Teki na eksempre fu Yesus—Anbegi Gado na a fasi di a feni bun

Na wan lobi-ati fasi Gado e gi sma „fu ala kondre, lo, pipel, nanga tongo” a kari fu anbegi en (Openb. 7:9, 10; 15:3, 4). Den sma di e teki a kari disi kan „si fa Yehovah bun” (Ps. 27:4; 90:17). Neleki a psalm skrifiman, den e prèise Gado nanga wan tranga sten, èn den e taki: „Meki wi anbegi èn meki wi boigi wisrefi na gron; meki wi saka kindi na fesi Yehovah wi Mekiman.”—Ps. 95:6.

Anbegi di Gado e warderi trutru

Leki a wan-enkri gebore Manpikin fu Gado, Yesus ben abi furu okasi fu kon sabi fa en Tata e denki èn fu kon sabi den wet nanga den markitiki fu en. Dati meki Yesus ben kan sori trawan nanga overtoigi fa den musu anbegi Yehovah na a yoisti fasi. Yesus ben taki: „Mi na a pasi, a waarheid nanga a libi. Nowan sma kan kon na a Tata, efu mi no yepi en.”—Yoh. 1:14; 14:6.

A fasi fa Yesus ben e saka ensrefi na ondro en Tata, na a moro bun eksempre gi wi. Yesus ben taki: „Mi no e du san misrefi wani; ma mi e taki den sani disi soleki fa a Tata leri mi.” A ben taki moro fara: „Ala ten mi e du san e plisi en” (Yoh. 8:28, 29). Na sortu fasi Yesus ben e plisi en Tata?

Wan fasi fa a ben du dati, na taki a ben e gi yesi na en Tata nanga en heri ati. Fu taki en leti, dati na a fasi fa wan sma musu anbegi Gado. Yesus ben gi yesi na en Tata, noso a ben e du a  wani fu En, awinsi dati ben e tyari furu problema kon gi en. Na so fasi a sori taki a lobi en Tata trutru (Fil. 2:7, 8). Wan prenspari sani di Yesus ben e du na ini na anbegi fu en, na taki a ben e meki disipel. A ben e du a wroko disi so furu, taki sma di ben tron en bakaman èn sosrefi sma di no ben wani bribi den leri fu en, ben e kari en Leriman (Mat. 22:23, 24; Yoh. 3:2). Boiti dati, Yesus gebroiki furu fu en ten nanga en krakti fu yepi trawan. Fu di a ben e du so furu gi sma, meki a no ben abi furu ten gi ensrefi. Ma toku a ben de klariklari fu dini trawan (Mat. 14:13, 14; 20:28). Aladi Yesus ben abi furu fu du, toku ala ten a ben e meki ten fu taki nanga en hemel Tata na ini begi (Luk. 6:12). A no de fu taki dati Gado ben warderi a fasi fa Yesus anbegi en!

Wi musu meki tranga muiti fu plisi Gado

Yehovah ben e poti prakseri na a fasi fa en Manpikin ben tyari ensrefi. Yehovah sori en tu taki a ben feni en bun (Mat. 17:5). Ma Satan Didibri ben e si tu fa Yesus ben e gi yesi na Gado. Sobun, Satan du ala san a ben man fu pori a bribi fu Yesus. Fu san ede? Fu di nowan libisma ben gi yesi dorodoro na Gado ete, soleki fa Gado wani taki sma musu anbegi en. Èn na a anbegi dati a e frudini tu. Ma Didibri ben wani tapu Yesus fu anbegi Yehovah na a fasi fa sma musu anbegi En.—Openb. 4:11.

Fu di Satan ben wani pori a bribi fu Yesus, meki a tesi en. A tyari Yesus go na ’wan kefalek hei bergi èn a sori en ala den kownukondre fu grontapu nanga a moi fu den’. Baka dati a taki: „Mi o gi yu ala den sani disi efu yu boigi èn anbegi mi wan leisi nomo.” San Yesus du? A taki: „Gowe fu dya, Satan! Bika Gado Buku taki: ’Na Yehovah yu Gado, yu musu anbegi èn na en wawan yu musu dini’” (Mat. 4:8-10). Iya, Yesus ben frustan taki, efu a ben o boigi gi Satan, dan a ben o anbegi wan falsi gado. Yesus weigri fu boigi gi Satan, awinsi sortu wini a ben kan kisi. A ben wani anbegi Yehovah wawan, èn nowan tra sma.

