Yu no sabi pe a sa abi bun bakapisi!
Yu no sabi pe a sa abi bun bakapisi!
„Sai yu siri na mamanten èn no meki yu anu rostu teleki neti doro; bika yu no sabi pe disi sa abi bun bakapisi.”—PREIK. 11:6.
1. Fu san ede a fasi fa wan sani e gro de wan wondru? Èn fu san ede a sani disi e meki wi kisi sakafasi?
WAN gronman musu de wan sma di abi pasensi (Yak. 5:7). Baka te a sai siri, dan a musu wakti teleki den siri e sproiti èn e bigin gro. Te den siri e gro na tapu bun doti, dan safrisafri den e bigin sproiti komoto na ini a gron. Baka dati, den pransun e gro kon bigi teleki den e gi nyanyan. Te fu kaba, a ten e doro gi a gronman fu koti aleisi. A fasi fa sani e gro, na wan wondru trutru! Èn te wi sabi suma na a Sma di e meki sani gro, dan dati e meki wi kisi sakafasi. Wi kan yepi fu sorgu taki den siri e gro bun. Wi kan gi den watra. Ma na Gado wawan kan meki den gro.—Luku 1 Korentesma 3:6.
2. Sortu sani Yesus ben leri wi te a abi fu du nanga a fasi fa wan sma e tron wan disipel?
2 Soleki fa wi ben si na ini na artikel na fesi, Yesus ben agersi a Kownukondre preikiwroko nanga a wroko di wan saiman abi fu sai siri. Na ini na agersitori fu den difrenti sortu gron, Yesus ben tyari kon na krin taki aladi a saiman e sai bun siri, toku a de so taki na ati fu a sma e sori efu a siri o gro kon lepi, noso efu dati no o pasa (Mark. 4:3-9). Na ini na agersitori fu a saiman di e sribi, Yesus ben tyari kon na krin taki a saiman no e frustan krin fa den siri e gro. Disi e kon fu di a no libisma e meki sani gro, ma na Gado (Mark. 4:26-29). Meki wi poti prakseri na ete dri agersitori di Yesus ben fruteri. A di fu a mosterd siri, a di fu a srudeki, èn a di fu a fisinèt. *
Na agersitori fu a mosterd siri
3, 4. Sortu sani na agersitori fu a mosterd siri e tyari kon na krin te a abi fu du nanga a Kownukondre boskopu?
3 Na agersitori fu a mosterd siri, di skrifi tu na ini Markus kapitel 4, e tyari tu sani kon na krin. A fosi sani, na taki moro nanga moro sma e arki a Kownukondre boskopu. A di fu tu sani, na taki den wan di e arki a boskopu, e kisi kibri. Yesus ben taki: „Nanga san wi musu agersi a kownukondre fu Gado, noso nanga sortu agersitori wi o tyari kon na krin san na a kownukondre? A de leki wan mosterd siri di de a moro pikin siri na grontapu te den e sai en na gron; — ma te a sai kaba, a e bigin gro èn a e bigi moro ala den tra gruntubon, èn a bon abi bigi taki, so taki den fowru di e frei na loktu man feni wan tanpresi na ini a skaduw fu a bon.”—Mark. 4:30-32.
4 Den tekst disi e taki fu „a kownukondre fu Gado” di e gro. A sani disi de fu si na a Kownukondre boskopu di e panya na heri grontapu èn sosrefi na a fasi fa a Kresten gemeente gro fu sensi a Pinksterfesa fu a yari 33. Wan mosterd siri na wan pikin-noti siri, èn na ini Bijbel a kan prenki wan heri pikin sani. (Luku Lukas 17:6.) Ma te fu kaba, wan mosterd siri e gro kon tron wan bon di kan hei pikinmoro 3 te go miti 5 meter, èn di a abi tranga taki.—Mat. 13:31, 32.
