Tan preiki oso fu oso awinsi a no makriki fu du dati
Tan preiki oso fu oso awinsi a no makriki fu du dati
„Wi Gado gi wi deki-ati fu fruteri unu a bun nyunsu fu Gado, aladi a ben muilek srefisrefi gi wi.”—1 TES. 2:2.
1. Sortu tesi miti Yeremia, èn fa a ben man pasa den tesi dati?
YEREMIA ben abi den srefi firi leki wi. Di Yehovah taigi en taki a ben musu tron wan „profeiti gi den nâsi”, dan a bari: „Ke, o Moro Hei Masra Yehovah! Luku, mi no sabi kwetikweti fa mi musu taki, bika mi na wan boi ete.” Ma Yeremia ben e frutrow tapu Yehovah, èn fu dati ede a teki a wroko dati (Yer. 1:4-10). Moro leki 40 yari langa, Yeremia kisi fu du nanga sma di no ben wani arki a boskopu fu en, èn nanga sma di no ben wani abi noti fu du nanga en. Boiti dati, sma ben e spotu en, èn den fon en srefi (Yer. 20:1, 2). Son leisi a ben wani tapu nanga a wroko di Gado ben gi en fu du. Ma a tan meki wan boskopu bekènti di sma no ben lobi, èn furu fu den sma no ben wani arki en. Nanga yepi fu a krakti fu Gado, Yeremia du wan sani di noiti a ben o man du nanga en eigi krakti.—Leisi Yeremia 20:7-9.
2, 3. Fa den futuboi fu Gado e kisi fu du nanga den srefi sortu tesi di ben miti Yeremia?
2 Na ini a ten disi, furu fu den futuboi fu Gado kan frustan fa Yeremia ben e firi. Te wi ben e prakseri taki wi ben o abi fu go preiki oso fu oso, dan furu fu wi ben e taki: „Dati na wan sani di mi noiti no o man du.” Ma di wi kon sabi taki Yehovah wani taki wi musu meki a bun nyunsu bekènti, dan wi teki deki-ati èn wi bigin teki prati na a preikiwroko. Ma awinsi a ben de fu wan pisi ten nomo, toku furu fu wi kisi fu du nanga situwâsi di meki en muilek gi wi fu tan teki prati na a preikiwroko. A no de fu taki dati a no makriki fu bigin preiki oso fu oso fu a fosi leisi, èn a no makriki tu fu tan preiki te na a kaba.—Mat. 24:13.
3 Ma kande yu e studeri Bijbel nanga Yehovah Kotoigi, èn kande yu e go na den konmakandra wan pisi ten kaba. A de so taki yu frede pikinso fu bigin preiki oso fu oso? Noso kande yu na wan dopu Kresten. A de so taki yu feni en muilek fu preiki oso fu oso, aladi yu gosontu nofo fu du dati? Yu kan de seiker taki sma fu ala kondre nanga kulturu e tan preiki oso fu oso, aladi a no makriki gi den fu du dati. Yehovah kan yepi yu fu du dati tu.
Teki deki-ati
4. San yepi na apostel Paulus fu preiki a bun nyunsu nanga deki-ati?
4 A no de fu taki dati yu sabi taki a preikiwroko di e du na heri grontapu no e du nanga yepi fu a krakti, noso a koni fu libisma, ma nanga yepi fu a yeye fu Gado (Sak. 4:6). Na so a de tu nanga a diniwroko fu ibri Kresten (2 Kor. 4:7). Luku na eksempre fu na apostel Paulus. A ben e memre a ten di sma ben fon en nanga wan tra zendeling di ben e wroko makandra nanga en. A ben skrifi: „Baka di den sma na Filipi pina wi fosi èn den du sani nanga wi na wan syen fasi, . . . dan wi Gado gi wi deki-ati fu fruteri unu a bun nyunsu fu Gado, aladi a ben muilek srefisrefi gi wi” (1 Tes. 2:2; Tori. 16:22-24). Kande wi no man bribi taki wan fayafaya preikiman leki Paulus ben feni en muilek wan pisi ten fu preiki. Ma neleki wi alamala, Paulus ben musu frutrow tapu Yehovah fu man preiki a bun nyunsu nanga deki-ati. (Leisi Efeisesma 6:18-20.) Fa wi kan teki na eksempre fu Paulus?
