Tan abi „a lobi di yu ben abi biginbigin”
Tan abi „a lobi di yu ben abi biginbigin”
„Tan hori steifi na san yu abi.”—OPENB. 3:11.
1, 2. Fa yu ben e firi di yu kisi na overtoigi taki den sani di yu ben e leri fu Yehovah, na tru tori?
YU E memre a fosi leisi di yu kon sabi a moi howpu di Yehovah e gi libisma di e gi yesi na en? Efu yu ben abi wan tra bribi fosi, dan fa yu ben e firi di sma gebroiki Bijbel fu fruklari gi yu san Gado o du? Fa yu ben e firi di sma yepi yu fu kon frustan Bijbel leri di yu no ben e frustan fosi? Kande yu ben kon si taki den sani di yu ben leri fosi fu Gado, no ben tru. Ma a no de fu taki dati yu breiti now taki yu kon sabi den tru tori fu Bijbel! Efu yu papa nanga mama na Kresten di kweki yu na ini a Kresten bribi, dan kande yu kon kisi na overtoigi taki den sani di yu ben e leri fu Yehovah, na tru tori, èn fu dati ede yu bosroiti fu fiti den sani dati na ini yu libi. Yu e memre fa yu ben e firi na a ten dati?—Rom. 12:2.
2 Furu fu den Kresten brada nanga sisa fu yu sa fruteri yu taki den ben e firi prisiri trutru, den ben e firi taki den ben kon moro krosibei na Yehovah, èn den ben de nanga tangi taki a ben hari den krosibei na en (Yoh. 6:44). Fu di den ben e firi koloku, meki den bigin teki prati na a tru anbegi. Den ben breiti so te taki den ben wani trawan fu kon abi a srefi firi leki den. Na so a ben de tu nanga yu?
3. San ben de a situwâsi na ini a gemeente fu Efeise di Yesus seni wan boskopu gi en?
3 Yesus ben seni wan boskopu gi a Kresten gemeente fu Efeise na ini a fosi yarihondro, èn a ben taki fu ’a lobi di den ben abi biginbigin’. Den Kresten na ini Efeise ben abi furu bun fasi, ma a lobi di den ben abi gi Yehovah biginbigin, ben kon kowru. Fu dati ede, Yesus taigi den: „Mi sabi den sani di yu e du, èn mi sabi taki yu e wroko tranga, taki yu e horidoro, taki yu no man frudrage ogrisma, èn taki yu e ondrosuku den sma di e taki dati den na apostel, fu si efu den na apostel trutru; ma den a no apostel trutru, èn yu kon si taki den na leiman. Yu e horidoro sosrefi, yu hori deki-ati fu mi nen ede, èn yu no kon weri. Ma toku mi si wan sani na yu di mi no feni bun, namku taki yu lasi a lobi di yu ben abi biginbigin.”—Openb. 2:2-4.
4. Fu san ede a boskopu di Yesus ben seni gi den Efeisesma, prenspari gi wi na ini a ten disi?
4 Na ini a buku Openbaring, Yesus gi den Kresten na ini Efeise èn na ini tra gemeente, spesrutu rai. Te wi e luku san ben de a situwâsi fu den salfu Kresten wan pisi ten fu sensi 1914, dan wi e si taki a rai dati fiti (Openb. 1:10). Toku a kan pasa na ini a ten disi srefi taki son Kresten e lasi „a lobi di [den] ben abi biginbigin” gi Yehovah èn gi den tru leri fu Krestes. Fu di dati de so, dan meki wi luku fa wi kan tan abi a srefi lobi èn fa wi kan tan horibaka fayafaya gi Gado èn gi a tru anbegi. Wi sa luku tu fa wi kan kisi a lobi nanga a faya dati baka, èn san wi kan du fu meki a lobi nanga a faya dati kon moro bigi. Wi sa man doro den marki disi te wi e denki dipi fu den sani di wisrefi ondrofeni.
San overtoigi yu taki yu feni a tru bribi?
