A Wortu fu Yehovah de libilibi

Edepenti fu a brifi di skrifi gi den Romesma

NA A ten fu a yari 56, di na apostel Paulus ben de na a di fu dri zendelingwaka fu en, a doro na ini a foto Korente. A kon sabi taki na ini Rome, den Dyu Kresten nanga den Kresten di no de Dyu, no ben agri nanga makandra fu spesrutu tori. Fu di Paulus wani taki den Kresten dati de na ini wánfasi nanga Krestes na ini ala sani di den e du, meki a e skrifi wan brifi gi den.

Na ini a brifi dati di Paulus skrifi gi den Romesma, a e taki na sortu fasi Gado fruklari taki libisma de regtfardiki èn fa den sma dati musu libi. A brifi disi e meki wi kon sabi moro fu Gado nanga en Wortu. Boiti dati, a e poti krakti tapu a no-frudini bun-ati fu Gado, èn a e sori taki a sani di Krestes du fu frulusu wi, prenspari trutru.—Hebr. 4:12.

NA SORTU FASI GADO FRUKLARI TAKI LIBISMA DE REGTFARDIKI?

(Rom. 1:1–11:36)

„Ala sma sondu èn den no man doro a glori fu Gado”, na so Paulus skrifi. „Na wan fri presenti den kisi di Gado fruklari taki den de regtfardiki; dati pasa fu di a sori den no-frudini bun-ati, èn fu di a frulusu den nanga a lusu-paiman di Krestes Yesus pai.” Paulus e taki tu: „Wan sma de regtfardiki te a sma disi e bribi èn no te a sma e du san a wet e taki” (Rom. 3:23, 24, 28). Fu di den salfu Kresten nanga den memre fu a „bigi ipi” fu „tra skapu” poti bribi na ini „a wán reti sani di du”, meki Gado „fruklari taki den de regtfardiki”. Disi meki taki den salfu Kresten o libi na hemel leki sma di o tiri makandra nanga Krestes, èn a bigi ipi o de Gado mati èn den o abi a howpu fu pasa „a bigi banawtu” libilibi.—Rom. 5:18; Openb. 7:9, 14; Yoh. 10:16; Yak. 2:21-24; Mat. 25:46.

„Wi o du wan sondu, fu di wi no de na ondro wet, ma fu di Gado sori wi no-frudini bun-ati?”, na so Paulus e aksi. A e piki: „Dati no musu pasa kwetikweti!” Paulus e fruklari: „Efu unu na srafu fu sondu, dan dati sa abi dede leki bakapisi, ma efu unu e gi yesi na Gado, dan dati sa abi regtfardikifasi leki bakapisi” (Rom. 6:15, 16). „Efu nanga yepi fu a yeye unu no e du moro san a sondu skin wani, dan unu o libi”, na so a e taki.—Rom. 8:13.

Piki tapu den aksi fu Bijbel:

1:24-32—Den tekst disi e taki dati sma ben e tyari densrefi na wan fasi di no fiti kwetikweti. A sani disi ben abi fu du nanga den Dyu, noso nanga den sma di no de Dyu? Aladi den sani di skrifi drape kan abi fu du nanga ala tu grupu, toku Paulus ben taki dyaso fu den Israelsma fu owruten di no ben hori densrefi na a Wet. Aladi den ben sabi den regtfardiki komando fu Gado, toku „den no ben wani kon sabi Gado finifini”. Fu dati ede, den ben e tyari densrefi na wan fasi di no fiti kwetikweti.

3:24, 25—Fa a kan taki „a lusu-paiman di Krestes Yesus pai”, ben kan gi sma pardon fu „den sondu di den du” bifo a lusu-paiman ben pai? A fosi profeititori di abi fu du nanga a Mesias, èn di skrifi na ini Genesis 3:15, kon tru na ini a yari 33, di sma kiri Yesus na wan pina postu (Gal. 3:13, 16). Ma na a momenti di Yehovah taki a profeititori dati, dan gi en a ben de leki a lusu-paiman ben pai kaba, fu di noti no kan tapu Gado fu du san a abi na prakseri. Sobun, nanga yepi fu a lusu-paiman di Yesus Krestes ben o pai na ini a ten di ben o kon, Yehovah ben o man gi den bakapikin fu Adam pardon fu den sondu te den ben o poti bribi na ini a pramisi dati. Boiti dati, den sma di ben libi na ini a ten bifo den Kresten, o man kisi wan opobaka tu nanga yepi fu a lusu-paiman.—Tori. 24:15.

