Teki a tiri fu Yehovah
Teki a tiri fu Yehovah
„Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi.”—1 YOH. 5:3.
1, 2. (a) Fu san ede furu sma no lobi fu saka densrefi na ondro a tiri fu trawan? (b) A de so trutru taki den sortu sma disi abi den eigi denki fu sani? Fruklari dati.
FURU sma no lobi fu saka densrefi na ondro a tiri fu trawan. Den sortu sma disi e taki: „Nowan sma musu taigi mi san mi musu du.” Ma a de so trutru taki den sma disi abi den eigi denki fu sani? Kwetikweti! Furu fu den sma disi e fiti densrefi na den markitiki fu furu trawan di e ’libi leki fa a grontapu sistema disi wani taki den musu libi’ (Rom. 12:2). A no de so kwetikweti taki den sma disi e libi soleki fa den srefi wani, ma na presi fu dati, den na „srafu fu sondu”, soleki fa a Kresten apostel Petrus ben taki (2 Petr. 2:19). Den e libi ’leki den sma fu a grontapu sistema disi, iya, soleki fa a sma wani di abi makti tapu a krakti di e tiri sma denki’, èn a sma disi na Satan Didibri.—Ef. 2:2.
2 Wan skrifiman ben meki bigi na a fasi disi: „Mi no e gi pasi taki mi papa nanga mama, wan priester, wan domri, wan pandit, noso Bijbel e taigi mi san tru.” A no de fu taki dati son sma di abi makti wani dwengi wi fu du sani di no fiti, èn fu dati ede a no bun fu gi yesi na den sma disi. Ma dati wani taki dati wi no abi nowan sma fanowdu fu tiri wi? Te wi e luku den sani di skrifi na ini koranti, dan wi e si taki dati no de so trutru. A de wan sari sani taki na ini a ten disi pe sma abi tiri tranga fanowdu, furu sma e weigri fu teki tiri fu trawan, èn noiti ete dati ben de so.
A fasi fa wi e si sma di abi makti
3. Fa den Kresten na ini a fosi yarihondro sori taki den no ben e du iniwan sani di sma ben e taigi den fu du?
3 Wi leki Kresten abi wan heri tra denki leki grontapusma. Te sma e taigi wi fu du spesrutu sani, dan wi no e gi yesi sondro fu luku efu a bun fu du den sani dati. Na presi fu dati, wi musu weigri son leisi fu gi yesi na trawan, awansi den sma dati abi makti. Na dati den Kresten na ini a fosi yarihondro ben du tu. Fu eksempre, di a granpriester nanga tra heiheisma fu a Sanhedrin gi den apostel a komando fu tapu nanga a preikiwroko fu den, dan den apostel weigri fu gi yesi na den. Aladi den sma di ben gi den a komando disi ben de sma di abi makti, toku den apostel no tapu fu du san bun.—Leisi Tori fu den Apostel 5:27-29.
4. Sortu eksempre na ini den Hebrew Buku fu Bijbel e sori taki furu fu den futuboi fu Gado ben de tra fasi leki furu fu den sma fu a ten dati?
4 Na ini a ten bifo Yesus kon na grontapu, furu futuboi fu Gado ben abi a srefi fasti bosroiti disi. Fu eksempre, Moses „no ben wani meki sma kari en a manpikin fu na umapikin fu Farao; ma a ben bosroiti fu nyan pina makandra nanga a pipel fu Gado”, awansi a sani dati ben meki ’a kownu atibron’ (Hebr. 11:24, 25, 27). Yosef ben kakafutu gi a wefi fu Potifar di ben e tan dwengi en fu du hurudu nanga en, aladi a ben sabi taki na uma disi ben kan du wan hati sani baka nanga en (Gen. 39:7-9). Danièl „ben teki a bosroiti na ini en ati taki a no ben sa doti ensrefi nanga den switisani fu a kownu”, aladi a prenspari dinari fu a kownu-oso fu Babilon no ben feni dati bun (Dan. 1:8-14). Den eksempre disi e sori taki, na ini owruten, a pipel fu Gado ben abi a fasti bosroiti fu du san reti, awansi sortu bakapisi dati ben kan tyari kon gi den. Den no ben e gi yesi na sma soso fu meki den sma dati lobi den. Wi no musu du dati tu.
