Fu san ede a de prenspari fu preiki oso fu oso na ini a ten disi?
Fu san ede a de prenspari fu preiki oso fu oso na ini a ten disi?
„Ibri dei den ben e tan gi sma leri na ini a tempel èn na ibri oso, èn den ben e fruteri sma a bun nyunsu fu Yesus, a Krestes.”—TORI. 5:42.
1, 2. (a) Na sortu fasi furu Kotoigi fu Yehovah e du a preikiwroko? (b) Na sortu sani wi sa poti prakseri na ini na artikel disi?
SMA na ini pikinmoro ibri kondre na grontapu gwenti fu si fa tu sma di weri bun krosi e waka go fu a wán oso go na a trawan. Den sma disi e pruberi fu fruteri den ososma syatu san Bijbel e taki fu Gado Kownukondre. Efu na ososma wani sabi moro fu a boskopu disi, dan den tu sma kan gi en Bijbel publikâsi èn den kan aksi en efu a wani studeri Bijbel sondro taki a abi fu pai. Baka dati den e go na a tra oso. Efu yu e teki prati na a wroko disi, dan kande yu ondrofeni taki nofo tron sma e si yu leki wan Kotoigi fu Yehovah, srefi bifo yu e bigin taki nanga den. Iya, furu sma kon sabi Yehovah Kotoigi leki sma di e preiki oso fu oso.
2 Difrenti fasi de fa wi e du a wroko di Yesus gi wi fu preiki a bun nyunsu èn fu meki disipel (Mat. 28:19, 20). Wi e gi kotoigi na wowoyo, na tapu uku fu strati, èn na tra presi pe furu sma e kon (Tori. 17:17). Wi e bèl furu sma èn wi e skrifi furu brifi tu fu prati a bun nyunsu nanga den. Wi e fruteri den sma di wi e miti na ini wi aladei libi, den tru tori fu Bijbel. Na organisâsi fu wi abi sosrefi wan Web site di e gi sma okasi fu kon sabi tori fu Bijbel na ini moro leki 300 tongo. * Ala den fasi disi fa wi e prati a bun nyunsu, e tyari bun bakapisi kon. Ma na furu presi wi e preiki a bun nyun oso fu oso, èn dati na a moro prenspari fasi fa wi e du a wroko disi. Fa wi du sabi taki wi musu preiki oso fu oso? Fa a du kon taki a pipel fu Gado na ini a ten disi e preiki oso fu oso na heri grontapu? Èn fu san ede a wroko disi prenspari na ini a ten disi?
A fasi fa den apostel ben e preiki
3. Sortu rai Yesus ben gi den apostel fu en, èn fa den ben musu fiti a rai dati na ini a preikiwroko?
3 Bijbel e sori wi taki wi musu preiki oso fu oso. Di Yesus ben seni den apostel fu en fu go preiki, dan a taigi den: „Awansi na ini sortu foto noso dorpu unu e go, suku suma warti fu teki unu na ini oso èn fu yere a boskopu.” Fa den ben musu suku den sma di warti? Yesus ben taigi den fu go na den oso fu sma. A ben taki: „Te unu e go na ini na oso, dan taki na osofamiri odi; efu na oso warti en, dan meki a vrede di unu wani taki den musu kisi, kon na tapu na osofamiri.” A de so taki den ben musu go na den sma oso sondro taki den sma ben kari den kon? Luku san Yesus ben taki moro fara: „Efu wan presi de pe sma no e kari unu kon na inisei, noso den no e arki san unu e taki, dan un musu komoto na ini na oso noso a foto dati, èn naki a doti puru na un futu” (Mat. 10:11-14). Den rai disi e sori krin taki te den apostel ben e „waka pasa na ini ala den dorpu na ini a heri kontren fu fruteri a bun nyunsu”, dan den no ben musu wakti teleki den sma ben e kari den kon, ma den srefi ben musu go na den sma oso.—Luk. 9:6.
4. Sortu bijbeltekst e sori krin taki wi musu preiki oso fu oso?
4 Bijbel e sori krin taki den apostel ben e preiki oso fu oso. Fu eksempre, luku san Tori fu den Apostel 5:42 e taki fu den apostel disi: „Ibri dei den ben e tan gi sma leri na ini a tempel èn na ibri oso, èn den ben e fruteri sma a bun nyunsu fu Yesus, a Krestes.” Sowan 20 yari baka dati, na apostel Paulus taigi den owruman fu a gemeente na ini Efeise a sani disi: ’Mi no tapu fu fruteri unu ala bun sani, èn mi gi unu leri na fesi fu ala sma èn sosrefi na un oso.’ A de so taki Paulus ben go preiki gi den owruman disi, bifo den tron bribiman? Soleki fa a sori, dan dati ben de so, fu di wan fu den sani di a ben leri den, na taki den ben musu ’sori Gado taki den abi berow èn taki den ben musu bribi na ini Masra Yesus’ (Tori. 20:20, 21). Disi na san wan buku e taki fu Tori fu den Apostel 20:20: „A moi fu si taki a tumusi prenspari preikiman disi ben e preiki oso fu oso” (Robertson’s Word Pictures in the New Testament).