6:3-5—San a wani taki dati wan sma dopu fu de wán nanga Krestes Yesus èn taki a dopu na ini a dede fu en? Te Yehovah salfu den bakaman fu Krestes nanga santa yeye, dan den e kon de wán nanga Yesus èn den e kon de wan pisi fu a gemeente fu salfu Kresten di de a skin fu Krestes. A skin dati abi Krestes leki Ede (1 Kor. 12:12, 13, 27; Kol. 1:18). Disi wani taki dati den dopu fu de wán  nanga Krestes Yesus. Salfu Kresten ’dopu sosrefi na ini a dede fu Krestes’, fu di den e gi densrefi dorodoro èn den e weigri fu abi iniwan howpu fu libi fu têgo na grontapu. Fu dati ede, a dede fu den na wan ofrandi neleki fa a dede fu Yesus na wan ofrandi. Ma a dede fu den salfuwan no de wan lusu-paiman. A dopu di den dopu na ini a dede fu Krestes, e kon na wan kaba te den dede èn kisi wan opobaka fu libi na hemel.

7:8-11—Fa ’sondu kisi na okasi’ fu du difrenti sani ’nanga yepi fu a komando’? A Wet ben e yepi sma fu frustan san na sondu trutru, èn a meki den kon frustan moro bun taki den na sondusma. Leki bakapisi fu dati, den ben kon si taki tra sani di den ben e du, ben de sondu tu. Boiti dati, moro sma kon frustan taki den na sondusma aladi den no ben denki so fu densrefi fosi. Fu dati ede, a de so taki sondu kisi na okasi fu du difrenti sani nanga yepi fu a Wet.

Sani di wi kan leri:

1:14, 15. Wi abi bun furu reide fu preiki a bun nyunsu fayafaya. Wán reide, na taki wi abi wan paiman na sma di bai nanga a brudu fu Yesus, èn wi abi a plekti fu yepi den kisi wan bun matifasi nanga Gado.

1:18-20. Ogrisma nanga onregtfardikisma „no man taki dati den no sabi” Gado, fu di den fasi fu Gado de krin fu si na den sani di a meki.

2:28; 3:1, 2; 7:6, 7. Baka di Paulus taki sani na so wan fasi dati a ben kan gersi leki a afrontu den Dyu, a e taki sani di no ben hati den firi so furu. Disi na wan moi eksempre gi wi, di e sori fa fu taki na wan koni fasi èn na wan fasi di fiti te a abi fu du nanga tori di kan afrontu sma.

3:4. Te den sani di libisma e taki no e kruderi nanga san Gado e taki na ini en Wortu, dan wi e sori taki „Gado e taki tru ala ten”, fu di wi e poti bribi na ini a boskopu fu Bijbel èn wi e handri soleki fa Gado wani. Te wi e teki prati fayafaya na a Kownukondre preikiwroko nanga a wroko fu meki disipel, dan wi kan yepi trawan fu si taki Yehovah na a tru Gado.

4:9-12. Langa ten bifo Abraham ben besnèi, di a ben abi 99 yari, Gado ben si en leki wan regtfardiki sma kaba, fu di a ben abi bribi (Gen. 12:4; 15:6; 16:3; 17:1, 9, 10). Na so wan fasi Gado sori krin san e meki wan sma de regtfardiki.

4:18. Howpu na wan prenspari pisi fu a bribi fu wi. Fu di wi abi howpu, meki taki wi abi bribi.—Hebr. 11:1.

5:18, 19. Na wan makriki fasi Paulus ben fruklari fa Yesus de leki Adam, èn na a fasi disi a sori krin fa a kan dati wán man „gi en sili leki wan lusu-paiman fu frulusu furu sma” (Mat. 20:28). Te wi e gi trawan leri, dan wi musu du dati na wan fasi di makriki fu frustan èn wi no musu taki tumusi furu fu wan tori.—1 Kor. 4:17.

7:23. Den pisi fu wi skin soleki wi anu, wi futu, nanga wi tongo kan meki taki wi ’tron wan srafu fu sondu di de leki wan wet na ini wi skin’. Fu dati ede wi musu luku bun taki wi no e gebroiki den sani disi na wan fowtu fasi.

8:26, 27. Te wi de na ini situwâsi di e meki wi bruya so te taki wi no sabi san wi musu taki na ini begi, dan „a yeye srefi e taki gi wi”. Den begi di skrifi na ini Gado Wortu kan fiti na ini a situwâsi fu wi. Te wi e taki den begi dati, dan Yehovah, a „Yereman fu begi”, sa arki den begi disi, leki na wi begi.—Ps. 65:2.

8:38, 39. Nowan rampu, nowan takru yeye, èn nowan libisma tirimakti o man meki taki Yehovah no lobi wi moro, èn nowan fu den sani dati musu meki tu taki wi no lobi en moro.

