Yehovah e piki wan fayafaya begi

„So taki sma kan sabi taki yu, di nen Yehovah, yu wawan na a Moro Heiwan fu heri grontapu.”—PS. 83:18.

1, 2. San furu sma ondrofeni? San wi kan aksi wisrefi?

WAN tu yari pasa, wan uma ben e firi brokosaka srefisrefi, fu di wan sari sani ben pasa na ini a birti fu en. Fu di na uma disi gebore na ini wan Lomsu famiri, meki a go suku yepi na a priester fu a kontren dati. Ma a priester no ben wani taki srefi nanga en. Sobun, na uma disi begi Gado: „Mi no sabi yu . . . , ma mi sabi taki yu de. Grantangi, yepi mi fu kon sabi yu!” Wan syatu pisi ten baka dati, Yehovah Kotoigi kon na a uma disi en oso èn den trowstu en. Boiti dati, den fruteri en den sani di a ben wani sabi. Den leri en furu sani. Wán fu den sani di den leri en, na taki Gado abi wan nen, èn a nen dati na Yehovah. Di a kon sabi a sani dati, dan dati naki en ati trutru. A taki: „Yu sabi taki disi na a Gado di mi ben e angri fu kon sabi sensi mi ben pikin?”

² Furu sma ondrofeni wan srefi sortu sani. Furu fu den ben si a nen Yehovah fu a fosi leisi, di den leisi Psalm 83:18. Na ini a Nyun Grontapu-vertaling, a vers disi e taki: „So taki sma kan sabi taki yu, di nen Yehovah, yu wawan na a Moro Heiwan fu heri grontapu.” Ma oiti yu aksi yusrefi fu san ede a psalm skrifiman ben skrifi Psalm 83? Sortu sani ben o meki taki ala sma ben o abi fu agri taki Yehovah na a wan-enkri tru Gado? San wi kan leri fu a psalm disi? Na ini na artikel disi, wi sa poti prakseri na den aksi disi. *

Den e span anu makandra fu puru a pipel fu Yehovah na pasi

3, 4. Suma skrifi Psalm 83, èn san tra pipel ben wani du nanga a pipel fu Gado?

³ Den wortu na a bigin fu Psalm 83 e sori taki a psalm disi na „wan psalm fu Asaf”. A kan taki a skrifiman fu a psalm disi ben de wan bakapikin fu Asaf di ben de wan Leifisma. Asaf ben de wan prenspari pokuman na a ten fu Kownu David. Na ini a psalm, a skrifiman e begi Yehovah fu du wan sani fu sori taki na En abi a reti fu tiri hemel nanga grontapu, so taki sma e kon sabi a nen fu En. A musu de so taki a psalm disi skrifi baka di Salomo dede. Fu san ede wi kan taki dati? Fu di na a ten fu Kownu David nanga Kownu Salomo, a kownu fu Tirus no ben de wan feanti fu Israel. Ma na a ten di Psalm 83 skrifi, den sma fu Tirus ben drai baka gi Israel, èn den ben teki a sei fu den feanti fu en.

⁴ A psalm skrifiman e kari tin pipel di ben e span anu makandra fu puru a pipel fu Gado na pasi. Den feanti dati ben e libi na ini a kontren lontu Israel. Disi na den pipel: „Den tenti fu Edom nanga den Ismaelsma, Moab nanga den  Hagritsma, Gebal, Amon, Amalek, Filistea, èn sosrefi den sma fu Tirus. Asiria srefi go horibaka tu gi den; den yepi den manpikin fu Lot ”(Ps. 83:6-8). Fu sortu sani a psalm disi e taki? Son sma e taki dati a psalm disi e taki fu a feti di a pipel fu Amon, Moab, nanga den sma fu Seir-bergi go feti nanga a pipel fu Israel. A sani disi ben pasa na ini a ten fu Yosafat (2 Kron. 20:1-26). Tra sma e bribi taki a psalm disi e taki fu den problema di Israel ben gwenti abi nanga den pipel di ben e libi na en lontu.