Wan legre fu sprenka na ini a ten disi
5. Nanga sortu sani a buku Yoèl e agersi a preikiwroko?
5 A kotoigiwroko di den Kresten du na ini a fosi yarihondro, ben de a bigin nomo fu wan moro bigi wroko di ben o du na ini a ten disi. A profeiti Yoèl ben agersi a preikiwroko fu den salfu Kresten nanga wan legre fu woron, kakalaka, èn sosrefi sprenka di ben o tyari pori kon (Yoèl 1:4). Den sprenka disi e kon leki wan legre èn den e pasa ibri sani di e tapu pasi gi den, den e go na ini sma oso, èn den e nyan ibri sani di de na tapu den pasi. (Leisi Yoèl 2:2, 7-9.) Den wortu disi e sori krin fa a pipel fu Gado na ini a ten disi e horidoro èn e wroko finifini na ini a preikiwroko di den e du! A preikiwroko di e du oso fu oso, na a moro prenspari fasi fa den salfu Kresten nanga den „tra skapu” di e wroko makandra nanga den e meki a profeititori disi kon tru (Yoh. 10:16). Fa a du kon taki wi leki Yehovah Kotoigi bigin preiki a bun nyunsu na a fasi fa den apostel ben e du dati?
6. Sortu deki-ati Kresten kisi na ini 1922, ma fa sonwan fu den ben feni a sani disi?
6 Fu sensi 1919, na organisâsi sori krin taki ibri Kresten abi a frantwortu fu preiki a bun nyunsu. Fu eksempre, wan artikel di nen „Service Essential” (A preikiwroko de prenspari) na ini a Watch Tower fu 15 augustus 1922, ben memre salfu Kresten o prenspari a de fu „prati a boskopu disi gi sma nanga yepi fu publikâsi èn fu taki nanga den sma disi na den oso. Na so sma ben kan kon sabi taki a kownukondre fu hemel de krosibei”. A Bulletin (now a nen Wi Kownukondre diniwroko) ben skrifi finifini fa fu preiki a boskopu disi. Ma toku wan pikin grupu sma nomo ben e preiki oso fu oso na ini a bigin. Son sma ben e weigri fu du dati. Den ben abi difrenti reide fu san ede den no ben wani teki prati na a preikiwroko. Ma a moro bigi problema di sonwan fu den ben abi, na taki den ben e si a wroko disi leki wan lagi wroko. Fu di na organisâsi ben e sori moro nanga moro taki a de prenspari fu preiki oso fu oso, meki safrisafri furu fu den sma disi hari den srefi puru fu Yehovah en organisâsi.
7. San den brada kon si na ini den yari syatu baka 1950?
7 Na ini den yari baka dati, moro nanga moro Kresten bigin teki prati na a preikiwroko. Ma a kon na krin taki ibri Kresten ben musu kisi moro leri fa fu preiki oso fu oso. Fu eksempre, luku san ben de a situwâsi na ini Amerkankondre. Na ini den yari syatu baka 1950, a ben de so taki 28 procent fu den Kotoigi na ini a kondre dati ben e prati soso traktaat gi sma, noso den ben tanapu na strati e prati tijdschrift. Moro leki 40 procent fu den Kotoigi disi no ben e teki prati doronomo na a preikiwroko, èn furu mun baka makandra den no ben e gi kotoigi srefisrefi. San den brada ben kan du fu yepi ala den dopu Kresten fu preiki oso fu oso?
8, 9. Sortu sani na organisâsi seti na ini 1953 fu gi sma leri, èn sortu bakapisi dati tyari kon?
8 Na wan internationaal kongres di ben hori na ini New York City na ini 1953, den brada meki den sma drape kon frustan krin taki a ben de prenspari fu preiki oso fu oso. Brada Nathan H. Knorr ben taki dati a moro prenspari wroko di ala Kresten owruman musu du, na fu yepi ibri Kotoigi fu tron wan preikiman di e preiki oso fu oso doronomo. A ben taki: „Ibri sma musu sabi fa fu preiki a bun nyunsu oso fu oso.” Fu doro a marki disi, na organisâsi seti sani fu leri tru Kresten na heri grontapu fa fu du a preikiwroko. Den Kotoigi di no ben e preiki oso fu oso ete ben e kisi leri fa fu bigin wan takimakandra nanga sma na den oso, fa fu gebroiki Bijbel fu taki-go-taki-kon nanga sma, èn fa fu piki den aksi fu sma.