5. Fa a Kresten gemeente gro na ini a fosi yarihondro?
5 Na ini a yari 33, a Kresten gemeente bigin nanga wan pikin grupu fu 120 disipel di ben salfu nanga santa yeye. Na ini wan syatu pisi ten, a pikin gemeente fu disipel gro kon tron wan bigi grupu fu dusundusun bribiman. (Leisi Tori fu den Apostel 2:41; 4:4; 5:28; 6:7; 12:24; 19:20.) A nomru fu den sma di ben e teki prati na a kotiwroko, ben gro so te taki 30 yari baka dati, na apostel Paulus ben kan taigi a gemeente na ini Kolose taki a bun nyunsu ben „preiki gi ala sma na grontapu” (Kol. 1:23). A gemeente ben gro fu tru!
6, 7. (a) Fa a Kownukondre wroko gro sensi 1914? (b) Fa a wroko disi sa gro moro fara?
6 Sensi a Kownukondre fu Gado seti na hemel na ini 1914, den taki fu a mosterd „bon” gro srefisrefi, èn nowan sma ben fruwakti dati. A pipel fu Gado si a kontru fu a profeititori disi di Yesaya ben skrifi: „A pikinwan srefi sa tron wán dusun, èn a wan di no abi so furu makti sa tron wan makti kondre” (Yes. 60:22). A pikin grupu fu salfuwan di ben e du a Kownukondre wroko na a bigin fu a di fu 20 yarihondro, no ben sabi srefisrefi taki na a ten fu 2008, sowan seibi milyun Kotoigi ben o du a wroko disi na ini moro leki 230 kondre. A no de fu taki dati a wroko gro na wan tumusi moi fasi, neleki a mosterd siri na ini na agersitori di Yesus ben fruteri!
7 Ma disi wani taki dati a wroko no o gro moro fara? Nôno. Te fu kaba, ibri sma na grontapu sa saka ensrefi na ondro a Kownukondre fu Gado. Ala den gensman o kisi pori. A no libisma o tyari a kenki disi kon na grontapu, ma na Yehovah, a Moro Hei Masra, o du dati. (Leisi Danièl 2:34, 35.) Na a ten dati, wi sa si a lasti kontru fu ete wan profeititori di Yesaya skrifi. A ben taki: „Grontapu sa kon furu trutru nanga a sabi fu Yehovah, soleki fa watra e tapu se.”—Yes. 11:9.
8. (a) Suma den fowru na ini na agersitori fu Yesus e prenki? (b) Gi sortu sani a Kresten gemeente e kibri wi na ini a ten disi srefi?
8 Yesus e taki dati den fowru di e frei na loktu sa man feni wan tanpresi na ini a skaduw fu a Kownukondre disi. Den fowru disi no e prenki den feanti fu a Kownukondre di e pruberi fu nyan den bun siri, soleki fa den fowru ben du na ini na agersitori fu a man di e trowe siri di e fadon na tapu difrenti sortu gron (Mark. 4:4). Ma na ini na agersitori disi, den fowru e prenki opregtisma di e suku kibri na ini a Kresten gemeente. Srefi na ini a ten disi, a gemeente e kibri den sma disi gi na ogri grontapu, so taki den no e teki gwenti abra di kan pori a matifasi di den abi nanga Gado, èn so taki den no tyari densrefi leki den sma di e du sani di no krin. (Luku Yesaya 32:1, 2.) Na ini wan profeititori, Yehovah ben agersi a Mesias Kownukondre tu nanga wan bon, èn a ben taki: „Na tapu a bergi fu a hei presi fu Israel mi sa prani en baka, èn a sa meki bigi taki nanga froktu srefisrefi èn tron wan kefalek bigi sedre. Èn na en ondro trutru ala fowru di abi ala sortu frei sa tan; na ondro a kowru fu den wiwiri fu en den sa tan.”—Esek. 17:23.
Na agersitori fu a srudeki
9, 10. (a) San Yesus ben tyari kon na krin na ini na agersitori fu a srudeki? (b) San a wortu srudeki e prenki nofo tron na ini Bijbel? Na sortu aksi wi sa poti prakseri te a abi fu du nanga a sani di Yesus ben taki fu srudeki?
9 A no ala ten sma man si fa wan sani e gro. Na ini na agersitori di e kon now, Yesus e poti prakseri na a sani disi. A e taki: „A kownukondre fu hemel de leki srudeki di wan uma ben teki èn ben poti na ini dri bigi baki blon teleki ala blon kon swa” (Mat. 13:33). San a srudeki e prenki, èn san disi abi fu du nanga a fasi fa a Kownukondre e gro?
