Wi swaki, ma wi tranga

DEN swakifasi di yu abi kan meki taki yu lasi-ati so te, taki yu no sabi san fu du. Den de nanga yu neleki te kupari de na wan sma en skin. Yu kan denki taki noiti yu o man basi den swakifasi fu yu, noso taki yu no bun nofo fu du dati. Yu kan kisi a denki dati te yu e teki yusrefi gersi nanga trawan èn te yu e denki taki trawan bun moro yu. Noso a kan de so taki yu abi wan siki di e meki yu kon swaki moro nanga moro èn di e meki yu lasi yu prisiri na ini a libi. Awansi san na a reide fu san ede yu e firi so, a kan gersi leki noti no kan yepi yu. Kande yu e firi neleki Yob, di ben taigi Gado: „O, taki yu ben sa kibri mi na ini Syeol, taki yu ben sa kibri mi, teleki na atibron fu yu saka, taki yu ben o poti wan ten gi mi èn ben sa memre mi!”—Yob 14:13.

San kan yepi yu fu komoto na ini a situwâsi disi di e meki yu firi leki nowan howpu no de? Aladi a situwâsi fu yu kan muilek srefisrefi, toku a de fanowdu taki yu no e denki den problema fu yu tumusi. Fu eksempre, yu kan poti prakseri na den sani di Yehovah aksi en getrow futuboi Yob: „Pe yu ben de di mi ben seti a fondamenti fu grontapu? Taigi mi, efu yu abi frustan trutru. Suma ben marki en, efu yu sabi, noso suma ben hari wan lin na en tapu fu marki en?” (Yob 38:4, 5) Te wi e denki san den aksi dati wani taki trutru, dan dati o meki wi frustan taki a koni nanga a krakti fu Yehovah bigi srefisrefi. Gado abi bun reide fu san ede a gi pasi taki a situwâsi na ini a disiten grontapu de so ete.

„Wan maka na ini mi skin”

Wan tra getrow futuboi fu Yehovah ben aksi En fu puru ’wan maka na ini en skin’, noso wan problema di ben tan trobi en. Na apostel Paulus ben begi Gado dri leisi fu puru a problema disi. Wi no sabi san a problema dati ben de, ma neleki fa a fruferi te wan maka de na ini yu skin, na so a problema disi ben kan meki Paulus lasi en prisiri na ini a diniwroko fu Yehovah. Paulus ben  taki dati a maka na ini en skin, noso a problema di a ben abi, ben e tan pina en. Yehovah ben taigi en: „A no-frudini bun-ati fu mi nofo gi yu; bika a krakti fu mi e kon volmaakti te yu swaki.” Yehovah no puru a maka dati na ini en skin. Paulus ben abi fu libi nanga a maka dati, ma a ben taki tu: „Te mi swaki, dan mi tranga” (2 Kor. 12:7-10). San a ben wani taki nanga den wortu dati?

Wan wondru no pasa di puru a problema dati di Paulus ben abi. Ma toku, disi no meki taki a no ben man du aparti sani na ini a diniwroko fu Yehovah. Paulus ben poti en frutrow tapu a yepi di Yehovah e gi, èn a ben tan aksi Yehovah fu yepi en (Fil. 4:6, 7). Na a kaba fu Paulus en libi na grontapu, a ben man taki: „Mi feti a bun feti, mi lon a streilon te na a kaba, mi no lasi bribi.”—2 Tim. 4:7.

Yehovah e gebroiki sondu libisma fu du a wani fu en aladi den abi swakifasi nanga problema, èn fu dati ede a fiti trutru taki a e kisi a grani gi dati. Yehovah kan gi libisma tiri nanga koni so taki den o man sabi fa fu handri te den abi problema, èn so taki den o man tan abi prisiri na ini a diniwroko fu en. Iya, aladi sondu libisma abi swakifasi, toku Yehovah kan gebroiki den fu du aparti sani.

Paulus ben taki fu san ede Gado no ben puru a maka na ini en skin. A ben taki: „Fu no meki taki mi e denki tumusi furu fu misrefi” (2 Kor. 12:7). A „maka” di Paulus ben abi, ben memre en na den swakifasi fu en, èn a ben yepi en fu tan abi sakafasi. A sani disi e kruderi nanga san Yesus ben leri sma: „Den o saka a sma di e hei ensrefi, èn den o hei a sma di e saka ensrefi” (Mat. 23:12). Te den futuboi fu Gado e kisi tesi, dan dati e leri den fu abi sakafasi, èn a e yepi den fu frustan taki den musu poti den frutrow tapu Yehovah efu den wani horidoro na wan getrow fasi. Sobun, neleki na apostel Paulus, den kan ’meki bigi gi Yehovah’.—1 Kor. 1:31.

Swakifasi di wi no e si

Son sma abi swakifasi di den no e si na densrefi, noso den no wani erken taki den abi den swakifasi dati. Fu eksempre, wan sma kan denki tumusi fu ensrefi, èn poti tumusi furu frutrow tapu den sani di ensrefi man du (1 Kor. 10:12). Wan tra swakifasi di sondu libisma abi nofo tron, na a angri di den abi fu de prenspari.