5. Fa a fasi fa wi e si sma di abi makti e difrenti fu a fasi fa grontapusma e si den sortu sma disi?
5 Te wi abi deki-ati fu weigri fu du wan sani di no bun, dan dati no wani taki dati wi na tranga-ede sma. A no de so tu taki wi e opo wisrefi teige tirimakti, neleki fa son sma e du dati. Na presi fu dati, wi abi a fasti bosroiti fu no gi yesi na nowan-enkri libisma di e aksi wi fu du wan sani di Yehovah no feni bun. Te den wet fu libisma no e kruderi nanga den wet fu Gado, dan wi sabi heri bun sortu bosroiti wi musu teki. Neleki den apostel na ini a fosi yarihondro, wi e gi yesi na Gado na presi fu gi yesi na libisma.
6. Fu san ede a moro bun ala ten fu gi yesi na den komando fu Yehovah?
6 Fu san ede wi e teki a tiri fu Gado? Wi e agri nanga den wortu disi di skrifi na Odo 3:5, 6: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala san yu e du, èn ensrefi sa meki yu pasi kon reti.” Wi e bribi taki iniwan sani di Gado e aksi fu wi na fu wi eigi bun te fu kaba. (Leisi Deuteronomium 10:12, 13.) A tru taki Yehovah ben taigi den Israelsma taki en na ’a Sma di e leri den fu tyari wini kon gi densrefi, a Sma di e meki den waka na tapu a pasi di den musu waka’. A ben taigi den moro fara: „O, efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se” (Yes. 48:17, 18). Wi abi a frutrow taki den wortu disi tru. Wi abi a fasti overtoigi taki te wi e gi yesi na den komando fu Gado, dan ala ten dati sa de fu wi eigi bun.
7. San wi musu du te wi no e frustan soifri san wan spesrutu komando na ini Gado Wortu wani taki?
7 Wi e teki a tiri fu Yehovah, èn wi e gi yesi na en, awinsi wi no e frustan soifri fu san ede a gi wi wan spesrutu komando di skrifi na ini a Wortu fu en. Disi no wani taki dati wi e bribi iniwan sani di skrifi na ini Bijbel, sondro fu luku efu den sani dati tru. Nôno, wi e bribi den sani dati fu di wi e frutrow tapu Gado. Disi e sori taki wi abi ala frutrow taki Yehovah sabi san bun gi wi. Te wi e gi yesi na en, dan dati e sori tu taki wi lobi en, fu di na apostel Yohanes ben skrifi: „Disi na san a lobi fu Gado wani taki, dati wi e hori wisrefi na den komando fu en” (1 Yoh. 5:3). Ma ete wan sani de fanowdu fu man gi yesi na Gado.
Wi musu leri fa fu si sani krin
8. Fu san ede wi musu ’leri fa fu gebroiki wi frustan’ fu man teki a tiri fu Yehovah?
8 Bijbel e sori taki wi musu ’leri fa fu gebroiki wi frustan fu man si sani krin, so taki wi kan sabi san bun èn san no bun’ (Hebr. 5:14). Fu dati ede, wi no wani gi yesi na den wet fu Gado, sondro taki wi sabi fu san ede wi musu du dati. Na presi fu dati, wi wani kon sabi den markitiki fu Yehovah, fu man „sabi san bun èn san no bun”. Wi wani kon frustan fu san ede a moro bun fu du sani soleki fa Yehovah wani, so taki wi kan agri nanga a psalm skrifiman di ben taki: „Yu wet de na ini den inisei pisi fu mi.”—Ps. 40:8.