10 Nofo tron te Bijbel e taki fu srudeki, dan dati na fu prenki sondu. Di Paulus gebroiki a wortu disi, dan a ben wani prenki a srefi sani disi, fu di a ben taki fu a takru krakti di wan sma ben abi tapu a gemeente Korente fu owruten. A sma dati ben e du wani sani di Gado no feni bun (1 Kor. 5:6-8). A de so taki Yesus ben gebroiki a wortu srudeki fu prenki fa wan sani di no e gro bun?
11. Fa den Israelsma fu owruten ben e gebroiki srudeki?
11 Fosi wi e piki na aksi dati, wi musu poti prakseri na dri prenspari sani. A fosi sani, na taki Yehovah no ben feni en bun taki sma ben e gebroiki srudeki na a ten fu a Paskafesa, ma son leisi a ben feni en bun taki sma ben e tyari ofrandi di ben abi srudeki. Sma ben e gebroiki srudeki te den ben e tyari vrede-ofrandi fu taki Yehovah tangi. Èn wan sma ben e tyari na ofrandi disi fu sori taki a ben de nanga tangi gi den someni blesi di Yehovah ben gi en. Te sma ben e nyan nanga makandra na a okasi disi, dan den ben de nanga prisiri.—Leif. 7:11-15.
12. San wi kan leri fu a fasi fa Bijbel e gebroiki wortu fu prenki sani?
12 A di fu tu sani, na taki son leisi wan wortu na ini Bijbel kan prenki wan sani di no bun. Ma tra leisi baka, a srefi wortu dati kan prenki wan bun sani. Fu eksempre, na 1 Petrus 5:8, Bijbel e agersi Satan nanga wan lew, fu di a e suku fu du ogri nanga trawan, èn fu di a abi ogri-ati fasi. Ma na Openbaring 5:5, Bijbel e agersi Yesus nanga wan lew, namku „a lew fu a lo fu Yuda”. Na ini a tekst disi, a lew e prenki a deki-ati di wan sma abi fu du san reti.
13. San na agersitori fu a srudeki e tyari kon na krin te a abi fu du nanga a fasi fa wan sma e go na fesi fu tron wan disipel?
13 A di fu dri sani, na taki na ini na agersitori fu en, Yesus no ben taki dati a srudeki pori ala blon, so taki sma no ben o man gebroiki en moro. A ben taki nomo fu a fasi fa sma ben gwenti meki brede. Na uma ben poti a srudeki na ini a blon fu di a ben sabi taki a sani dati ben o meki a blon sweri. A srudeki ben moksi nanga a blon. Sobun, na uma no ben man si fa a srudeki ben e meki taki a blon ben e sweri. A sani disi e meki wi prakseri a man di ben e trowe siri èn di ben e go sribi te neti. Yesus ben taki dati ’a siri ben bigin gro èn a gro kon bigi, ma a man no ben sabi fa dati ben e pasa’ (Mark. 4:27). A no de fu taki, dati disi na wan makriki fasi fu tyari kon na krin fa wan sma e go na fesi fu tron wan disipel! Kande wi no e si fa a sma e go na fesi na ini a bigin, ma te a sma tron wan disipel, dan wi sa frustan taki a go na fesi trutru.
14. Sortu sani di abi fu du nanga a preikiwroko, e kruderi nanga a fasi fa a srudeki e meki taki ala a blon e sweri?
14 Soleki fa wi sabi kaba, dan libisma no man si fa wan sma e go na fesi fu tron wan disipel. Ma wan tra sani di wi musu hori na prakseri, na taki moro nanga moro sma na heri grontapu e tron disipel tu. A sani disi e kon na krin tu na ini na agersitori fu a srudeki. A srudeki e meki taki a blon na ini ala den „dri bigi baki” e kon swa, noso e sweri (Luk. 13:21). Neleki fa srudeki e meki taki ala blon e sweri, na so a Kownukondre preikiwroko di meki taki furu sma tron disipel, e du now „te na den moro farawe presi fu grontapu” (Tori. 1:8; Mat. 24:14). A de wan grani trutru fu teki prati na a Kownukondre wroko disi di e gro moro nanga moro!