Yoab, di ben tron edeman fu a legre fu Kownu David, ben de wan man di ben abi deki-ati, a ben sabi fa fu teki koni bosroiti na ini muilek situwâsi, èn a ben man lusu problema. Ma Yoab ben tyari ensrefi na wan fasi di no fiti kwetikweti, fu di a ben denki tumusi furu fu ensrefi èn a ben du ala san a man fu kisi furu makti. A kiri tu legre-edeman na wan ogri-ati fasi. A fosiwan ben de Abner, èn a kiri en fu di a ben wani pai en baka gi san a ben du. Bakaten, a kiri Amasa, en brada pikin. Yoab ben man du dati, fu di a du neleki a go taki en odi. Nanga en reti-anu, Yoab grabu Amasa na en barba neleki a ben o bosi en, èn nanga en kruktu-anu a hari en feti-owru èn kiri Amasa (2 Sam. 17:25; 20:8-10). Yoab ben lasi en posisi leki legre-edeman fu di den ben poti Amasa na en presi. Yoab gebroiki na okasi disi fu kiri a man di ben teki en presi, kande fu di a ben howpu taki a ben o tron legre-edeman baka. Yu kan si taki Yoab no ben basi den firi fu en, èn a no ben man hori ensrefi fu no feti fu kisi wan hei posisi. A handri na wan ogri-ati fasi sondro fu sori berow. Syatu bifo Kownu David dede, a taigi en manpikin Salomo fu sorgu taki Yoab dede fu di a du den ogri sani dati.—1 Kow. 2:5, 6, 29-35.

Awansi san e pasa, wi no musu meki den takru lostu fu wi basi wi. Wi kan basi den swakifasi fu wi. A fosi sani di wi musu du na fu sabi san na den swakifasi fu wi. Te wi sabi dati kaba, dan wi kan du muiti fu basi den. Wi kan begi Yehovah doronomo, fu aksi en fu yepi wi basi den swakifasi dati. Boiti dati, wi kan studeri en Wortu finifini fu kon sabi fa wi kan basi den takru lostu dati (Hebr. 4:12). A de fanowdu kande taki wi e tan du muiti fu basi den swakifasi fu wi, èn wi no musu lasi-ati efu wi musu tan du a muiti disi. Kande wi o abi fu tan du dati solanga wi na sondusma. Paulus ben frustan taki na so a ben de nanga en, fu di a skrifi: „San mi wani du, mi no e du, ma san mi no lobi kwetikweti, na dati mi e du.” Ma soleki fa yu sabi, Paulus no ben libi ensrefi taki den swakifasi basi en, leki a no ben man du noti fu basi den firi dati. Tra fasi leki dati, a ben tan meki tranga muiti fu basi den swakifasi fu en, fu di a ben poti  en frutrow tapu a yepi di Gado e gi nanga yepi fu Yesus Krestes (Rom. 7:15-25). Na ini wan tra tekst, Paulus ben taki: „Ma mi e kofu mi skin èn mi e basi en neleki a de wan srafu, so taki a no sa de so, taki na wan noso tra fasi, baka te mi preiki gi tra sma, Gado no feni mi bun.”—1 Kor. 9:27.

Libisma abi a gwenti fu suku reide fu taki bun fu a fasi fa den e handri. Wi kan feti teige a fasi dati te wi e kon si sani soleki fa Yehovah e si den. Wi kan du a sani disi di Paulus taigi den Kresten fu du: „Tegu gi ogri, ma tan du bun” (Rom. 12:9). Te wi e feti fu basi den swakifasi fu wi, dan wi o abi fu de opregti nanga wisrefi, wi musu abi a fasti bosroiti fu wini den swakifasi fu wi, èn wi musu dwengi wisrefi. David ben aksi Yehovah: „Krin den niri fu mi èn na ati fu mi” (Ps. 26:2). David ben sabi taki Gado kan ondrosuku finifini san na den moro dipi firi fu wi, èn A kan yepi wi te dati de fanowdu. Te wi e teki a tiri di Yehovah e gi nanga yepi fu en Wortu èn en santa yeye, dan dati o yepi wi fu basi den swakifasi fu wi moro nanga moro.

Son sma di abi problema, e feni kande taki densrefi no man lusu den problema dati. A no de fu taki dati den gemeente owruman kan gi den sma disi yepi na wan lobi-ati fasi èn den kan gi den deki-ati tu (Yes. 32:1, 2). Ma a de wan koni sani fu no fruwakti tumusi furu. Son problema no kan lusu dorodoro na ini a disiten sistema. Ma toku, furu sma leri fa den musu handri na ini den situwâsi dati, èn dati yepi den fu abi prisiri na ini den libi.