9:22-28; 11:1, 5, 17-26. Furu profeititori di abi fu du nanga a meki di Israel ben o meki kon bun baka, kon tru na ini a gemeente fu salfu Kresten. Den memre fu a gemeente dati „teki puru na mindri Dyu, ma sosrefi na mindri den trakondre sma”.

10:10, 13, 14. Lobi gi Gado nanga tra sma èn a tranga bribi di wi abi na ini Yehovah nanga den pramisi fu en, kan gi wi deki-ati fu teki prati fayafaya na a Kresten diniwroko.

11:16-24, 33. Gado sabi heri bun o ten a musu sori „bun-ati” gi sma èn o ten a musu „handri tranga” nanga den. Iya, ’den sani di a Klepston e du, bun dorodoro, bika a e du ala sani na wan reti fasi’.—Deut. 32:4.

WI MUSU LIBI NA WAN FASI DI E SORI TAKI GADO FRUKLARI WI REGTFARDIKI

(Rom. 12:1–16:27)

Paulus e taki: „Fu dati ede, mi brada, fu di Gado abi sari-ati, meki mi e begi unu fu gi un skin leki wan srakti-ofrandi di e libi, di de santa  èn di Gado feni bun” (Rom. 12:1). Gado fruklari Kresten regtfardiki, fu di den e poti bribi na ini en. „Fu dati ede” a sani di Paulus e taki baka dati, musu abi krakti tapu a fasi fa Kresten e si densrefi, a fasi fa den e si trawan, èn a fasi fa den e si tirimakti.

„Mi e taigi un alamala drape fu no denki moro fu unsrefi leki san de fanowdu”, na so Paulus e skrifi. A e gi a rai disi tu: „Lobi trawan sondro fu hoigri” (Rom. 12:3, 9). „Ibri sma musu saka ensrefi na ondro den tiriman” (Rom. 13:1). Te a abi fu du nanga tori pe wan Kresten kan teki wan bosroiti soleki fa en konsensi e taigi en, dan Paulus e gi Kresten a deki-ati fu ’no krutu makandra’.—Rom. 14:13.

Piki tapu den aksi fu Bijbel:

12:20—Na sortu fasi wi e „poti wan ipi faya krofaya” na tapu na ede fu wan feanti? Na ini Bijbel ten, a ben de a gwenti taki sma ben e poti ston di ben abi isri na ini wan onfu. Na tapu èn na ondro den ston den ben e poti faya krofaya. Fu di den ben meki den tapusei krofaya kon moro faya, meki na isri ben smèlter èn a doti ben komoto na ini. Na a srefi fasi wi e poti faya krofaya na tapu na ede fu wan feanti, te wi e du bun gi en. Disi kan meki taki wi safu en ati èn wi kan yepi en fu abi bun fasi.

12:21—Fa wi e „tan du bun fu wini na ogri”? Wán fasi fa wi e du dati, na te wi e tan du a wroko di Gado gi wi fu du sondro fu frede. A wroko dati na fu preiki a bun nyunsu fu a Kownukondre teleki Yehovah taki dati a nofo.—Mark. 13:10.

13:1—Na sortu fasi ’Gado gi den tiriman na okasi fu tiri’? ’Gado gi den tiriman na okasi fu tiri’ fu di A gi den primisi fu du dati, èn na ini son situwâsi A ben taki na fesi srefi dati sonwan fu den ben o tiri. Disi e kon na krin te wi e luku san Bijbel taki na fesi fu wan tu tiriman.

Sani di wi kan leri:

12:17, 19. Te wi e pai ogri fu ogri, dan wi e du wan sani di Yehovah wawan abi a reti fu du. Wi ben o abi heimemre te ’wi ben o du wan ogri baka nanga wan sma di du wi ogri’.

14:14, 15. Wi no musu hati den firi fu wi brada, noso wi no musu meki a naki futu nanga den sani di wi e gi en fu nyan noso dringi.

14:17. A moro prenspari sani di o meki wi abi wan bun matifasi nanga Gado, a no te wi bosroiti sortu sani wi no o nyan noso dringi. Ma san de prenspari, na te wi e du sani di reti, te wi abi vrede, èn te wi de nanga prisiri.

15:7. Wi no musu denki takru fu sma sondro taki wi sabi den, ma wi musu gi wan switikon na ala opregtisma di e suku fu kon sabi a tru anbegi, te den kon na ini a gemeente. Boiti dati, wi musu preiki a Kownukondre boskopu gi ala sma di wi e miti.

[Prenki na tapu bladzijde 31]

A de so taki a lusu-paiman kan gi sma pardon fu den sondu di den du bifo a lusu-paiman pai?