Wi no ben frede fu di Yehovah ben de nanga wi

Soleki fa Egyptia Petrides fruteri

Na ini a yari 1972, den Kotoigi na ini Siprus ben kon makandra na Nikosia fu arki wan spesrutu lezing di Brada Nathan H. Knorr ben o hori. Furu yari langa a brada disi ben e teki fesi na ini a preikiwroko fu Yehovah Kotoigi. Di a si mi, a ben sabi wantewante suma na mi èn srefi bifo mi kari mi nen, a aksi mi: „Fa a e go na ini Egepte?” Mi ben miti Brada Knorr 20 yari pasa na ini a foto pe mi gro kon bigi, namku a foto Aleksandria, na Egepte.

MI GEBORE na ini Aleksandria tapu 23 yanuari 1914, èn mi na a moro owruwan fu den fo pikin na ini wi osofamiri. Wi gro kon bigi krosibei fu a se. Na a ten dati, a foto Aleksandria ben de wan moi foto pe sma fu difrenti kondre ben e libi. Furu sma sabi a foto disi fu di moi sani bow drape èn fu di prenspari sani pasa drape fositen. Fu di sma fu Europa ben e moksi nanga Arabiri, meki wi leki pikin leri fu taki Arabiatongo, Ingrisitongo, Fransitongo, Italiatongo, èn sosrefi Grikitongo, a tongo di wi ben e taki na oso.

Baka di mi kaba nanga skoro, mi feni wroko na wan presi pe sma ben e meki den moro nyun krosi di de na modo na ini Fransikondre. Mi ben lobi fu wroko drape fu di mi ben e meki kefalek moi yapon gi den heihei-uma fu a libimakandra. Mi ben lobi fu go na kerki èn mi ben lobi fu leisi Bijbel, aladi mi no ben frustan furu fu den sani di mi ben e leisi.

Na ini den yari baka 1935, mi miti wan yonkuman di ben abi bun maniri èn di ben de fu Siprus. A yonkuman disi, Theodotos Petrides, ben sabi aswa bun, ma a ben leri fu meki kuku nanga tra switi sani tu. A ben e wroko na wan wenkri di ben e seri den sani disi èn furu sma ben sabi a wenkri dati. Theodotos kon lobi mi, wan pikin syatu uma nanga broin wiwiri! Nofo tron a ben e prei Griki lobi singi gi mi na ondro mi fensre. Wi trow tapu 30 yuni 1940. Dati ben de wan switi ten! Wi ben e libi na ondrosei fu na oso fu mi mama. Na ini 1941, John, wi fosi pikin gebore.

Mi e kon leri sabi den tru tori fu Bijbel

Wan pisi ten kaba, Theodotos no ben de tevrede nanga den sani di a ben e leri na ini a kerki fu wi, èn a ben abi furu aksi fu Bijbel. Sondro fu mi sabi, Yehovah Kotoigi bigin studeri Bijbel nanga en. Wan dei, di mi ben de na oso nanga a beibi fu wi, wan uma naki na a doro fu wi èn a gi mi wan karta pe wan Bijbel boskopu ben skrifi na tapu. Fu di mi no ben wani handri grofu nanga en, meki mi leisi san skrifi na tapu a karta. Baka dati a gi mi wan tu Bijbel publikâsi. Dati ben de den srefi buku di Theodotos ben tyari kon na oso!

 Mi taigi en: „Mi abi den buku disi kaba. Grantangi, kon na inisei.” Wantewante mi bigin poti wan lo aksi gi a Kotoigi disi, di nen Eleni Nicolaou. Na uma disi teki en ten fu gi piki tapu den aksi fu mi nanga yepi fu Bijbel. Mi ben lobi dati. Wantronso, mi bigin frustan a boskopu fu Bijbel. Di wi ben e taki nanga makandra, Eleni si wan fowtow fu mi masra. „Mi sabi a man dati!”, na so taki. Now mi ben sabi san Theodotos ben e du èn mi ben fruwondru. Theo ben e go na den Kresten konmakandra sondro fu tyari mi. A no ben taigi mi srefi taki a ben e go! Di Theodotos kon na oso a dei dati, mi taigi en: „A wiki disi mi o go nanga yu na a presi pe yu ben go a sonde di pasa.”

