San yu o gi fu man kisi têgo libi?
San yu o gi fu man kisi têgo libi?
„San wan sma o gi fu kan kisi en libi baka?”—MAT. 16:26.
1. Fu san ede Yesus no ben agri srefisrefi nanga a sani di Petrus ben taigi en?
NA APOSTEL Petrus no ben man bribi san a ben yere. Yesus Krestes, a Leriman fu en di a ben lobi, ben „taigi den krin” taki heri esi A ben o pina hebi èn sma ben o kiri en. Dati meki Petrus piri-ai gi Yesus. A taigi en: „Masra, sorgu bun gi yusrefi; a sani disi no o miti yu kwetikweti.” A no de fu taki dati Petrus ben abi a bun fu Yesus na prakseri. Yesus drai en baka gi Petrus èn a luku den tra disipel. A kan taki den ben abi a srefi fowtu denki leki Petrus. Ne Yesus taigi Petrus: „Komoto na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki.”—Mark. 8:32, 33; Mat. 16:21-23.
2. San Yesus e fruwakti fu wan tru disipel?
2 Kande a sani di Yesus ben taki baka dati, yepi Petrus fu kon si fu san ede Yesus ben piri-ai gi en. Yesus ben „kari den sma nanga den disipel fu en kon na en” èn a taigi den: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn meki a tan waka na mi baka; bika a sma di wani kibri en libi, sa lasi en; ma a sma di e lasi en libi fu mi ede èn gi a bun nyunsu, o kibri en” (Mark. 8:34, 35). A de krin taki Yesus no ben o gi en libi nomo leki ofrandi. A ben e fruwakti tu taki den bakaman fu en ben o de klariklari fu gebroiki den libi fu dini Gado. Te den ben o du dati, dan den ben o kisi furu blesi.—Leisi Mateyus 16:27.
3. (a) Sortu aksi Yesus ben poti gi den arkiman fu en? (b) Sortu sani den arkiman fu Yesus ben prakseri kande, di a poti a di fu tu aksi gi den?
3 Na a srefi okasi dati, Yesus poti tu aksi di ben e hari a prakseri fu den sma di ben e arki en. A ben taki: „Sortu bun a e du wan sma efu a abi heri grontapu, ma a e lasi en libi?” A ben aksi tu: „San wan sma ben o gi fu kan kisi en libi baka?” (Mark. 8:36, 37) A makriki gi ala sma fu piki a fosi aksi. A no e tyari wini kon gi wan sma te a e kisi heri grontapu, ma a e lasi en libi. Na soso te wan sma de na libi, a man kisi wini fu den gudu fu en. Ma di Yesus ben aksi: „San wan sma ben o gi fu kan kisi en libi baka?”, dan a kan taki na aksi disi meki den arkiman memre a sani di Satan ben taki na ini a ten fu Yob. Satan ben taki: „Ala san wan libisma abi, a sa gi fu kibri en sili” (Yob 2:4). Kande a sani disi tru gi son sma di no e anbegi Yehovah. Furu sma ben o du iniwan sani, noso den ben o pasa iniwan wet, soso fu man tan na libi. Ma Kresten e denki tra fasi fu a tori disi.
4. Fu san ede den aksi fu Yesus prenspari srefisrefi gi Kresten?
4 Wi sabi taki Yesus no ben kon na grontapu fu gi wi wan bun gosontu, gudu, noso wan langa libi na ini a grontapu disi. A ben kon fu gi wi na okasi fu libi fu têgo na ini a nyun grontapu. A howpu dati prenspari srefisrefi gi wi (Yoh. 3:16). Gi wan Kresten a fosi aksi fu Yesus ben wani taki: „Sortu wini a e tyari kon gi wan sma fu kisi heri grontapu aladi a e lasi a howpu di a abi fu kisi têgo libi?” A sani disi no e tyari nowan enkri wini kon gi wan sma (1 Yoh. 2:15-17). Fu man gi piki tapu a di fu tu aksi di Yesus poti, dan wi ben kan aksi wisrefi: „Mi sa de klariklari fu du iniwan sani, fu man kisi têgo libi na ini a nyun grontapu?” Na a fasi fa wi e libi e sori dati, èn a e sori tu o tranga a howpu de di wi abi na ini wi ati.—Luku Yohanes 12:25.