9. Fa wi kan meki den markitiki fu Yehovah abi krakti tapu a konsensi fu wi, èn fu san ede a de prenspari fu du dati?
9 Fu man frustan fu san ede a bun fu gi yesi na den wet fu Gado, soleki fa a psalm skrifiman ben du dati, dan wi musu denki dipi fu den sani di wi e leisi na ini Bijbel. Fu eksempre, te wi e kon sabi wan spesrutu sani di Yehovah e aksi fu wi, dan a bun fu aksi wisrefi: ’Fu san ede a bun fu gi yesi na a komando noso a gronprakseri disi? Sortu takru bakapisi miti den wan di no fiti a rai fu Gado na ini a tori disi?’ Te wi e meki den gronprakseri fu Gado abi krakti tapu a konsensi fu wi, dan a sa de moro makriki gi wi fu teki bosroiti di e kruderi nanga a wani fu en. Wi sa man „tan si krin san na a wani fu Yehovah”, èn leki bakapisi fu dati wi sa gi yesi na en (Ef. 5:17). Ma a sani disi no makriki ala ten.
Satan e suku fu kori wi fu no gi yesi na Gado
10. San na wan fasi fa Satan suku fu kori sma fu no teki a tiri fu Gado?
10 Langa ten kaba, Satan suku fu kori sma so taki den no e gi yesi na Gado. Na difrenti fasi a e sori taki a no wani teki a tiri fu Gado. Fu eksempre, luku fa a kori sma fu no sori lespeki gi a trowlibi di Gado seti. Son sma e bosroiti fu libi makandra nanga a patna fu den sondro taki den trow, aladi trawan e du espresi sani soso fu man broko trow. Kande den tu grupu sma disi e agri nanga a sani disi di wan pôpi uma di e prei na ini felem ben taki: „Wan man noso wan uma no man de getrow na a trowpatna fu den.” Na uma disi ben taki moro fara: „Mi no sabi nowan sma di de getrow na a trowpatna fu en, noso di wani de getrow.” Wan pôpi man di e prei tu na ini felem, ben e poti prakseri na ala den leisi di a prati nanga difrenti uma, èn a man disi taki tu: „Mi no sabi efu libisma trutru man libi nanga a srefi trowpatna den heri libi langa.” A ben o bun te wi e aksi wi srefi a sani disi: ’Mi e teki a tiri fu Yehovah te a abi fu du nanga a trowlibi, noso mi teki a denki fu den grontapusma di e bribi taki trowpatna no man tan getrow na makandra fu ala ten?’
11, 12. (a) Fu san ede a no makriki ala ten gi yonguwan fu teki a tiri fu Yehovah? (b) Fruteri wan ondrofenitori di e sori taki a de wan don sani fu no gi yesi na den komando nanga den gronprakseri fu Yehovah.
11 Yu na wan yonguwan di de na ini na organisâsi fu Yehovah? Efu dati de so, dan a kan taki Satan e du spesrutu muiti fu kori yu fu no teki a tiri fu Yehovah. Boiti ’den lostu di yu leki yonguwan abi’, a kan de so tu taki den speri fu yu e meki yu denki taki den wet fu Gado na wan hebi (2 Tim. 2:22). No meki den sani dati abi krakti na yu tapu. Pruberi fu si fu san ede a bun fu hori yusrefi na den markitiki fu Gado. Fu eksempre, Bijbel e taigi yu fu „lowe gi hurudu” (1 Kor. 6:18). Te a abi fu du nanga a tori disi, dan a bun tu fu aksi yusrefi den sani disi: ’Fu san ede a komando disi na wan bun komando? Fa mi sa kisi wini te mi e gi yesi na a komando disi?’ Kande yu sabi wan tu sma di kisi takru bakapisi fu di den no ben fiti a rai fu Gado. Den sma disi de koloku trutru now? Den abi wan moro bun libi leki di den ben de na ini na organisâsi fu Yehovah? A de so trutru taki den kon sabi fa fu de koloku, aladi den tra futuboi fu Gado no kon sabi dati?—Leisi Yesaya 65:14.