5, 6. (a) San ibri Kresten musu kon sabi gi ensrefi? (b) San overtoigi yu taki Yehovah Kotoigi e leri sma tru tori? (c) San kan yepi wan sma fu kon abi a lobi baka di a ben abi biginbigin?
5 Iniwan sma di gi ensrefi abra na Yehovah musu „kon sabi” fosi san na „Gado en wani di bun, di e plisi en èn di de volmaakti” (Rom. 12:1, 2). Wan fu den sani di a musu du, na taki a musu kon sabi den tru tori fu Bijbel. A sani di e overtoigi a wán sma taki Yehovah Kotoigi e leri sma tru tori, kan difrenti fu a sani di e overtoigi wan trawan. Son sma e memre taki den kisi na overtoigi dati di den leisi a nen fu Gado na ini Bijbel, noso di den kon frustan san na a situwâsi fu den dedewan (Ps. 83:18; Preik. 9:5, 10). A sani di ben naki na ati fu trawan, na a lobi di a pipel fu Yehovah abi gi makandra (Yoh. 13:34, 35). Trawan baka, ben fruwondru fu kon sabi san a wani taki fu no de wan pisi fu grontapu. Den kon frustan taki tru Kresten no man teki prati na politiek afersi noso na orloku fu nowan-enkri kondre.—Yes. 2:4; Yoh. 6:15; 17:14-16.
6 Furu sma kon lobi Gado di den kon sabi den tori disi, èn sosrefi tra tori. Teki a ten fu denki baka san ben overtoigi yu taki yu feni a tru bribi. Fu di a situwâsi fu yu e difrenti fu a di fu trawan, èn fu di ibri sma de tra fasi, meki yu abi tra reide fu san ede yu lobi Yehovah èn fu san ede yu e bribi den pramisi fu en. A musu de so taki den srefi sani dati prenspari ete gi yu. A tru bribi no kenki. Fu dati ede, te yu e luku baka sortu sani ben overtoigi yu èn fa yu ben e firi, dan dati kan meki taki a lobi di yu ben abi gi a tru bribi na ini a bigin e kon de fayafaya baka.—Leisi Psalm 119:151, 152; 143:5.
Tranga a lobi di yu ben abi biginbigin
7. Fu san ede wi musu tranga a lobi di wi ben abi gi a tru bribi na ini a bigin, èn fa wi kan du dati?
7 Kande furu sani kenki na ini yu libi sensi a ten di yu gi yusrefi abra na Yehovah. A lobi di yu ben abi gi a tru bribi na ini a bigin ben de prenspari, ma baka wan pisi ten, a lobi dati ben musu kon moro tranga so taki yu ben kan pasa den tra tesi di yu kisi. Ma Yehovah horibaka gi yu (1 Kor. 10:13). Sobun, den sani di yu ondrofeni na ini den yari di pasa prenspari tu gi yu. Den yepi yu fu tranga a lobi di yu ben abi biginbigin, èn den e gi yu na okasi fu kon sabi san na Gado en wani di bun èn di e plisi en.—Yos. 23:14; Ps. 34:8.
8. Fa Gado meki Moses kon sabi suma na En trutru, èn fa den Israelsma kon sabi Gado moro bun?
8 Fu gi wan eksempre, luku na ini sortu situwâsi den Israelsma ben de di Yehovah meki den kon sabi taki a ben o puru den na ini katibo na Egepte. Gado meki Moses kon sabi suma na En trutru. A ben taigi Moses: „Mi sa tron suma mi wani tron” (Ex. 3:7, 8, 13, 14). Fu taki en leti, Yehovah ben taigi en taki a ben o tron iniwan sani di a ben musu tron fu man frulusu a pipel fu en. Den sani di pasa bakaten, gi den Israelsma na okasi fu kon sabi Yehovah na difrenti fasi. Na ini difrenti situwâsi, den kon sabi en leki na Almaktiwan, leki wan Krutuman, wan Fesiman, wan Frulusuman, wan Fetiman, èn leki wan Sma di e sorgu gi den.—Ex. 12:12; 13:21; 14:24-31; 16:4; Neh. 9:9-15.
