Yehovah e sorgu na wan lobi-ati fasi gi den owru futuboi fu en

„Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en.”—HEBR. 6:10.

1, 2. (a) Te yu e si wan sma nanga weti wiwiri, dan sortu Bijbel tori yu e prakseri? (b) Fa Yehovah e si owru Kresten?

TE YU de na ini a gemeente èn yu e si den wan di abi weti wiwiri, dan a sani dati no e meki yu denki wan tori na ini a Bijbel buku Danièl? Yehovah Gado ben gi Danièl wan fisyun, èn na ini a fisyun dati A prenki ensrefi leki wan sma di abi weti wiwiri. Danièl ben skrifi: „Mi tan luku teleki den poti kownusturu èn a Wan di de fu sensi Owruten go sidon. Den krosi fu en ben weti leki snew, èn a wiwiri na en ede ben weti srefisrefi.”—Dan. 7:9.

² Fu di Bijbel e taki dati a wiwiri fu Yehovah weti srefisrefi, èn fu di Bijbel e kari en „a Wan di de fu sensi Owruten”, meki dati e sori taki Gado ben de ala ten, èn taki a abi koni pasa marki. Fu dati ede, wi musu abi bigi lespeki gi en. We dan, fa Yehovah, a Wan di de fu sensi Owruten, e si den owru man nanga uma di e dini en nanga den heri ati? Gado Wortu e taki dati „weti wiwiri de leki wan kownu-ati di e moi wan sma, te a sma dati e libi na wan regtfardiki fasi” (Odo 16:31). Iya, te wan tru Kresten kon abi weti wiwiri, dan a lepisma disi moi na ini Gado ai. Yu e si den owru brada nanga sisa fu yu soleki fa Yehovah e si den?

Fu san ede den warti so?

3. Fu san ede owru brada nanga sisa warti so gi wi?

³ Sonwan fu den owru futuboi disi di Gado lobi trutru, na memre fu a Tiri Skin fu Yehovah Kotoigi, sonwan fu den e dini now leki opziener di e reis, noso den ben e du dati fosi. Trawan fu den na fayafaya pionier, noso lepi Kownukondre preikiman. Den alamala na brada nanga sisa di e dini Gado nanga den heri ati na ini den gemeente fu wi. Kande yu sabi wan tu owruwan di preiki a bun nyunsu fayafaya furu yari langa. A kan taki a bun eksempre fu den owruwan disi ben gi yonguwan deki-ati, èn kande a ben abi wan bun krakti tapu a libi fu den. Son owru brada nanga sisa e tyari bigi frantwortu, èn den tan preiki a bun nyunsu aladi den ben e kisi frufolgu. Yehovah nanga „a getrow èn koni srafu” abi furu warderi gi ala sani di den sma disi du fu horibaka gi a Kownukondre wroko na ini a ten di pasa, èn sosrefi na ini a ten disi.—Mat. 24:45.

4. Fu san ede wi musu lespeki den owru Kresten brada nanga sisa, èn fu san ede wi musu begi gi den?

⁴ Den tra futuboi fu Yehovah Gado musu sori warderi nanga lespeki gi den owruwan dati di e dini Gado nanga den heri ati. Fu taki en leti, a Wet di Gado ben gi Moses e sori taki wan sma di abi frede gi Yehovah e hori den owruwan na prakseri, èn a e sori lespeki gi den (Lef. 19:32). Wi musu begi doronomo gi den wan disi di e dini Gado nanga den heri ati, èn wi musu taigi Gado tangi gi den sani di den e du fu sori taki den lobi trawan. Fu di na apostel Paulus ben lobi den yonguwan nanga den owruwan di ben e wroko makandra nanga en, meki a ben e begi gi den.—Leisi 1 Tesalonikasma 1:2, 3.

5. Fa wi kan kisi wini te wi abi demakandra nanga owru anbegiman fu Yehovah?

⁵ Boiti dati, ala sma na ini a gemeente kan kisi wini te den abi demakandra nanga owru Kresten. Den owruwan di e dini Gado nanga den heri ati, abi furu sabi di warti srefisrefi. Dati e  kon fu di den studeri Gado Wortu, fu di den poti prakseri na sani, èn fu di den abi furu ondrofeni. Den leri fu abi pasensi èn fu sori taki den e firi gi trawan. Èn den e prisiri srefisrefi te den man leri yonguwan den sani di den kon sabi (Ps. 71:18). Un Kresten di moro yongu, un musu si a sabi fu den owruwan disi leki watra na ini wan dipi peti. Sori taki un koni, èn kisi wini fu a sabi disi.—Odo 20:5.

