Tan dini Yehovah nanga yu heri ati

„Mi sa waka na ini yu waarheid. Meki mi abi frede gi yu nen nanga mi heri ati.” —PS. 86:11.

1, 2. (a) Soleki fa Psalm 86:2, 11 e sori, dan san sa yepi wi fu tan dini Yehovah nanga wi heri ati te wi e kisi tesi? (b) O ten wi musu teki a bosroiti fu tan dini Yehovah nanga wi heri ati?

SON Kresten tan dini Yehovah furu yari langa, aladi den ben de na strafu noso aladi sma ben e frufolgu den. Ma bakaten, den Kresten disi go feti baka gudu. Fu san ede disi e pasa? A sani disi abi fu du nanga na ati fu wi, noso a sma di wi de fu inisei. Psalm 86 e sori taki wan sma di e tai hori na Gado, na wan sma di e anbegi en nanga en heri ati. A psalm skrifiman David ben begi: „O, grantangi kibri mi sili, bika mi e tai hori na yu. Yu na mi Gado, kibri yu futuboi di e frutrow na yu tapu.” David ben begi tu: „O Yehovah, leri mi den pasi fu yu. Mi sa waka na ini yu waarheid. Meki mi abi frede gi yu nen nanga mi heri ati.”—Ps. 86:2, 11.

² Efu wi no e frutrow tapu Yehovah nanga wi heri ati, dan tra afersi nanga tra sma sa meki taki wi du sani di a tru Gado no feni bun. Te wi e angri fu kisi spesrutu sani, dan dati kan de leki wan trapu gi wi. Awinsi wi tan gi yesi na Yehovah na ini muilek situwâsi, toku wi kan fadon na ini trapu di Satan seti gi wi. Iya, wi ben kan go feti baka gudu, noso wi ben kan du hurudu. Dati meki a de tumusi prenspari now taki wi e teki a bosroiti fu tan dini Yehovah nanga wi heri ati, èn wi musu teki a bosroiti disi bifo wi e kisi tesi! Bijbel e taki: „Kibri yu ati, moro leki ala tra  sani di de fu kibri” (Odo 4:23). Te a abi fu du nanga a tori disi, dan wi kan leri wan prenspari sani fu a sani di miti wan profeiti fu Yuda. Yehovah ben seni a profeiti disi go na Kownu Yerobeam fu Israel.

„Meki mi gi yu wan presenti”

3. San Yerobeam du di a profeiti fu Gado tyari a krutuboskopu gi en?

³ Luku san e pasa. No so langa pasa, a man fu Gado tyari wan krakti boskopu gi Kownu Yerobeam di ben seti na anbegi fu den pikin kaw na ini a tin-lo kownukondre Israel na a noordsei. A kownu e kisi atibron. A e taigi den futuboi fu en fu grabu a boskopuman. Ma Yehovah de nanga a futuboi fu en. Wantewante na anu fu a kownu di ben sori go na a boskopuman, e kon kruwa na wan wondru fasi, èn na altari di a ben e gebroiki gi na falsi anbegi e priti na tu. Wantronso Yerobeam e kenki. A e begi a man fu Gado: „Grantangi, begi Yehovah yu Gado fu en ati no bron moro nanga mi èn aksi en fu meki mi anu kon betre baka.” A profeiti begi Gado, èn na anu fu a kownu kon betre baka.—1 Kow. 13:1-6.

4. (a) Fu san ede a sani di a kownu ben wani gi a profeiti ben de wan tesi gi en? (b) San a profeiti piki a kownu?

⁴ Ne Yerobeam e taigi a man fu a tru Gado: „Kon nanga mi na mi oso èn nyan wan sani. Meki mi gi yu wan presenti” (1 Kow. 13:7). San a profeiti fu Gado musu du now? A musu teki a kari fu a kownu, baka di a tyari wan krutuboskopu gi en? (Ps. 119:113) Noso a musu weigri fu teki a kari fu a kownu, now di a gersi taki a abi berow? A no de fu taki dati Yerobeam gudu nofo fu gi den mati fu en diri kado. Efu a profeiti fu Gado ben kweki lobi gi gudu na ini en ati, dan a no de fu taki dati a sani di a kownu taigi en na wan bigi tesi gi en. Ma Yehovah ben gi a profeiti a komando disi: „Yu no musu nyan brede noso dringi watra, èn yu no musu teki a srefi pasi di yu ben teki kaba.” Sobun, a profeiti taigi a kownu krin: „Awinsi yu ben o gi mi afu fu yu oso, mi no ben o kon nanga yu, èn mi no ben o nyan brede noso dringi watra na a foto disi.” Èn a profeiti e teki wan tra pasa te a e gowe libi Betel (1 Kow. 13:8-10). Fa a bosroiti di a profeiti teki e leri wi fu tan gi yesi na Yehovah, awinsi san e pasa?—Rom. 15:4.