Wi abi a dyaranti taki Yehovah o yepi wi

Awansi sortu problema wi abi na ini den muilek ten disi, wi kan de seiker taki Yehovah sa tiri wi èn a sa yepi wi. Bijbel e gi wi a deki-ati disi: „Fu dati ede, un musu saka unsrefi na ondro a makti anu fu Gado, so taki a kan hei unu na a reti ten; èn un musu trowe ala un sorgu na en tapu, bika a e broko en ede nanga unu.”—1 Petr. 5:6, 7.

Di Kathy, wan sisa di ben e wroko furu yari kaba na Bethel, kon sabi taki en masra abi a siki fu Alzheimer, dan a ben feni taki a no bun nofo fu man horidoro te a ben o kisi fu du nanga den tyalensi di ben o kon leki bakapisi fu a siki dati. Ibri dei a ben musu begi Yehovah fu gi en a koni nanga a krakti fu go doro. Di a masra fu en ben e kon siki moro nanga moro, dan brada di ben sori Kresten lobi, teki en na den tapu fu kon sabi  moro bun fa fu handri nanga wan sma di abi a siki disi. Boiti dati, sisa di ben broko den ede nanga Kathy èn nanga en masra, ben gi en deki-ati nanga krakti. Nanga yepi fu den Kresten disi, Yehovah yepi Kathy, èn a ben man sorgu gi en masra sowan 11 yari ete teleki en masra dede. Kathy e taki: „Nanga watra-ai mi e taigi Yehovah tangi nanga mi heri ati, fu di a yepi mi so furu fu man go doro. Mi no ben sabi taki mi ben man tan du san mi ben musu du fu so wan langa pisi ten, aladi mi ben kon swaki fu di mi ben weri srefisrefi.”

Yepi di wi e kisi fu basi den swakifasi fu wi di wi no e si

Te sma e firi leki den no warti, dan den kan denki taki Yehovah no o arki den te den e aksi en fu yepi den na ini muilek ten. Na den sortu momenti dati a bun fu prakseri san David ben taki di a ben firi syen gi a seryusu sondu di a du nanga Batseiba. A ben taki: „Wan ati di broko èn di masi, o Gado, yu no sa wisiwasi” (Ps. 51:17). David ben sabi taki a ben kan begi Gado, èn fu di a ben abi opregti berow meki a ben abi a dyaranti taki Gado ben o abi sari-ati gi en. Neleki fa Yehovah e sori sari-ati gi sma, na so Yesus e sori dati tu. Na Evangelie skrifiman Mateyus ben taki fa den wortu fu Yesaya kon tru na ini Yesus. A ben skrifi: „A no sa masi wan warimbo di broko, èn a no sa kiri wan faya di e suku fu dede” (Mat. 12:20; Yes. 42:3). Di Yesus ben de na grontapu, a ben sori sari-ati gi den mofinasma èn gi den sma di ben kisi kwinsi. Na agersifasi, a no ben kiri a pikinso faya di wan sma abi, neleki fa wan sma no e kiri wan faya na ini wan kokolampu di e suku fu dede. Na presi fu dati, na wan safu-ati fasi Yesus ben e sorgu gi den wan di e pina, so taki den kan kisi krakti baka fu go doro. Na so a ben e handri di a ben de na grontapu. Yu e bribi taki Yesus de so te now ete, èn taki a e firi gi yu te yu e broko yu ede nanga den swakifasi fu yu? Luku taki Hebrewsma 4:15 e sori taki Yesus na a Sma di „man frustan den swakifasi fu wi”.

Di Paulus ben skrifi fu ’a maka na ini en skin’, dan a ben taki dati a krakti fu Krestes de „leki wan tenti” na en tapu (2 Kor. 12:7-9). Paulus ben firi taki Gado ben e kibri en nanga yepi fu Krestes, neleki fa wan sma e firi te a de na ini wan tenti èn a e kibri gi alen. Neleki Paulus, wi no abi fu brokokindi gi den swakifasi fu wi èn gi den problema fu wi. Te wi wani tan abi wan bun matifasi nanga Yehovah, dan wi kan gebroiki ala den sani di A e gi wi nanga yepi fu en gemeente na grontapu. Wi kan meki muiti fu du ala san wi man leki libisma, èn wi musu abi ala frutrow sosrefi taki Yehovah o tiri wi. Te wi o ondrofeni taki a krakti fu Gado e yepi wi nanga den swakifasi fu wi, dan wi o man taki a srefi sani disi di Paulus ben taki: „Te mi swaki, dan mi tranga.”—2 Kor. 12:10.

[Prenki na tapu bladzijde 3]

Paulus ben e tan begi Yehovah fu tiri en so taki a ben kan du en diniwroko bun

[Prenki na tapu bladzijde 5]

Kownu David ben poti Yoab leki edeman fu en legre

[Prenki na tapu bladzijde 5]

Yoab ben puru Amasa na pasi fu di a ben e si en leki wan feanti

[Prenki na tapu bladzijde 6]

Na wan lobi-ati fasi, owruman e gi rai fu Bijbel so taki wi kan kisi yepi fu kakafutu gi den problema fu wi