9, 10. Sortu sani di wan sma ondrofeni kan yepi en fu kon sabi Gado moro bun, èn fu san ede a bun fu memre den sani dati?
9 A no de fu taki dati a situwâsi fu yu e difrenti fu a di fu den Israelsma. Ma toku, a musu de so taki den sani di yu ondrofeni, gi yu na overtoigi taki Gado e broko en ede nanga yu, èn a sani disi tranga a bribi fu yu. Kande yu ondrofeni taki Yehovah na wan Sma di sorgu gi yu èn di trowstu yu, noso kande yu ondrofeni taki Yehovah na wan Leriman. (Leisi Yesaya 30:20b, 21.) Kande yu kisi wan krin piki tapu wan begi fu yu. Kande wan Kresten brada noso wan sisa yepi yu nanga wan problema di yu ben abi. Noso kande na fu di yu studeri Bijbel, meki yu kon sabi sortu tekst yu kan fiti na ini a situwâsi fu yu.
10 Te yu ben o fruteri trawan den sani disi di yu ondrofeni, dan kande dati no o naki na ati fu sonwan fu den. Fu taki en leti, den sani di yu ondrofeni a no wondru. Ma den prenspari srefisrefi gi yu. Iya, Yehovah ben tron soifri san a ben musu tron fu yepi yu. Prakseri fa a ben de ala den yari di yu de na ini a tru anbegi. Yu kan memre wan tu okasi di yu ondrofeni taki Yehovah sorgu gi yu? Efu yu e memre den okasi disi èn sosrefi fa yu ben e firi di yu ondrofeni den sani dati, dan dati kan meki taki yu e kon lobi Yehovah baka leki fa yu ben lobi en na a ten dati. Warderi den ondrofeni dati. Denki dipi fu den. Den ondrofeni dati e sori krin taki Yehovah e broko en ede nanga yu, èn nowan sma man puru na overtoigi dati na ini yu ati.
Fa a de nanga yu?
11, 12. Efu a lobi di wan Kresten abi gi a tru anbegi kon kowru, dan fa dati du kon, èn sortu rai Yesus ben gi den?
11 Efu a de so taki a lobi di yu ben abi gi Gado èn gi a tru anbegi na ini a bigin kon kowru, dan dati no e kon fu di Gado kenki. Yehovah no e kenki noiti (Mal. 3:6; Yak. 1:17). A ben e broko en ede nanga yu fosi, èn a e du dati ete na ini a ten disi. Sobun, efu a lobi di yu ben abi gi Yehovah kon kowru, dan fa dati du kon? A kan taki yu abi moro broko-ede now? Kande fosi yu ben e begi fayafaya, yu ben e studeri fayafaya, noso kande yu ben e meki moro ten fu denki dipi fu sani. A de so taki yu no e teki prati fayafaya moro na a preikiwroko leki fosi? Noso a de so taki yu no e go na ala den konmakandra moro?—2 Kor. 13:5.
12 Kande den sani disi no pasa nanga yu, ma efu a de so taki den pasa nanga yu, dan fa dati du kon? Kande yu ben musu sorgu gi yu osofamiri noso gi a gosontu fu yu, noso kande yu ben musu du tra prenspari sani. Den sani disi meki taki yu no e hori krin na prakseri moro taki a dei fu Yehovah de krosibei? Yesus ben taigi den apostel fu en: „Poti prakseri na unsrefi taki noiti un ati e kon hebi fu di unu e nyan pasa marki, noso fu di unu e dringi tumusi furu, noso fu di unu e broko un ede nanga den sorgu fu na aladei libi, so taki a dei dati no e kon na un tapu wantronso leki wan trapu. Bika a o kon na tapu ala den sma di e libi na grontapu. Fu dati ede, tan na ai èn begi ala ten taki unu man lowe gi ala den sani di musu pasa.”—Luk. 21:34-36.
