Sorgu taki a trowlibi fu yu e tan leki „dri titei di frekti kon na wán”
Sorgu taki a trowlibi fu yu e tan leki „dri titei di frekti kon na wán”
„Dri titei di frekti kon na wán, no man hari koti na tu makriki.”—PREIK. 4:12.
1. Suma trow a fosi man nanga uma?
BAKA DI Yehovah Gado meki den bon nanga den meti, dan a meki a fosi man, Adam. Bakaten, Gado meki Adam fadon na ini wan dipi sribi, èn A gebroiki wan lebriki fu en fu meki wan volmaakti yepiman gi en. Di Adam si na uma, dan a taki: „Ai, disi na trutru bonyo fu mi bonyo èn skin fu mi skin” (Gen. 1:27; 2:18, 21-23). Yehovah ben e si en leki wan bun sani fu meki na uma disi, èn fu dati ede a trow den, èn a blesi den.—Gen. 1:28; 2:24.
2. Fa Satan tyari problema kon na ini a trowlibi fu Adam nanga Eva?
2 Ma a sari fu si taki a no ben teki langa fosi problema kon na ini a trowlibi di Gado ben seti. Fa so? Wan ogri yeye, di bakaten kisi a nen Satan, kori Eva. A meki a nyan fu a wan-enkri bon di den no ben mag nyan fu en. Syatu baka dati, Adam trangayesi Gado neleki en wefi, èn na so den opo densrefi teige Gado di abi a reti fu tiri den, èn di ben e gi den bun rai (Gen. 3:1-7). Di Yehovah aksi a trowpaar san den ben du, dan a ben de krin taki den ben abi problema kaba nanga makandra. Luku fa Adam krutu a wefi fu en: „Na a uma di yu gi mi, na en gi mi a froktu fu a bon, dan mi nyan.”—Gen. 3:11-13.
3. Sortu fowtu denki son Dyu ben kon abi?
3 Na ini den hondrohondro yari baka dati, Satan gebroiki difrenti triki fu pori a trowlibi fu sma. Fu eksempre, son leisi a gebroiki kerki fesiman fu leri sma sani di abi fu du nanga a trowlibi, aladi den sani dati no e kruderi nanga Bijbel. Wan tu Dyu fesiman no ben e lespeki den markitiki fu Gado, fu di den gi pasi taki masra ben e broko trow nanga a wefi fu den gi lawlaw sani. Fu eksempre, den ben e broko trow te a wefi fu den ben bori nanga tumusi furu sowtu. Ma Yesus ben taki: „Efu wan man broko trow nanga en wefi, ma a wefi no ben du hurudu, èn a man trow nanga wan tra uma, dan a du sutadu.”—Mat. 19:9.
4. Fa Satan e pruberi fu pori a trowlibi fu sma?
4 Satan e pruberi ete fu pori a trowlibi fu sma. Èn a de krin taki a abi bun bakapisi. Na ini a ten disi, man e trow nanga man, uma e trow nanga uma, sma e libi nanga makandra sondro fu trow, èn sma e broko trow fu lawlaw sani ede. (Leisi Hebrewsma 13:4.) San wi leki Kresten kan du fu sorgu taki wi no e kon abi a srefi fowtu denki di sma na ini a ten disi abi fu a trowlibi? Meki wi go luku san a wani taki fu abi wan koloku trowlibi.
Sorgu taki Yehovah e tan na ini a trowlibi fu yu
5. San den wortu „dri titei di frekti kon na wán” wani taki te a abi fu du nanga a trowlibi?
5 Efu wan trowpaar wani taki a trowlibi fu den waka bun, dan Yehovah musu de na ini a trowlibi fu den. A Wortu fu En e taki: „Dri titei di frekti kon na wán, no man hari koti na tu makriki” (Preik. 4:12). Den wortu „dri titei di frekti kon na wán” e prenki wan sani. Te a abi fu du nanga a trowlibi, dan a masra nanga a wefi na den tu titei di frekti kon na wán nanga a moro prenspari titei. A titei dati na Yehovah Gado. Te wan trowpaar abi wan bun matifasi nanga Gado, dan dati sa gi den a krakti fu horidoro te den abi problema. A sani disi sa yepi den tu fu de koloku trutru na ini a trowlibi.
