A di fu 124 klas fu a Gileadskoro

Den zendeling de leki sprenka

IBRI siksi mun, a Waktitoren Bijbelskoro Gilead e hori wan spesrutu konmakandra te den studenti klari a skoro. A heri Bethelfamiri fu Amerkankondre e kisi kari fu de na a okasi disi. Tapu 8 maart 2008, fisitiman fu moro leki 30 kondre kon makandra nanga a Bethelfamiri fu de na a okasi disi di ben hori na a kaba fu a 124 klas fu a Gileadskoro. Ala den 6411 sma di ben de drape ben prisiri nanga den studenti na a spesrutu dei dati.

Stephen Lett, wan memre fu a Tiri Skin, ben de fesiman fu a programa disi. A bigin a programa nanga a lezing di ben nen „Wroko makandra nanga den futuboi fu Yehovah di de leki sprenka”. Openbaring 9:1-4 e agersi a pikin grupu fu salfu Kresten nanga wan bigi bosu sprenka di bigin wroko fayafaya wantronso. A pikin grupu salfuwan disi bigin teki prati baka na a diniwroko fu Yehovah na ini 1919. Brada Lett memre den studenti taki leki memre fu den „tra skapu”, den go wroko makandra nanga a salfu grupu disi di de leki sprenka.—Yoh. 10:16.

Baka dati, Lon Schilling, wan memre fu a Bijkantoro Komte fu Amerkankondre, hori a lezing di nen „De wan bun patna”. A lezing disi ben e poti prakseri na a Bijbel eksempre fu Akwila nanga Preska, wan Kresten trowpaar fu a fosi yarihondro (Rom. 16:3, 4). A Gileadklas ben abi 28 trowpaar. Brada Schilling memre den studenti taki efu den wani abi bun bakapisi leki zendeling, dan den musu sorgu taki a trowlibi fu den e waka bun. Bijbel noiti e taki fu Akwila sondro fu taki fu en wefi Preska. Sobun, na apostel Paulus nanga den sma fu a gemeente ben e si den leki wan paar. Na so a de tu taki zendeling trowpaar na ini a ten disi musu wroko makandra, den musu anbegi Gado makandra, èn den musu horibaka gi makandra te den e kisi fu du nanga den problema di sa miti den te den go dini na wan tra kondre. Na so fasi den sa de leki bun patna gi makandra.—Gen. 2:18.

Baka dati, Brada Guy Pierce fu a Tiri Skin hori wan lezing di nen „Du bun fu di Yehovah du bun gi yu”. Brada Pierce sori den studenti taki te wan sma de wan bun sma, dan dati no wani taki nomo dati a e luku bun fu no du ogri. Wan bun sma e du bun gi trawan. Yehovah Gado bun dorodoro (Sak. 9:16, 17). A bunfasi nanga a lobi di Gado sori gi wi kan gi wi deki-ati fu du bun gi trawan. Na a kaba fu a lezing fu en, Brada Pierce prèise den studenti. A taki: „Unu e du bun. Wi sabi taki awansi sortu wroko Yehovah Gado sa gi unu na ini a ten di e kon, unu sa tan du bun fu di A du bun gi unu.”

Baka dati, Brada Michael Burnett hori wan lezing. A brada disi ben de wan zendeling fosi èn a tron leriman na a Gileadskoro no so langa pasa. A lezing fu en ben nen: „Weri en leki wan banti na un fesi-ede.” Den Israelsma ben musu memre a wondru fasi fa Yehovah ben frulusu den fu Egepte, èn a sani disi ben musu de leki wan ’banti na den fesi-ede’ (Ex. 13:16). Den studenti ben kisi a deki-ati fu memre den bogobogo rai di den kisi na a Gileadskoro, èn den rai disi ben musu  de leki wan banti na den fesi-ede. Brada Burnett ben sori krin o prenspari a de taki den zendeling abi sakafasi èn taki den no e denki furu fu densrefi. A sori den tu taki te den abi kesekese nanga tra zendeling noso nanga tra sma, dan den musu gebroiki Bijbel gronprakseri fu lusu den problema dati.—Mat. 5:23, 24.