5. San na wán fasi fa wi kan kisi deki-ati fu preiki?
5 Wán fasi fa wi kan kisi deki-ati fu preiki a bun nyunsu, na te wi e begi Gado fu yepi wi. Wan pionier sisa ben taki: „Mi e begi Gado fu yepi mi fu taki nanga overtoigi, fu doro den ati fu sma, èn fu abi prisiri na ini a diniwroko. Fu taki en leti, a wroko disi a no fu wi, ma na fu Yehovah. Sobun, wi no man du noti sondro a yepi fu en” (1 Tes. 5:17). Wi alamala musu begi Gado doronomo fu gi wi en santa yeye, so taki wi kan preiki nanga deki-ati.—Luk. 11:9-13.
6, 7. (a) Sortu fisyun Esekièl ben kisi, èn san a fisyun dati ben wani taki? (b) San den disiten futuboi fu Gado kan leri fu a fisyun fu Esekièl?
6 A buku fu Esekièl tyari ete wan sani kon na krin di kan yepi wi fu preiki nanga deki-ati. Na ini wan fisyun, Yehovah gi Esekièl wan lolo, èn na ala tu sei fu a lolo disi „dedesingi, geme, nanga krei” ben skrifi na tapu. Yehovah ben taigi en fu nyan en. Yehovah ben taki: „Manpikin fu libisma, yu musu nyan, so taki yu kan furu yu bere nanga a lolo disi di mi e gi yu.” San a fisyun disi ben wani taki? Esekièl ben musu kon frustan heri bun san a boskopu ben wani taki di a ben musu go meki bekènti. Fu taki en leti, a boskopu ben musu tron wan pisi fu en, èn a ben musu abi krakti tapu den moro dipi firi fu en. A profeiti e taki moro fara: „Mi bigin nyan en, èn a ben switi leki oni na ini mi mofo.” A ben de wan prisiri gi Esekièl fu meki a boskopu fu Gado bekènti gi tra sma, iya, a sani disi ben switi leki oni gi en. A ben si en leki wan bigi grani fu teki presi gi Yehovah èn fu du a wroko di Yehovah ben gi en, aladi dati ben wani taki dati a ben o abi fu tyari wan prenspari boskopu gi sma di no ben wani arki.—Leisi Esekièl 2:8–3:4, 7-9.
7 Den disiten futuboi fu Gado kan leri wan prenspari sani fu a fisyun disi. Wi musu tyari wan prenspari boskopu tu gi sma di nofo tron no e warderi a muiti di wi e du. Fu man tan si a Kresten diniwroko leki wan grani di wi kisi fu Gado, dan wi musu leisi èn studeri Gado Wortu bun. Te wi e studeri frafra, dan wi no o man frustan Gado Wortu bun. Kande yu musu leisi èn studeri Bijbel moro bun, noso kande yu musu du moro muiti fu du den sani disi doronomo. Kande yu musu teki moro ten fu denki dipi fu den sani di yu e leisi.—Ps. 1:2, 3.
Fa fu bigin wan Bijbel takimakandra
8. San yepi son Kownukondre preikiman fu bigin wan Bijbel takimakandra nanga sma te den e preiki oso fu oso?
8 Furu preikiman feni taki te den e preiki oso fu oso, dan a moro muilek sani gi den, na fu bigin wan takimakandra nanga na ososma. A no de fu taki dati na ini son kontren a muilek fu bigin wan takimakandra nanga sma. Son preikiman e bigin taki wan tu sani di e hari a prakseri fu na ososma, èn baka dati den e gi a sma wan traktaat, soleki fa a skrifi na ini a faki na ondrosei. A sani disi e meki en moro makriki gi den preikiman disi fu bigin wan takimakandra nanga sma. A nen fu a traktaat èn den moi prenki na en tapu kan hari a prakseri fu na ososma. Disi e gi wi na okasi fu taki syatu fu san ede wi kon na a sma, èn wi kan poti wan aksi tu gi a sma. Wan tra sani di wi kan du, na fu sori na ososma dri noso fo difrenti traktaat, èn fu aksi en fu teki wan di e hari en prakseri. A no de fu taki dati wi no e suku nomo fu prati traktaat gi sma, noso fu gebroiki den na ibri oso. San wi wani du, na fu bigin wan Bijbel takimakandra nanga sma so taki wi kan studeri Bijbel nanga den.