5. Fa Kresten na ini a ten disi e kisi wini fu Psalm 83?

⁵ Awinsi fa a no fa, a de krin taki na Yehovah Gado meki sma skrifi Psalm 83. A psalm disi skrifi na a ten di sma ben wani du ogri nanga a pipel fu en. Na ini a ten disi, Psalm 83 e gi den futuboi fu Gado deki-ati tu. Den futuboi disi kisi frufolgu ibri tron baka, fu di feanti de nomonomo fu puru den na pasi. A no de fu taki dati a psalm disi sa gi wi deki-ati tu na ini a ten di e kon, te Gog fu Magog nanga den legre fu en sa kon na wán fu a lasti leisi fu kiri ala den wan di e dini Gado nanga yeye èn nanga waarheid.—Leisi Esekièl 38:2, 8, 9, 16.

Wan tumusi prenspari sani

6, 7. (a) Gi sortu sani a psalm skrifiman e begi na a bigin fu Psalm 83? (b) San ben de den moro prenspari sani gi a psalm skrifiman?

⁶ Te a psalm skrifiman e begi Yehovah, dan a e taigi en san de na tapu en ati. A e taki: „O Gado, no tan tiri fu yu sei; no tan tapu yu mofo, èn no tan pî, o  Gado. Bika luku! Den feanti fu yu e meki dyugudyugu; èn den wan di abi bita-ati gi yu e sutu den ede kon na loktu. Na wan triki fasi den e taki den kibritori fu den, fu du ogri nanga a pipel fu yu . . . Bika na ini den ati, alamala agri nanga makandra; den meki srefi wan frubontu teige yu.”—Ps. 83:1-3, 5.

⁷ San ben de a moro prenspari sani di ben e gi a psalm skrifiman broko-ede? A no de fu taki dati a psalm skrifiman ben e broko en ede srefisrefi nanga en eigi libi èn nanga a di fu en osofamiri. Ma den moro prenspari sani di ben e gi en broko-ede, na a porinen di sma ben gi Yehovah èn na ogri di sma ben wani du nanga a pipel di ben e tyari a nen dati. Neleki a psalm skrifiman, wi alamala musu hori na prakseri san na den moro prenspari sani, aladi wi e horidoro na ini den muilek lasti dei fu na owru sistema disi.—Leisi Mateyus 6:9, 10.

8. Fu san ede den pipel ben e span anu makandra teige Israel?

⁸ Luku san a psalm skrifiman e skrifi fu sori san den feanti fu Israel taki: „Kon, meki wi puru den na pasi krinkrin, so taki den no de wan pipel moro, èn so taki nowan sma kan memre a nen fu Israel moro” (Ps. 83:4). Den pipel disi trutru ben abi bita-ati gi a pipel fu Gado! Ma ete wan reide ben de fu san ede den ben span anu makandra teige a pipel fu Gado. Den ben wani a kondre fu Israel, èn den ben e meki bigi na a fasi disi: „Meki wi teki den tanpresi fu Gado abra gi wisrefi” (Ps. 83:12). Wan srefi sortu sani pasa tu na ini a ten disi? Iya!

„Yu santa tanpresi”

9, 10. (a) San ben de a santa tanpresi fu Gado na ini owruten? (b) Sortu blesi a salfu fikapisi nanga den „tra skapu” e kisi na ini a ten disi?

⁹ Na ini owruten, sma ben e kari a Pramisi Kondre, a santa tanpresi fu Gado. Yu sabi a singi ete di den Israelsma ben singi, baka di Gado ben puru den na ini katibo na Egepte? Den ben e singi: „Fu di yu lobi du bun, meki yu frulusu a pipel èn yu tyari den gowe. Nanga a krakti fu yu, yu o tyari den go na yu santa tanpresi” (Ex. 15:13). Bakaten, a „tanpresi” dati kon abi a tempel nanga den priester èn sosrefi wan mamafoto, Yerusalem. Drape kownu di ben komoto fu a famirilin fu David ben e sidon na tapu a kownusturu fu Yehovah (1 Kron. 29:23). Dati meki a ben fiti taki Yesus kari Yerusalem „a foto fu a bigi Kownu”.—Mat. 5:35.