6, 7. (a) San Kresten kan du fu sorgu taki Gado de na ini a trowlibi fu den? (b) San wan sisa lobi fu a masra fu en?
6 Ma san wan trowpaar kan du fu sorgu taki a trowlibi fu den e tan leki dri titei di frekti kon na wán? A psalm skrifiman David ben singi: „O mi Gado, mi lobi fu du a wani fu yu, èn a wet fu yu de na ini mi ati” (Ps. 40:8). A lobi di wi abi gi Gado e meki tu taki wi e dini en nanga wi heri ati. Sobun, ala tu patna musu lobi Yehovah nanga den heri ati, èn den musu lobi fu du a wani fu en. Trowpatna musu yepi makandra tu fu kisi moro lobi gi Gado.—Odo 27:17.
7 Efu a wet fu Gado trutru de na ini wi ati, dan wi sa sori taki wi abi bribi, howpu, nanga lobi. Den fasi disi sa yepi wi fu tan abi wan koloku trowlibi (1 Kor. 13:13). Wan Kresten di nen Sandra, trow 50 yari langa kaba. A sisa disi e taki: „San mi lobi fu a masra fu mi, na taki a e gi mi rai nanga yepi fu Bijbel, èn taki a lobi Yehovah moro leki a lobi mi.” Un masra, a wefi fu yu ben o taki a srefi sani disi fu yu?
8. San wan trowpaar musu du fu man kisi „wan bun paiman” na ini a trowlibi fu den?
8 Efu yu trow, dan yu nanga a patna fu yu e tan poti na anbegi fu unu èn a Kresten diniwroko na a fosi presi na ini un libi? Boiti dati, yu nanga a wefi fu yu e horibaka gi makandra na ini a diniwroko fu Yehovah? (Gen. 2:24). Koni Kownu Salomo ben skrifi: „Tu moro bun leki wán, bika den abi wan bun paiman gi a tranga wroko fu den” (Preik. 4:9). Iya, wan masra nanga en wefi musu du tranga muiti fu man kisi „wan bun paiman”. Dati wani taki dati den musu du muiti fu abi wan koloku trowlibi di e tan waka bun, fu di Gado e blesi a trowlibi dati.
9. (a) Sortu frantwortu masra abi? (b) Fa wan masra musu handri nanga a wefi fu en, soleki fa Kolosesma 3:19 e sori?
9 Wan sani di e sori efu Gado de na ini wan trowlibi, na a muiti di masra nanga wefi e meki fu libi na wan fasi di A feni bun. Masra abi a prenspari frantwortu fu sorgu gi na osofamiri fu den, èn den musu yepi na osofamiri fu den fu tan abi wan tranga bribi (1 Tim. 5:8). Den e kisi a deki-ati tu fu hori den firi fu a wefi fu den na prakseri. Kolosesma 3:19 e taki: „Un masra, tan lobi un wefi èn no abi bita-ati gi den.” Wan Bijbel sabiman ben tyari kon na krin taki te wan sma abi „bita-ati” gi a trowpatna fu en, dan dati wani taki dati „a e taigi en hati sani, a e naki en, a no e sori lobi gi en, a no e sorgu gi en, a no e kibri en gi ogri, èn a no e yepi en”. A de krin taki a no fiti te Kresten trowpatna e tyari densrefi na a fasi dati. Te wan masra e tyari a frantwortu fu en na wan lobi-ati fasi, dan a wefi fu en sa feni en moro makriki fu saka ensrefi na en ondro.