„De tevrede”

5. Fu san ede wi kan taki dati wan sma di lobi gudu no e dini Yehovah nanga en heri ati?

⁵ Kande wi feni taki wan sma di lobi gudu, kan dini Gado nanga en heri ati. Ma dati no tru. Wi abi a frutrow taki Yehovah sa gi wi san wi abi fanowdu, soleki fa a pramisi wi? (Mat. 6:33; Hebr. 13:5) Kande a libi ben o moro makriki gi wi te wi ben abi spesrutu sani. Wi man libi sondro den sani dati efu wi no man abi den nownow? Noso wi sa feti fu kon abi den sani disi? (Leisi Filipisma 4:11-13.) Kande wi e kisi na okasi fu du moro na ini a diniwroko. Wi e prakseri fu no teki na okasi dati, soso fu man abi den sani di wi wani abi nownowde? Wi e si en leki a moro prenspari sani fu dini Yehovah na nanga wi heri ati? Fu man piki den aksi dati, dan wi musu aksi wisrefi efu wi e dini Yehovah nanga wi heri ati. Paulus ben skrifi: „Wan sma e kisi furu wini te a e dini Gado na wan getrow fasi, efu a de tevrede nanga san a abi. Bika wi no tyari noti kon na grontapu èn wi no man teki noti fu en tyari gowe tu. Fu dati ede, efu wi abi nyanyan, krosi nanga wan presi fu tan, dan wi musu de tevrede nanga den sani disi.”—1 Tim. 6:6-8.

6. Sortu „presenti” sma ben kan gi wi, èn san o yepi wi fu kon sabi efu wi musu teki den?

⁶ Fu eksempre, a basi fu wi ben kan gi wi wan wroko di sa meki taki wi kisi moro moni èn sosrefi tra sani di sa tyari wini kon gi wi. Noso kande wi e kon si taki wi sa man meki moro moni efu wi go suku wroko na wan tra kondre noso na wan tra kontren. A kan gersi leki den okasi dati na blesi fu Yehovah. Ma fosi wi teki a bosroiti dati, dan a no ben o moro bun aksi wisrefi fu san ede wi wani teki a wroko dati? A moro prenspari sani di wi musu aksi wisrefi na disi: „Efu mi teki a bosroiti disi, dan sortu krakti dati sa abi tapu a matifasi di mi abi nanga Yehovah?”

7. Fu san ede a de prenspari fu rutu a lobi gi gudu puru na ini wi ati?

⁷ A sistema fu Satan e gi wi deki-ati doronomo  fu feti baka gudu. (Leisi 1 Yohanes 2:15, 16.) A sani Didibri wani, na fu pori wi ati. Fu dati ede, wi musu luku bun efu wi abi lobi gi gudu na ini wi ati, èn wi no musu draidrai fu rutu dati puru (Openb. 3:15-17). Di Satan ben wani gi Yesus ala den kownukondre fu grontapu, dan a no ben muilek gi Yesus fu sori en taki a no ben wani den sani dati (Mat. 4:8-10). Yesus ben gi wi a warskow disi: „Tan na ai èn luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi” (Luk. 12:15). Te wi e tai hori na Yehovah, dan dati sa yepi wi fu frutrow na en tapu, na presi taki wi e frutrow tapu wisrefi.

Wan owru profeiti „kori en”

8. Fa a profeiti fu Gado kisi tesi fu sori taki a ben e tan gi yesi na Gado?

⁸ Sani ben o waka bun nanga a profeiti fu Gado efu a ben go langalanga na oso. Ma fosi yu denki, wan tra tesi miti en. Bijbel e taki: „Yu ben abi wan owru profeiti di ben e tan na Betel. Di den manpikin fu en kon, dan den bigin fruteri en” ala san ben pasa a dei dati. Di na owru man yere a tori dati, dan a aksi den fu poti wan sadri na tapu wan buriki gi en so taki a ben kan hari go miti a profeiti fu Gado na pasi. Syatu baka dati, a e feni a profeiti e rostu na ondro wan bigi bon. A e taigi en: „Kon nanga mi na oso èn nyan brede.” Di a man fu a tru Gado no ben wani go nanga en, dan a owru man taigi en: „Mi na wan profeiti tu neleki yu. Wan engel srefi kon taigi mi san Yehovah taki. A taigi mi: ’Meki a kon na yu oso, so taki a kan nyan brede èn dringi watra.’” Ma Bijbel e taki: „A profeiti ben e kori a man.”—1 Kow. 13:11-18.