¹⁰ Fa a de na ini a ten disi? Na ini a yari 33, Yehovah teki wan nyun pipel di nen „na Israel fu Gado” (Gal. 6:16). Den memre fu a pipel dati na salfu brada fu Yesus Krestes, èn den gi kotoigi fu a nen fu Gado. A trutru Israel no ben du dati (Yes. 43:10; 1 Petr. 2:9). Yehovah pramisi den salfuwan disi a srefi sani di a ben pramisi Israel  fu owruten. Yehovah ben taki: „Mi sa de a Gado fu den, èn den sa de a pipel fu mi” (2 Kor. 6:16; Lef. 26:12). Na ini 1919, Yehovah ben feni a fikapisi fu „na Israel fu Gado” bun. Leki bakapisi fu dati, den teki wan „kondre” abra pe den ben kan teki prati na a anbegi fu den. Na agersi kondre disi na a yeye paradijs (Yes. 66:8). Sensi 1930, milyunmilyun „tra skapu” bigin horibaka gi den (Yoh. 10:16). Yehovah e blesi den Kresten disi bogobogo, èn disi e sori krin taki na En abi a reti fu tiri hemel nanga grontapu. (Leisi Psalm 91:1, 2.) A sani disi e gi Satan bigi atibron!

11. San den feanti fu Gado e suku fu du nomonomo?

¹¹ Na ini a pisi ten fu a kaba, Satan sutu faya gi den bakaman fu en na grontapu fu gens a salfu fikapisi nanga den tra skapu di e horibaka gi den. A sani dati pasa na ini West-Europa, na a ten fu a Nazi tirimakti, èn sosrefi na ini Owstu-Europa, na a ten di a Communist tiri ben de na ini Rosiakondre. A sani disi pasa tu na ini furu tra kondre, èn a o pasa baka spesrutu te Gog fu Magog o kon feti fu a lasti leisi nanga a pipel fu Gado. Te dati o pasa, dan a kan taki gridi gensman sa teki den gudu fu a pipel fu Gado abra, soleki fa den feanti fu den ben gwenti du na ini a ten di pasa. Ma a moro prenspari sani di Satan suku fu du ala ten, na fu tyari prati kon na wi mindri, so taki sma no sa memre a nen moro di wi leki Yehovah Kotoigi e tyari. Fa Yehovah sa handri nanga den sma di no wani si en leki a wan di abi a reti fu tiri hemel nanga grontapu? Meki wi go luku baka san a psalm skrifiman e taki.

Eksempre di e sori taki Yehovah na a winiman

12-14. A psalm skrifiman e taki fu tu prenspari feti di den Israelsma ben wini. Sortu feti na dati?

¹² Luku a tranga bribi di a psalm skrifiman ben abi taki Yehovah ben o man tapu den pipel fu du ogri nanga Israel. A e taki fu tu feti di Israel ben wini krosibei fu na owruten foto Megido di ben abi wan lagipresi. A lagipresi disi ben nen Megido tu. Na ini a waran pisi ten fu a yari, a drei gron fu a Kison-liba di ben e meki furu boktu, ben de fu si na ini a lagipresi. Ma baka te alen ben fadon na ini a kowru pisi ten fu a yari, dan a watra fu a liba ben e sungu a lagipresi. Kande na fu dati ede meki Bijbel e kari a liba disi sosrefi „a liba fu Megido”.—Krut. 4:13; 5:19.

¹³ Sowan 15 kilometer abrasei fu a lagipresi Megido, a pikin Morei-bergi de. Na a ten fu Krutuman Gideon, den srudati fu den Midiansma, fu den Amalèksma, nanga den di fu den sma fu na Owstusei, bondru kon na wán fu kon feti nanga a pipel fu Gado (Krut. 7:1, 12). Te fu kaba, a pikin legre fu Gideon ben kon abi 300 srudati nomo. Ma fu di Yehovah yepi den, meki den ben wini a bigi grupu srudati fu den feanti fu den. Fa dati pasa? Soleki fa Gado ben taigi den, den lontu den kampu fu den feanti fu den na neti. Den ben e tyari watrakan, èn na inisei fu den watrakan disi den ben kibri frambo di ben leti. Di Gideon gi a komando, dan den srudati fu en naki den watrakan broko, èn wantronso den frambo na ini den watrakan disi ben kon de fu si. Na a srefi ten, den bro na tapu den tutu fu den èn den bari: „A feti na fu Yehovah nanga Gideon!” Den srudati fu den feanti kon bruya, èn den bigin kiri makandra. Den wan di ben tan na libi lowe go na abrasei fu Yordan-liba. Na a srefi ten, moro Israelsma bigin lon na den feanti baka. Ala nanga ala, den kiri 120.000 srudati fu den feanti fu den.—Krut. 7:19-25; 8:10.