6. Fa yu kan sori owruwan taki yu e warderi den trutru?

⁶ Yu e meki owruwan kon sabi taki yu e warderi den soleki fa Yehovah e du dati? Wan fasi fa yu kan du dati, na te yu e taigi den fa yu lobi den fu di den e horidoro, èn te yu e fruteri den taki yu lobi fu kon sabi fa den e denki fu sani. Boiti dati, te yu e du den sani di yu leri fu den, dan yu e sori taki yu abi trutru lespeki gi den. Furu owru Kresten kan memre a koni rai di den kisi fu owruwan di e dini Gado fayafaya, èn fa den kisi wini fu di den fiti den rai dati na ini den libi. *

Du sani fu sori taki yu abi furu warderi gi den

7. Suma na den fosiwan di abi a frantwortu fu sorgu gi owruwan, soleki fa Yehovah wani?

⁷ Gado e sori taki den famiriman fu owruwan na den fosiwan di abi a frantwortu fu sorgu gi den. (Leisi 1 Timoteyus 5:4, 8.) Yehovah lobi te famiriman e sorgu gi den owruwan na ini a famiri fu den, èn na so den e sori taki neleki En, den e broko den ede nanga owruwan. Gado e horibaka gi den famiri disi, èn a e blesi den gi a muiti di den e meki, èn sosrefi gi ala tra sani di den e du gi den owruwan disi. *

8. Fu san ede den gemeente musu sori taki den e broko den ede nanga Kresten di kon owru?

⁸ Yehovah lobi tu te gemeente e yepi owru Kresten di e dini en fayafaya. Son leisi den Kresten disi abi yepi fanowdu, ma den no abi famiriman di de na bribi, noso di wani sorgu gi den (1 Tim. 5:3, 5, 9, 10). Fu dati ede, den gemeente e sori taki den ’e firi gi den owruwan, taki den lobi den, èn taki den de klariklari fu sori sari-ati’ gi den (1 Petr. 3:8). Paulus e sori heri bun fa den memre fu a gemeente e broko den ede nanga den owruwan. A e taki dati efu wan pisi fu a skin e pina, dan „ala den tra pisi e pina tu” (1 Kor.  12:26). Te wi e du sani fu sori den owruwan taki wi e firi gi den, dan wi e fiti a rai disi di Paulus gi wi: „Tan tyari den hebi fu makandra, èn na so fasi unu e du san a wet fu Krestes e taki.”—Gal. 6:2.

9. Sortu hebi wan owrusma kan abi?

⁹ Sortu hebi owrusma abi? Furu fu den e kon weri esi-esi. Kande den feni taki a hebi srefisrefi gi den fu du aladei sani. Iya, kande a hebi gi den fu go na datra, fu skrifi brifi, fu go seti papira tori, fu krin den oso, noso fu bori nyanyan. Fu di owrusma nofo tron no e firi so furu moro fu nyan noso dringi, meki den no e nyan noso dringi nofo. Te a abi fu du nanga na anbegi fu den, dan a srefi sani disi kan pasa. Kande den no e studeri Bijbel so furu moro, noso kande den no e go so furu moro na den konmakandra. Fu di den kon owru, meki a kan taki den no man leisi so furu moro, èn kande a kon muilek gi den fu arki a programa te den de na den konmakandra. Kande a hebi srefi gi den fu sreka densrefi fu go na den Kresten konmakandra. We dan, san trawan kan du fu yepi den owruwan disi?

Fa yu kan yepi den owruwan?

10. San owruman kan du fu sorgu taki den owruwan e kisi a yepi di den abi fanowdu?

¹⁰ Na ini furu gemeente, sma e sorgu na wan tumusi moi fasi gi den owruwan. Lobi-ati brada nanga sisa e go na wenkri gi den, den e bori gi den, èn den e krin den oso noso den dyari gi den. Den e yepi den owruwan fu studeri, fu sreka densrefi gi den konmakandra, èn fu tan teki prati na a diniwroko. Kotoigi di moro yongu e go nanga den te den musu go na spesrutu presi, èn den e tyari den go nanga wagi. Efu den owruwan no man komoto na oso, dan den brada e seti sani so taki den kan arki den konmakandra nanga yepi fu telefon, noso den e poti a programa na tapu cassette lolo gi den. Efu a kan, dan owruman e seti sani fu yepi den owruwan na ini a gemeente fu den. *