12 Luku san wan Kresten di nen Sharon, ben taki wan pisi ten pasa. Na uma disi ben taki: „Fu di mi no ben gi yesi na den komando fu Yehovah, meki mi kisi a takru siki AIDS. Mi gwenti fu prakseri o koloku mi ben de na ini den someni yari di mi ben e dini Yehovah.” Sharon kon si taki a ben du wan don sani fu no gi yesi na den komando fu Yehovah, èn a kon si tu taki a ben musu abi bigi lespeki gi den komando dati. Den komando fu Yehovah e kibri wi. Sharon dede seibi wiki baka di a ben skrifi den wortu dati. A sari sani di miti Sharon e sori taki Satan no abi nowan-enkri bun sani fu gi den sma di e tron memre fu na ogri grontapu fu en. Leki „a tata fu ala lei” a e pramisi sma furu sani, ma a no e hori ensrefi na den pramisi disi, neleki fa a no ben hori ensrefi na a pramisi di a ben gi Eva (Yoh. 8:44). Iya, a moro bun fu teki a tiri fu Yehovah ala ten.
No weigri fu teki a tiri fu trawan
13. San na wán situwâsi pe wi musu luku bun taki wi no e weigri fu teki a tiri fu trawan?
13 Fu man teki a tiri fu Yehovah, dan wi musu luku bun taki wi no e weigri fu teki a tiri fu trawan. Te wi abi heimemre, dan dati kan gi wi a denki taki wi no abi a tiri fu trawan fanowdu. Fu eksempre, wi kan weigri fu teki a rai di wi e kisi fu den wan di e teki fesi na mindri a pipel fu Gado. Gado poti wan getrow èn koni srafu fu gi wi yeye nyanyan na a reti ten (Mat. 24:45-47). Wi musu abi a sakafasi fu kon si taki disi na a fasi fa Yehovah e sorgu gi a pipel fu en na ini a ten disi. Wi musu de leki den getrow apostel. Di son disipel bosroiti fu drai baka gi Yesus, dan Yesus aksi den apostel: „Unu no wani gowe tu?” Petrus piki en: „Masra, na suma wi musu go? Yu abi wortu di e gi sma têgo libi.”—Yoh. 6:66-68.
14, 15. Fu san ede wi musu abi a sakafasi fu fiti den rai fu Bijbel?
14 Te wi e teki a tiri fu Yehovah, dan dati wani taki dati wi e fiti den rai di e komoto fu a Wortu fu en. Fu eksempre, a getrow èn koni srafu grupu e gi wi a rai fu ’tan wiki èn fu de na ai’ (1 Tes. 5:6). A rai disi fiti srefisrefi na ini den lasti dei disi pe furu sma ’lobi densrefi nomo, èn pe furu sma lobi moni’ (2 Tim. 3:1, 2). A denki disi kan abi krakti na wi tapu? Iya. Te wi e suku fu doro marki di no abi noti fu du nanga na anbegi fu wi, dan a bribi fu wi kan kon swaki, noso wi ben kan bigin feti baka gudu (Luk. 12:16-21). Fu dati ede, a bun srefisrefi te wi e fiti a rai fu Bijbel èn te wi no e teki na eksempre fu furu fu den sma na ini a grontapu fu Satan, fu di den sma dati e denki densrefi nomo!—1 Yoh. 2:16.
15 Owruman na ini den difrenti gemeente e sorgu taki wi e kisi a yeye nyanyan di a getrow èn koni srafu sreka gi wi. Bijbel e gi wi a rai disi: „Gi yesi na den wan di e teki fesi na un mindri èn saka unsrefi na den ondro, bika den e sorgu unu; den e du disi leki sma di sa musu gi frantwortu fu dati; na so fasi den kan du disi nanga prisiri èn den no sa du dati nanga geme, bika disi no ben o bun gi unu” (Hebr. 13:17). A sani disi wani taki dati den gemeente owruman no e meki fowtu? Kwetikweti! Gado sabi moro leki iniwan sma sortu swakifasi den abi. Toku a wani taki wi e saka wisrefi na den ondro. Te wi e wroko makandra nanga den owruman aladi den abi swakifasi, dan dati e sori taki wi e teki a tiri fu Yehovah.