5. Fa wi kan kisi a presenti fu têgo libi?
5 A no de fu taki dati Yesus no ben wani taki dati têgo libi na wan sani di sma abi reti na tapu. A libi na wan presenti, iya, srefi a syatu libi di wi abi na ini a sistema disi, na wan presenti. Wi no man bai libi, èn wi no man du noti fu kon abi reti na tapu. A wan-enkri fasi fa wi kan kisi a presenti fu têgo libi, na te wi „e bribi na ini Krestes Yesus” èn na ini Yehovah, a Sma di „sa pai den sma di e suku en fayafaya” (Gal. 2:16; Hebr. 11:6). Ma wi musu sori bribi nanga yepi fu den sani di wi e du, fu di „bribi sondro wroko dede” (Yak. 2:26). Dati meki te wi e poti moro prakseri na a aksi fu Yesus, dan a de prenspari fu luku sortu sani wi ben o wani libi na baka na ini a sistema disi. Wi musu luku tu san wi de klariklari fu du na ini a diniwroko fu Yehovah, fu sori taki a bribi fu wi no dede.
„Krestes no ben plisi ensrefi”
6. San ben de a moro prenspari sani gi Yesus?
6 Yesus no ben e poti prakseri na den sani di ben de fu kisi na ini a ten fu en. Na presi fu dati, a ben e poti prakseri na prenspari sani, èn a ben weigri fu feti baka gudu. A ben e libi soso fu dini Gado èn fu gi yesi na En. Yesus no plisi ensrefi, ma na presi fu dati, a taki: „Ala ten mi e du san e plisi [Gado]” (Yoh. 8:29). San Yesus ben de klariklari fu du fu di a ben wani plisi Gado?
7, 8. (a) Sortu sani Yesus ben de klariklari fu du, èn sortu pai a kisi? (b) Sortu sani wi musu aksi wisrefi?
7 Wan leisi, Yesus ben taigi den disipel fu en: „A Manpikin fu libisma no kon fu sma dini en, ma a kon fu dini sma èn fu gi en sili leki wan lusu-paiman fu frulusu furu sma” (Mat. 20:28). Wan pisi ten na fesi, Yesus bigin warskow den bakaman fu en taki heri esi a ben o abi fu „gi en libi”. Di a taki dati, dan Petrus gi en deki-ati fu sorgu bun gi ensrefi. Ma Yesus no kenki en prakseri. Leki wan sma di no ben abi sondu, a ben de klariklari fu gi a libi fu en gi a bun fu libisma. Fu di Yesus ben gi en libi fu a bun fu trawan, meki a ben abi a dyaranti taki sani ben o waka bun nanga en. A kisi wan opobaka èn „Gado gi en moro makti èn a meki a sidon na en reti-anu sei” (Tori. 2:32, 33). Na so Yesus kon tron wan tumusi bun eksempre gi wi.
8 Na apostel Paulus ben gi den Kresten na ini Rome a rai fu ’no plisi’ densrefi, èn a memre den taki „srefi Krestes no ben plisi ensrefi” (Rom. 15:1-3). Sobun, wi sa gi yesi dorodoro na a rai di wi kisi fu na apostel? Wi sa de klariklari fu du iniwan sani gi Yehovah, neleki fa Krestes ben du dati?
Yehovah wani taki wi musu du ala san wi man fu plisi en
9. San wan Kresten e du te a e gi ensrefi abra na Gado?
9 Na ini Israel fu owruten, a Wet di Gado ben gi Moses ben e taki dati den srafu fu den Hebrewsma ben musu kon fri na ini a di fu seibi yari di den ben e dini leki srafu, noso na ini a Yubelyari. Ma den srafu ben kan bosroiti fu du wan tra sani. Efu wan srafu ben kon lobi a masra fu en, dan a ben kan bosroiti fu tan dini en masra leki srafu en heri libi langa. (Leisi Deuteronomium 15:12, 16, 17.) Wi e teki wan srefi sortu bosroiti te wi e gi wisrefi abra na Gado. Wisrefi e bosroiti fu du a wani fu Gado, na presi fu du san wisrefi feni bun. Te wi e du dati, dan wi e sori taki wi lobi Yehovah nanga wi heri ati, èn taki wi e angri fu dini en fu têgo.
10. Fu san ede wi kan taki dati wi na fu Gado? Sortu krakti dati musu abi tapu a fasi fa wi e denki èn tapu a fasi fa wi e tyari wisrefi?
10 Efu yu e studeri Bijbel now nanga Yehovah Kotoigi, efu yu e teki prati na a preikiwroko, èn efu yu e go na den Kresten konmakandra, dan yu e du wan bun sani. Wi e howpu taki heri esi yu sa teki a bosroiti fu gi yusrefi abra na Yehovah èn taki yu sa taki a srefi sani disi di a man fu Etiopia ben taigi Filipus: „San e tapu mi fu dopu?” (Tori. 8:35, 36) Te yu e du dati, dan yu sa kon abi a srefi matifasi nanga Gado leki a di fu den Kresten fu Korente. Paulus ben skrifi gi den Kresten disi: „Unu no de fu unsrefi, bika Gado bai unu fu di a pai gi unu” (1 Kor. 6:19, 20). Efu wi gi wisrefi abra na Yehovah, dan wi na fu En, awansi wi abi a howpu fu libi na hemel noso na grontapu. Dati meki a prenspari srefisrefi taki wi e dwengi wisrefi fu no suku wi eigi bun, èn fu „no tron srafu fu libisma moro”! (1 Kor. 7:23) A de wan grani trutru fu de Yehovah en futuboi, èn taki a kan gebroiki wi soleki fa ensrefi feni bun!