A fisinèt
15, 16. (a) Taki syatu fu na agersitori fu a fisinèt. (b) San a fisinèt e prenki, èn san na agersitori disi e tyari kon na krin te a abi fu du nanga a fasi fa a Kownukondre wroko e gro?
15 Ma wan sani de di prenspari moro a nomru fu den wan di e taki dati den na disipel fu Yesus Krestes. Yesus ben sori taki den disipel fu en musu de opregti bakaman fu en. Na ini na agersitori fu a fisinèt, Yesus ben tyari kon na krin taki disi na wan tra fasi fa a Kownukondre wroko e gro. A ben taki: „A kownukondre fu hemel de sosrefi leki wan fisinèt di fringi go na ini se èn a kisi ala sortu fisi.”—Mat. 13:47.
16 A fisinèt, di e prenki a Kownukondre preikiwroko, e tyari ala sortu fisi kon na wán. Yesus e taki moro fara: „Di a fisinèt kon furu, dan den hari en kon na syoro, pe den go sidon piki ala den bun fisi puru èn den poti den na ini bari, ma den trowe den fisi di no ben bun. Na so a sa go na a kaba fu a grontapu sistema disi: den engel sa go puru den ogriwan na mindri den regtfardikiwan. Den sa trowe den go na ini a faya onfu. Drape den o krei èn den o kaw tifi.”—Mat. 13:48-50.
17. Na ini sortu pisi ten a pratiwroko na ini na agersitori fu a fisinèt e pasa?
17 Soleki fa Yesus ben taki, dan den skapu nanga den bokoboko sa kisi wan lasti krutu te a sa kon nanga en glori. A de so taki a prati di sma e prati den fisi abi fu du nanga a tori disi? (Mat. 25:31-33). Nôno. A lasti krutu o pasa te Yesus e kon na a ten fu a bigi banawtu. Ma a pratiwroko na ini na agersitori fu a fisinèt e pasa „na a kaba fu a sistema disi”. * Wi e libi na ini a ten dati now, èn a ten disi sa doro en heimarki na ini a bigi banawtu. We dan, fa a pratiwroko e pasa na ini a ten disi?
18, 19. (a) Sortu pratiwroko e pasa na ini a ten disi? (b) San opregtisma musu du? (Luku a futuwortu na tapu bladzijde 21.)
18 Na ini a ten disi, milyunmilyun sma kon na ini a gemeente fu Yehovah. Den sma disi de leki fisi di hari komoto na ini a se. Son sma e go na a Memrefesa, trawan e kon na den konmakandra fu wi, èn trawan baka de klariklari fu studeri Bijbel. Ma a de so taki ala den sma disi na trutru Kresten? Kande sma ’hari den kon na syoro’, ma Yesus e taki dati sma sa poti soso „den bun fisi” na ini den bari di e prenki den Kresten gemeente. Den engel e trowe den agersi fisi gowe, èn te fu kaba den sa fringi den go na ini wan faya onfu di e prenki têgo pori.
19 Furu sma di ben studeri Bijbel fosi nanga a pipel fu Yehovah de leki fisi di no bun, fu di den tapu fu studeri Bijbel. Son sma di abi Kresten papa nanga mama, noiti no ben wani tron bakaman fu Yesus trutru. Den no ben wani teki a bosroiti fu dini Yehovah. Sonwan fu den di ben teki a bosroiti fu dini Yehovah, tapu fu du dati baka wan pisi ten (Esek. 33:32, 33). * Ma a de prenspari taki ala opregtisma e kon na wán na ini den gemeente di de leki bari. Den musu du dati fosi a lasti krutudei kon, èn den musu tan drape so taki den e kisi kibri.
20, 21. (a) San wi leri fu den agersitori fu Yesus di abi fu du nanga a fasi fa sani e gro? (b) Sortu fasti bosroiti yu abi?