13. Nanga sortu sani Yakobus agersi a Wortu fu Gado?
13 Nanga yepi fu a santa yeye, a Bijbel skrifiman Yakobus ben gi den Kresten brada nanga sisa fu en a rai fu gebroiki Gado Wortu fu ondrosuku densrefi na wan opregti fasi. Yakobus ben skrifi: „Un musu tron sma di e du san a wortu e taki, èn un no musu de sma di e yere nomo, fu di unu e kori unsrefi nanga prakseri di no tru. Bika efu wan sma e yere a wortu, ma a no e du san a wortu e taki, dan a de leki wan sma di e luku en fesi na ini wan spikri. A e luku ensrefi, dan a e gowe, èn wantewante a e frigiti sortu sma a de. Ma te wan sma e luku finifini san skrifi na ini a volmaakti wet di e meki sma kon fri, èn te a e tan du dati, dan a sma disi o de koloku, bika a no de wan sma di e frigiti san a yere, ma a de wan sma di e du san a wortu e taki.”—Yak. 1:22-25.
14, 15. (a) Fa Bijbel kan yepi yu fu go na fesi na ini a tru anbegi? (b) Sortu sani yu kan aksi yusrefi?
14 Wan sma kan gebroiki wan spikri fu si efu ala sani e sidon bun. Fu eksempre, te wan man e si taki a das fu en kron, dan a kan seti en bun baka. Te wan uma e si taki a wiwiri fu en no sidon bun, dan a kan seti en wiwiri baka. Na so a de tu taki den Buku fu Bijbel e yepi wi fu kon sabi suma na wi. Te wi e luku efu wi tron a nyun sma di Bijbel e taki dati wi musu tron, dan fu taki en leti, wi e gebroiki a Bijbel leki wan spikri. Ma a ben o de fu soso efu baka te wi luku na ini wan spikri, wi no e du noti fu seti baka san no bun, a no so? Wi e sori taki wi koni te wi „de sma di e du” san skrifi na ini a „volmaakti wet” fu Gado. Fu dati ede, te wan sma kon si taki a no lobi Yehovah èn a tru anbegi moro soleki fa a ben lobi den biginbigin, dan a ben o bun te a e aksi ensrefi den sani disi: ’Sortu broko-ede mi abi, èn sortu krakti den abi na mi tapu? Sortu krakti den ben abi na mi tapu fosi? Wan sani kon kenki?’ Te yu e si taki yu kon abi swakifasi, dan no libi den so. Efu a de fanowdu taki yu e tyari kenki kon, dan no draidrai fu du dati.—Hebr. 12:12, 13.
15 Te yu e denki dipi fu den sani disi, dan dati kan yepi yu tu fu kon sabi san yu musu du fu go na fesi na ini a tru anbegi. Nanga yepi fu santa yeye, na apostel Paulus ben gi Timoteyus di ben e wroko makandra nanga en, a rai fu go na fesi na ini a diniwroko fu en. Paulus ben taigi a yonkuman: „Prakseri bun fu den sani disi; denki soso dati wawan, so taki ala sma kan si taki yu e go na fesi.” Wi musu ondrosuku Gado Wortu tu fu kon sabi sortu kenki wi musu tyari kon fu man go na fesi.—1 Tim. 4:15.
16. Nanga sortu sani yu musu luku bun te yu e ondrosuku yusrefi nanga yepi fu Bijbel?
16 Te yu e ondrosuku yusrefi na wan opregti fasi, dan dati sa tyari kon na krin taki yu abi wan tu swakifasi. A sani dati ben kan meki yu firi brokosaka, ma no meki dati pasa. Te yu e luku en bun, dan a reide fu san ede wan sma e ondrosuku ensrefi, na fu kon sabi sortu kenki a musu tyari kon. A no de fu taki te wan Kresten kon sabi taki a abi swakifasi, dan Satan o wani gi en a firi taki a no warti noti. Fu taki en leti, sma ben taki dati Gado no abi nowan enkri warderi gi a muiti di sma e du fu dini en (Yob 15:15, 16; 22:3). Yesus ben sori krin taki a sani dati na wan lei, bika ibriwan fu wi warti trutru na ini Gado ai. (Leisi Mateyus 10:29-31.) Te yu kon sabi sortu swakifasi yu abi, dan yu no musu firi brokosaka, ma na presi fu dati yu musu de klariklari fu du ala san yu man fu tyari kenki kon, èn Yehovah sa yepi yu (2 Kor. 12:7-10). Efu siki noso owrudei e meki taki yu no man du so furu na ini a diniwroko, dan pruberi fu du san yu man, ma no lasi-ati, èn no meki a lobi fu yu kon kowru.