¹⁴ Sowan siksi kilometer moro fara fu a pikin Morei-bergi, abrasei fu a lagipresi Megido, a Tabor-bergi de. Wan pisi ten na fesi, Krutuman Barak  ben tyari 10.000 srudati fu Israel kon na wán drape, fu feti nanga a legre fu Kownu Yabin fu Hasor. A kownu disi ben de wan Kanansma. A legre-edeman fu en ben nen Sisera. A legre disi fu Kanan ben abi 900 fetiwagi. Den fetiwagi disi ben abi langa srapu isri nefi na den banti. Den srudati fu Israel no ben abi kefalek fetisani, èn di den kon makandra na tapu Tabor-bergi, dan a legre fu Sisera go na ini a lagipresi, fu di den ben denki taki den ben o man wini Israel. Ne „Yehovah bruya Sisera, nanga ala den srudati di ben e rèi den fetiwagi fu en èn a bruya a heri legre fu en tu”. Soleki fa a sori, dan wan bigi alen fadon wantronso, èn a meki a watra fu a Kison-liba kren pasa a syoro. A sani disi meki taki den fetiwagi fu den srudati saka go na ini a tokotoko. Den Israelsma kiri a heri legre.—Krut. 4:13-16; 5:19-21.

15. (a) San a psalm skrifiman e begi Yehovah fu du? (b) Na san a nen fu a lasti feti fu Gado e memre wi?

¹⁵ A psalm skrifiman e begi Yehovah fu du wan srefi sortu sani nanga den pipel di ben e suku fu puru Israel na pasi na ini a ten fu en. A e begi: „Du nanga den soleki fa yu du nanga Midian, nanga Sisera, èn nanga Yabin na a Kison-lagipresi. Na den dede na Endor; den kon tron mest gi a gron” (Ps. 83:9, 10). A moi fu sabi taki a lasti feti di Gado sa feti nanga a grontapu fu Satan, nen Har–Magedon („Bergi fu Megido”), noso Armagedon. A nen dati e meki wi prakseri den prenspari feti di ben feti krosibei fu Megido. Fu di Yehovah wini den feti dati fu owruten, meki wi kan abi a dyaranti taki a sa wini a feti tu na Armagedon.—Openb. 16:13-16.

Begi taki a nen fu Yehovah e kon santa

16. Fa den gensman fu Yehovah „kisi syen” na ini a ten disi?

¹⁶ Na ini den „lasti dei” disi, Yehovah tapu pasi gi ala sma di pruberi fu puru a pipel fu en na pasi (2 Tim. 3:1). Leki bakapisi fu dati, den gensman fu a pipel fu en kisi syen. Luku fa Psalm 83:16 ben taki a sani disi na fesi: „Meki den kisi syen, so taki sma e suku fu kon sabi yu nen, o Yehovah.” Na ini furu difrenti kondre, den gensman fu Gado no ben abi bun bakapisi kwetikweti di den pruberi fu tapu a wroko fu Yehovah Kotoigi. Na ini den kondre dati, den anbegiman fu a wan-enkri tru Gado tanapu kánkan, èn den horidoro. A sani disi ben de leki wan kotoigi gi reti-atisma, èn furu fu den ’suku fu kon sabi a nen fu Yehovah’. Na ini furu kondre pe tirimakti ben frufolgu Yehovah Kotoigi na wan ogri-ati fasi fosi, dusundusun koloku sma, srefi hondrohondro dusun fu den e prèise Yehovah. A sani disi e sori krin taki Yehovah na a winiman! Èn den feanti fu en kisi bigi syen fu tru!—Leisi Yeremia 1:19.