9. Fu san ede a de prenspari taki wi e sreka wisrefi bun?
9 Awinsi na sortu fasi yu e bigin wan takimakandra nanga sma, sreka yusrefi bun, fu di dati sa yepi yu fu taki nanga overtoigi èn fu de fayafaya te yu e preiki oso fu oso. Wan pionier brada ben taki: „Mi e du a wroko nanga moro prisiri te mi sreka misrefi bun. A sani dati e gi mi deki-ati fu taki nanga sma fu a tori di mi sreka.” Wan tra pionier brada ben taki: „Te mi kon sabi san skrifi na ini den publikâsi di mi wani pristeri gi sma, dan mi e kisi deki-ati fu go fruteri sma fu den sani dati.” Aladi a bun fu prakseri san yu o taki, toku furu sma feni en moro bun fu oefen fosi san den o taki te den de na ini a preikiwroko. Disi e yepi den fu du ala san den man fu plisi Yehovah.—Kol. 3:23; 2 Tim. 2:15.
10. San owruman nanga tra brada kan du fu sorgu taki den preikiman e kisi wini fu a preikiwroko konmakandra?
10 Te wi e kisi rai na a preikiwroko konmakandra, dan dati kan yepi wi fu abi bun bakapisi èn fu de nanga prisiri te wi e preiki oso fu oso. Efu a deitekst e taki fu a preikiwroko, dan a brada kan leisi en, èn a kan taki syatu fu en. Ma a brada di e teki fesi na a preikiwroko konmakandra musu teki nofo ten fu taki, noso fu demo fa den preikiman kan bigin wan takimakandra na wan makriki fasi, èn a takimakandra disi musu fiti gi a kontren dati. A brada kan taki tu fu tra sani di den preikiman kan gebroiki na ini a preikiwroko a dei dati. Den sani disi sosrefi sa yepi den wan di de na a konmakandra fu gi kotoigi na wan bun fasi. Te owruman nanga tra brada di e teki fesi na den konmakandra disi e sreka densrefi bun, dan den sa man yepi den preikiman fu gi wan bun kotoigi, èn den sa man tapu a konmakandra biten.—Rom. 12:8.
Wi sa abi bun bakapisi te wi e arki
11, 12. Te wi e arki sma na wan fasi di e sori taki wi e firi gi den, dan fa dati kan yepi wi fu doro den nanga a bun nyunsu? Gi wan tu eksempre.
11 Boiti taki wi musu sreka wisrefi bun, wi musu broko wi ede tu nanga sma fu man bigin wan Bijbel takimakandra nanga den èn fu man doro na ati fu den sma disi di wi e miti na ini a preikiwroko. Wán fasi fa wi kan sori taki wi e broko wi ede nanga sma, na te wi e arki san den abi fu taki. Wan kring-opziener ben taki: „Te wi abi pasensi nanga sma, èn te wi e sori taki wi de klariklari fu arki den, dan dati e meki taki den wani arki a bun nyunsu. Disi na wan moi fasi fa wi kan sori taki wi e broko wi ede trutru nanga den sma dati.” Te wi e arki bun san sma abi fu taki èn te wi e sori den taki wi e firi gi den, dan dati kan meki taki a sma sa wani sabi moro fu a bun nyunsu. Na ondrofenitori di e kon now e sori taki a sani disi tru.
12 Na ini wan brifi di ben kon na doro na ini wan koranti fu a foto Saint-Étienne, na Fransikondre, wan uma ben fruteri san pasa di tu sma naki na en doro, syatu baka di wan sari sani miti en. A beibi fu en di ben abi dri mun, lasi en libi. Na uma disi ben skrifi: „Wantewante mi si taki den sma disi ben de Yehovah Kotoigi. Mi ben de kaba fu taigi den na wan switi fasi taki mi no ben wani taki nanga den, ne mi si taki den ben abi wan brochure na den. A brochure disi ben e tyari kon na krin fu san ede Gado e gi pasi taki sma e pina. Sobun mi kari den kon na inisei fu sori den taki den sani di den ben e leri sma no ben tru. . . . Den Kotoigi tan na mi oso pasa wán yuru. A fasi fa den ben e arki mi ben e sori krin taki den ben e firi gi mi, èn di den gowe, mi ben e firi so bun taki mi aksi den fu kon ete wan leisi na mi” (Rom. 12:15) (Le Progrès). Baka wan pisi ten, na uma disi bigin studeri Bijbel nanga Yehovah Kotoigi. Luku taki den sani di a ben memre fu a fosi takimakandra di a ben abi nanga den Kotoigi, a no den sani di den sisa ben taki, ma na a fasi fa den ben arki en.