Brada Mark Noumair, di de wan leriman na a Gileadskoro langa ten kaba, hori a lezing di nen „Sortu singi den sa singi fu yu?” Na ini owruten, sma ben abi a gwenti fu singi te a kondre noso a lo fu den ben wini wan feti. Wan fu den sortu singi disi e taki dati den lo fu Ruben, Dan, nanga Aser ben e kibri skin, ma a lo fu Seibulon e kisi prèise fu di a ben de klariklari fu du bun, aladi a no ben makriki gi den (Krut. 5:16-18) Neleki fa sma e kon sabi den wortu fu wan singi, na so sma te fu kaba e kon sabi ibri sani di wan Kresten du. Te wan Kresten e teki prati fayafaya na a wroko fu Gado èn te a e tan horibaka gi den seti fu  na organisâsi, dan a sa kon abi wan bun nen na Yehovah, èn a sa de wan bun eksempre gi den brada nanga sisa fu en. Te brada nanga sisa na ini a gemeente e si den sani di wi du, dan den e kisi deki-ati fu teki a bun eksempre fu wi.

Di den studenti fu a di fu 124 klas ben de na a Gileadskoro, dan den teki prati tu na a preikiwroko. Den alamala makandra preiki sowan 3000 yuru. Brada Sam Roberson fu a Bijbelskoro kantoro, hori a lezing di nen „Meki a santa yeye tiri unu”. Den studenti kisi na okasi fu fruteri wan tu ondrofenitori, èn den demo wan tu fu den. Baka den moi ondrofenitori disi, Brada Patrick LaFranca fu a Bijkantoro Komte fu Amerkankondre, interview wan tu zendeling di e dini kaba na ini tra kondre. Den studenti warderi den bun rai di den kisi fu den brada disi.

Brada Anthony Morris fu a Tiri Skin hori a lasti lezing di ben nen „Hori na prakseri taki den sani di wi man si, de fu wan syatu pisi ten nomo”. Bijbel no e gi wi deki-ati fu tan prakseri den banawtu di wi de na ini nownowde, fu di den sani dati de fu wan syatu pisi ten nomo. Na presi fu dati, Bijbel e gi wi deki-ati fu poti prakseri na den blesi di Yehovah sa gi wi na ini a ten di e kon (2 Kor. 4:16-18). Na ini a ten disi, wi alamala e si taki sma pôti srefisrefi, sma e du kruktudu, sma e kisi kwinsi, sma e siki, èn sma e dede. Zendeling kan kisi fu du nanga wan tu fu den sari situwâsi disi. Ma te wi e hori na prakseri taki den sani disi de fu wan syatu pisi ten nomo, dan dati sa yepi wi fu tan poti Yehovah na a fosi presi na ini wi libi, èn wi sa tan abi wan tranga howpu.

Na a kaba fu a programa, ala den studenti ben de na tapu a podium èn den ben arki den lasti sani di Brada Lett ben abi fu taki. A gi den studenti deki-ati fu tan horidoro, èn a taki: „Te Yehovah de na wi sei, dan wi man horidoro èn wi man tan dini en fayafaya, awinsi sortu tesi wi e kisi.” A gi den nyun zendeling deki-ati fu de leki sprenka. Iya, den musu tan teki prati fayafaya na a diniwroko fu Yehovah, èn den musu tan gi yesi na en fu têgo.

[Faki na tapu bladzijde 30]

WAN TU SANI FU A KLAS

A nomru fu den kondre pe den studenti komoto: 7

A nomru fu den kondre pe den studenti o go: 16

A nomru fu studenti: 56

Gemiddeld yari di den abi: 33,8

Gemiddeld yari di den dopu: 18,2

Gemiddeld yari di den de na ini a furuten diniwroko: 13,8

[Prenki na tapu bladzijde 30]

A di fu 124 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Prenki na tapu bladzijde 32]

A Gileadskoro de na a Waktitoren Skoro Centrum