20 Sobun, san wi leri di wi poti prakseri syatu na den agersitori fu Yesus di abi fu du nanga a fasi fa sani e gro? Na a fosi presi, wi leri taki neleki fa a mosterd siri e gro, na so den Kownukondre afersi na grontapu go na fesi na wan tumusi moi fasi. Noti kan tapu a wroko fu Yehovah fu go na fesi! (Yes. 54:17) Boiti dati, den wan di e suku wan „tanpresi na ini a skaduw fu a bon”, e kisi kibri so taki Satan nanga a grontapu fu en no kan abi krakti na den tapu. Leki di fu tu sani, wi leri taki na Gado e meki sani gro. Neleki fa a srudeki di moksi na ini a blon e meki taki ala a blon e sweri, na so wi no man si èn wi no man frustan krin fa a wroko e gro. Ma a e gro fu tru! A di fu dri sani di wi leri, na taki a no ala sma di teki a boskopu, na opregti bakaman fu Krestes. Sonwan fu den de leki den fisi di no bun, soleki fa na agersitori fu Yesus e taki.
21 Ma a e gi wi deki-ati fu si omeni bun sma Yehovah e hari kon na ini den gemeente fu en! (Yoh. 6:44) A sani disi meki taki moro nanga moro sma na ini difrenti kondre e tron disipel fu Krestes. Na Yehovah Gado musu kisi ala grani gi a sani disi. Fu di wi e si disi, meki ibriwan fu wi musu de klariklari fu gi yesi na a rai di ben skrifi na ini Bijbel hondrohondro yari na fesi. A rai disi e taki: „Sai yu siri na mamanten . . . , bika yu no sabi pe disi sa abi bun bakapisi, a kan de dyaso noso a kan de drape, noso taki ala tu sa bun a srefi.”—Preik. 11:6.
[Futuwortu]
^ paragraaf 2 Na ini den paragraaf di e kon now, wi sa fruklari sani moro krin leki fa wi ben du dati na ini De Wachttoren fu 15 yuni 1992, bladzijde 17-22, èn a di fu 1 oktober 1975, bladzijde 589-608.
^ paragraaf 17 Aladi Mateyus 13:39-43 e taki fu wan tra sani di abi fu du nanga a Kownukondre preikiwroko, toku den sani di Yesus taki na ini den tekst dati èn na ini na agersitori fu a fisinèt, e kon tru na ini a srefi pisi ten, namku na „a kaba fu a sistema disi”. A prati di sma e prati den agersi fisi na wan sani di e pasa doronomo, neleki fa wan saiman e sai siri èn e du kotiwroko doronomo na ini a ten disi.—A Waktitoren fu 15 oktober 2000, bladzijde 25, 26; Anbegi a wan-enkri tru Gado, bladzijde 178-181, paragraaf 8-11.
^ paragraaf 19 A sani disi wani taki dati ibriwan sma di tapu fu studeri Bijbel, noso fu kon makandra nanga a pipel fu Yehovah, de leki wan fisi di den engel trowe? Nôno! Efu wan sma trutru wani drai kon baka na Yehovah, dan A sa teki en baka.—Mal. 3:7.
San yu ben sa piki?
• San na agersitori di Yesus fruteri fu a mosterd siri e leri wi fu a fasi fa a Kownukondre e gro èn fu a kibri di wi e kisi?
• San a srudeki na ini na agersitori fu Yesus e prenki, èn san Yesus tyari kon na krin te a abi fu du nanga a fasi fa a Kownukondre e gro?
• Na sortu tra sani na agersitori fu a fisinèt e poti prakseri te a abi fu du nanga a fasi fa Kownukondre e gro?
• Fa wi kan sorgu taki wi e tan wan fu den agersi fisi di sma ’poti na ini den bari’?
[Aksi fu a tori disi]
[Prenki na tapu bladzijde 18]
San na agersitori fu a mosterd siri e leri wi te a abi fu du nanga a fasi fa a Kownukondre e gro?
[Prenki na tapu bladzijde 19]
San wi e leri fu na agersitori fu a srudeki?
[Prenki na tapu bladzijde 21]
San wi e leri fu na agersitori di e taki fu a prati di sma e prati den bun fisi fu den fisi di no bun?