13. Fa wi kan preiki a bun nyunsu na so wan fasi taki a e hari a prakseri fu den sma di wi e miti?
13 Te wi e arki bun san sma abi fu taki èn te wi e sori taki wi e firi gi den, dan fu taki en leti, wi e gi den sma disi na okasi fu fruteri wi fu san ede den abi a Kownukondre fanowdu. Disi sa meki en moro makriki gi wi fu prati a bun nyunsu nanga den. Kande yu si taki bun preikiman nofo tron na sma di e arki bun te trawan e taki (Odo 20:5). Den e sori taki den e broko den ede trutru nanga den sma di den e miti na ini a preikiwroko. Den no e suku nomo fu kon sabi fa den sma nen èn pe den e tan, ma den wani kon sabi tu san e hari den prakseri, èn sortu broko-ede den sma disi abi. Te wan sma e taki sortu sani e gi en broko-ede, dan wan bun preikiman e go ondrosuku a tori disi moro fini, èn syatu baka dati a e drai go baka na a sma fu fruteri en san a kon sabi. Neleki na apostel Paulus, den e preiki a Kownukondre boskopu na so wan fasi taki a e hari a prakseri fu den sma di den e miti. (Leisi 1 Korentesma 9:19-23.) Te preikiman e sori taki den e broko den ede trutru nanga sma, dan dati e meki taki sma wani kon sabi a bun nyunsu, èn a sani disi na wan moi fasi fa den preikiman e sori taki „wi Gado abi trutru sari-ati”.—Luk. 1:78.
Tan abi wan bun denki fu sma
14. Fa wi kan sori den fasi fu Yehovah te wi e du a diniwroko fu wi?
14 Fu di Yehovah e warderi wi, meki a gi wi a grani fu teki wi eigi bosroiti. Aladi Gado abi ala makti, toku a no e dwengi nowan sma fu dini en. A wani taki sma musu dini en fu di den lobi en, èn a e blesi den wan di e sori warderi gi den tumusi moi sani di a seti (Rom. 2:4). Wi leki futuboi fu en, musu de klariklari fu preiki a bun nyunsu na wan fasi di e gi grani na wi Gado di abi sari-ati, èn wi musu du dati ibri leisi te wi e gi sma kotoigi (2 Kor. 5:20, 21; 6:3-6). Fu dati ede, wi musu tan abi wan bun denki fu den sma na ini a kontren fu wi. San kan yepi wi fu du disi?
15. (a) San den apostel fu Yesus ben musu du te sma no ben wani arki a boskopu? (b) San kan yepi wi fu du ala muiti fu feni sma di warti fu yere a boskopu?
15 Yesus ben taigi den bakaman fu en fu no broko den ede tumusi te son sma no ben wani arki a boskopu. Na presi fu dati, den ben musu du ala muiti fu suku sma di warti fu yere a bun nyunsu. (Leisi Mateyus 10:11-15.) Wan sani di sa yepi wi fu du disi, na te wi e poti marki di makriki fu doro. Wan brada e agersi ensrefi nanga wan sma di e ondrosuku wan kontren fu feni gowtu. Luku san a e taki fu gi ensrefi deki-ati: „Tide mi o feni gowtu.” Wan tra brada poti wan tra marki gi ensrefi. A e taki: ’Ibri wiki mi wani miti wan sma di wani arki a boskopu, èn baka wan tu dei mi wani go baka na a sma dati fu yepi en fu kon sabi moro’. Son preikiman e pruberi fu taki fu awinsi wán bijbeltekst nanga ibri ososma te dati kan. Sortu bun marki yu kan suku fu doro?
