Den lusu a problema na wan koni fasi

DRI yonkuman na ini Centraal Afrika ben wani go na a distrikt kongres pe a gemeente fu den ben o go. Fa den ben o doro drape? A kongres ben o hori na wan presi di de sowan 90 kilometer fara, èn den ben musu teki wan olo-olo santi pasi fu doro drape. Boiti dati, den no ben abi wagi fu doro drape. Den ben wani leni dri baisigri, ma den no ben man feni bun baisigri fu tyari den go te drape.

Wan owruman na ini a gemeente fu den, si a problema di den ben abi èn a leni den a baisigri fu en. Aladi a ben de wan owru baisigri, toku a ben rèi bun ete. A fruteri den fa a ben de fositen di en nanga trawan ben seti sani fu doro na wan kongres. Na owruman taigi den taki den ala dri kan rèi wán baisigri. Disi ben de wan moi lusu gi a problema fu den, ma den ben o musu seti sani bun. Fa dri sma ben o man rèi wán baisigri?

Fu di den yongu brada no ben wani rèi na ini a faya son, meki den miti makandra na wan presi fruku mamanten, èn den poti den lai fu den na tapu a baisigri. A fosi brada bigin rèi a baisigri go na fesi, èn den tu trawan ben waka gaw na en baka. Baka di a fosi brada rèi sowan 500 meter, dan a stop èn a poti a baisigri nanga den lai, na sei wan bon. A no de fu taki, dati a poti a baisigri na so wan fasi taki sma no ben o fufuru en, ma taki den tu tra brada ben kan si a baisigri. Baka dati, a fosi brada waka a pasi go doro.

Di den tu tra brada doro na a baisigri, dan wan fu den teki a baisigri rèi en, èn a trawan tan waka go doro sowan 500 meter, fosi en kisi na okasi fu rèi a baisigri. Den dri brada disi ben sreka sani bun èn den no meki nowan sani tapu den fu go na a kongres. Fu dati ede, den ben musu waka sowan 60 kilometer nomo na presi fu 90 kilometer. A muiti di den ben du, no ben de fu soso. Den ben miti nanga den Kresten brada nanga sisa na a kongres èn den nyan bun fu a programa (Deut. 31:12). Yu o du ala san yu man a yari disi, fu go na a distrikt kongres na ini a kontren fu yu?