9 A seti disi tyari tumusi moi bakapisi kon. Na ini wan pisi ten fu tin yari, a nomru fu preikiman na heri grontapu kren nanga 100 procent, a nomru fu gobaka kren nanga 126 procent, èn a nomru fu sma di e studeri Bijbel kren nanga 150 procent. Na ini a ten disi, pikinmoro seibi milyun Kownukondre preikiman e preiki a bun nyunsu na heri grontapu. A bigi gro disi na wan fu den buweisi di e sori taki Yehovah blesi a pipel fu en di e preiki oso fu oso.—Yes. 60:22.
Den e poti wan marki na tapu den wan di sa kisi frulusu
10, 11. (a) Sortu fisyun Esekièl ben kisi, soleki fa a skrifi na Esekièl kapitel 9? (b) Fa a fisyun dati e kon tru na ini a ten disi?
10 A fisyun di a profeiti Esekièl ben kisi, e sori krin o prenspari a de fu preiki oso fu oso. Na ini a fisyun dati, Esekièl e si siksi man di abi fetisani na ini den anu, èn a e si sosrefi wan tra man di weri linnen krosi èn di abi wan enkikokro fu wan sekretarsi na en seibere. A di fu seibi man disi e kisi a komando fu ’hari pasa na mindri fu a foto èn fu poti wan marki na tapu a fesi-ede fu den wan di e soktu èn e geme fu ala den tegu sani di e pasa na mindri fu a foto’. Baka te a di fu seibi man kaba marki den sma, dan den siksi man di abi fetisani fu kiri trawan, e kisi a komando fu kiri ala den wan di no abi a marki.—Leisi Esekièl 9:1-6.
11 Wi e frustan taki na ini a profeititori disi, a man di „weri linnen krosi” e prenki a fikapisi fu den salfu Kresten. Nanga yepi fu a wroko di den abi fu preiki èn fu meki disipel, den salfuwan e poti wan agersi marki na tapu den wan di e tron „tra skapu” fu Krestes (Yoh. 10:16). San na a marki dati? Na wan agersi fasi, a marki disi na a buweisi taki den skapu dati gi densrefi abra na Gado, èn den tron dopu disipel fu Yesus Krestes. Boiti dati, den tron nyun sma di abi den fasi fu Krestes (Ef. 4:20-24). Den sma disi di de leki skapu e tron wán ipi makandra nanga den salfu Kresten èn den e yepi den salfuwan disi nanga a prenspari wroko di den abi fu poti marki na tapu moro sma.—Openb. 22:17.
12. Fa a fisyun fu Esekièl e sori o prenspari a de fu tan suku den wan di de leki skapu?
12 A fisyun fu Esekièl e poti prakseri na wán reide fu san ede a de so prenspari taki wi e tan suku sma di e „soktu èn e geme”. Efu wi no e tan suku den sortu sma disi, dan den kan lasi den libi. Heri esi, den hemel legre fu Yehovah, di den siksi man nanga fetisani e prenki, sa pori den wan di no abi na agersi marki. Na apostel Paulus ben skrifi taki te a ten dati doro, dan Masra Yesus, makandra nanga „den tranga engel fu en” sa „puru atibron na tapu den sma di no sabi Gado èn na tapu den sma di no e gi yesi na a bun nyunsu fu wi Masra Yesus” (2 Tes. 1:7, 8). A tekst disi e sori taki a fasi fa sma e handri te den yere a bun nyunsu, sa tyari kon na krin sortu krutu den sa kisi. Fu dati ede, wi musu tan meki a boskopu fu Gado bekènti te na a kaba (Openb. 14:6, 7). A sani disi e poti wan hebi frantwortu tapu ala den anbegiman fu Yehovah.—Leisi Esekièl 3:17-19.
13. (a) Sortu frantwortu na apostel ben feni taki a ben abi, èn fu san ede a ben e denki so? (b) Sortu frantwortu yu feni taki yu abi na den sma na ini a kontren fu yu?
13 Na apostel Paulus ben frustan taki a ben abi a frantwortu fu preiki a bun nyunsu gi trawan. A ben skrifi: „Mi abi wan paiman na den Grikisma èn na den wan di no de Grikisma, sosrefi na den koni sma èn na den sma di no kisi leri. Dati meki mi e angri fu preiki a bun nyunsu sosrefi gi unu di de na Rome” (Rom. 1:14, 15). Fu di Paulus ben de nanga tangi taki Gado ben sori bun-ati gi en, meki a ben e si en leki wan plekti fu yepi trawan so taki den ben kan kisi wini fu a lobi-bun ati fu Gado, soleki fa en srefi ben kisi wini fu dati (1 Tim. 1:12-16). A ben de neleki a ben abi wan paiman na ibri sma di a ben e miti. A ben feni taki a ben kan pai a paiman dati soso te a ben e preiki a bun nyunsu gi den sma dati. Yu feni taki yu abi so wan paiman tu na den sma di e libi na ini a kontren fu yu?—Leisi Tori fu den Apostel 20:26, 27.