9. San Bijbel e taki fu sma di e bedrigi trawan, èn gi suma den e tyari takru bakapisi kon?

⁹ Wi no sabi fu san ede na owru profeiti du a sani di a du, ma awansi fa a no fa, a lei gi a man. Kande fosi, na owru profeiti disi ben e gi yesi doronomo na Yehovah. Ma now a ben e handri na wan bedrigi fasi. Bijbel e sori taki a no bun kwetikweti te wan sma e handri so. (Leisi Odo 3:32.) Sma di e bedrigi trawan no e tyari takru bakapisi kon gi densrefi wawan, ma sosrefi gi trawan. Den sma disi e pori a matifasi di den abi nanga Yehovah èn sosrefi a matifasi di trawan abi nanga Yehovah.

„A man go nanga” na owru man

10. San a profeiti fu Gado du di na owru man gi en wan kari fu kon na en oso, èn san ben de a bakapisi?

¹⁰ Fu taki en leti, a profeiti fu Yuda ben musu si taki na owru profeiti ben wani kori en. A ben kan aksi ensrefi: ’Fu san ede Yehovah ben o seni wan engel go na wan tra sma fu taigi en taki a ben musu gi mi wan tra boskopu?’ A profeiti ben kan aksi Yehovah fu yepi en fu kon frustan  fu san ede a ben musu du sani tra fasi. Ma soleki fa Bijbel e sori, a no du dati. Na presi fu dati, ’a go nanga na owru man na en oso fu nyan brede èn fu dringi watra’. Yehovah no ben feni a sani dati bun. Te fu kaba, di a profeiti ben de na pasi baka fu go na Yuda, dan wan lew kiri en. Dati na trutru wan sari fasi fa a man disi lasi a grani di a ben abi fu de wan profeiti fu Gado!—1 Kow. 13:19-25. *

11. Fa Ahia gi wan bun eksempre?

¹¹ Ma a profeiti Ahia di ben musu go salfu Yerobeam leki kownu, ben de tra fasi. A profeiti disi tan gi yesi na Gado, srefi di a ben kon owru. Di Ahia ben owru èn ben breni, dan Yerobeam seni en wefi fu go aksi Ahia san ben o pasa nanga a siki manpikin fu den. Nanga deki-ati Ahia taigi a wefi fu Yerobeam taki a manpikin fu den ben o dede (1 Kow. 14:1-18). Ahia kisi bun furu blesi fu Gado. Wan bigi grani di a ben kisi, na taki di Esra skrifi a Bijbel buku fu en, dan a gebroiki wan tu fu den sani di a profeiti disi ben skrifi.—2 Kron. 9:29.

12-14. (a) San wi kan leri fu a sani di pasa nanga a yongu profeiti? (b) Sori fu san ede a de prenspari fu poti bun prakseri na a rai di owruman e gi wi nanga yepi fu Bijbel, èn fu san ede a bun tu fu begi Gado fu yepi wi fu fiti a rai dati.

¹² Bijbel no e taki fu san ede a yongu profeiti no ben suku rai na Yehovah fosi a go nyan èn dringi na a owru man en oso. Kande na owruman ben taigi en san a ben wani yere. San wi kan leri fu a sani disi? Wi musu abi na overtoigi taki san Yehovah e aksi fu wi, ala ten na a yoisti sani fu du. Èn wi musu abi a fasti bosroiti tu fu du den sani dati, awansi san e pasa.

¹³ Te son sma e kisi rai, dan den e yere san densrefi wani yere. Luku na eksempre disi: Kande wan preikiman e kisi wan wroko di kan meki taki a no sa abi so furu ten moro gi en osofamiri èn gi na anbegi fu en. Kande a e go suku rai na wan owruman. Fosi na owruman e bigin gi a brada rai, dan a ben kan sori en taki na ensrefi musu bosroiti fa a wani sorgu en osofamiri. Baka dati, na owruman ben kan sori a brada taki a bribi fu en kan kon swaki efu a e teki a wroko. A brada sa memre soso den sani di na owruman ben taki na a bigin? Noso a sa poti bun prakseri na den tra sani di na owruman taki? A no de fu taki dati a brada srefi musu bosroiti san na a moro bun sani di a kan du fu sorgu taki te fu kaba a bribi fu en no e kon swaki.

 ¹⁴ Luku wan tra situwâsi. Kande wan sisa e aksi wan owruman efu a musu gowe libi a masra fu en di no de na bribi. A no de fu taki dati na owruman sa taigi a sisa taki na ensrefi musu bosroiti efu a o gowe libi en masra noso efu a o tan na en. Baka dati, a ben kan sori en san Bijbel e taki fu a tori (1 Kor. 7:10-16). A sisa sa poti bun prakseri na a rai di na owruman gi en? Noso a teki a bosroiti kaba fu libi en masra? Fosi a teki wan bosroiti, dan a ben o bun fu begi Yehovah fu yepi en fu fiti a rai di Bijbel e gi.