17. Sortu muilek situwâsi o miti libisma, èn sortu wortu wi sa memre heri esi?

¹⁷ Ma wi sabi taki a feti no kaba ete. Èn wi e tan preiki a bun nyunsu. Wi e preiki en srefi gi sma di e gens wi (Mat. 24:14, 21). Den gensman dati abi na okasi now fu sori berow so taki den kan kisi frulusu. Ma heri esi, den no sa abi na okasi dati moro. Yehovah en nen musu kon santa, èn a sani dati prenspari omeni tron moro a frulusu di libisma kan kisi. (Leisi Esekièl 38:23.) Te den pipel fu heri grontapu bondru kon na wán fu pruberi fu kiri a pipel fu Gado, dan wi sa memre den wortu disi fu a begi fu a psalm skrifiman: „O meki den kisi syen èn meki den kon bruya fu ala ten, meki den kon fruleigi èn meki den lasi gowe.”—Ps. 83:17.

18, 19. (a) San o pasa nanga den gensman fu Yehovah di e weigri fu si en leki a Sma di abi a reti fu tiri hemel nanga grontapu? (b) San yu musu du now di Yehovah sa sori fu a lasti leisi taki na en abi a reti fu tiri hemel nanga grontapu?

 ¹⁸ Den gensman di e weigri fu si Yehovah leki a Sma di abi a reti fu tiri hemel nanga grontapu, sa kon na wan kaba na wan syen fasi. Gado Wortu e sori taki den wan di „no e gi yesi na a bun nyunsu”, sa kisi „pori fu têgo”. Na fu a sani dati ede den sa kisi pori na ini Armagedon (2 Tes. 1:7-9). Te den sma disi kisi pori, èn te den wan di e anbegi Gado na ini waarheid sa kisi frulusu, dan dati sa sori krin taki Yehovah na a wan-enkri tru Gado. Na ini a nyun grontapu, sma noiti no sa frigiti taki Yehovah na a bigi winiman. ’Den regtfardikiwan nanga den onregtfardikiwan di sa kisi wan opobaka’, sa kon sabi sortu bigi sani Yehovah du (Tori. 24:15). Na ini a nyun grontapu, den sa si krin taki a de wan koni sani te sma e saka densrefi na ondro Yehovah, a Sma di abi a reti fu tiri hemel nanga grontapu. Èn heri esi den safri-atisma na den mindri, sa kisi na overtoigi taki Yehovah na a wan-enkri tru Gado.

¹⁹ A no de fu taki dati wi lobi-ati hemel Tata sreka wan tumusi moi ten gi den anbegiman fu en di e dini en nanga den heri ati. A sani disi no e gi yu deki-ati fu begi Yehovah fu gi wan lasti piki heri esi tapu a begi fu a psalm skrifiman? A psalm skrifiman ben begi: „Meki [den feanti fu yu] kon fruleigi èn meki den lasi gowe; so taki sma kan sabi taki yu, di nen Yehovah, yu wawan na a Moro Heiwan fu heri grontapu.”—Ps. 83:17, 18.

[Futuwortu]

Yu kan tyari disi kon na krin?

• Sortu situwâsi ben miti Israel na a ten di Psalm 83 ben skrifi?

• San ben de a moro prenspari sani di ben e gi a skrifiman fu Psalm 83 broko-ede?

• Suma Satan e frufolgu na ini a ten disi?

• Fa Yehovah sa gi wan lasti piki tapu a begi na ini Psalm 83:18?

[Aksi fu a tori disi]

[Karta na tapu bladzijde 15]

(Luku a tijdschrift)

Fa den feti di feti krosibei fu Megido fu owruten, abi fu du nanga a ten di e kon?

Kison-liba

Haroset

Karmel-bergi

Yisreèl-lagipresi

Megido

Tanak

Gilboa-bergi

Peti fu Harod

Morei-bergi

Endor

Tabor-bergi

Se fu Galilea

Yordan-liba

[Prenki na tapu bladzijde 12]

Fu san ede wan psalm skrifiman ben skrifi wan fayafaya begi?