11. Sortu ofrandi Kresten musu tyari? Èn soleki fa a Wet di Gado ben gi Moses ben sori, dan san dati wani taki trutru?
11 Paulus ben gi den Kresten brada nanga sisa fu en a rai disi: „Gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu sa man du santa diniwroko gi en nanga un frustan” (Rom. 12:1). Di den Dyu Kresten yere den wortu dati, dan kande den ben memre den ofrandi di den ben musu tyari na ini na anbegi fu den, di den no ben de bakaman ete fu Yesus. Den ben sabi san a Wet di Gado ben gi Moses ben e taki fu den meti di den ben e gi leki ofrandi na tapu na altari fu Yehovah. Den meti dati ben musu de den moro bunwan. Efu den no ben bun nofo, dan Gado no ben o teki den ofrandi dati (Mal. 1:8, 13) Na so a de tu te wi e gi wi skin leki „wan srakti-ofrandi di e libi”. Wi e gi Yehovah den moro bun sani di wi abi. Wi no e gi en san tan abra nomo baka te wi suku wi eigi bun fosi. Te wi e gi wisrefi abra na Gado, dan dati wani taki dati wi gi en wi „libi” nanga wi heri ati. Iya, wi e gebroiki wi krakti, wi gudu, nanga den koni fu wi fu dini en (Kol. 3:23). Fa wi kan du disi?
Gebroiki yu ten na wan koni fasi
12, 13. San na wán fasi fa wi kan gi Yehovah den moro bun sani di wi abi?
12 Wán fasi fa wi kan gi Yehovah den moro bun sani fu wi, na te wi e gebroiki wi ten na wan koni fasi. (Leisi Efeisesma 5:15, 16.) Fu man du disi, dan wi musu dwengi wisrefi. Fu di grontapu kan abi krakti na wi tapu èn fu di wi na sondusma, meki nofo tron wi wani gebroiki wi ten soso fu meki prisiri, noso fu wi eigi bun. A tru taki ’wan fasti ten de gi ala sani’. Iya, wan ten de fu meki prisiri, èn wan ten de fu du wi grontapuwroko so taki wi man tyari den Kresten frantwortu fu wi (Preik. 3:1). Ma wan Kresten di gi ensrefi abra na Gado musu sabi san na den moro prenspari sani, èn a musu gebroiki en ten na wan koni fasi.
13 Di Paulus ben go na Ateine, dan a si taki „ala den sma fu Ateine nanga den trakondre sma di ben kon tan wan pisi ten na ini a foto dati, ben gwenti fu fruteri tori èn fu arki nyun tori te den no ben abi noti fu du” (Tori. 17:21). Na ini a ten disi, furu sma e lasi den ten na wan srefi sortu fasi. Furu sma e gebroiki tumusi furu ten fu luku telefisi, fu prei video game, èn fu suku sani tapu Internet. Moro nanga moro sani de di kan hari wi prakseri so taki wi e lasi furu ten na den tapu. Te wi e gebroiki wi ten gi den sani dati, dan kande wi no sa abi ten moro fu kon leri sabi Yehovah moro bun. Kande wi sa bigin feni tu taki wi no abi ten gi „den moro prenspari sani”. Dati na den sani di abi fu du nanga a diniwroko fu Yehovah.—Fil. 1:9, 10.
14. Na sortu aksi wi musu poti seryusu prakseri?
14 Dati meki, efu yu na wan sma di gi ensrefi abra na Yehovah, dan aksi yusrefi a sani disi: „Mi e teki ten ibri dei fu leisi Bijbel, fu denki dipi fu den sani di mi e leri, èn fu begi Gado?” (Ps. 77:12; 119:97; 1 Tes. 5:17) „Mi e poti ten na wan sei fu sreka gi den Kresten konmakandra? Mi e gi piki na den konmakandra fu gi trawan deki-ati?” (Ps. 122:1; Hebr. 2:12) Gado Wortu e taki dati „wan heri pisi ten” Paulus nanga Barnabas „ben e taki sondro frede nanga den sma, fu di Yehovah ben gi den a makti fu du dati” (Tori. 14:3). Yu kan tyari wan tu kenki kon so taki yu kan gebroiki moro ten, iya, bun furu ten srefi, na ini a preikiwroko? Yu kan dini leki pionier?—Leisi Hebrewsma 13:15.
