wi Kresten brada nanga sisa te den no e agri nanga wi (2 Tim. 2:24, 25). Kande na fu dati ede meki na ini a di fu tu brifi di Paulus ben skrifi gi Timoteyus, a ben taki dati „vrede” na wan fu den fasi di wi musu du muiti fu kon abi (2 Tim. 2:22; luku 1 Timoteyus 6:11.) Iya, „vrede” na wan tra fasi di wi musu du muiti fu kon abi, soleki fa Bijbel e sori dati.—Ps. 34:14; Hebr. 12:14.
19. Baka di wi poti prakseri na seibi fasi di wi leki Kresten musu abi, dan sortu marki yu sa suku fu doro, èn fu san ede yu sa du dati?
19 Wi poti prakseri na seibi fasi di wi leki Kresten musu du muiti fu kon abi. Iya, wi musu du muiti fu de regtfardiki, wi musu dini Gado na wan getrow fasi, wi musu abi bribi, wi musu sori lobi, wi musu horidoro, wi musu abi safri-ati fasi, èn wi musu abi vrede. A de wan blesi trutru te brada nanga sisa na ini ibri gemeente e du muiti fu sori den tumusi prenspari fasi disi moro bun! Disi sa gi Yehovah grani èn a sa gi en na okasi fu yepi wi fu tron moro bun sma, èn dati sa meki taki a e kisi prèise.
Denki dipi fu den tori disi
• O ten wi kan taki dati wan sma de regtfardiki èn taki a e dini Gado na wan getrow fasi?
• San o yepi wi fu kon abi bribi èn fu horidoro?
• Fa wi kan sori lobi gi trawan?
• Fu san ede wi musu du muiti fu kon abi safri-atifasi nanga vrede?
[Aksi fu a tori disi]
[Prenki na tapu bladzijde 12]
Yesus ben warskow den bakaman fu en fu no du neleki den de regtfardiki, soso fu meki sma poti prakseri na den
[Prenki na tapu bladzijde 13]
Wi kan kon abi bribi te wi e denki dipi fu den tru tori na ini Gado Wortu
[Prenki na tapu bladzijde 15]
Wi kan du muiti fu sori lobi nanga safri-ati fasi