Wi abi bun furu reide fu de nanga tangi
17, 18. Sortu wini yu sa kisi te yu e tranga a lobi di yu ben abi biginbigin?
17 Yu kan kisi furu wini te yu e tan tranga a lobi di yu ben abi biginbigin. Yu kan kon sabi Gado moro bun èn yu kan kisi moro warderi gi a lobi-ati fasi fa a e tiri yu. (Leisi Odo 2:1-9; 3:5, 6.) A psalm skrifiman ben taki: ’Furu pai de gi den sma di e hori densrefi na den krutubosroiti fu Yehovah.’ A skrifiman ben taki sosrefi: „A frumane fu Yehovah de soifri, a e meki a sma di no abi ondrofeni tron wan koni sma.” Ete wan sani di a ben taki, na disi: „Koloku fu den sma di tan sondro fowtu na tapu a pasi fu den, den sma di e waka na ini a wet fu Yehovah.”—Ps. 19:7, 11; 119:1.
18 A no de fu taki dati yu e agri taki yu kan de nanga tangi gi furu bun sani. Yu sabi fa a du kon taki a situwâsi na grontapu kon de so. Yu e kisi wini fu ala den sani di Gado seti fu sorgu gi a pipel fu en na ini a ten disi. A no de fu taki dati yu de nanga tangi tu taki Yehovah hari yu kon na ini a gemeente fu en di abi memre na heri grontapu, èn taki a gi yu a grani fu de wan fu den Kotoigi fu en. De nanga tangi gi den blesi di yu e kisi! Efu yu ben musu skrifi den alamala poti na tapu papira, dan yu ben o abi furu sani fu skrifi. Te yu e du disi ten na ten, dan dati kan yepi yu fu fiti a rai disi: „Tan hori steifi na san yu abi, so taki nowan sma o teki a pai di yu musu kisi.”—Openb. 3:11.
19. Boiti taki yu musu luku fa a de nanga a bribi fu yu, sortu tra prenspari sani yu musu du fu man tan abi wan tranga bribi?
19 Soleki fa wi si, dan wi kan kon abi wan tranga bribi te wi e luku fa a bribi fu wi kon moro tranga na ini a ten di pasa. Ma moro sani de di wi musu du fu kon abi wan tranga bribi. Ibri tron baka, A Waktitoren poti prakseri na tra prenspari sani di wi musu du fu man tan abi wan tranga bribi. Den sani di wi musu du, na taki wi musu begi Gado, wi musu go na den konmakandra, wi musu teki prati na den, èn wi musu teki prati fayafaya na a preikiwroko. Den sani disi kan yepi yu fu tan du muiti fu sorgu taki a lobi di yu ben abi biginbigin e tan fayafaya, èn taki a e kon moro tranga.—Ef. 5:10; 1 Petr. 3:15; Yud. 20, 21.
San yu ben sa piki?
• Fa den sani di meki taki yu kon lobi Yehovah, kan gi yu deki-ati now?
• Te yu e prakseri den sani di yu ondrofeni na ini den yari di pasa, dan sortu overtoigi dati kan gi yu?
• Fu san ede yu musu luku efu a lobi di yu abi gi Gado tranga ete?
[Aksi fu a tori disi]
[Prenki na tapu bladzijde 23]
Sortu sani overtoigi yu taki yu feni a tru bribi?
[Prenki na tapu bladzijde 25]
A de fanowdu taki yu e tyari wan tu kenki kon?