11. Fruteri fa wan famiri yepi wan owru brada.

¹¹ Ibri brada noso sisa kan sori switifasi gi den owruwan, èn den kan yepi den tu te den de na nowtu. Baka di a wefi fu wan owru brada dede, dan a no ben man pai yuru-oso moro, fu di a no ben e kisi a pensyun moni fu en wefi moro. En nanga en wefi ben studeri Bijbel nanga wan osofamiri di ben abi wan papa, wan mama, nanga tu tini umapikin. Den sma disi ben abi wan bigi oso. Den gi en tu kamra fu tan na ini. Den teki a brada disi leki den eigi famiri, èn tinafeifi yari langa den libi switi nanga makandra. Den yonguwan leri furu fu a brada disi fu di a ben abi wan tranga bribi èn sosrefi furu ondrofeni. Boiti dati, a brada disi ben kisi wini fu a demakandra di ben e gi en furu prisiri. Na owru brada disi tan libi drape te na a dede fu en, èn na a ten dati a ben abi 89 yari. Na osofamiri disi e taigi Gado tangi ete gi den furu blesi di den kisi fu di den ben abi demakandra nanga a brada disi. Den ’o feni den pai’ fu di den yepi wan disipel fu Yesus Krestes.—Mat. 10:42. *

12. San yu kan du fu sori taki yu abi furu warderi gi den owru brada nanga sisa fu yu?

¹² Kande yu no man yepi wan owru brada noso sisa na a fasi fa na osofamiri disi du dati. Ma kande yu kan yepi den fu go na den konmakandra noso fu teki prati na a preikiwroko. Yu kan kari den kon tu na yu oso, noso fu kon nanga yu te yu e go koiri. Yu kan go luku den, spesrutu te den siki noso te den no man komoto na oso. Boiti dati, ala ten yu musu hori na prakseri taki den na bigisma. Solanga den owru Kresten de nanga den krinkrin frustan, den musu kisi na okasi fu taki san den e denki te sma e teki bosroiti di abi fu du nanga den. Srefi den owrusma di no de nanga den krinkrin frustan moro, kan firi te sma abi lespeki gi den.

Yehovah no sa frigiti den wroko fu yu

13. Fu san ede a de prenspari fu hori den firi fu den owru Kresten na prakseri?

¹³ A de tumusi prenspari fu hori den firi fu  owrusma na prakseri. Son leisi owruwan e sari srefisrefi fu di den no man du ala den sani di den ben gwenti du di den ben moro yongu èn moro gosontu. Luku na eksempre fu wan sisa di ben dini Yehovah fayafaya sowan 50 yari langa. A sisa disi di ben de wan gewoon pionier fosi, kon siki èn a no ben makriki srefisrefi gi en fu go na den konmakandra. Di a ben e fruteri fa a no ben man du so furu moro na ini a diniwroko leki fosi, dan a bigin krei. A saka en ede, èn aladi en ai ben e lon watra, a taki: „A gersi leki mi no e du noti moro.”

14. Sortu deki-ati owru futuboi fu Yehovah e kisi fu den psalm?

¹⁴ Efu yu na wan owrusma, dan yu e sari tu taki yu no man du so furu moro leki fosi? Noso yu e firi son leisi leki Yehovah gowe libi yu? A kan taki a psalm skrifiman ben abi den srefi firi disi di a ben kon owru, fu di a ben begi Yehovah: „No trowe mi gowe na ini mi owru dei; leti na a ten di mi krakti e kon moro mendri, no gowe libi mi. Srefi teleki mi kon owru èn mi wiwiri kon weti, o Gado, no gowe libi mi” (Ps. 71:9, 18). A no de fu taki dati Yehovah no gowe libi a psalm skrifiman, èn A no sa gowe libi yu tu. Na ini wan tra psalm, David sori taki a ben abi a frutrow taki Gado ben o horibaka gi en. (Leisi Psalm 68:19.) Efu yu na wan owru Kresten di e dini Gado fayafaya, dan yu kan abi a dyaranti taki Yehovah de nanga yu, èn a sa tan horibaka gi yu ibri dei.