10. Sortu fasi Kresten wefi musu abi?
10 Kresten wefi di wani taki Yehovah tan na ini a trowlibi fu den, musu hori densrefi tu na den markitiki fu en. Na apostel Paulus ben skrifi: „Meki den wefi saka densrefi na den masra ondro neleki fa den e saka densrefi na Masra ondro, bika wan masra na a ede fu en wefi neleki fa Krestes na a ede tu fu a gemeente” (Ef. 5:22, 23). Satan kori Eva, fu di a lei gi en taki a ben o de koloku fu ala ten efu a ben o libi soleki fa ensrefi ben wani. Na ini a ten disi, a de krin taki furu trowpatna e libi soleki fa densrefi wani. Ma gi umasma di e si a trowlibi soleki fa Gado e si en, a no de wan hebi fu saka densrefi na ondro a masra fu den di e tyari a frantwortu fu en na wan lobi-ati fasi. Den e hori na prakseri taki Yehovah ben meki Eva fu de „wan yepi” gi a masra fu en. A no de fu taki dati Gado ben si a sani disi leki wan bun sani (Gen. 2:18). Wan Kresten wefi di de klariklari fu horibaka gi a seti dati, na trutru „wan kransi” gi a masra fu en.—Odo 12:4.
11. San yepi wan brada fu abi wan koloku trowlibi, soleki fa ensrefi e taki?
11 Wan tra sani di kan yepi wan trowpaar fu sorgu taki Gado e tan na ini a trowlibi fu den, na te den e studeri Gado Wortu makandra. Gerald, di abi wan koloku trowlibi 55 yari langa, e taki: „A moro prenspari reide fu san ede a trowlibi fu wi waka bun, na fu di wi e leisi èn e studeri Bijbel makandra.” A e taki moro fara: „Te trowpatna e du sani makandra, spesrutu sani di abi fu du nanga na anbegi fu den, dan dati e yepi den fu kon moro krosibei na makandra èn na Yehovah.” Te den sma na ini na osofamiri e studeri Bijbel makandra, dan dati e yepi den fu tan hori den markitiki fu Yehovah bun na prakseri. Boiti dati, a bribi fu den e kon moro tranga, èn den e tan go na fesi.
12, 13. (a) Fu san ede a de so prenspari taki trowpaar e begi makandra? (b) Sortu tra sani trowpaar kan du na ini a Kresten diniwroko fu meki a trowlibi fu den waka bun?
12 Trowpaar di abi wan koloku trowlibi e begi tu nanga makandra. Te wan masra ’e taki san de na tapu en ati’, fu di a e aksi Gado krin fu yepi en nanga en wefi na ini a situwâsi fu den, dan dati seiker sa yepi den fu kon abi wan moro koloku trowlibi (Ps. 62:8). Fu eksempre, baka te yu nanga a trowpatna fu yu begi na Almaktiwan fu yepi unu nanga den problema di unu abi, dan dati sa meki en moro makriki gi yu nanga yu patna fu frigiti iniwan kesekese di unu abi, a no so? (Mat. 6:14, 15) Fu di unu begi gi den sani dati, meki a ben o fiti te unu ala tu ben o du muiti fu yepi makandra èn fu „tan frudrage makandra èn gi makandra pardon nanga un heri ati” (Kol. 3:13). Hori na prakseri taki te yu e begi Gado, dan dati e sori taki yu e frutrow na en tapu. Kownu David ben taki: „Ala ai e luku go na yu fu di den e howpu tapu yu” (Ps. 145:15). Te wi e begi Gado nanga a howpu taki a sa yepi wi, dan wi no sa abi so furu broko-ede, fu di wi sabi taki ’a e broko en ede nanga wi’.—1 Petr. 5:7.
13 Ete wan prenspari fasi fa trowpatna kan sorgu taki Yehovah e tan na ini a trowlibi fu den, na te den e go na den gemeente konmakandra èn te den e wroko makandra na ini a diniwroko. Na den konmakandra fu wi, trowpaar e leri fa den musu kakafutu gi den „triki” di Satan e gebroiki fu tyari prati kon na ini osofamiri (Ef. 6:11). Èn wan masra nanga wan wefi di gwenti fu wroko makandra na ini a diniwroko e leri fu ’tanapu kánkan, èn fu no degedege’.—1 Kor. 15:58.