Na a fosi konmakandra di mi ben go, wan grupu fu sowan tin sma ben de di ben e taki fu a Bijbel buku Mika. Mi ben arki ala den sani di den ben taki. Sensi a dei dati, George nanga Katerini Petraki ben kon studeri Bijbel nanga wi ibri freida neti. Mi papa nanga den brada fu mi no ben feni en bun kwetikweti taki wi ben e studeri nanga den Kotoigi. Aladi mi sisa no ben de leki den, toku noiti a no tron wan Kotoigi. Ma mi mama poti bribi na ini den tru tori fu Bijbel. Na ini 1942, mi, Theodotos nanga mi mama teki dopu na ini a se na Aleksandria fu sori taki wi gi wi libi abra na Yehovah.

A libi fu wi kenki

Na ini 1939, a di fu Tu Grontapufeti bigin èn syatu baka dati a ben kon moro ogri. Na ini den yari syatu baka 1940, a Doisri legre-edeman Erwin Rommel ben de nanga en legre na ini a foto El Alamein, di de krosibei fu Aleksandria. Fu dati ede furu srudati fu Ingrisikondre ben de na ini Aleksandria. Na a ten dati wi ben e kibri drei nyanyan di no ben o pori. Baka dati, a basi fu Theodotos aksi en fu drai a nyun wenkri fu en na ini Port Taufiq, di de krosibei fu a foto Suez. Dati meki wi froisi go drape. Tu Kotoigi di e taki Grikitongo bigin suku wi na ini Port Taufiq. Aladi den no ben sabi pe wi ben e tan, toku den meki muiti fu feni wi. Fu dati ede, den preiki oso fu oso teleki den feni wi.

Di wi ben de na ini Port Taufiq, dan wi ben e studeri Bijbel nanga Stavros nanga Giula Kypraios, èn sosrefi den tu pikin fu den, Totos nanga Georgia. Den sma disi tron bun mati fu wi. Stavros ben lobi a bijbelstudie so te, taki a ben gwenti fu poti ala den oloisi na ini en oso wán yuru na baka. Disi ben meki taki wi ben o misi a lasti loko di ben e go na a birti pe wi e tan. Na so fasi wi ben musu tan moro langa na den. Den takimakandra di wi ben abi ben e go doro te lati neti.

Wi ben libi 18 mun na ini Port Taufiq, ma di mi mama kon siki, wi drai go baka na Aleksandria. Mi mama tan getrow na Yehovah teleki a dede na ini 1947. Na a ten disi, wi ben ondrofeni baka fa Yehovah gi wi deki-ati nanga yepi fu a demakandra di wi ben abi nanga den lepi  Kresten mati fu wi. Zendeling di ben de na pasi fu go na tra kondre pe den ben musu dini, ben e kon tan nanga wi tu te a sipi fu den ben de fu wan syatu pisi ten na a lanpe na Aleksandria.

Den prisiri ten nanga den muilek ten

Na ini 1952, James, a di fu tu manpikin fu wi gebore. Leki papa nanga mama, wi ben frustan taki a de prenspari fu kweki den manpikin fu wi na so wan fasi taki den e kon si taki a tru anbegi prenspari trutru. Fu dati ede, wi ben feni en bun taki konmakandra hori na wi oso, èn nofo tron wi ben kari furuten dinari kon na wi oso. Leki bakapisi fu dati, John, a moro owru manpikin fu wi, kon lobi den tru tori fu Bijbel èn a bigin pionier di a ben de wan tini ete. Na a srefi ten, a ben e go neti na skoro fu man kisi en diploma te fu kaba.

Syatu baka dati, datra kon si taki Theodotos en ati ben siki seryusu, èn den taigi en taki a musu tapu nanga a wroko di a ben e du. Na a ten dati, James, a manpikin fu wi, ben abi fo yari nomo. San wi ben o du? A no Yehovah ben taki: „No frede, bika mi de nanga yu”? (Yes. 41:10) Yu kan frustan taki wi ben fruwondru èn wi ben breiti srefisrefi di wi kisi a kari na ini 1956, fu dini leki pionier na ini a foto Ismailia, krosibei fu Suez Kanaal. Na ini den yari baka dati, furu dyugudyugu ben de na ini Egepte, èn den Kresten brada nanga sisa fu wi ben abi deki-ati fanowdu.

Na ini 1960, wi ben abi fu gowe libi Egepte èn ibriwan fu wi ben kan tyari wán kofru nomo. Wi froisi go na Siprus, na èilanti pe mi masra gro kon bigi. Na a pisi ten dati, Theodotos ben siki srefisrefi èn a no ben man wroko. Ma wan Kresten brada nanga en wefi sori switifasi gi wi, fu di den gi wi wan presi fu tan. A de wan sari sani taki mi masra dede tu yari baka dati èn mi wawan ben de fu sorgu gi James, di ben yongu ete. John, di ben kon libi na Siprus sosrefi, ben trow èn a ben abi en eigi osofamiri fu sorgu.