15. San kan yepi owruwan fu tan abi wan bun denki fu sani?

¹⁵ Yehovah noiti e frigiti san unu leki owru futuboi fu en du kaba èn e du now so taki a kan kisi glori. Bijbel e taki: „Gado no de onregtfardiki taki a sa frigiti den wroko fu unu èn taki a sa frigiti a lobi di unu sori gi a nen fu en” (Hebr. 6:10). Fu dati ede, un no musu denki taki Yehovah no abi unu fanowdu moro, soso fu di unu kon owru. A sani dati no tru. Na presi fu dati, du muiti fu denki fu sani di bun. Prakseri den blesi di unu e kisi, èn a howpu di unu abi gi a ten di e kon. Meki den sani dati gi yu prisiri! Wi abi „wan tamara èn wan howpu” di bun moro leki iniwan trawan, èn wi Mekiman e gi wi a dyaranti taki wi sa kisi den sani disi (Yer. 29:11, 12; Tori. 17:31; 1 Tim. 6:19). Prakseri a howpu di yu abi, du muiti fu tan abi wan bun denki fu sani, èn noiti no denki taki a gemeente no abi yu fanowdu! *

16. Fu san ede wan owru brada ben feni taki a no ben musu dini moro leki owruman, èn fa den tra owruman gi en deki-ati?

¹⁶ Luku na eksempre fu Johan. A brada disi di abi 80 yari, e sorgu ibri dei gi Sannie, a lobi wefi fu en di kon siki. * Ibri tron baka wan tra sisa e go tan nanga Sannie, so taki Johan kan go na den konmakandra èn na ini a preikiwroko. Ma no so langa pasa, Johan ben e firi leki a no ben man moro, èn a bigin prakseri fu no dini moro leki owruman na ini a gemeente. En ai ben furu nanga watra di a taki: „Fu san ede mi musu de wan owruman ete? Mi no e du noti moro na ini a gemeente.” Den tra owruman taigi en taki den e kisi furu wini fu na ondrofeni di a abi èn fu a fasi fa a e si sani. Den gi en deki-ati fu tan dini leki owruman, awansi a no man du furu. Fu di a sani disi gi Johan furu deki-ati, meki a e dini ete leki owruman, èn a de wan blesi gi a gemeente.

Yehovah e broko en ede trutru nanga den owruwan

17. Sortu dyaranti Bijbel e gi owru Kresten?

¹⁷ Bijbel e sori krin taki owruwan man tan go na fesi na ini na anbegi, aladi den e kisi fu du nanga den problema fu owrudei. A psalm skrifiman  ben taki: „Den wan di prani na ini na oso fu Yehovah . . . sa tan gi froktu te den ede-wiwiri kon weti, den sa fatu èn den sa moi doronomo” (Ps. 92:13, 14). Na apostel Paulus, di kande ben abi wan siki, ’no ben lasi-ati, srefi di a skin fu en ben e kon swaki moro nanga moro’.—Leisi 2 Korentesma 4:16-18.

18. Fu san ede owru brada nanga sisa, èn sosrefi den sma di e sorgu gi den abi a yepi fu trawan fanowdu?

¹⁸ Na eksempre fu furu Kresten na ini a ten disi, e sori taki owruwan man „tan gi froktu”. Ma te owruwan e siki, dan a sani dati kan gi den broko-ede, awansi den abi lobi-ati famiriman di e du ala san den man fu yepi den. Srefi den sma di e sorgu gi den owruwan disi kan kon weri. A gemeente abi a grani nanga a frantwortu fu du sani di e sori taki den lobi den owruwan èn sosrefi den wan di e sorgu gi den (Gal. 6:10). Te wi e yepi owruwan na a fasi dati, dan wi no e taigi den nomo fu go èn fu ’hori den skin waran, èn fu sorgu taki den nyan den bere furu’, ma wi e yepi den trutru.—Yak. 2:15-17.

19. Fu san ede tru Kresten di owru kaba kan abi a dyaranti taki sani sa waka bun na ini a ten di e kon?

¹⁹ Awansi owru Kresten no man du so furu moro leki fosi, toku dati no wani taki dati Yehovah no sa lobi den futuboi disi moro di e tan gi yesi na en. Tra fasi leki dati, ala den tru Kresten disi warti na ini na ini Gado ai, èn noiti a sa gowe libi den (Ps. 37:28; Yes. 46:4). Yehovah sa horibaka gi den èn a sa tiri den na ini den owrudei.—Ps. 48:14.

[Futuwortu]

Fa yu ben sa piki?

• Fu san ede yu e si owru Kresten di e dini Gado fayafaya, leki warti sma?

• Fa wi kan sori taki wi abi furu warderi gi den owru brada nanga sisa fu wi?

• San kan yepi owru futuboi fu Yehovah fu tan abi wan bun denki fu sani?

[Aksi fu a tori disi]

[Prenki na tapu bladzijde 18]

Den brada nanga sisa fu a gemeente abi bigi warderi gi den owruwan