Kande Satan no e pramisi fu gi wi ala den kownukondre fu grontapu nanga a moi fu den, efu wi anbegi en. Ma a e pruberi ete fu tapu Kresten fu anbegi Gado nanga den heri ati. Didibri wani taki wi musu anbegi wan tra sma, noso wan tra sani.—2 Kor. 4:4.

Krestes Yesus gi yesi na Gado te na dede. Fu di Yesus gi yesi na Yehovah dorodoro, meki a gi glori na En moro leki iniwan tra libisma. Na ini a ten disi, wi leki tru Kresten e meki muiti fu teki na eksempre fu Yesus. Wi e poti na anbegi fu wi Mekiman na a fosi presi. Iya, a bun matifasi di wi abi nanga Gado na a moro prenspari sani gi wi.

Den blesi di wi e kisi fu di wi e anbegi Gado na a fasi di a feni bun

Te wi e horibaka gi „na anbegi di krin èn di de sondro flaka” soleki fa Gado e si dati, dan wi  sa kisi furu blesi (Yak. 1:27). Fu eksempre, wi e libi na ini wan ten pe moro nanga moro sma ’lobi densrefi nomo, den lobi moni, den e denki tumusi furu fu densrefi’ èn den ’no lobi san bun’ (2 Tim. 3:1-5). Ma leki a pipel fu Gado, wi abi a grani fu abi demakandra nanga sma di e tyari densrefi na wan krin fasi èn na wan fasi di fiti. Boiti dati, den sma disi e meki muiti fu anbegi Gado na wan fasi di A feni bun. A sani disi e gi wi deki-ati, a no so?

Wan tra blesi di wi e kisi te wi e tan sondro flaka fu a grontapu disi, na taki wi sa abi wan krin konsensi. Fu di wi wani tan abi wan krin konsensi, meki wi e gi yesi na den regtfardiki gronprakseri fu Gado. Boiti dati, wi e gi yesi na den wet fu lanti, solanga den e kruderi nanga den wet fu Gado.—Mark. 12:17; Tori. 5:27-29.

Te wi e anbegi Gado nanga wi heri ati, dan wi sa kisi tra blesi tu. Te wi e meki ala muiti fu du a wani fu Gado na presi fu du san wi srefi wani, dan wi sa abi wan marki na ini wi libi, èn wi sa de koloku. Wi no sa de leki den sma di e taki: „Meki wi nyan èn meki wi dringi, bika tamara wi o dede.” Na presi fu dati, wi sa abi a trutru howpu fu libi fu têgo na ini wan paradijs na grontapu.—1 Kor. 15:32.

A buku Openbaring e taki fu wan ten te den wan di abi wan bun nen na Yehovah, sa „komoto na ini a bigi banawtu”. Openbaring e taki tu dati „a Sma di e sidon na tapu a kownusturu o bradi en tenti abra den” (Openb. 7:13-15). A sma di e sidon na tapu a kownusturu na Yehovah Gado, a moro hei Sma na hemel nanga grontapu. Prakseri fa yu o prisiri te a e gi yu wan switikon na ini a tenti fu en, pe a sa kibri yu so taki nowan ogri no miti yu! Èn nownowde kaba a e kibri wi èn a e sorgu gi wi.

Soleki fa a buku Openbaring e taki moro fara, dan ala sma di e anbegi Gado na wan yoisti fasi e go na „peti di abi watra di e gi libi”. Den peti disi e prenki den sani di Yehovah seti so taki wi kan kisi têgo libi. Iya, nanga yepi fu a frulusu ofrandi fu Krestes, „Gado o figi ala watra puru na den ai” (Openb. 7:17). Libisma no sa abi sondu moro, èn den wan di abi a howpu fu libi fu têgo na grontapu, sa prisiri srefisrefi. Srefi na ini a ten disi, koloku anbegiman fu Gado e bari fu prisiri. Iya, den e sori o furu warderi den abi gi en, èn den e anbegi Yehovah makandra nanga den wan na ini hemel di e singi: „Den sani di yu e du bigi èn den e fruwondru sma srefisrefi, Yehovah Gado na Almaktiwan. Yu di de Kownu fu têgo, e du sani na wan fasi di e sori taki yu de regtfardiki èn getrow. Yehovah, suma no sa frede yu trutru èn suma no sa gi yu nen glori? Bika yu wawan de loyaal! Bika ala den pipel o kon na yu fesi fu anbegi yu fu di den kon sabi den regtfardiki komando fu yu.”—Openb. 15:3, 4.

[Prenki na tapu bladzijde 27]

San Satan e pramisi fu gi wi efu wi anbegi en?