14. San na a moro prenspari reide fu san ede wi e preiki na difrenti presi èn sosrefi oso fu oso?
14 Aladi a de prenspari fu kibri sma libi, toku wan moro prenspari reide de fu san ede wi musu preiki oso fu oso. Na ini a profeititori di skrifi na Maleaki 1:11, Yehovah e taki: „Fu son-opo, iya, te go miti sondongo mi nen sa bigi na mindri den nâsi, èn . . . wan presenti sa meki gi mi nen, iya, wan krin presenti; bika mi nen sa bigi na mindri den nâsi.” Leki wan kontru fu a profeititori disi, den futuboi fu Yehovah e du a diniwroko fu den nanga sakafasi, èn na so den e prèise Yehovah na heri grontapu, so taki ala sma man si dati (Ps. 109:30; Mat. 24:14). A moro prenspari reide fu san ede wi e preiki na difrenti presi èn sosrefi oso fu oso, na fu gi Yehovah „wan srakti-ofrandi fu prèise”.—Hebr. 13:15.
Heri esi prenspari sani o pasa
15. (a) Omeni leisi den Israelsma ben musu waka lontu Yerikow tapu a di fu seibi dei? (b) Te a abi fu du nanga a preikiwroko, dan san disi e sori?
15 Te a abi fu du nanga a preikiwroko, dan sortu tra sani o pasa ete? Wi kan kon frustan sani moro bun te wi e luku a fasi fa den Israelsma teki Yerikow abra, soleki fa a skrifi na ini a buku Yosua. Memre taki syatu bifo Gado pori Yerikow, den Israelsma ben kisi a komando fu waka lontu a foto wán leisi wan dei, èn den ben musu du disi siksi dei langa. Ma tapu a di fu seibi dei, den ben musu waka lontu a foto moro leki wán leisi. Yehovah ben taigi Yosua: „Na a di fu seibi dei un musu waka lontu a foto seibi leisi, èn den priester musu bro na tapu den tutu. Te unu yere den priester e bro na tapu den tutu, dan a heri pipel musu bari bun tranga leki fa fetiman e bari te den e go feti. Dan a skotu fu a foto musu broko fadon” (Yos. 6:2-5). A kan taki wi sa du a preikiwroko moro faya tu. A no de fu taki dati te a sistema disi e kisi pori, dan a nen fu Gado èn sosrefi a Kownukondre boskopu sa meki bekènti moro leki iniwan ten bifo.
16, 17. (a) San o pasa fosi „a bigi banawtu” kon na wan kaba? (b) Na sortu sani wi sa poti prakseri na ini a tra artikel?
16 A kan taki na ini a ten di e kon, a boskopu di wi e meki bekènti o kon de leki ’wan bun tranga babari leki fa fetiman e bari te den e go feti’. A buku Openbaring e agersi seryusu krutuboskopu nanga ’pisipisi ijs di hebi sowan tutenti kilo, èn di e fadon komoto na hemel leki wan bigi alen’. Èn Openbaring 16:21 e taki: „A rampu disi ben hebi srefisrefi.” Wi no sabi ete efu wi sa musu meki den krutuboskopu dati bekènti te wi e preiki oso fu oso. Ma wi kan de seiker taki bifo „a bigi banawtu” kon na wan kaba, a nen fu Yehovah sa meki bekènti moro leki iniwan ten bifo.—Openb. 7:14; Esek. 38:23.
17 Now wi e wakti den prenspari sani di o pasa. Ma na a srefi ten wi musu tan preiki a bun nyunsu fu a Kownukondre fayafaya. Te wi e preiki oso fu oso, dan sortu tyalensi kan miti wi? San wi musu du te den tyalensi disi e miti wi? Na ini a tra artikel, wi sa poti prakseri na den aksi disi.
[Futuwortu]
^ paragraaf 2 A Web site fu na organisâsi nen www.watchtower.org.
San yu ben sa piki?
• Sortu tekst na ini Bijbel e sori taki wi musu preiki oso fu oso?
• Fa na organisâsi sori krin taki a de prenspari fu preiki oso fu oso na ini a ten disi?
• Fu san ede den anbegiman fu Yehovah musu preiki?
• Sortu prenspari sani o pasa na ini a ten di e kon?
[Aksi fu a tori disi]
[Prenki na tapu bladzijde 4]
Yu feni taki neleki na apostel Paulus yu abi a frantwortu fu preiki gi trawan?
[Prenki na tapu bladzijde 5]
Brada Knorr, na ini 1953