Yu de srekasreka fu opo taki gi a bribi fu yu?

OITI yu ben de na ini wan situwâsi pe yu ben feni taki yu musu opo taki gi a bribi fu yu? Luku san ben pasa nanga Susana, wan sisa di abi 16 yari èn di e libi na ini Paragwei. Na wan fu den les fu en na skoro, den pikin na ini en klas ben taki dati Yehovah Kotoigi no e bribi na ini na „Owru Testamenti”, den no e bribi na ini Yesus Krestes èn na ini Maria. Den pikin ben feni tu taki den Kotoigi na fayafaya kerkisma di ben o feni en moro bun fu dede, leki fu teki datrayepi. San yu ben o du na ini so wan situwâsi?

Susana begi Yehovah èn a opo en anu. Fu di a les ben de fu kaba, meki a ben aksi en skoromisi efu a mag fruteri a klas wan tra leisi san en leki wan fu den Kotoigi fu Yehovah e bribi. A skoromisi ben feni dati bun wantewante. Na ini den tu wiki baka dati, Susana sreka ensrefi fu fruteri a klas san a e bribi, èn a du dati nanga yepi fu a brochure Jehovah’s Getuigen — Wie zijn zij? Wat geloven zij?

Dan a dei doro taki Susana fruteri a klas san a e bribi. A fruteri den pikin fu san ede wi nen Yehovah Kotoigi. A fruklari tu sortu howpu wi abi gi a ten di e kon, èn fu san ede wi no e teki brudu. Baka dati a aksi a klas efu den abi sani fu aksi. Pikinmoro ala studenti opo den anu fu poti aksi. A skoromisi ben fruwondru taki a yongu meisje ben e piki den aksi nanga yepi fu Bijbel.

Wán studenti ben taki: „Mi go na wan Kownukondre zaal wan leisi, èn nowan enkri prenki noso popki ben de drape.” A skoromisi ben wani sabi fu san ede dati ben de so. Susana ben leisi Psalm 115:4-8 nanga Exodus 20:4. A skoromisi ben fruwondru, èn a taki: „Fa a kan taki den kerki fu wi lai nanga prenki noso popki, aladi Bijbel e krutu den sani dati?”

Sowan 40 miniti langa den studenti ben e tan poti aksi èn Susana ben piki den aksi. Di Susana aksi a klas efu den wani si a video Geen bloed — De geneeskunde kan de uitdaging aan, dan alamala ben wani dati. Sobun a skoromisi seti sani so taki den ben kan taki moro fara fu a tori disi na a tra dei. Baka di a klas luku a video, dan Susana fruteri den fu den difrenti sortu datrayepi pe datra no e gebroiki brudu, èn di son Yehovah Kotoigi e feni bun. Di a skoromisi yere dati, a taki: „Mi no ben sabi taki someni tra sortu datrayepi de, èn mi no ben sabi tu taki a abi so furu wini te sma no e teki brudu. A de so taki na Yehovah Kotoigi wawan kan kisi den sortu datrayepi dati?” Di a skoromisi yere taki ala sma kan kisi den sortu datrayepi disi, dan a taki: „Wan tra leisi te Yehovah Kotoigi kon na mi oso, dan mi o taki nanga den.”

Susana ben sreka ensrefi fu hori wan takimakandra fu 20 miniti, ma  te fu kaba a takimakandra ben de dri yuru langa. Wan wiki baka dati, tra studenti di ben de fu tra kerki, ben fruteri a klas tu san den e bribi. Na a kaba, furu pikin fu a klas poti aksi gi den studenti dati, ma den no ben man opo taki gi a bribi fu den. A skoromisi aksi den studenti dati: „Fa a kan taki unu no man opo taki gi a bribi fu unu neleki fa a tra studenti di de wan Yehovah Kotoigi ben du?”

Den studenti piki: „Den Yehovah Kotoigi trutru e studeri Bijbel. Wi no e du dati.”

A skoromisi drai luku Susana, èn a taki: „Unu e studeri Bijbel trutru èn unu e meki muiti fu du san skrifi na ini. Unu de fu prèise gi dati.”

Susana ben kan sidon pî, sondro fu opo taki gi a bribi fu en. Ma fu di a opo taki gi a bribi fu en, meki a handri neleki wan meisje fu Israel, di nen no skrifi na ini Bijbel. Den Siriasma ben tyari a meisje disi gowe leki srafu. Bakaten, a meisje ben kon tan na ini na oso fu Naman, a legre-edeman fu Siria, di ben abi wan takru siki na en skin. A meisje fu Israel no ben frede fu taigi en misi: „Efu mi basi ben de nomo na fesi a profeiti di de na Samaria! Dan a ben o dresi en fu a gwasi fu en.” A meisje no ben man hori en mofo fu no taki fu a tru Gado. Disi ben abi leki bakapisi taki en basi, Naman, kon tron wan anbegiman fu Yehovah.—2 Kow. 5:3, 17.

Na a srefi fasi, Susana no ben man hori en mofo fu no gi kotoigi fu Yehovah nanga a pipel fu En. Fu di Susana opo taki gi a bribi fu en di sma no ben taki bun fu dati, meki a gi yesi na a Bijbel komando disi: „Santa a Krestes leki Masra na ini un ati, èn ala ten un musu de srekasreka fu opo taki gi unsrefi na fesi ala sma di e aksi unu fu a howpu di de na ini unu, ma du dati na wan safri fasi èn nanga bigi lespeki” (1 Petr. 3:15). Yu de srekasreka fu opo taki gi a bribi fu yu te yu e kisi na okasi fu du dati?

[Prenki na tapu bladzijde 17]

Den sani disi kan yepi yu fu opo taki gi a bribi fu yu