16. Sortu reide wi abi fu tan preiki a bun nyunsu?
16 Na arki di den sma na ini a kontren e arki a boskopu, a no a wan-enkri sani di e sori taki wi abi bun bakapisi te wi e preiki oso fu oso. A no de fu taki dati a de tumusi prenspari fu preiki a boskopu, so taki opregtisma kan kisi frulusu. Ma tra prenspari reide de tu fu san ede wi e preiki. A Kresten preikiwroko e gi wi na okasi fu sori taki wi lobi Yehovah (1 Yoh. 5:3). Boiti dati, wi no sa abi brudu-paiman te wi e teki prati na a wroko disi (Tori. 20:26, 27). Èn a wroko disi e warskow den ogrisma taki „a yuru doro kaba taki [Gado] o krutu sma” (Openb. 14:6, 7). Ma san moro prenspari, na taki te wi e preiki a bun nyunsu, dan a nen fu Yehovah e kisi prèise na heri grontapu (Ps. 113:3). Fu dati ede, awinsi sma e arki noso efu den no e arki, wi musu tan meki a Kownukondre boskopu bekènti. Iya, Yehovah e prisiri fu si fa wi e meki furu muiti fu preiki a bun nyunsu.—Rom. 10:13-15.
17. Nanga sortu sani sma sa musu agri heri esi?
17 Aladi furu sma na ini a ten disi no e poti prakseri na a preikiwroko fu wi, toku heri esi den sa kisi wan tra denki fu a tori disi (Mat. 24:37-39). Yehovah ben gi Esekièl a dyaranti taki te den krutuboskopu di a ben meki bekènti kon tru, dan na oso fu Israel di ben opo ensrefi, ben o „sabi seiker tu taki wan profeiti ben de na den mindri” (Esek. 2:5). Na so a sa de tu taki te Gado sa krutu a disiten sistema, dan sma sa musu agri taki a boskopu di Yehovah Kotoigi ben e preiki na publiki presi èn sosrefi oso fu oso, trutru ben komoto fu a wan-enkri tru Gado, Yehovah. Den sa musu agri tu taki den Kotoigi trutru ben teki presi gi Gado. A no de fu taki dati a de wan bigi grani fu tyari a nen fu Gado èn fu meki a boskopu fu en bekènti na ini a prenspari ten disi! Meki a de so, taki nanga yepi fu a krakti fu en, wi e tan preiki oso fu oso awinsi a no makriki fu du dati.
San yu ben sa piki?
• Fa wi kan kisi a deki-ati fu preiki?
• San kan yepi wi fu bigin wan Bijbel takimakandra nanga sma te wi e preiki oso fu oso?
• Fa wi kan sori sma taki trutru wi e broko wi ede nanga den?
• San kan yepi wi fu tan abi wan bun denki fu den sma na ini a kontren fu wi?
[Aksi fu a tori disi]
[Faki/Prenki na tapu bladzijde 9]
Wan tu eksempre fa fu bigin wan Bijbel takimakandra
Fa fu bigin:
▪ Baka te yu taki na ososma odi, dan yu kan gi en wan traktaat, èn yu kan taki: „Mi kon na yu tide fu fruteri yu wan sani di sa gi yu deki-ati, èn a sani disi abi fu du nanga wan prenspari tori.”
▪ Noso yu kan gi a sma wan traktaat èn yu kan taki: „Mi kon na yu tide fu taki syatu nanga yu, fu di mi wani sabi fa yu e denki fu a tori disi.”
Efu a sma e teki a traktaat:
▪ Sondro fu wakti tumusi langa, poti prakseri na a nen fu a traktaat, èn aksi a sma san a e denki fu a tori dati.
▪ Arki bun san a sma abi fu taki, èn pruberi fu kon frustan fu san ede a sma e denki so. Taki a sma tangi fu di a taigi yu fa a e denki, èn hori den sani dati na prakseri te yu e taki moro fara nanga en.
Fa fu go doro nanga a takimakandra:
▪ Te yu kon sabi san e hari a prakseri fu a sma èn san na den broko-ede fu en, dan leisi èn taki fu wán noso moro bijbeltekst fu gi en deki-ati.
▪ Te a sma wani sabi moro, dan gi en wan tu sani fu leisi, èn efu a kan, sori en fa wi e studeri Bijbel nanga sma. Meki mofo nanga a sma fu kon baka na en.