Wi musu abi sakafasi

15. San wi e leri fu a fowtu di a profeiti fu Gado ben meki?

¹⁵ Sortu tra sani wi kan leri fu a fowtu di a profeiti fu Yuda ben meki? Odo 3:5 e taki: „Frutrow tapu Yehovah nanga yu heri ati èn no frutrow tapu yu eigi frustan.” Na presi taki a profeiti fu Yuda tan frutrow tapu Yehovah soleki fa a ben gwenti du fosi, a frutrow tapu en eigi frustan. A fowtu di a meki, ben abi leki bakapisi taki a lasi en libi èn sosrefi a bun nen di a ben abi na Gado. Na ondrofenitori disi e sori wi krin o prenspari a de fu abi sakafasi, èn fu dini Yehovah nanga wi heri ati!

16, 17. San o yepi wi fu tan gi yesi na Yehovah?

¹⁶ Fu di na ati fu wi nofo tron e gi wi deki-ati fu suku wi eigi bun, meki a kan kori wi. Bijbel e taki: „Na ati e kori sma moro leki iniwan tra sani èn a pori srefisrefi.” Fu man gi yesi na Yehovah doronomo, dan wi musu tan meki muiti fu kenki a fasi fa wi ben de fosi. Te wi e du dati, dan wi no sa denki furu fu wisrefi èn wi no sa frutrow tapu wi eigi frustan. Boiti dati, wi musu tron nyun sma „di de soleki fa Gado wani, nanga trutru regtfardikifasi èn loyaalfasi”.—Leisi Efeisesma 4:22-24.

¹⁷ Odo 11:2 e taki: „Den sma di abi sakafasi, na koni sma.” Te wi abi sakafasi, dan wi o frutrow tapu Yehovah, na presi fu frutrow tapu wi eigi frustan. Dati sa yepi wi fu no meki bigi fowtu. Fu eksempre, te wi e firi brokosaka, dan a kan pasa makriki taki wi no man si sani krin moro (Odo 24:10) Kande wi kon weri fu teki tyari wan spesrutu frantwortu di abi fu du nanga a diniwroko, èn wi kan bigin denki taki wi du nofo na ini den yari di pasa. Kande wi feni taki tra sma musu du a wroko dati now. Noso kande wi wani libi soleki fa furu tra sma e libi. Ma te wi e „du ala muiti”, èn te wi „ala ten abi furu fu du na ini a wroko fu Masra”, dan dati sa kibri wi ati.—Luk. 13:24; 1 Kor. 15:58.

18. San wi kan du efu wi no sabi sortu bosroiti wi musu teki?

¹⁸ Kande wi musu teki muilek bosroiti son leisi, èn kande wi no sa sabi wantewante san wi musu du. Wi sa lusu a problema soleki fa wisrefi feni bun? Te wi de na ini den sortu situwâsi dati, dan a bun fu aksi Yehovah fu yepi wi. Yakobus 1:5 e taki: „Efu wan fu unu e mankeri koni, meki a tan aksi Gado, bika a e gi ala sma nanga en heri ati.” Wi hemel Tata sa gi wi en santa yeye fu yepi wi, so taki wi kan teki bun bosroiti.—Leisi Lukas 11:9, 13.

Abi a fasti bosroiti fu tan gi yesi na Yehovah

19, 20. Sortu fasti bosroiti wi musu abi?

¹⁹ Na ini a bruya pisi ten baka di Salomo gowe libi a tru anbegi, dan a ben muilek srefisrefi gi den futuboi fu Gado fu tan gi yesi na en. A tru taki furu fu den du sani di Gado no ben feni bun. Ma sonwan fu den tan dini Yehovah nanga den heri ati.

²⁰ Ibri dei wi musu teki bosroiti di e meki en muilek gi wi fu tan gi yesi na Gado. Ma neleki den futuboi fu owruten, wi kan tan gi yesi na Gado tu. Meki wi dini Yehovah nanga wi heri ati ala ten, èn meki wi abi na overtoigi taki a sa tan blesi den wan di e tai hori na en.—2 Sam. 22:26.

[Futuwortu]

San yu ben sa piki?

• Fu san ede wi musu rutu a lobi gi gudu puru na ini wi ati?

• San o yepi wi fu tan gi yesi na Yehovah?

• Te wi abi sakafasi, dan fa dati kan yepi wi fu tan gi yesi na Gado?

[Aksi fu a tori disi]

[Prenki na tapu bladzijde 9]

A muilek gi yu fu kakafutu gi tesi?

[Prenki na tapu bladzijde 10]

Yu sa begi Gado fu yepi yu fu fiti a rai di Bijbel e gi?