Mi kisi yepi na ini muilek ten

Bakaten, Stavros nanga Dora Kairis aksi wi efu wi no wani tan nanga den na den oso. Mi saka na tapu mi kindi èn taki Yehovah tangi taki a sorgu baka gi den sani di wi abi fanowdu (Ps. 145:16). Di Stavros nanga Dora bosroiti fu seri na oso fu den èn fu bow wan nyunwan di ben o abi wan Kownukondre zaal na ondrosei, dan den bow wan pikin oso nanga tu kamra sosrefi gi mi nanga James. A sani dati ben de wan lobi-ati sani.

 Te fu kaba, James trow èn en nanga en wefi dini leki pionier teleki a fosiwan fu den fo pikin fu den gebore. Na ini 1974, tu yari baka di Brada Knorr ben kon na Siprus fu gi den Kotoigi deki-ati, dyugudyugu ben de na ini a politiek na Siprus. * Furu sma, èn sosrefi Kotoigi, ben lowe gowe libi den oso èn den go tan na tra presi. A manpikin fu mi, John, ben du dati tu. John, en wefi, nanga den dri pikin fu den, froisi go na Kanada. Aladi furu sma ben froisi gowe, toku wi ben prisiri fu si taki moro Kownukondre preikiman ben kon de na ini Siprus.

Di mi ben bigin kisi mi pensyun moni, mi ben man du moro na ini a diniwroko. Ma wan tu yari pasa, mi kisi wan berurtu èn mi go tan nanga mi manpikin James nanga en osofamiri. Bakaten, di a siki fu mi kon moro ogri, mi ben abi fu didon wan tu wiki na ati-oso èn baka dati mi go tan na wan presi pe sma e sorgu gi owrusma. Aladi mi abi pen ala ten, toku mi e gi kotoigi na den sma di e wroko drape, den sma di e tan drape, èn den sma di e kon fisiti den owrusma. Mi e gebroiki furu fu mi ten tu fu studeri, èn den lobi-ati Kresten brada e yepi mi fu go na a Gemeente Bukustudie di de krosibei.

Deki-ati di mi kisi na ini mi owrudei

Mi nanga Theodotos ben abi a grani fu yepi furu sma fu kon sabi den tru tori fu Bijbel. A e gi mi deki-ati te mi yere fa a de nanga den sma dati. Furu fu den pikin fu den sma disi, nanga den granpikin fu den, de na ini a furuten diniwroko. Sonwan fu den e dini na ini Australia, Kanada, Ingrisikondre, Grikikondre, nanga Switserland. Now, mi manpikin John nanga en wefi, e libi na ini Kanada nanga a manpikin fu den. A moro owru umapikin fu den e pionier makandra nanga en masra. A moro yongu umapikin fu den, Linda, nanga en masra Joshua Snape, kisi a kari fu go na a di fu 124 klas fu a Gileadskoro.

Mi manpikin James nanga en wefi e libi now na ini Doisrikondre. Tu fu den manpikin fu den e dini na Bethel, wán fu den na ini Ateine na Grikikondre, èn a trawan na ini Selters na Doisrikondre. A moro yongu manpikin fu den, èn sosrefi na umapikin fu den nanga en masra, e dini leki pionier na ini Doisrikondre.

Wi sa abi furu sani fu fruteri mi mama nanga mi lobi Theodotos, te den kisi wan opobaka. Den o breiti trutru te den si sortu tumusi moi gudu den libi na baka gi a famiri fu den. *

[Futuwortu]

[Prenspari pisi na tapu bladzijde 24]

Wi ben ondrofeni baka fa Yehovah gi wi deki-ati nanga yepi fu a demakandra di wi ben abi nanga den lepi Kresten mati fu wi

[Karta na tapu bladzijde 24]

(Efu yu wani si pe den sani disi skrifi, luku a tijdschrift)

SIPRUS

NIKOSIA

MINDRIKONDRE SE

EGEPTE

CAIRO

El Alamein

Aleksandria

Ismailia

Suez

Port Taufiq

Suez Kanaal

[Sma di abi a reti fu a karta]

Based on NASA/Visible Earth imagery

[Prenki na tapu bladzijde 23]

Mi nanga Theodotos na ini 1938

[Prenki na tapu bladzijde 25]

Mi manpikin John nanga en wefi

[Prenki na tapu bladzijde 25]

Mi manpikin James nanga en wefi