Te problema e opo kon
14. Sortu sani kan meki taki trowpatna e kisi problema na ini a trowlibi fu den?
14 A no de fu taki dati den rai di wi kisi te nanga now, a no nyun rai. Ma fu san ede yu no e taki fu den nanga a patna fu yu? Luku pe yu kan gebroiki den rai disi na ini a trowlibi fu yu. Ma Bijbel e sori taki srefi den wan di abi Gado na ini a trowlibi fu den, „o kisi banawtu na ini den libi” (1 Kor. 7:28). Fu di wi na sondusma, fu di na ogri grontapu disi kan abi krakti na wi tapu, èn fu di Didibri e suku fu kori wi, meki srefi futuboi fu Gado kan kisi bigi problema na ini a trowlibi fu den (2 Kor. 2:11). Ma Yehovah e yepi wi fu horidoro te wi e kisi fu du nanga den problema dati. Iya, wi man horidoro. A man Yob di ben e anbegi Gado nanga en heri ati, ben lasi ala den meti fu en, den futuboi fu en, èn sosrefi den pikin fu en. Ma toku Bijbel e taki: „Aladi den sani disi ben e pasa nanga Yob, toku a no sondu èn a no taki nowan ogri fu Gado.”—Yob 1:13-22.
15. Fa wan sma kan handri te a abi problema, èn san na a moro bun sani di trowpatna kan du te dati e pasa?
15 Ma a wefi fu Yob ben taigi en: „Yu e hori steifi ete na yu soifri retifasi? Fluku Gado èn dede!” (Yob 2:9) Iya, te bigi problema noso tra muilek situwâsi e opo kon, dan wan sma kan bruya, èn leki bakapisi fu dati, a kan handri sondro fu denki. A koniman e taki: „Soso kwinsi kan meki wan koniman du law sani” (Preik. 7:7). Efu a patna fu yu e taigi yu hati sani fu di a abi problema noso fu di a e kisi „kwinsi”, dan pruberi fu hori yusrefi. Te yu e taigi en hati sani baka, dan wan fu unu, noso un ala tu kan taki wan sani di kan meki a situwâsi kon moro ogri. (Leisi Psalm 37:8). Sobun, no mandi te yu patna e „taki sani sondro fu denki”, kande fu di a e bruya, noso fu di a e firi brokosaka.—Yob 6:3.
16. (a) San trowpatna kan leri fu den wortu fu Yesus di skrifi na Mateyus 7:1-5? (b) Fu san ede trowpatna no musu fruwakti tumusi furu fu makandra?
16 Trowpatna no musu fruwakti tumusi furu fu makandra. Kande wan trowpatna e si taki a patna fu en abi wan tu fruferi fasi. A ben kan denki taki a o man kenki a patna fu en. Te yu e sori lobi èn te yu abi pasensi, dan kande yu sa man yepi yu patna fu tyari kenki kon safrisafri. Ma no frigiti san Yesus ben taki fu wan sma di lobi fu poti prakseri na den pikinpikin fowtu fu wan trawan. A ben agersi a sma disi nanga wan sma di e si a „splentri” na ini na ai fu en brada, aladi a no e si a „postu” na ini en eigi ai. Yesus ben gi wi a rai disi: „No krutu sma moro, so taki trawan no krutu unu.” (Leisi Mateyus 7:1-5.) A sani disi no wani taki dati trowpatna no musu poti prakseri na den seryusu fowtu fu makandra. Robert di trow pikinmoro 40 yari kaba, ben taki: „Te trowpatna e taki krin nanga makandra èn te den de klariklari fu arki te a patna fu den e taigi den taki den abi wan fruferi fasi, dan a kan de fanowdu taki den e tyari wan tu kenki kon.” Sobun, no fruwakti tumusi furu fu makandra. Na presi taki yu de nomonomo taki yu patna musu kon abi spesrutu fasi, a ben o moro bun te yu e warderi den bun fasi di a abi nownow kaba, èn te yu lobi den fasi dati.—Preik. 9:9.
17, 18. Te wi abi furu problema, dan pe wi kan suku yepi?