A de prenspari fu abi sakafasi
16. Fa wi kan sori lespeki gi Yesus leki Edeman fu a Kresten gemeente?
16 Ala ten wi musu hori na prakseri taki Yesus na a trutru Edeman fu a gemeente (Kol. 1:18). Dati na wán reide fu san ede wi musu de klariklari fu saka wisrefi na den owruman ondro, èn wi musu abi „bigi lespeki” gi den (1 Tes. 5:12, 13). A no de fu taki, dati gemeente owruman kan sori taki den e saka densrefi tu na ondro a tiri fu Gado. Iya, den e luku bun fu no kon nanga den eigi denki, ma den musu leri den brada nanga sisa san Gado e taki. Den e ’hori densrefi na san skrifi’, èn den no e leri sma den eigi denki.—1 Kor. 4:6.
17. Fu san ede a no bun te wi e angri fu kisi makti noso biginen?
17 Ala sma na ini a gemeente musu luku bun fu no suku den eigi glori (Odo 25:27). Soleki fa a sori, dan wan spesrutu disipel di na apostel Yohanes ben miti, gowe libi a tru anbegi fu a sani dati ede. Yohanes ben skrifi: „Diotrefes di lobi fu teki a fosi presi na den mindri, no e teki noti fu wi nanga lespeki. Dati meki te mi kon, mi sa taki fu den sani di a e tan du, namku taki a e waka e taki wan lo ogri fu wi” (3 Yoh. 9, 10). Wi kan leri wan sani fu a tori disi. Te wi si taki wi e angri fu kisi makti noso biginen, dan a bun taki wi e du muiti fu rutu iniwan fu den prakseri disi puru na ini wi ati. Bijbel e taki: „Bigimemre e kon bifo wan sma fadon, èn wan yeye fu heimemre e kon bifo wan sma e naki futu.” Den wan di e teki a tiri fu Gado musu luku bun taki den no e kisi heimemre, bika dati sa meki den kisi syen.—Odo 11:2; 16:18.
18. San sa yepi wi fu teki a tiri fu Yehovah?
18 Iya, yu musu abi a fasti bosroiti fu teki a tiri fu Yehovah èn fu kakafutu gi a denki fu den grontapusma di no wani teki a tiri fu trawan. Kon abi a gwenti fu denki dipi fu a bigi grani di yu abi fu dini Yehovah. A grani di yu abi fu de wan futuboi fu Gado, e sori taki Gado hari yu kon krosibei na en nanga yepi fu en santa yeye (Yoh. 6:44). Noiti no lasi warderi gi a grani di yu abi fu de wan anbegiman fu Gado. Du muiti fu sori na ini ala afersi fu yu libi taki yu e weigri fu du sani soleki fa yu srefi wani, ma taki yu e teki a tiri fu Yehovah.
Yu e memre disi ete?
• San a wani taki fu teki a tiri fu Yehovah?
• Fu san ede wi musu leri fa fu gebroiki wi frustan fu man si sani krin, so taki wi man teki a tiri fu Yehovah?
• Na sortu fasi Satan e pruberi fu kori wi fu no teki a tiri fu Gado?
• Fu san ede wi musu abi sakafasi fu man teki a tiri fu Yehovah?
[Aksi fu a tori disi]
[Prenki na tapu bladzijde 18]
„Fu di Gado na wi tiriman, meki wi musu gi yesi na en na presi fu libisma”
[Prenki na tapu bladzijde 20]
A bun fu hori wisrefi na den markitiki fu Gado ala ten