15. Fa owruman e gebroiki den ten na wan koni fasi?
15 Di na apostel Paulus nanga Barnabas ben go na a Kresten gemeente na ini Antiokia, dan „den tan wan heri pisi ten nanga den disipel” fu gi den deki-ati (Tori. 14:28). Na ini a ten disi, lobi-ati owruman e gebroiki furu fu den ten fu gi trawan deki-ati. Boiti taki owruman e go na ini a preikiwroko, den e wroko tranga fu tiri na ipi, den e go suku den skapu di lasi, den e yepi den sikiwan, èn den abi furu tra frantwortu na ini a gemeente. Efu yu na wan dopu brada, dan fu san ede yu no e du muiti fu doro den markitiki so taki yu kan kisi moro frantwortu na ini a gemeente?
16. Kari wan tu fasi fa wi kan „du bun gi . . . den wan di de na ini a srefi bribi leki wi”.
16 Furu sma ben e prisiri fu di den ben man yepi trawan di lasi furu sani fu di wan rampu ben pasa. Luku na eksempre fu wan sisa di abi sowan 65 yari èn di e dini na Bethel. Wan tu leisi, a sisa disi go na farawe presi fu go yepi sma di ben de na nowtu, fu di wan rampu ben miti den. Fu san ede a sisa disi e gebroiki en fakansi na a fasi disi? A e taki: „Aladi mi no kisi leri fu du spesrutu wroko, toku mi ben e si en leki wan grani taki mi ben mag du iniwan wroko di mi kisi. Di mi si a tranga bribi fu den brada nanga sisa di lasi so furu sani, dan mi kisi deki-ati trutru.” Boiti dati, dusundusun brada nanga sisa na heri grontapu e yepi bow Kownukondre zaal nanga Kongreshal. Te wi abi wan prati na den sani disi, dan wi no e suku wi eigi bun, ma wi e „du bun gi . . . den wan di de na ini a srefi bribi leki wi”.—Gal. 6:10.
„Mi sa de nanga unu ala dei”
17. San yu de klariklari fu du so taki yu kan kisi têgo libi?
17 Heri esi den sma di no e dini Gado sa kisi pori. Wi no sabi soifri o ten dati o pasa. Ma wi sabi taki „a ten di tan abra kon syatu”, èn taki „a komedi-prei fu grontapu e kenki”. (Leisi 1 Korentesma 7:29-31.) A sani disi e meki taki a di fu tu aksi di Yesus ben poti, e kon moro prenspari gi wi. A no de fu taki dati wi sa du ala san Yehovah e aksi fu wi, so taki wi kan kisi „a trutru libi” (1 Tim. 6:19). Fu tru, a de tumusi prenspari fu gi yesi na a rai di Yesus gi wi fu ’tan waka na en baka’ èn fu ’suku a kownukondre fosi’.—Mat. 6:31-33; 24:13.
18. Sortu frutrow wi kan abi, èn fu san ede?
18 A tru taki a no makriki ala ten fu waka baka Yesus. Èn soleki fa Yesus ben warskow wi, son brada nanga sisa na ini a ten disi lasi den libi fu di den ben e waka na en baka. Ma awansi dati de so, toku wi e teki na eksempre fu Yesus. Iya, wi sa tan waka na en baka awansi wi e kisi tesi. Wi e bribi na ini a dyaranti di a gi den salfu bakaman fu en fu a fosi yarihondro. A ben taki: „Mi sa de nanga unu ala dei te na a kaba fu a grontapu sistema” (Mat. 28:20). Fu dati ede, meki wi gebroiki wi ten nanga wi krakti so furu leki wi man na ini a santa diniwroko fu wi. Na so wi e sori taki wi abi a frutrow taki Yehovah sa kibri wi na a ten fu a bigi banawtu, noso taki a sa gi wi libi baka na ini a nyun grontapu (Hebr. 6:10). Te wi e du ala den sani disi, dan wi sa sori taki wi abi furu warderi gi a libi di wi kisi.
San yu ben o piki?
• Fa Yesus sori taki a ben de klariklari trutru fu dini Gado nanga libisma?
• Fu san ede wan sma no musu teri ensrefi moro, èn fa a e du dati?
• Sortu ofrandi Yehovah ben wani fu den Israelsma fu owruten, èn san wi e leri fu a tori dati?
• Fa wi kan gebroiki wi ten na wan koni fasi?
[Aksi fu a tori disi]
[Prenki na tapu bladzijde 26]
Ala ten Yesus ben e du den sani di e plisi Gado
[Prenki na tapu bladzijde 28]
Den Israelsma di ben abi warderi gi den sani di Gado du gi den, ben du ala san den ben man fu horibaka gi a tru anbegi
[Prenki na tapu bladzijde 29]
Te wi e gebroiki wi ten na wan bun fasi, dan wi e plisi Gado