17 Te den situwâsi na ini a libi e kenki, dan dati kan de wan tesi gi trowpatna. Wan trowpaar kan kisi tesi te den abi pikin. Wan trowpatna noso wan pikin kan kon siki seryusu. Kande trowpatna sa abi fu sorgu gi a papa nanga mama fu den di kon owru. Kande pikin di kon bigi kaba e go libi na wan farawe presi. Tra kenki kan kon te a masra e kisi frantwortu na ini a gemeente. Ala den kenki disi kan tyari problema nanga broko-ede kon na ini a trowlibi.
18 Efu yu feni taki den problema fu yu e gi yu so furu broko-ede taki yu no man moro, dan san yu kan du? (Odo 24:10) No lasi-ati! Satan ben o breiti srefisrefi te wan fu den futuboi fu Gado e drai baka gi a tru anbegi. Èn a ben o moro breiti srefi te wan trowpaar e du dati. Fu dati ede, du ala san yu man fu sorgu taki a trowlibi fu yu e tan leki dri titei di frekti kon na wán. Bijbel abi furu tori fu sma di tan gi yesi na Yehovah aladi den ben e kisi hebi tesi. Fu eksempre, wan leisi, David taigi Yehovah san ben de na tapu en ati. A ben taki: „Sori bun-ati gi mi, o mi Gado, bika libisma di man dede . . . e tan kwinsi mi” (Ps. 56:1). Oiti yu firi brokosaka fu di „libisma di man dede” e kwinsi yu? Efu yu e firi brokosaka fu di wan sma krosibei fu yu, noso wan tra sma e kwinsi yu, dan hori a sani disi na prakseri: David ben kisi a krakti fu horidoro, èn yu man du dati tu. David ben taki: „Mi ben aksi Yehovah, èn a ben piki mi, èn a puru mi na ini ala den nowtu fu mi.”—Ps. 34:4.
Moro blesi
19. Fa wi kan kakafutu gi Satan?
19 Na ini den lasti dei disi, trowpatna musu ’tan trowstu makandra èn den musu tan gi makandra deki-ati’ (1 Tes. 5:11). No frigiti taki Satan feni taki wi e dini Yehovah soso fu kisi wini gi wisrefi. A sa du iniwan sani fu meki wi drai baka gi Gado, iya, a sa pruberi tu fu pori a trowlibi fu wi. Fu man kakafutu gi Satan, dan wi musu poti ala wi frutrow tapu Yehovah (Odo 3:5, 6). Paulus ben skrifi: „Mi man du ala sani nanga yepi fu a sma di e gi mi krakti.”—Fil. 4:13.
20. Sortu blesi wan trowpaar e kisi te den abi Gado na ini a trowlibi fu den?
20 Wi sa kisi furu blesi te Gado de na ini a trowlibi fu wi. Na dati Joel nanga a wefi fu en ondrofeni. Den sma disi trow 51 yari kaba. Joel e taki: „Mi e taigi Yehovah tangi doronomo gi a wefi fu mi èn taki wi abi wan koloku trowlibi. A wefi fu mi na a yoisti patna gi mi.” Fa a du kon taki den abi so wan koloku trowlibi? „Wi meki muiti ala ten fu sori switifasi gi makandra, fu abi pasensi, èn fu lobi makandra.” Nowan fu wi sa du dati na wan volmaakti fasi na ini a ten disi. Ma meki wi du ala san wi man fu gi yesi na den rai di skrifi na ini Bijbel, èn meki wi sorgu tu taki Yehovah e tan na ini a trowlibi fu wi. Te wi e du dati, dan a trowlibi fu wi sa de leki „dri titei di frekti kon na wán [èn] di no man hari koti na tu makriki”.—Preik. 4:12.
Yu e memre disi ete?
• San a wani taki fu abi Yehovah na ini a trowlibi fu yu?
• San trowpatna musu du te den abi problema?
• Fa wi kan sabi efu Gado de na ini wan trowlibi?
[Aksi fu a tori disi]
[Prenki na tapu bladzijde 18]
Te trowpaar e begi nanga makandra, dan dati e yepi den fu horidoro te den de na ini problema